Sumunod pang mga araw, paggising sa umaga ni Steffani, si Zack na agad ang hanap ng kaniyang mga mata. Sa tuwing magtatama ang kanilang paningin, napapangiti na lang silang dalawa.
"Kumain na tayo. Nakapagluto na ako," wika ni Mark matapos niyang makapagluto.
"Wow! Mukhang masarap amoy pa lang! The best ka talagang magluto, Mark!" Magiliw na sabi ni Steffani.
Malawak namang ngumiti si Mark. "Talaga? Salamat, Steffani."
Kumunot naman ang noo ni Zack. "Mas masarap pa akong magluto kay Mark." Biglang sabi niya.
Nagkatinginan tuloy sina Tim at Ken. "Mukhang may tensyon akong nararamdaman," bulong ni Tim.
"Same tayo. Parang may nagpapagalingan sa pagitan ng dalawang guwapong nilalang para sa isang babae," bulong naman ni Ken.
"Ganda kasi ni Steffani eh. Kaya ayan, nagkakaselosan na ang dalawa. Bawal pa nama tayong magkagusto kay Steffani," sabi pa ni Tim.
"Buti pa ako crush ko lang si Steff. Ganda kasi eh," dagdag pa ni Ken sabay hagikgik.
Umupo sa tabi ni Steffani si Zack, sa bandang kanan. Habang sa kaliwang tabi naman si Mark. Napagitnaan nila si Steffani. Sumipol naman si Ken. Nagkatinginan silang apat.
"Oh? Ano pang tinitingin-tingin niyo diyan? Kainan na!" Biglang sabat ni Tim sa usapan.
"Sandukan na kita," sabi ni Zack sabay kuha ng plato ni Steffani. 
Sinandukan niya ng kanin si Steffani. "Okay na 'yan," sabi ng dalaga sabay ngiti.
"Sandukan na kita ng ulam," sabi naman ni Mark sabay kuha ng plato ni Steffani.
Alanganin namang napangiti ang dalaga. "Sige, salamat Mark."
Matapos sandukan ni Mark si Steffani ay nagkatinginan silang dalawa ni Zack. Sa mga tingin nila, mararamdaman ang tensyon.
"Woooh! Parang ang init ng paligid!" biglang sabi ni Ken.
Kumunot ang noo ni Mark. "Ha? Anong parang mainit eh ang lamig nga."
Tumawa si Tim. "Basta! Parang may iba kasi sa paligid natin ngayon."
"Ha? Anong pinagsasabi mo diyan?" sabi naman ni Zack.
Nagpalipat-lipat naman ng tingin si Steffani sa apat. Hindi niya kasi maintindihan kung ano ang nangyayari. 
"Steffani, tubig," sabi ni Mark sabay abot ng tubig sa dalaga.
Kinuha naman iyon ni Steffani. "Thank you, Mark."
"Steffani, juice baka gusto mo," sabi naman ni Zack sabay abot ng juice kay Steffani.
Malawak namang ngumiti si Steffani sabay kuha ng juice na inabot ni Zack. Agad niya iyong ininom kaya napangiti si Zack. Sa tabi naman ay napatiim bagang na lang si Mark.
"Mukhang alam na natin kung sino ang nagwagi," bulong ni Ken kay Tim.
Ngumiai si Tim.  "Totoo. Kitang-kita ko sa aking harapan."
Tiningnan naman ni Mark ang dalawa. "Ano bang pinagbubulungan niyo diyan? Para kayong bubuyog." Inis na sabi nito at saka nagpatuloy sa pagkain.
"Nagagalit na ang isa sa kanila. Hindi niya kaya matanggap na siya ay hindi pinili?" Natatawang bulong ni Ken sa kapatid na si Tim.
"Siguro nga. Halata sa mukha," sabi ni Tim na nagpipigil ng tawa.
Tila nawalan ng ganang kumain si Mark kaya nauna na itong natapos. Sina Zack at Steffani naman ay nagtatawanan habang kumakain.
"Ang sweet niyo naman. Para kayong lovebirds," biglang sabi  ni Ken kaya nagulat ang dalawa.
"Oh! Mukhang nagulat silang dalawa sa sinabi mo, Ken. Parang may something na yata. Tama ba ako, Zack at Steffani?"  Nakangising sabi ni Tim.
Sumeryoso ang mukha ni Zack. "Umayos kayong dalawa kung ayaw niyong tamaan kayo sa akin."
Nagpipigil naman ng tawa si Ken. "Tumigil na tayo. Seryoso na si Loverboy," bulong pa ni Ken sa kapatid.
Lumipas pa ang ilang linggo, isang buwan na lang ay uuwi na si Steffani. Masaya siya dahil marami siyang natutunan kasama ang apat na lalaki.
"Oh? Bakit malungkot ka diyan?" tanong ni Tim sa kaniya.
Lumingon si Steffani sabay ngiti. "Wala naman. Naisip ko lang kasi na isang buwan na lang pala ako dito. At pagkatapos ay babalik na ako sa Maynila," ani Steffani sabay tingin sa mga batang naglalaro sa kalsada.
"Oh tapos? Bakit parang malungkot ka pa? Eh 'di ba nga gusto mo ng bumalik sa Maynila?" 
Bumuntong hininga si Steffani. "Syempre, mamimiss ko kayo. Naging masaya na rin kasi ako kasama kayo. Nasanay kasi ako na mag-isa lang. Tapos nang tumira ako dito, masaya pala kapag may nakaakusap ka, may nakabiruan ka, may nambubuwisit sa iyo,  kagay ni Ken na palagi akong binubuwisit," sabi niya sabay tawa.
Mahinang tumawa si Tim. "Ganoon lang talaga ang kapatid kong 'yon pero mabait siya, 'di ba?"
Tumango si Steffani. "Oo. Pero ang pinakamabait sa inyo ay si Mark. Parang siya ang kuya sa inyong apat. Tapos ikaw naman, parang nakiki-join ka lang sa agos eh. Para ngang may sarili kang mundo palagi."
Tumawa si Tim. "Ganoon lang talaga ako. Madalas kong kakuwentuhan si Ken. Kami talaga ang magkadikit. Si Zack talaga ang dapat na kuya kasi siya ang unang lumabas sa amin, tapos sumunod si Ken, sunod ako at huli si Mark. Sadyang matured lang mag-isip si Mark. Siguro nga, kung nandito pa si Mama namin, masaya kami. Kaso namatay siya dahil sa panganganak. Apat ba naman kasi kaming nilabas niya," biglang lumungkot ang boses ni Tim.
"Hayaan mo na! Same lang naman tayo eh. Wala rin naman akong mga magulang na. Pero ang maganda lang sa inyo, apat kayo. May kasama kang kakuwentuhan, eh ako, only child lang kaya madalas mag mag-isa sa bahay," sabi naman ni Steffani kasabay ng pilit na ngiti.
"Nga pala, gusto ko lang sabihin na alam na namin ang tungkol sa inyo ni Zack.  Na nagkakagustuhan na kayo."
Nanlaki naman ang mata ni Steffani. "Ah…kasi…"
"Ayos lang 'yan. Huwag ka ng mahiya. Ramdam na ramdam namin ang tensyon sa pagitan ni Mark at Zack."
Kumunot ang noo ni Steffani. "Ha? Tensyon? Bakit?"
Tumawa si Tim. "Ay? Hindi mo ba dama na gusto ka rin ni Mark?"
Mabilis na umiling si Steffani. "Hindi. Akala ko ganoon lang talaga siya. Hindi ko alam ang tungkol diyan."
"Gusto ka ni Mark. Pero sa tingin ko magpapaubaya 'yan si Mark kay Zack. Dati kasi, si Zack ang nagpaubaya kay Mark. Kaya ngayon, sa tingin ko si Mark naman ang gagawa no'n," sabi ni Tim sabay ngiti.
"Ah…okay," 'yon lang ang nasabi ni Steffani sabay kamot sa ulo.
"Ang payo ko lang sa iyo, huwag mong sasaktan o lolokohin si Zack. Wala pang ibang nagiging girlfriend 'yan kun'di ikaw lang kung sakaling maging kayo. At saka, siguro kaya ganiyan ang ugali ni Zack dahil kulang siya sa pagmamahal. Madalas kasi na nagkukulong lang siya sa kuwarto. Hindi siya masyadong nakikisali sa bonding naming tatlo. Kaya payo ko lang na huwag mo siyang sasaktan. Hindi naming maipagkakaila na maganda ka, Steff. Maraming lalaki ang magkakagusto sa iyo. Kaya sana iwasan mo sila at kay Zack lang ang mata mo," seryosong sabi ni Tim.
Tipid na ngumiti si Steffani. Hindi niya kasi inasahan ang mga salitang lumabas sa bibig ni Tim. Akala niya kasi puro kalokohan lang ang lalabas sa bibig ni Tim. Silang dalawa kasi ni Ken ang madalas mang-asar sa kaniya. 
"Oo naman. Hindi naman ako playgirl eh. Kapag nagmahal ako, iisa lang talaga at wala ng iba. Kaya makakaasa kang hindi ko lolokohin ang kapatid mo," sabi ni Steffani sabay ngiti.