"Welcome to Balesin Island!"
Nakaspread pa ang arms niya habang sinabi niya ‘yon. Akala mo siya yung taga-bantay dito o may-ari para sabihin niya ‘yan. Nagplano nga sila na pumunta kami rito para makapag-relax daw sila. Akala mo naman busy sila, eh puro nga sila punta sa Rainbow Escape!
"Akin na itong gamit mo, mahal," Kinuha na ni Edvin ang mga gamit ko at nauna na roon sa pagtutuluyan namin. Sumunod na rin ‘yong iba at naiwan kami ni Green dito.
Nakita kong kinukuha ni Green ‘yong mga gamit nila sa sasakyan niya kaya nilapitan ko ito, "Tulungan na kita," Prisenta ko sa kaniya.
"Huwag na," Pagtanggi niya kaya tumingin ulit ako sa dagat.
Ang ganda ng ulap ngayon. Makaka-relax talaga ako rito at kakalimutan ang pangamba. Hindi muna ako mag-iisip ng kung ano ano. Buti na lang sabi nina mama na sila na raw muna magbabantay ng Rainbow Escape. Mag-enjoy daw ako kasi kailangan ko raw ‘yon. Masyado na raw akong stress sa mga nangyari last week kaya magpahinga raw muna ako.
Napabuntong hininga ako habang nakatingin sa dagat. Ilang araw din kami rito sa Balesin Island. Hindi na rin muna raw sila papasok sa mga trabaho nila para kaming magbabakasyon dito. Okay lang naman kasi maganda rin dito. Dito talaga ako pupunta kapag kailangan kong mag-relax!
"Ang ganda noh?" Napaigtad ako sa gulat dahil nasa tabi ko na pala si Green. Wala siyang hawak na mga bag baka siguro nilagay niya na roon sa lugar kung saan kami magi-stay. Matagal na ata akong nakatayo rito at hinayaan lang nila ako. Natawa naman siya noong nakita niyang nagulat ako sa pagsalita niya. "Natatandaan ko noong pumunta tayo rito sa panaginip natin. Ang daming nangyaring hindi maganda rito sa panaginip," Napailing na lang siya kasi naalala niya ‘yong panaginip namin.
"Akala ko talaga sa inyo itong Balesin Island," Natatawang sabi ko sa kaniya at natawa rin siya.
"Gulat nga ako noong naisip ko ‘yon. Biglang pagmamay-ari pala namin ito. Ang alam ko hindi sa amin ito tapos biglang nag-iba sa panaginip natin," Natatawang kwento nito.
"Ang daming masaya at malungkot na nangyari rito sa panaginip natin," Nakangiting saad ko habang nakatingin sa dagat. Inakbayan ako ni Green kaya napatingin ako sa kaniya. "Kapag ikaw nakita ni Edvin, baka masuntok ka na talaga niya."
Natawa naman siya sa sinabi ko pero hindi pa rin inaalis ang pagkakaakbay sa akin, "Ang sweet natin dito sa panaginip natin. Hindi ko aakalain na magiging ganoon talaga tayo."
"Noong nakita kita sa hospital noong kakalabas ko lang, nagulat talaga ako nun. Hindi ko aakalain na makikita kita roon. Hindi pa ako nakaka-recover sa panaginip ko tapos biglang makikita ko kayo sa harapan ko," Kwento ko sa kaniya.
Tinanggal niya ang pagkakaakbay sa akin, nilagay niya ang dalawang kamay niya sa bulsa ng pantalon niya at tumingin din sa dagat, "Noong kakagising ko lang, nagulat din ako kasi hindi ko inaasahan na ganoon ang mangyayari. May girlfriend ako sa totoong buhay tapos sa panaginip ko ay iba ‘yong babaeng mahal ko. Ang sweet ko pa sa kaibigan ng girlfriend ko sa panaginip ko kaya para akong nag-cheat sa kaniya. Kinuwento ko ‘yon sa kaniya lahat. Sinabi ko na ang sweet at clingy ako sayo sa panaginip natin. Naiintindihan naman niya kasi panaginip ‘yon eh. Hindi natin hawak kung anong magiging panaginip nagin," Mahabang kwento nito.
"Maintindihin si Adaly noh? Kaya siguro nahulog ka sa kaniya," Pagbibiro ko sa kaniya.
"Sobra," Nakangiting sagot niya. "Kaya ang swerte ko sa kaniya. Noong kinuwento ko sa kaniya agad na naghalikan tayo, akala ko magagalit siya o magseselos sayo pero hindi. Sabi niya okay lang kasi gusto ko lang tumulong sayo para malaman mo kung ano bang nararamdaman mo kay Edvin. Sa sobrang takot ko, sinabi ko agad sa kaniya noong pagkatapos kitang ihatid sa bahay niyo."
Maswerte sila sa isa't isa kasi parehas din silang maintindihin. Hindi ko lang inalam ang ugali ni Green noong pinakilala ni Adaly sa amin na boyfriend niya ito kasi natuon ang atensyon ko kay Edvin noong gabing ‘yon.
"Mahal na mahal ko siya," Proud niyang sabi kaya napangiti ako.
Nasa tamang tao ang kaibigan ko.
"Sa panaginip natin, nagseselos si Adaly sa akin dahil kay Edvin. Pero sa totoong buhay pala, ako pala ang magseselos sa kaniya!" Natatawang sabi ko sa kaniya.
Tumingin sa akin si Green at natawa, "Gwapo naman pala ni Edvin!"
"Ikaw din naman, ah?!" Tinaasan ko siya ng isang kilay. "Nahulog ako sayo sa panaginip natin tapos may girlfriend ka pala sa totoong buhay!"
"Ako lang ‘to," Mayabang na sabi niya at pumosing pa siya na akala mo pinipicturan siya. Napailing na lang ako sa ginawa niya. Pinapakita niya pa muscle niya habang seryoso ang mukha niya.
"Pero seryoso..." Napatingin ulit ako sa kaniya at nakangiti siyang nakatingin sa akin. "Masaya ako dahil okay na kayo ni Edvin. Okay na tayong lahat. Alam mo na ‘yang nararamdaman mo sa kaniya. Naalala mo na rin ‘yong nangyari sa bar. Umamin na kayo sa isa't isa. May isa na lang kulang."
Napakunot ang noo ko sa sinabi niya, "Ano naman?"
"Relationship. Wala pa kayong label."
Napakurap ako ng dalawang beses sa sinabi niya. Tama nga naman siya. Wala pa kaming label. Hindi pa kami. Napaisip ako sa sinabi niya kasi alam ko hindi nanliligaw si Edvin sa akin. Paano ko siya sasagutin, diba?
"Nago-overthink ka na naman ba?" Ngumiti ako ng tipid sa kaniya. "Iwasan mo na ‘yang pago-overthink mo. Alam kong hindi maiiwasan pero hindi maganda ‘yong palagi kang mago-overthink. Kailangan mong magtiwala kay Edvin lalo na kapag may relasyon na kayo... Kailangan mong magtiwala at sa kaniya ka lang maniniwala. Hindi mo dapat pinapakinggan ang sinasabi ng iba. Mga kilos at sasabihin lang ni Edvin ang kailangan pagtiwalaan," Para akong bata na pinapangaralan niya.
Marahas akong nagbuntong hininga at tumango, "Opo. Nagtitiwala naman na ako sa kaniya at naniniwala ako sa kaniya. Sadyang hindi ko lang maiwasan pero sinusubukan ko."
"Mahal ka niya. Mahal ka ni Edvin."
At mahal ko rin siya.
PAGKATAPOS namin mag-usap, pumunta na kami sa Mykonos Village kasi roon kami matutulog. Pagkarating namin doon ni Green, nakatambay sila sa Mykonos Beach Villas. Masaya akong lumapit kay Edvin at niyakap siya. Para akong batang yumakap sa kaniya na akala mo nawala ako at ngayon ko lang nakita siya nakita.
"Ang tagal niyo naman," Reklamo ni Edvin at pinangsingkitan ng mata si Green.
Natatawang umupo si Green at hinalikan niya si Adaly sa noo, "Nag-usap lang kami. Huwag ka ngang magselos!"
"Bakit ba?!" Parang batang sagot ni Edvin.
Mabilis kong hinalikan si Edvin sa labi kaya natahimik siya sa pag-aalburoto niya, "Nag-usap lang kami, mahal. Hindi kami naghalikan!"
Natawa ‘yong mga kasama namin pero inirapan lang ako ni Edvin. Parang babae talaga! Kumain na kami ng brunch namin habang masayang nagkukwentuhan. Nag-aasaran ang mga lalaki at syempre mga pikon din sila. Mga asar talo rin eh.
Nagkakatuwaan kami kasi tapos na rin kaming kumain pero nandito pa rin kami nakaupo nang biglang tumayo si Adaly at umalis. Hindi ko alam kung saan siya pupunta kaya nagpaalam ako sa kanila na magc-cr lang ako pero ang totoo ay susundan ko si Adaly. Parang sa panaginip lang... Pero ngayon, hindi ko alam kung saan siya pupunta. Nakasunod pa rin ako sa kaniya at napadpad kami sa Veranda kung saan niya sinabi na nagseselos siya sa akin sa panaginip ko.
Nakasandal siya sa railings at natalikod siya sa akin habang nakatingin sa paligid, "May problema ka ba?"
"Ay kabayo!" Napahawak siya sa dibdib niya at gulat na napatingin sa akin. Hinampas niya ako sa braso nang pagkalapit ko sa kaniya. "Nanggugulat ka ha!"
"Hindi mo ba nararamdaman na may sumusunod sayo?"
"Paano ko malalaman eh nakatalikod ako!"
Inirapan ko siya at sumandal din sa railings, "Bakit ka nga nandito? May problema ka ba?"
"Wala lang. Gusto ko lang mapag-isa," Mabilis niyang sagot.
"Anong iniisip mo ngayon?" Curious na tanong ko habang nakakrus ang braso sa dibdib ko.
"Bakit ka ba sumunod dito?!"
"Chismosa ako eh," Sarkastikong saad ko. "Ano nga kasing iniisip mo?!"
"Kung kailan ka magkakaroon ng boyfriend."
Sinamaan ko siya ng tingin, "Excited ka? Magiging kami rin nun."
"Nanliligaw ba siya sayo?" Siya naman ang chismosa ngayon.
"Wala siyang sinabi," Kibit balikat kong sagot.
"Pero kung tatanungin ka niya kung pwede bang maging kayo, sasagutin mo?"
"Oo naman. Mahal ko ‘yon eh!" Proud kong sabi sa kaniya.
Nginitian niya ako at pabirong tinulak, "Naks naman! Dalaga ka na!"
"Matagal na noh," Pag-irap na sabi ko sa kaniya.
Tahimik akong tumingin sa baba at malinaw na makikita sila Edvin dito sa taas. Nag-uusap lang sila na akala mo may importante silang pinag-uusapam kasi seryoso pa ‘yong mga mukha nila. Akala mo nagmi-meeting silang apat.
"Dito sa lugar na ‘to, sinabi mo sa akin na nagseselos ka sa akin dahil kay Edvin. Pero sa totoong buhay pala, ako ang magseselos sayo," Natatawang sambit ko.
Tumingin siya sa akin at nilagay ang kamay sa railings, "Wala nga akong naramdaman kay Edvin noong nakita ko siya. Mapaglaro ang panaginip niyo ni Green."
"Sobra! Akalain mo ‘yon? Nahulog ako kay Green sa panaginip namin. Pero parang gusto ko talaga si Edvin pero kailangan ko lang pagtuunan ng pansin si Green."
Ngayon ko lang napagtanto ‘yong kaganapan sa panaginip namin. Dapat kay Edvin talaga ako mahuhulog pero dahil nandiyan si Green kaya nalihis yung nararamdaman ko sa kaniya. Kung kay Edvin siguro ako nahulog sa panaginip ko baka hindi ako maguluhan sa nangyayari. Pero okay na rin, tapos na rin naman ‘yon.
"Alam kong madalas kang mag-overthink kahit dati pa kasi hindi mo maiwasan na mag-isip ng kung ano ano pero ito tatandaan mo... Kailangan mong magtiwala sa kaniya. Alam kong nahihirapan ka sa pagtitiwala kasi minsan na rin nasira ‘yong tiwala na binigay mo sa nakilala mo dati pero iba si Edvin. Ibang tao siya. Hindi siya katulad ng nakilala mo dati. Hindi siya katulad ng nakilala mong sinira ‘yong tiwala mo. Hindi pare-parehas ang ugali at ginagawa ng tao. May dadating sa buhay mo na sisirain yung tiwala mo at may dadating sa buhay mo na ibabalik yung pagtitiwala mo sa tao. At si Edvin iyon. Siya yung taong maibabalik yung pagtitiwala mo sa tao," Mahabang sabi niya sa akin.
Hindi ako nagsalita pagkatapos niyang sabihin iyon. Si Adaly ay kadalasan maingay at makulit pero kapag kailangan mo ng makakausap tungkol sa problema o seryosong usapan man ‘yan, maasahan mo talaga siya. Kaya niya ring magseryoso kapag gusto mo ng seryosong usapan. Hindi ako madalas magsabi ng nararamdaman ko pero kilalang kilala niya ako kaya alam niya kung anong bumabagabag sa akin.
"Palagi namin sinasabi na huwag kang mag-overthink. Panghawakan mo ‘yong sinabi ni Edvin na mahal ka niya," Dagdag nito. "Kung sinaktan ka, reresbakan namin!"
Natawa ako sa sinabi niya. Naalala ko dati noong sinaktan ako ng ex ko. Sinira niya yung tiwalang binigay ko kaya nahihirapan akong magtiwala kahit sa kanila kaya sinuntok nila yung ex ko. Sinisisi niya pa yung ex ko dahil daw sa kaniya ay hindi na ako nagtiwala ulit maski sa kanila. Grabe rin ang paga-adjust ko kasi nahirapan talaga akong magtiwala. Pakiramdam ko hindi totoo ang sinasabi nila at lolokohin din nila ako. Pakiramdam ko mauulit ulit yung nangyari dati. Umabot ako sa puntong natakot akong magmahal ulit dahil natatakot akong maulit ulit yung dati. Ang dami kong tanong sa isipan ko. Minsan sila na lang ang gumagawa ng paraan para bumalik ulit yung tiwala ko sa lalaki.
At ayon ‘yong gabing nakilala ko si Edvin. Noong nakilala ko si Edvin, bumalik lahat. Bumalik yung pangamba ko na baka lokohin ulit ako. Baka sirain ulit yung tiwalang binigay ko sa kaniya. Baka iwan din niya ako. Pero habang tumatagal, bumabalik din yung tiwala ko sa lalaki. Nagsisimula akong magtiwala at maniwala sa mga sinasabi niya. Mahirap sa una pero ginagawa ko rin ang makakaya ko para na rin sa sarili ko.
Tama naman sila... Kailangan kong magtiwala at maniwala ulit.
"Tsaka ikaw... Ang landi landi mo na! May paghalik ka pa kay Edvin, pati si Green hinalikan mo!"
Natatawa akong tumingin sa kaniya at nakita kong nakasimangot siya, "Gaga! Hindi kami matagal naghalikan. Hindi kagaya niyo... Paniguradong hindi lang halikan ang ginagawa niyo!" Kunwaring nandidiri kong sinabi ‘yon.
"Well..." Kibit balikat niyang sabi habang malanding kinagat ang ibabang labi niya.
"Eww," Kunwaring nandidiri na sabi ko.
Sinamaan niya ako ng tingin at pabirong hinila ang buhok, "Gagawin niyo rin ni Edvin iyon! Eww ka riyan!" Tinawanan ko lang siya.
Nag-chikahan lang kami saglit bago kami ulit bumalik kung saan sila nakaupo. Sinalubong ako ni Edvin ng yakap pagkaupo ko pa lang at hinalikan ako sa labi.
"Mahal kita," Bulong nito habang nakatingin sa mga mata ko.
Matamis akong ngumiti sa kaniya, "Mahal din kita," Bulong ko rin at mabilis siyang hinalikan sa labi sabay yakap ulit sa kaniya.
NANG gabi na ay napag-isipan nilang pumunta rito sa Mykonos Cove Deck dahil maglalaro raw kami. Ano na naman ang lalaruin namin?
"Laro tayo ng truth or truth!" Masayang anunsyo ni Edvin. Siya talaga ang nangunguna kahit dito. Mapa-panaginip o sa totoong buhay, siya ang nangunguna pagdating sa kalokohan.
"Walang choices?" Tanong ko rito at umiling lang.
"Hindi mo naman siguro alam kung anong mangyayari ngayon noh?" Paninigurado ni Grant.
Dahan dahan akong umiling at nagtatakang tumingin sa kaniya, "Bakit? Wala akong napanaginipan."
"Good," Para naman gumaan ang loob niya noong sinabi ko iyon. Bakit ang weird nila ngayon?
Pinagmamasdan ko yung lima habang naglalaro sila. Para silang natatae na ewan kasi hindi sila mapakali. May ganap ba ngayon? Naiinis pa sila kapag sa kanila natuturo yung bote na hindi ko alam kung saan nila kinuha ‘yon.
"Ako na naman?!" Asar na sabi ni Feya.
"Ako na lang. Ako na lang ‘yong hindi pa natatanong," Prisenta ko sa kanila pero natigilan sila sa sinabi ko. "Bakit ganiyan kayo makatingin? Weird niyo."
Nagtinginan silang lima at lumunok muna si Edvin bago ako tanungin, "Ano pipiliin mo?"
"Malamang truth. Wala rin naman akong choice kundi ‘yon," Sambit ko.
Hindi ko masyadong marining yung binubulong nila Green kay Edvin pero parang sinasabihan nila na kumalma ito. Ano bang nangyayari sa kanila? Nasa harapan kasi si Edvin na nakaupo bale nasa tapat ko siya at katabi niya sina Green at Grant. Samantalang katabi ko sina Feya at Adaly. Biglang may nagpatugtog ng 'Habang buhay by Zack Tabudlo' at nagulat ako na may parating na mga tao habang may hawak silang bulaklak.
"Para sayo, Ma'am," Sabi nila kaya isa isa kong tinanggap ‘yong mga bulaklak. Naguguluhan man ako pero tinanggap ko pa rin yun kasi nakaiahiya kung hindi ko tatanggapin. Ano meron?!
"Anong nangyayari?" Nagtatakang tanong ko sa dalawa kong kaibigan pero nginitian lang nila ako.
May lumapit ulit sa akin at binigay yung polaroid pictures. Mga stolen pictures ko ito na nasa bar, nasa Rainbow Escape at sa iba pang lugar kung saan man ako pumupunta. Ano ito?! Pinatong ko ito at yung mga bulaklak sa table at hinanap ko bigla si Edvin. Nasaan na siya?!
"Nandito ako, mahal," Napatingin ako sa likod ko at naroon siya... may hawak na bulaklak. "Para sa‘yo ito, mahal," Tinanggap ko iyon at nilagay sa table.
Tumayo ako para harapin siya, "Anong meron?"
"Una kitang nakita sa bar pero ikaw lang mag-isa nun. Ilang beses na kitang nakikita sa bar at sinusundan. Minsan nakikita ko kasama mo ‘yong mga kaibigan mo. Gusto kong malaman yung pangalan mo pero nahihiya akong lumapit sayo. Kaya noong pinakilala ni Green sa amin na may girlfriend na raw siya, nabuhayan ako ng pag-asang malalaman ko ang pangalan mo. Tamang tama rin kasi nireto ka sa akin ni Adaly kaya nalaman ko buong pangalan mo," Natatawang kwento nito.
"Noong naaksidente ka, hindi ko alam gagawin ko. Kung hindi lang ako naka-inom noong gabing ‘yon baka napigilan pa kita. Marami na rin akong nainom noong gabing iyon kasi kinakabahan ako. Makikita na kita eh. Hindi kita nahabol nun kasi hindi ko na rin kayang magmaneho pero nawala yung lasing ko noong nalaman ko na naaksidente ka. Araw araw akong pumupunta sa kwarto mo. Nagtataka nga sila bakit hindi raw si Green ang puntahan ko. Ang sabi ko naman ay nandiyan si Adaly para kay Green," Natatawang kwento ulit nito.
"Noong nagising ka at nakita ulit kita, sobrang saya ko noon pero naalala ko na may dare pala kami na kunwari may relasyon kami ni Adaly kaya hindi kita mahawakan at mayakap. Gustong gusto kitang mayakap noon kaya gumawa ako ng paraan. Pumunta ako sa bahay niyo noon, nayakap at nahalikan kita noong gabing ‘yon. Ayon din ang gabing hinalikan ka ni Green sa noo, " Bigla siyang tumingin kay Green at sinamaan niya ng tingin ito. Natawa lang kami dahil sa kaniya. Seloso talaga.
"Alam kong naguguluhan ka na sa mga panahon na ‘yon. Nakwento rin ni Adaly sa akin na sinumbong mo raw sa kaniya na hinalikan kita. Nagtaka ka noon na sabi niya ay okay lang. Malamang okay lang kasi si Green talaga ang jowa niya at wala kaming relasyon. Lahat kami sinabi namin na huwag kang mag-overthink. Gusto ko na malaya na kitang mayakap at mahalikan kaya sinabi ko sa kanila na itigil na ‘yong dare. Sinabi ko sa kanila yung nararamdaman ko tungkol sayo. Sinabi ko kung gaano kita ka-mahal at ayon lang daw ang gusto nilang marinig sa akin."
Kaya pala. Ayon pala ang rason kung bakit okay lang kay Adaly na hinalikan ako ni Edvin. Kung alam ko lang edi sana hinayaan ko lang si Edvin na halik-halikan ako.
"Mahal kita, Tayla. Alam kong ikaw na ‘yong babaeng dumating sa buhay ko na mamahalin ko habang buhay. Kapag nakikita kita, mas lalo akong nahuhulog sayo. Cringe man pakinggan pero ayon talaga ang nararamdaman ko. Gagawin ko ang lahat para lang bumalik iyong tiwala mo at maniwala ka sa akin. Sa sobrang pagmamahal ko sayo, handa akong tanungin ka..."
Nakita ko yung mga tao kanina nagbigay sa akin ng mga bulaklak na may hawak na placard at nakalagay 'Maaari ba kitang makasama habang buhay?' Tumingin ako kay Edvin at nakangiti siya sa akin. Naghihintay siya ng sagot ko.
"Oo naman! Hinihintay ko lang na tanungin mo ako!" Niyakap niya ako ng mahigpit at narinig kong nagpalakpakan yung mga tao na nasa paligid namin.
Kumalas siya sa pagkakayakap, hinalikan niya ang noo ko at napunta sa labi, "Mahal kita. Ayokong madaliin ka kaya hindi muna kita tinanong kung pwede ba kitang maging akin. Ayokong isipin mo na masyado akong mabilis."
"Naiinip na nga ‘yan kasi tagal mo raw magtanong," Sabat ni Feya kaya sinamaan ko siya ng tingin.
"Atat siyang mapasayo! Doon din naman talaga punta niyo," Natatawang saad ni Adaly kaya inirapan ko siya.
Mga kaibigan ko ba talaga sila?!
Sinapo ni Edvin ang magkabilang pisngi ko at mabilis akong hinalikan sa labi, "Sayong sayo na ako, mahal. Sayong sayo na ako habang buhay."
May dadating sa buhay natin na akala natin siya na talaga makakasama natin habang buhay. May iba na dumating lang para bigyan tayo ng lesson. May iba na sasaktan lang tayo at matatakot tayo magmahal ulit. Pero may darating din sa buhay natin na paniniwalaan ulit tayo na masarap at masayang magmahal ulit.
May dadating sa buhay natin na hindi natin aakalain na mahuhulog tayo rito sa taong ‘to. Hindi rin natin alam na siya na pala yung makakasama natin habang buhay.
Dumating na yung taong hindi ko inaasahan na mahuhulog ako sa kaniya at sigurado na akong gusto ko siyang makasama habang buhay.