Hindi tumigil si Ka Ipeng na magmatyag kay Alice mula sa malayo. Naging sutil ito lalo na sa mga kapwa mag-aaral. Napag-alaman niya sa guro na dating tahimik at mabait na bata si Alice kaya labis silang nagtaka sa pagbabago ng ugali nito.
Kinilabutan din siya nang minsang may nakaaway ito. Lumingon ang bata sa kanya at nginisian siya ng nakaloloko. Sigurado na siya ngayon na hindi na si Alice ang may kontrol sa sarili niyang katawan kundi ang diablo!
Minatyagan niya ang bata sa pagbabakasakaling bumalik ang batang si Alice sa katawan nito. Hanggang dumating na ang pagkakataong nakita niyang balisa ang bata. Doon niya nakumpirmang lumalaban pa rin si Alice. Hindi pa ito tuluyang nasakop ng dyablo. Sinamantala niya ang pagkakataong lapitan ang bata. Umaasa siyang naroon pa rin ito sa sariling katawan at hindi pa natatangay ng diablo.
"Alice!" pagtawag niya rito. Nakita niyang umaliwalas ang mukha nito ngunit agad ring nagbago. Nagkaroon ng pag-aalinlangan kung lalapit ba o iiwas na lang. Sa huli ay nakayukong sinubukan niyang lumihis ng daan. Mabilis namang lumapit sa kanya ang matanda.
"Alice, sorry kung hindi kita kaagad natulungan. Ngayon ay handa na ako, lalakasan ko na ang loob ko para sa 'yo. Kaya lang naman ako tumanggi noon kasi ayaw kong matulad ka sa anak ko! Napatay ko ang anak ko habang pinapalayas ang demonyong sumapi sa kanya. Ayaw kong magaya ka sa anak ko, Alice. Ayaw kong may batang mamatay muli ng dahil sa akin pero naisip kong mas lalo kang manganganib kung hindi ako tutulong. Alice, pinapangako kong hindi kita pababayaan tulad ng nangyari sa anak ko. Kung nabubuhay si Cindy ay natitiyak kong gugustuhin niyang tulungan kita."
Nakita niya ang pag-aliwalas ng mukha ng bata. Muli itong nagkaroon ng pag-asa. Ang mga mata ay tila ba iiyak na bago mahigpit na yumakap sa kanya.
"Ka Ipeng, tulungan mo ako!" Humahagulgol na sambit na nito habang nakasubsob sa bewang niya ang mukha. Marahan siyang lumuhod upang magpantay sila bago niya niyakap ang bata na halatang labis ang nadaramang takot.
"Anong nangyari, Alice?" bulong niya sa bata ng magkalas ang pagkakayakap nila.
"Ka Ipeng, natatakot ako," pabulong na sambit nito. Tila ba natatakot na may makarinig sa kanila.
"Natutuwa ako dahil lumalaban ka pa. Buo na ang pasya kong tutulungan ka." Bumakas ang tuwa sa mukha ni Alice. Nagkaroon ng pag-asa ang mga mata nitong hilam sa luha.
"Sa-salamat Ka Ipeng." May kinuhang maliit na notebook ang bata sa bag nito. Mukhang diary iyon kaya agad niyang tinanggap nang iabot nito sa kanya.
"Basahin n'yo po ito. Kailangan ko nang umalis," nagmamadaling lumayo si Alice. Sinundan niya ng tingin ang bata at nakitang sinusundo na pala ito ni Alicia. Lalong nagkaroon ng kakaibang kutob si Ka Ipeng lalo na ng maalala niya kung ano ang tawag ni Alice sa ina nito. 'Mama' habang ang pilyang si Alice ay 'Mommy'.
Nang makauwi ay kaagad siyang pumasok sa kwarto. Naroon na ang kanyang asawa at natutulog. Naupo siya sa tabi ng mesa at binuksan ang lampshade bago binuklat ang diary. Lahat ng hiwaga sa isipan niya ay nasagot nang matapos niyang basahin lahat. Hindi siya makapaniwalang kayang gawin ni Alicia ang ganoon sa musmos na bata!
Ang nilalaman ng diary:
October 28, 1986
Nalaman ko ngayong araw na ito ang buong katotohanan. Nakita ko sa lihim na silid si Mama Alicia ang sikretong kanyang itinatago. Pinagbabawalan niya akong pumasok sa silid na iyon dahil sa sikretong pilit niyang tinatago. Nasilip ko iyon dala ng pangungulit ni Lilith. Narinig at nakita ko kung paano niya kausapin ang larawan doon ng isang batang babae na tinitirikan niya ng dalawang itim na kandila. 
'Malapit ko ng maisalin sa katawan ni Alice ang kaluluwa mo, anak' iyon ang narinig kong sinabi niya. Kaya pala ako inampon ni Mama mula sa bahay ampunan dahil gusto niyang buhayin sa katawan ko si Alice na tunay niyang anak. Kapareho ko pa ang pangalan niya at tulad ko ay singkit rin ang mga mata. Nalilito ako sa ginagawa ni Mama pero isa lang ang naging malinaw sa akin. Kapag nabuhay si Alice na anak niya ay mawawala na ako sa mundo. Ang katawan ko ay aangkinin na ng kanyang anak. Wala talagang nagmamahal sa akin! May kumupkop man sa akin ngunit katawan ko lang ang gusto niya at hindi ako. Iniwan ako ng mga totoo kong magulang sa bahay ampunan noong baby ako ayon kay mother Superior, walang umampon sa akin hanggang sa tumuntong sa edad na sampu. Akala ko may magmamahal na sa akin sa katauhan ni Mama Alice ngunit nagkamali ako. Hindi niya ako mahal! Tama si Lilith, walang nagmamahal sa akin!
"Diyos na mahabagin!" bulalas ni Ka ipeng matapos basahin ang nakasulat sa diary. Marahan niyang itiniklop ang diary ng bata. Si Lilith! Ang tusong diablo na dati nang sumakop sa katawan ni Cindy!
"Bakit, Ipeng?" Naalimpungatang sambit ni Delia. Marahan itong bumangon at nagtatakang nakatingin sa asawa na ngayon ay mababakas sa mukha ang labis na pagkabahala.
"Nanganganib si Alice sa kamay ni Alicia!" bulalas niya na ikinalito ni Delia.
"Pa-paano nangyari iyon? Anak niya si Alice!" giit ng babae na hindi makapaniwala.
"Ang Alice na anak niya ay malaon ng patay, Delia! Nais niya itong buhayin sa katawan ng Alice na inampon niya! Gusto niyang ipasok ang kaluluwa ng bata sa katawan ni Alice!" Paliwanag ng lalaki. Napaantanda naman si Delia sa rebelasyong sinabi ng asawa.
"Susmaryosep, Ipeng! Kaawa-awang Alice," sambit ng babae. Bakas sa mukha ng ginang ang takot. Hindi pa man niya nakakaharap ang batang si Alice ay ramdam na niya ang malasakit dito. Kapareho nito ang naging sitwasyon ng kanyang anak noon kaya naman hangga't maaari ay gusto niyang mailigtas ang buhay ng batang si Alice.
"Ngunit hindi presensiya ng isang namatay na tao ang nararamdaman kong gustong umangkin sa bata, Delia. Hindi presensiya ng multo, bagkus ay diyablo!" nanlalaki ang mga matang bulalas ni Ka Ipeng. Ngayon niya lubos na naunawaan ang lahat!
"Diyos na mahabagin! Iligtas mo ang kaawa-awang bata!" naluluhang sambit naman ng ginang. "Ipeng, humingi ka ng tulong sa Diyos. Siya lamang ang tanging makakatulong sa bata!"
"Maaaring nilinlang lang ng dyablo si Alicia. Nabubulagan siya sa labis na pangungulila sa kanyang anak," malungkot na sambit ni Ipeng. Gusto niyang maawa sa babae ngunit mali ang ginagawa nito! Nagtawag ito ng demonyong mapanlinlang! "Tama ka, Delia, kailangan kong ilapit ito sa Diyos. Hindi ko na uulitin pa ang kamaliang ginawa ko noon... Hindi na, Dehlia."
"Tulungan mo si Alice, Ipeng. Ilapit mo na ito kay father Ben at natititak kong papatnubayan kayo ng Diyos." Bakas sa mukha ni Delia ang saya nang sa wakas ay magtiwalang muli ang asawa niya sa Diyos. Noon ay naging mapagmataas ito sa Diyos at inakalang lahat ay kaya niyang solusyunan. Subalit ngayon ay nakikita niyang muli ang pagpapakumbaba ng kanyang asawa. Hindi lamang si Alice ang natutulungan ni Ka Ipeng dahil tinutulungan din siya ng bata upang magbalik sa dati ang kanilang buhay. Magiging daan iyon upang makalaya na sa pait ng nakaraan si Ipeng.
"Bukas na bukas din ay kakausapin ko si Father Ben at maghanda ka Delia dahil hindi magiging madali ang lahat."
"Si Alicia, Ipeng. Ramdam ko ang pinagdaraanan niya. Kung nilinlang siya ng diyablo ay maaaring nasa panganib din ang kan'yang buhay."
"'Siya ang dahilan ng lahat, Delia! Siya ang puno't dulo ng lahat ng ito!" galit na sambit nito. Maaaring nakipagkasundo si Alicia sa dyablo kaya kahit malakas si Alice ay naipapasailalim siya ng itim na kapangyarihan na si Alicia mismo ang may gawa!
"Isa lamang siyang inang nangungulila. Maanong tawagin mo ang kaluluwa ng kan'yang anak at kausapin. Maaaring magbago pa ang kan'yang ina." bulalas ni Delia. Saglit na natigilan si Ka Ipeng bago naluluhang nilingon ang asawa. Napakapalad niyang ito ang naging kabiyak. Napakabuti ng puso nito.
"Tama ka, Delia. Sige, iyan ang gagawin ko. Salamat dahil nananatili ka pa rin sa akin sa kabila ng lahat," maemosyong sambit niya. Nilapitan niya ang asawa at mahigpit na niyakap bago mabilis na hinagkan sa mga labi. "Mahal na mahal kita, Delia."
"Kinamuhian kita noon Ipeng ngunit nagliwanag na ang aking isipan, pareho lang tayong nawalan ng anak. Isa pa'y hindi gugustuhin ni Cindy kung tayo'y maghihiwalay. Mahal na mahal din kita, asawa ko." Gumanti ito sa mga yakap niya kaya naman mas lumakas ang kanyang loob na harapin ang nakaambang panganib.
Hinaplos ang puso niya sa sinabi ng asawa kaya titiyakin niyang maililigtas din niya si Alicia. Hindi pa huli ang lahat para magbago ang babae. Gagawin niya ang lahat upang matulungan si Alice na hindi niya nagawa para sa kanyang anak.