(Pre-Apocalypse)
"Guys, sinong gustong sumama sa field trip? Excited na ko!” tanong ni Bea sa mga kaklase habang nakaakbay sa kanya ang boyfriend na si Mark. Si Bea ang binansagan na “Emo” dahil lagi siyang emotional at nagpapa-comfort sa mga kaibigan niya.
"Di na muna ako sasama labs. May gagawin pa kasi ako eh lalo na't kailangan ko pang maghanap ng trabaho para suportahan ang aking pag-aaral." tugon naman ni Mark sa tanong ng kasintahan sabay halik sa pisngi ng dalaga. Siya ang bestfriend ni Vincent na may code name na “Hope” dahil sa pagiging positibo at pagsusumikap niya sa buhay.
"Ang KJ mo naman labs! Sa bagay naiintindihan naman kita eh. Alam mo labs kahit limang araw lang kami doon, mamimiss talaga kita pag-alis namin." sambit naman ni Bea sabay yakap sa braso ng binata.
“Mamimiss din kita labs. Hihintayin ko ang pagbabalik niyo.” sabi naman ni Mark at hinalikan ito sa noo.
Marami ang kinilig sa dalawa ngunit may mangilan-ngilan din na naiinis at naiinggit. Palibhasa kasi palagi na lang taga-sanaol ang role nila dito mundo. Kaya ayon tila binagsakan ng langit ang mga mukha nila sa tuwing nakakakita ng love birds sa tabi-tabi.
"Don't worry sis, nandito naman kaming mga kaibigan mo, mag-eenjoy ka pa rin kahit wala yang papa Mark mo!" sabi ni Nikka habang hinahagod ang likod ng kaibigan.
"Oo nga naman Bea. Hindi naman mawawala yang si Mark at mga ilang araw lang naman yung field trip, babalik naman kaagad tayo." Sang-ayon naman ni Jane habang katabi niya ang boyfriend na si Vincent. Tulad kay Jenny mabait, maganda at may takot sa Diyos si Jane. Bukod pa rito ay maputi, mahinhin at napakaloyal din sa boyfriend niya.
Sa kalagitnaan ng pag-uusap nila ay biglang pumasok sa silid si Ms. Trey. Kaya kaagad na nagsitahimik ang mga mag-aaral at inayos ang kanilang pag-upo upang hindi mapagalitan ng guro.
"Okay class! Kumusta na kayo, Engineering students?" bungad ni Mrs. Trey habang papaupo sa kanyang upuan.
"Okay lang naman po ma'am, excited na po sa field trip." sagot ni Brett, ang tinawag na “Mr. Use” dahil ma-sekreto siya. Ang tipo ng tao na hindi mahilig magshare ng mga karanasan o mga hinanakit sa buhay.
"Same here. Nga pala kung sino man yung gustong sumama paki sulat nalang ng inyong mga pangalan sa papel na ilalagay ko dito sa ibabaw ng mesa. Kumuha rin kayo ng waiver na kinakailangang pirmahan ng inyong mga magulang para makolekta ko na rin ang fee sa susunod na araw." bilin ni Ms. Trey sa mga mag-aaral at inilagay sa mesa ang isang papel. Pagkatapos ay isa-isang lumapit ang mga estudyanteng gustong sumama sa field trip sa mesa upang isulat ang kanilang pangalan . Kumuha sila ng waiver sa mesa at kaagad bumalik sa kani-kanilang upuan. Tahimik lang ang lahat at walang nais magsalita sa takot na baka magalit na naman si Ms. Trey. Samantala namutawi ang pananabik sa mukha ng mga mag-aaral at sumilay ang ngiti sa kanilang mga labi.
"Hmmm… Mukhang anim lamang sa inyo ang hindi sasama ah. Okay class, here are the people who wants to join our trip!” sambit ni Ms. Trey.
“Amihan, Jenny
Andrada, Nikka
Carson, Brett
Jandee, Alexa
Lico, Garry
Olivares, Jane
Ombio, James
Orin, Lea
Tan, Vincent
Taruca, Ken
Triz, Bea
Uy, Bon Dennis
Zinto, Romy Del”
"Sa mga hindi sasali sa field trip, may pagsusulit akong ipapagawa sa inyo. Class dismissed.” anunsyo ni Ms. Trey sa klase at umalis na pagkatapos.
Nang tuluyan ng nakaalis si Ms. Trey sa silid ay muli na namang nagkumpulan ang mga mag-aaral at nag-usap-usap tungkol sa field trip.
"Guys, ba't naman yung iba hindi sasama? Naman oh, last trip na natin ‘to kasi magmi-majoring na tayo next year. Pero okay lang, nabalitaan ko naman na isasabay tayo sa Agriculture at HRM, makikita ko na naman ulit ang crush kong si Paul." sambit ni Nikka at tumili dahil sa kilig.
“Hoy! Grabe ka naman kung makatili, ang sakit sa tenga. As if naman papansinin ka nun. Sa dami ba naman ng babae at baklang naghahabol dun. Tiyak puwing ka lang sa kanya na panira ng view.” bulalas ni Ken, ang tinawag nilang “Storage” dahil sa talas ng memorya na mayroon siya kaya madalas siyang nakakakuha ng mga matataas na marka sa klase nila. Yun nga lang mainitin ang ulo at napaka-bitter daig pa niya ang ampalaya at kape sa pait.
"Lalong lalo na ako, kilala n’yo ba si John? Yung heartthrob ng HRM? Balita ko sasama siya, crush na crush ko yun! Yieeeeeeee, pagdating natin dun, magpapa-separate talaga kami ng room!” wika naman ni Alexa na kinikilig nang sobra.
"Pangarap mode, ACTIVATED!" singit ni Romy na feel na feel ang pag-aaksiyon niya na mala- Power Rangers. Siya ang binansagang “Joker” dahil siya yung tipo ng tao na araw-araw lang na masaya at para bang walang problema na dala-dala.
Hindi na pinansin nina Nikka at Alexa ang pagpaparinig na ginawa nina Ken at Romy sa halip ay inirapan lang nila ang mga ito.
"Basta kami ng babes ko, susulitin talaga namin ang field trip. Don't worry babe, mag-eenjoy tayo. Mahal na mahal kita." sabi ni Garry, ang binansagang "Doc" dahil magaling siya sa Medisina kahit Engineering ang kursong kinuha niya.
"I love you too babe" tugon naman ni Lea habang nakahawak sa kamay ng kanyang kasintahan. Siya naman ang pinaka-sweet na klase ng tao sa section nila at maganda pa ang hubog ng katawan kaya tinagurian siyang “Lollipop”.
"Ang sweet n’yo naman, ano kaya kung pag-uuntugin ko kayo?" singit naman ni Ken na tila naiinggit sa dalawa.
"Bitter talaga nito! Eh kung ako kaya halikan mo Ken, tatanggapin ko talaga nang maluwag sa puso "sabi ni James, ang bakla na binansagang “Reporter” dahil walang preno ang bibig niya sa kakadada at siya rin ang nagdadala ng balita sa klase nila lalo na yung mga tsismis mula sa ibang section.
"Hoy bakla! Tumahimik ka, naiingayan ako sa’yo. At saka nandidiri ako sa mga pinagsasabi mo, lalong-lalo na sa pagmumukha mo!" Inis na sabi ni Ken.
Pagkatapos ng mahaba-habang bangayan sa loob ng classroom ay naisipan na ring umuwi ng mga mag-aaral. Dapit-hapon na ng napadaan sina Bon, Garry at Vincent sa may kagubatan ng biglang umihip ang napakalamig na hangin kasabay ng mga tunog sa paligid na hindi maipaliwanag.
“Mga pre, ang lamig, parang jowa ko.” reklamo ni Bon, ang tinaguriang “Geek” dahil sa angking galing nito sa asignaturang Math at Physics.
“G*go ka pre, wala kang jowa! Huwag kang nananaginip nang gising!” natatawang sabi ni Vincent sa kaibigan. Siya naman ang may code name na “Magnet” dahil matinik sa babae pero loyal pa rin kay Jane.
“Pre, bakit ang ingay ng paligid? Tayo lang naman ‘yung tao rito ah tapos malayo pa yung mga bahay ddito?” tanong ni Garry na halatang kinakabahan na.
“Oo nga pre, ang creepy naman ng lugar na ‘to.” sabay na komento ni Vincent at Bon.
Ilang sandali ay nakarinig sila ng mga boses. Tila nagtatalo ang mga ito gamit ang lenggwaheng tanging ang mga ito lang din ang nakakaintindi. Ngunit binalewala na lamang nila iyon at nagpatuloy na lamang sa paglalakad.
“La fine è arrivata” bulalas ng isang boses na umalingawngaw sa kagubatan.
Tumindig ang mga balahibo nila dahil sa lalim ng boses na kanilang narinig. Dumako ang kanilang paningin sa pinanggalingan ng boses at nagulantang sa kanilang nakita.
“May halimaw!”
“Takbo!”