"MAIWAN ko na muna kayo, alam n'yo na ang mga rules dito sa mansiyon. Kapag oras na ng tanghalian dapat sabay-sabay na kayong nasa hapag-kainan." Bilin pa ni Gregorio sa mga ito.
"Yes po!" Panabay na sagot ng mga estudyante.
NAPABALIKWAS na bumangon sa kama si Alyssa. Hindi niya namalayan na nakatulog pala siya pagkatapos nilang magtanghalian.
Dinampot niya ang maliit na alarm clock na nakapatong sa isang lamesita na katabi ng kama. "Alas kuwatro na pala, bulong niya sa sarili."
Bumaba ng kama si Alyssa at maingat na ipinatong sa lamesita ang alarm clock. Humihikab pa siya na tinungo ang banyo, naghilamos siya at nagsepilyo.
Nasaan kaya sina Maggie at Daisy? bulong niya sa hangin. Agad siyang nagpalit ng kasuotan, baka nasa sala ang mga ito hindi man lang siya ginising.
Saglit lang na inayos niya ang sarili, konteng suklay ng kanyang buhok, nagpahid na din siya ng kaunting pulbo sa mukha at nag lagay na din siya ng lip tint. Muli niyang tinignan ang sarili sa salamin bago tuluyan lumabas ng kuwarto.
Pagbukas ni Alyssa ng pinto hindi pa man man siya nakakalabas, may narinig siyang kalabog na parang nanggagaling sa 3rd floor. Lumabas siya ng kuwarto at maingat na sinara ang pinto.
Muli niyang narinig ang mahinang kalabog sa 3rd floor. Kumibit-balikat si Alyssa. Baka nasa silid na iyon ang mga kasama niya kaya nagsimula na siyang maglakad, tinungo niya ang hagdan papuntang 3rd floor dahan-dahan ang mga hakbang na ginawa niya.
Nang marating niya ang 3rdfloor agad niyang tinungo ang silid, nakita niyang nakabukas ito ng bahagya kaya sumilip siya.
Si Sir Gregorio ang nakita niya at mukhang abala ito sa pagpipinta. Tila naramdaman naman ng artist ang presensya niya dahil tumigil ito sa ginagawa.
"May tao ba diyan?" Tanong nito. Nahihiyang binuksan ni Alyssa ang pinto.
"Sorry Sir, akala ko po kasi naandito ang mga kasama ko. May narinig kasi akong mga kalabog kanina na parang nang gagaling dito." Nahihiyang paliwang niya. Ngumiti sa kanya ang artist kaya nakahinga siya ng maluwang. "Sorry po talaga lalabas na po ako." Paalam niya.
"Okay lang, Alyssa," Sagot nito.
Tinanggal nito ang suot na salamin at isinabit sa neckline na suot nitong t-shirt. "Gusto mo ba makita ang ginagawa ko?" Tanong pa nito sa kanya.
"Kung hindi po ako saiyo nakakaabala Sir,"
"No, no, no!" sagot nito. "Halika, lumapit ka dito." Nakangiting paanyaya nito sa kanya.
Nakaramdam man siya ng kaunting kaba pero lumapit pa din si Alyssa sa Artist.
"Wow!" Bulalas niya nang makita ang painting na ginagawa ng pintor.
Nanlalaki ang kanyang mga mata na titig na titig sa larawan. Hindi niya maitago ang tuwa sa ganda ng ginawa nito.
"Maganda ba?" Tanong ni Gregorio sa dalaga.
Tumango -tango si Alyssa bilang tugon.
"Puwede ko po ba mahawakan, Sir?" Tanong ni Alyssa na hindi na magawang alisin ang paningin sa larawan. 
"Oo naman," natatawang sagot ni Gregorio. "May ilang bahagi pa ng larawan ang hindi ko pa nakulayan, kung gusto mo ikaw na ang mag patuloy."
"Po!?" Gulat na tanong ni Alyssa. "Ako po?"sabay turo sa kanyang sarili.
Tumango si Calixto bilang sagot.
"Sigurado po kayo?" Parang hindi siya makapaniwala sa sinabi ng artist.
Bilang sagot ng artist inabot nito ang paint brush sa dalaga.
"Sir, baka po masira ko lang ang painting mo, ang ganda pa naman." Tila nanghihinayang na sabi ni Alyssa. Rain forest ang nasa painting at isa ito sa pinakapaborito niyang iguhit.
"Magaling ka sa larangan ng pagguhit at pagpipinta Alyssa. Kaya alam ko na iingatan mo 'yan, lalo na at tanda ko na ganyan ang mga gusto mo'ng larawan." Tila pagpapalakas loob ng artist sa dalaga.
Tumayo si Gregorio at inalalayan na makaupo ang dalaga. Iniabot niya dito ang mga acrylic paint.
Nanginginig ang mga daliri na nagsimula si Alyssa. Pakiramdam niya nababato-balani siya sa larawan kaya ipinagpatuloy niya ang pagpipinta. Nakita niyang inabot ng artist ang isang upuan na naroroon at naupo ito sa tabi niya. Naiilang man ang dalaga sa presensya nito pero mas binigyan niyang pansin ang ginagawa.
"See, ang galing mo!" Puri ni Gregorio sa dalaga nang matapos na nito ang pagpipinta.
Kinikilig sa narinig si Alyssa kahit man din siya natutuwa sa kanyang ginawa. Parang gusto pa nga niyang halikan ang larawan.
"Isulat mo ang pangalan mo at lagdaan mo na din, Alyssa."
Bigla siyang napasulyap sa artist sa narinig mula dito. 
"Pirma po?" Tanong ni Alyssa dito baka kase mali lang ang pandinig niya.
Tumango ang artist.
"Sir, hindi naman po ako ang may gawa nito, kayo naman po,"
"Alyssa, okay lang 'yan. Para naman may remembrance ako galing sa estudyante ko." Sagot ni Gregorio. Hinawakan nito ang kanang braso ng dalaga. "Sige na pumirma ka na,"
"Pero Sir, 'diba parang cheat 'yon?" 
"Hahaha, ano ka ba, s'yempre hindi dahil dito ko lang naman 'yan e display sa mansiyon, dito mismo sa kuwartong ito. Para naman may remembrance ako sa inyo kapag bumalik na kayo sa Manila. Para naman hindi ako malungkot kapag wala na kayo dito."
"Aahhh," anya. "Sige po Sir," napapayag na din siya. Tatanggi pa ba siya ang ganda kaya ng painting tapos may pirma niya pa.
Kinikilig na nagsimulang magsulat si Alyssa. Nasa letrang "A" palang siya nang biglang bumukas ang pinto ng silid.
"There you are!" Masiglang bungad ni Maggie kasama nito si Daisy.
Nagulat si Alyssa kaya nabitawan niya ang paint brush.
"Kayo pala Maggie," bakas ang gulat sa mukha na kanyang sabi.
Akmang dadamputin niya ang paint brush sa sahig ng maunang madampot ito ng artist.
"Kanina ka pa namin hinahanap ni Daisy, bigla ka kasing nawala sa kuwarto." Ani Maggie sabay lapit kay Alyssa. Samantalang nakatayo naman si Daisy sa bungad ng pintuan. "Tumawag si tita Alicia."
Ang ina ni Alyssa ang tinutukoy ni Maggie kaya agad na napatayo ang dalaga.
"Bakit saiyo tumawag si Mom?" Nagtatakang tanong niya kay Maggie.
"Hindi mo daw kasi sinasagot ang tawag ni tita."
Natampal niya ang sariling noo. Naalala niya inilagay niya pala sa ilalim ng unan ang cellphone niya. "Oo nga pala ang cellphone ko nasa kuwarto." Anya.
Humarap si Alyssa sa artist na sa oras na iyon ay tahimik. "Sir, pasensya na po maiwan kana po namin dito." Paalam ni Alyssa dito.
"Sige lang Alyssa, mag iingat kayo pagbaba ng hagdan," paalala pa nito sa tatlong dalaga.
"Opo, salamat po sa paalala." Magalang na sagot ni Alyssa.
"Sige po Sir, alis na po kami." Si Daisy naman ang nagpaalam, nakatayo pa din ito sa bungad ng pinto.
"Tara na!" Ani Alyssa sabay hatak sa kamay ni Maggie. Nawala sa isip ng dalaga ang pipirmahan na painting.
Lumabas ang tatlong dalaga sa silid, naiwan naman na nagngingitngit ang kalooban ni Gregorio.
Nanghihinayang ito dahil hindi natuloy ang paglagda ng dalaga sa painting, sana kabilang na ito sa dalawang kasama nito na nabiktima na niya.
Mahigpit na hinawakan ni Gregorio ang paint brush na nasa kamay.
"Hindi bale, may araw ibang pa naman. Sinuwerte ka man ngayon pero sa susunod sisiguraduhin ko na 'di kana makakatakas!" bulong ni Gregorio sa hangin na ang tinutukoy ay ang dalagang si Alyssa.
Napabuga ng hangin si Gregorio, kinuha niya ang painting at lumabas na ng silid. Itatago na lang muna niya ang painting na tinapos ni Alyssa. Maghahanap na lang siya ng tamang t'yempo para palagdaan iyon sa dalaga.