“Hanggang kailan kaya ang ganitong buhay namin?”
Napapaisip si Ice habang pinagmamasdan ang bulto ng taong pumapasok sa school gate dahil unang araw ng pagbabalik eskuwela. Kahit nasa paaralan na ay nasa bahay pa rin ata ang kaluluwa at pag-iisip nya. Nagkapatong-patong kasi ang problema nila sa pamilya.
Una, nahuli na naman ng tatay nya na may kalaguyo ang kanyang ina. Hindi pa natapos dun at nabuntis pa nga ito. Panganay na naman sa pangalawang lalaki na nakasama nito. Lima silang magkakapatid sa tatay nya. Nagsimula ang pagloloko ng nanay nya nung pinanganak ang pangatlong kapatid nya. Wala na daw oras dito ang kanilang ama dahil puro trabaho lang daw ang inaatupag nito. Araw-araw pumapasok bilang construction worker ang tatay nila at pagdating sa gabi ay halos gusto na lang matulog dahil sa pagod. Nagkaroon sila ng kapatid sa unang kinasama ng nanay nya. Binubugbog pala ito ng hinayupak na lalaki. Tinanggap naman ng tatay nya ng umuwi at humingi ng tawad ang nanay nya. Ganun nga siguro, mahal ni tatay eh. Makalipas ang ilang taon, naghanap na naman si Inay. Nabuo na nga ang dalawang bunso nila. Ayun, walo na silang magkakapatid. Same story, binugbog si Nanay, nalaman ni Tatay, sinundo si Nanay.
Pangalawa, hindi makatrabaho ang Tatay Kardo nya ngayon. Pagkatapos ng check-up, minabuti nilang pagpahingahin muna ito kahit dalawang linggo lang. Kahit ayaw nito ay sinabihan nya na kaya pa naman nya magsideline kahit mag-start na ang klase. Ang mahalaga ay makabawi ang katawan nito kesa naman bigla na lang atakehin dahil sa high blood pressure nito. Hindi pa nga nya mapacheck up ulit ngayon. Nahihiya na sya sa amo nya sa grocery store. Hindi na sya makabale dahil nakailang advance na kasi sya. Panganay sya kaya ramdam nya ang bigat ng responsibilidad. Madiskarte naman sya kung maituturing. Halos lahat ng raket pinasok na nya. Wala syang panahong sinayang para sa kanyang pamilya. Gagawin nya lahat para sa mga pinakamamahal nya. Pero may mga panahong naiisip nya na kelan pa kaya darating sa kanya ang panahon na uupo na lang sya katabi ng babaeng mamahalin nya…
Yun ang problema, wala nga pala syang girlfriend. Aside sa wala pa syang panahon para pasukin ang magulong mundo ng pag-ibig, wala pa syang nakikitang babae na magpapatibok ng puso nya.
“Pre, pre, preeeeeeee!” sigaw sabay tapik sa kanya ni Alex, ang bestfriend ni Ice.
“Sorry pre… Ano ba yun?” Nagtatakang tanong nya dito.
Ngumuso si Alex sa babaeng lumalakad palapit sa kanila. Hindi na nakapagtataka ang ganoong eksena. Mahilig sa babae ang kanyang kaibigan kaya kapag may bago sa paningin nito ay lagi sya nitong tinatawag. Magkaiba sila ng taste sa babae pero iba ang isang ito. Unang tingin mo pa lang ay mahahalina ka na. Kulang ang salitang maganda para ilarawan ito. Isama mo pa na hindi pangkaraniwan ang tangkad nito. Nasa 5’10”siguro ang height nito. Ang slim nitong katawan ay tamang tama lang. Maliit ang bewang at maganda din ang hubog ng dibdib at likuran. Kapansin-pansin din ang malalaki nitong mga mata. Matangos ang ilong at mapula ang pisngi. Ang makurba nitong labi ay manipis. Mahaba ang tuwid nitong buhok na sumasabay sa hangin. Makinis din ang mapula-pulang balat nito. Sa tantiya nya, may lahi siguro itong Kastila. Mukha itong modelo na naglalakad sa runway. Pupusta sya na lumalaban ito sa mga beauty pageant.
“Hi! San ang director’s office nyo?”tanong ng magandang dilag.
“Diretso lang po kayo dun sa taas tapos kakanan sa dulo,” sagot naman ni Alex
“Salamat ha!” Sabay ngiti bago sila iniwan ng babae.
“Pppreeee!!” sigaw na naman ni Alex.
“Ano ba?!” naiirita ng sagot naman ni Ice.
“E, paano ba naman natulala ka na dyan! Ni hindi mo nga sinagot yung babae e, sayo kaya sya nagtatanong,”mahabang pagpapaliwanag ni Alex.
Sinundan nya tuloy ng tingin ang babaeng ngayon ay paakyat na ng hagdanan. Tama nga si Alex, natulala sya sa babae kaya hindi na sya nakasagot.
“Bahala ka na nga d’yan!”
Mabilis syang tumayo at tinungo ang direksyon ng kanilang classroom. Nalilito naman si Alex sa inakto ng kaibigan.
“Hoooyyy! Ano na namang drama mo? Parang tanga ‘to!” Sumunod na din ito sa kanya. Inakbayan sya at pabirong sinakal ng naabutan sya. Huminto lang ito sa pakikipagkasatan ng tumunog ang school bell. Dali-dali na silang pumasok sa loob ng classroom kasunod ng iba nilang mga kaklase. Sinuyod nya ang buong classroom at nakahanap sya ng bakanteng upuan sa may bandang likuran.
“Ooopps, dito ako!”
Inunahan sya ni Alex sa tinutumbok nyang silya kaya nawalan sya ng choice kundi umupo sa isa pang bakanteng upuan. Ayaw nya sana umupo doon dahil sa makakatabi nyang babae.
“Hi Barbie! Musta bakasyon?” si Alex ulit.
“Hi Alex.. Ice…,” sagot naman nito habang kumakaway sa kanilang dalawa.
“Ako na lang ang kausapin mo. Wag mo nang batiin yang isa d’yan. Meron ata yan ngayon,” biro pa nito.
“Alex, please….”
Inismiran nya ito. Hinaplos naman nya nang marahan ang ulo ng babae na lalong nagpalabas sa mapuputi nitong ngipin. Wala naman talagang problema si Ice sa babae dahil kaibigan naman nya ito. Ang ayaw lang nya ay tinutukso sila palagi ng mga kaklase nila lalo na itong si Alex. Madalas banggitin sa kanya ni Alex na ligawan na daw nya si Barbie. Wala daw sya magiging problema dahil parang open secret na nilang magkakaklase ang matinding pagkakagusto sa kanya nito. Pero wala talaga syang nararamdaman para sa babae.
Tumingin na lang sya sa labas ng classroom. Tamang-tama naman na dumaan ang babaeng nakita nila kanina ni Alex sa labas. Pinagmasdan nyang mabuti ito. May dinaluhan itong batang nadapa. Kinalong nito iyon at pinatahan. May inilabas ito sa bulsa nito na isang lollipop. May ibinulong ito sa bata na ikinangiti nito.
“Sino kaya sya? Kaano-ano kaya nya ang bata? Anak kaya nya yun? Pero muka pa naman syang walang asawa. Bakit ko ba sya iniisip? Ang ganda nya talaga.”
“Sinong maganda, pre?” tanong ni Alex.
Sumilip din ito sa labas ng bintana. Nakita nya ding dumako sa labas ang tingin ni Barbie na parang ikinalungkot nito. Hindi nya namalayang nabigkas na pala nya ng malakas ang mga huli nyang sinabi.
“Maganda.. maganda… ang pagkakapintura ng gym natin. Di ba, ‘di ba favorite color ko ang yellow green? Ano sa tingin mo, Barbie?”
“Ayyy, oo nga! Napansin ko din yan kanina. Maganda nga.” Pagsang-ayon nito sa kanya, si Alex naman ay nagkibit-balikat lang.
Nakahinga sya nang malalim. Buti na lang at nalusutan nya. Ayaw din naman nya masaktan si Barbie dahil kaibigan nya ito. Pakiramdam pa nga nya ito ang babaeng version ni Alex sa buhay nya. Special sa kanya ang babae.