Hindi na napigilan ni Gemima ang tukso na mahiga sandali sa sofa. Sobrang antok na niya talaga,pagbibigyan niya sandali ang hinihinge ng kanyang katawan.Ilang sandali pa nga, nahulog na sa malalim na pagkakatulog ang dalaga,kasabay ng isang kakatwang panaginip.
Naglalakad siya sa magubat na lugar. Palingon-lingon pa siya habang naglalakad na nakayapak. May naririnig kasi siyang parang tambol at kasabay nito ang isang awit na hindi niya mawawaan.
Huminto siya sandali upang mapakinggan mabuti ang naririnig na ingay. Wala din siyang maaninag sa kanyang paligid dahil sa makapal na usok na hindi niya malaman kung saan nagmumula. Mula sa malayo may nakikita siyang kumikisap-kisap na parang galing sa ilawan. Habang tumatagal ay palakas ng palakas ang naririnig niyang parang tambol at hindi maintidihan na kinakanta.
Naghanap siya ng mapagtataguan dahil patungo sa direksyon niya ang mga nakikita na sa tingin niya ay mga tao. Nakapagtago siya sa isang malaking puno. Habang dumadaan sa kanyang harapan,nabistahan niya ang mga itsura nito. Sa unahan ay mga kalalakihan na nakabahag,may nakasabit na maliit na tambol sa mga leeg,saka salitan na pinapalo ng dalawang kamay.
Sumunod ang ilang kababaihan na ang tanging nakasaplot sa pang-ibabang bahagi ay mahabang sarong. Mga kwintas naman na gawa sa beads ang tumatakip sa mga dibdib ng mga ito. At lahat sila ay may guhit na pinturang kulay puti at pula sa mukha. Sa hulihan ay ang tingin niyang pinuno ng mga ito,isang matanda na may mahabang puting buhok. Nakadamit ito ng mahaba,hindi katulad ng iba na ang tanging maselan na bahagi lamang ang natatakpan.
Tingin ba niya sa mga ito ay may parada. Ang nasa hulihan ay ang babae na nakagapos ang dalawang kamay sa likod. Nang dumaan sa harapan niya, biglang nagtama ang kanilang mga paningin. Naaninag niya sa mga mata nito ang pagmamakaawa na tulungan niya. Nang makalampas ang mga ito, parang wala sa sarili na napasunod nalang siya sa mga ito.
Hindi niya alam kung gaano katagal ang ginawa niyang lihim na pagsunod sa mga ito nang may distansiya. Lumampas na sila sa magubat na parte,ang nilalakaran nila ngayon ay mabato at matarik na daan.
Tumigil siya sandali nang mapuna na tila papasok ang mga ito sa isang malaking yungib sa ilalim ng lupa. Gusto na niyang itigil ang pagsunod ngunit lumingon sa direksyon niya ang babae kanina na parang nabasa ang laman ng kanyang isipan.Tila pinapahiwatig ng mga titig nito na magpatuloy siya sa pagsunod sa kanila.
Hindi niya tiyak kung gaano na siya katagal sa pagsunod sa mga ito. Naramdaman niyang tila pababa na ang kanilang dinadaanan. Kahit nakakaramdam na ng pagod, parang may sariling isip ang kanyang mga paa sa patuloy na paghakbang pasunod sa mga ito.
Hanggang sa tumigil ang mga ito,agad siyang nagkubli upang hindi makita ng mga ito. Mula sa kanyang pinagtataguan kita niya ang buong nagaganap. Habang hawak ng dalawang lalaki ang babaeng nakagapos, dalawang babae ang lumapit dito. Ang isa ay may hawak na maliit na bote,ang isang babae ay tinanggal ang pagakakatali dito habang hawak parin ng dalawang lalaki. Nang matapos makalagan,ang babaeng may tangan na boteng sisidlan ay may binuhos na tila langis sa buong katawan ng babae.
Nang matapos ang ginawa ng dalawang babae,agad din lumayo ang mga ito. Habang ang lahat ng nasa paligid ay tila lalong nagsasaya. Mula kung saan,lumabas ang apat na lalaki na may buhat-buhat na malaking banga. Biglang bumilis ang tibok ng puso ni Gemima nang masilayan ito. Parang pamilyar sa kanya ang tangan ng mga ito na malaking banga. Bago pa niya maisip kung saan ito nakita. Naririnig niyang nagwawala ang babae. Nahihimigan niya dito ang takot at pagtutol sa gustong gawin sa kanya.
Hindi niya maunawaan ang salitang ginagamit ng babae ngunit parang nauunawaan ng kanyang isip ang mga pinagsasabi nito. Lumapit ang matandang lalaki na may mahabang puting buhok sa babae. Kagaya ng salita ng babae,ang lengguwaheng ginamit ay iba din pero nauunawaan ng isip niya.
Inutusan nito ang dalawang lalaki na hawakang mabuti ito. May isang babae na lumapit at pilit na binuka ang bibig nito at ibinuhos ang laman ng hawak nitong sisidlan. Lalong nagkaingay ang lahat ng tao sa paligid nila.
Nakita ni Gemima na biglang lumangayngay ang ulo ng babae. Binuhat ito ng dalawang lalaki na may hawak dito. Inihiga sa malaking bato. May mga lumapit dito na mga kababaihan,binalot ng puting tela ang buong katawan ng babae.
Sa panghihilakbot ni Gemima mula sa pinagkukublihan,nakita niyang lumapit muli ang matandang lalaki na may hawak na malaking itak. Pinagputol-putol nito ang mga bahagi ng katawan ng babae. Tinutop niya ang bibig upang hindi makagawa ng ingay at iniiwas ang mga mata upang hindi tuluyan maduwal.
Nang ibalik niya ang tingin sa mga ito,nakita niyang ang mga putol-putol na bahagi ng katawan ay inilalagay sa malaking banga. Ang mga tao ay nagpatirapa at waring umuusal ng dasal. Ang matandang lalaki ay may maliit na brush na hawak na parang may iginuguhit sa katawan ng malaking banga.
Biglang lumingon sa kanya ang matandang lalaki. Halos lumundag na ang puso niya palabas sa sobrang kaba. Maging ang ibang naroroon ay napatingin narin sa direksyon niya. Parang itinulos siya sa kanyang kinatatayuan. Sari-saring kaisipan narin ang pumapasok sa utak niya na maaring mangyari sa kanya. Gusto niyang tumakbo ngunit hindi niya maikilos ang buong katawan niya.
"Gemima! Gemima! Gising!"
Pakiramdam ba niya lumilindol. Hindi rin niya magawang ikilos ang buong katawan niya. May naririnig siyang boses na tumatawag sa pangalan niya.Patuloy parin ang tila pag galaw ng paligid.
Isang singhap ang namutawi sa kanya. Napabangon siyang bigla sa hinihigaan. Nagtataka pa siya kung bakit nasa kanyang tabi si Mitche.
"Hay buti naman nagising kana. Kanina pa kita ginigising,nadatnan kitang umuungol na para kang nananaginip," anito sa kanya.
Sumandal siya sa mahabang sofa kung saan siyan nakatulog. Tumingin lang siya sa kaibigan.
"Teka nga lang..." Paalam sandali ni Mitche,pagbalik may dala na itong bote ng mineral water. Agad niyang kinuha ng iabot sa kanya at halos mangalahati ng tunggain niya.
"Ano bang napanaginipan mo? " curious nitong tanong.
"Ewan ko...hindi ko na masyadong tanda eh,pero nakakatakot ang panaginip ko," nasabi nalang niya.
Napabuntong hininga na lamang si Mitche bago muling nagsalita," hindi kaya nagkaroon ka ng phobia dahil sa nangyari sa'yo?"
Umiling siya," sa tingin ko walang kinalaman ang nangyari sa bahay ang pagkakaroon ko ng masamang panaginip. Normal lang na nananaginip ang isang tao." Paliwanag niya dito.
"Eh hindi lang basta panaginip ang nangyari sa'yo,para kang binabangungot na kanina."
"Ayos na 'ko. Wala lang 'to." Tumayo na siya at tinungo ang swivel chair at doon naupo saka muling ibinalik ang tingin kay Mitche.
"Marami ba tayong customer ngayon?" pag-iiba niya ng usapan.
"Wala naman gaano. Pero kanina bumalik ulit iyong babaeng naghahanap ng banga. Tinatanong niya kung meron nadaw ba tayo. Inaalok ko nga ng iba pero banga talaga ang gusto niya." Buong sabi nito.
Napataas ang kilay niya. Naalala ang babaeng minsan nang nagpunta sa kanilang shop, "nakuha mo ba ang buong pangalan niya?" tanong niya dito.
May iniabot itong tarheta sa kanya,kinuha niya ito at binasa ng may kalakasan ang pangalan na nakalagay.
"Elaine Brambilla?" saka niya ibinalik ang nagtatanong na mata sa kaharap," pamilyar sa akin ang surname niya."
"Talaga?"
Bigla niyang naalala ang nagpadala ng malaking banga para sa kanyang ama.
"Ano kaya ang connection niya kay Cynthia Brambilla,ang nagpadala ng banga kay Daddy?"
"Baka nagkataon lang na parehas sila ng apelyido," tugon ni Mitche
Hindi siya sumagot,iba ang kutob niya.
"May iba kapa bang naiisip?" tanong ng babae ng hindi siya umimik.
"Wala pa sa ngayon. Nagtataka lang ako,saka napaka coincidence naman kasi na ang babaeng iyon ay naghahanap ng banga sa shop natin. Bumalik pa talaga siya,puwede naman sa ibang antique shop siya maghanap. At bakit ka-surname pa niya ang Cynthia Brambilla na iyon." Litanya niya. Napatango-tango naman si Mitche at napaisip nadin.
"Kailangan kong makausap si Mommy." Final niyang sabi.
MAGkaharap naman sa isang coffee shop si Xander at si SPO2 Marvin Reyes,ang may hawak ng kaso sa panloloob sa bahay ni Gemima.
Nakatitig padin sa kaharap si Xander,hindi lubos maisip kung anong magiging reaksyon niya sa mga isiniwalat nito.
"Alam kong mahirap paniwalaan pare pero iyan mismo ang sinabi nung lalaki na nanloob sa bahay ni Miss Dizon. " ani ni SPO2 Marvin Reyes.
"Halang ang mga kaluluwa ng mga taong iyon, maliit na bagay nalang sa kanila ang paghahabi ng kwento. Gusto lang niya makalusot sa kaso."
"Sana nga pare. Pero nagmamakaawa siyang huwag na siyang palabasin. May inako din siyang mga ibang krimen na ginawa para hindi na daw siya makalabas ng kulungan. Ang weird diba? At isa pa habang sinasalaysay niya ang pangyayari ng gabing iyon,kita mo ang takot sa mga mata niya. " Mahabang litanya nito.
"Pulis ka pare,dapat hindi ka nagpapaniwala sa mag ganyan. Mas malalim na imbestigasyon dapat ang gawin mo," sabi niya sa mabuway na salita.
"Ginagawa namin iyan pare. Pero hindi dapat natin alisin ang ilang posibilidad. Kahit makabago na ang panahon natin,mahiwaga parin ang mundo. Marami tayong hindi alam."
Napakunot naman ang kanyang noo sa mga sinabi nito. Hindi niya inaasahan na maririnig ito dito. Hind na siya nakapagsalita ng tumunog ang cellphone nito. Sandaling nagpaalam ito sa kanya,lumayo at saka sinagot ang tawag. Binalingan naman niya ang kape na nasa harapan niya saka sumimsim habang ang mga mata ay nasa lalaki. Kaya naman nakita niya bigla nag pagrehistro ng pagkabigla sa mukha nito. Ilang sandali pa itong nakipag-usap sa cellphone bago ini-off at bumalik sa lamesa nila.
"May problema ba pare?" tanong niya dito.
Bumuntong hininga muna ito bago mataman na tumitig sa kanya.
"Si Gardo patay na. Iyong lalaking nanloob sa bahay ni Miss Dizon. Sabi ng kausap ko nagwala kanina,kung ano-ano daw ang sinasabi. Pinagpipilitan na nasundan siya ng halimaw sa banga. Nang agaw ng baril kaya napilitan silang paputukan ito." Buong sabi nito.
Nanlumo naman siya sa nalaman. Hindi alam kung anong isasagot sa nangyari. Nang hindi siya sumagot, muling nagsalita ang lalaki.
"Sarado na ang kaso."
Napatitig nalang siya sa kaharap. Tama ito. Kailangan niyang makausap si Gemima para ipaalam ang nangyari.