Pinagmamasdan niya nang palihim ang ginagawa ng babae. 'Wala namang masama sa ginagawa ko, binabantayan ko lang ang estranghera na 'to sa loob ng pamamahay ko!' depensa niya sa sariling isipin at ipinilig nang bahagya ang ulo.
Napatingin siyang muli sa babae at humihiga na ito sa kaniyang kama. Sa tantiya niya ay nakatulog na ito wala pang isang minuto ang nakalipas matapos itong humiga. Bahagyang napailing at napangiti na lamang nang maliit nang maisip na panatag ang babae sa kaniyang kama.
'Aba! Ang bilis n'yang nakatulog, a! At home na at home.'
Pero mabuti na lang din at nakatulog na ito dahil kanina pa ito nag-iingay gamit ang gitara. Mabuti na lamang at hindi pa sumusugod sa kwarto niya ang kapatid dahil sa ingay, kung hindi ay baka makita ng kapatid ang babaeng ito.
Wala sa plano niya ang makita ng kapatid na may babae sa kaniyang kwarto sa kalagitnaan ng gabi. Baka kung anu-ano na naman ang isipin ng batang iyon. Noong huling beses na may sumabay na babae sa kaniya hanggang sa tapat ng bahay nila ay inisip ng kapatid na nobya niya ang babaeng iyon at nagdrama na ang kaniyang kapatid. Na kesyo hindi niya na raw ito mahal dahil ang kasintahan na niya ang kaniyang mahal. Kesyo may iba na siyang aalagaan. Na iyong babaeng iyon na raw ang prayoridad niya. Kung anu-ano ang iniisip ng kapatid at pawang mga wala namang katotohanan.
Isa pa, wala talaga sa plano niya ang magkita ang dalawa. Dahil ang plano niya ay bukas na bukas, paaalisin na niya ang babaeng ito. Kesohodang pakiusapan niya ito, kaladkarin (kung kaya niya, mukhang malakas ang babaeng ito), o iligaw. Ano mang paraan basta mapaalis niya ito sa bahay nila at huwag makita ng nakababatang kapatid.
Wala pang limang minuto mula nang magpasya siyang matulog ay muli na naman siyang nakarinig ng tipa ng gitara. Bigla, ay napabangon siya sa kaniyang hinihigaan. Napansin niyang nagulat niya ang babae dahil napahinto ito sa ginagawa sa gitara.
Dere-deretso siya sa babae at hinablot ang gitara mula rito. "Huwag mo munang gamitin 'to. Ang ingay! Matulog ka na," medyo inis na sambit niya. Masyado nang malalim ang gabi at pagod na siya, ngunit ang babaeng ito ay nagsisimula na namang mag-ingay. Ni hindi pa nga siya nakaiidlip.
Isinandal ng binata ang gitara sa gilid ng kaniyang tokador.
Pahiga na ulit siya sa sahig ng kaniyang kwarto na nilatagan niya ng kumot nang mapatingin siya sa mukha ng babae. Kahit hindi magsalita ay sinasabi ng mga mata nito ang lungkot nito dulot ng pagkuha sa kan'ya ng gitara.
Napabuntong hininga na lamang ang binata.
"Ibibigay ko ulit sa 'yo 'to bukas," sambit niya habang marahang tinapik ang gitarang nakasandig sa tokador malapit sa hinihigaan niyang parte ng sahig.
Nahuhulog na siya sa malalim na pagtulog nang may maulinigan siyang tunog ng gitara. Sa sobrang pag-iisip niya sa babae at pag-aalalang baka makita ito ng kapatid ay napapanaginipan na rin niya ang tunog ng tinutugtog nitong gitara.
Mabilis siyang napabalikwas nang ilang sunod-sunod na kalabog sa kabila ng kaniyang pinto ang gumulat sa papahimbing na sana niyang diwa.
"Kuya, ano ba?! Wala ka bang balak matulog?! Kanina ka pa gitara nang gitara d'yan! Aarh!" Sumisigaw sa inis at patuloy na kumakalampag sa labas ng silid niya ang kaniyang kapatid.
Tinignan niya ang dalaga sa kaniyang kama. Halatang nagulat din ito dahil yapos-yapos na nito ang gitarang tinutugtog na kanina ay inilagay niya sa gilid ng kaniyang tokador. Medyo nakaawang din ang mga pakpak ng babae na tila nag-aabang at handang lumaban kung sakaling may kaaway na susugod sa kaniya.
Matapos maglabas ang kapatid ng inis sa harap ng kaniyang silid ay umalis na rin ito. Marahil ay babalik na sa pagtulog.
Muli niyang nilapitan ang dalaga at kinuha mula rito ang gitara sa pangalawang pagkakataon.
"Ang kulit mo, sinabi nang 'wag munang gamitin. Tsk. Mabuti na lang at di pumasok dito si Mharc. Kundi ay nakita ka n'ya," patuloy at sunod-sunod na wika ng binata habang pabalik sa parte ng sahig na hinihigaan niya kanina. Pinagsasabihan niya ang babae na animo ay naiintindihan siya nito.
Inilapag niya sa kaniyang tabi ang gitara at muling sinulyapan ang babaeng nakatitig sa gawi niya bago ipikit ang mga mata.
Napadilat siyang muli at tumingin sa babaeng hanggang ngayon ay nakatitig sa gitara. "Hindi mo ba maitatago 'yang pakpak mo? Nakaka-distract e," sabi nito na nakaturo sa pakpak ng dalaga.
Napakurap ng ilang beses ang babae at saka tinignan ang pakpak nitong itinuturo ng binata. Tila naintindihan naman ng babae ang nais sabihin ng lalaki dahil ilang saglit lang ay biglang naglaho ang mga pakpak nito na parang nagtago sa loob ng kaniyang likod.
'So, totoo nga 'yong pakpak n'ya? Hindi 'yon costume,' pangungumbinsi ng binata sa sarili. Magkahalong pagkamangha at pangamba ang kaniyang nararamdaman sa mga sandaling iyon.
Nang makabawi sa pagkagulat ay tinalikuran na nito ang babae at bumalik sa kan'yang pagtulog. Hindi pa nakalilipas ang isang oras ay ginising na naman siya ng sigaw ng kan'yang kapatid mula sa kwarto nito.
"Kuya! Ang ingay mo!" Sa wari niya ay papunta na ang kan'yang kapatid upang sugurin siya. Dali-dali siyang bumagon at ikinandado ang pinto ng kaniyang kwarto.
Hindi nga siya nagkamali dahil sinubukan nga ng kapatid na buksan ang kaniyang silid. Mabuti na lamang at naikandado niya agad ang pinto.
"Kuya!" Mahihimigan ng labis na pagkainis ang bawat sigaw ng kaniyang nakababatang kapatid.
"Oo, matutulog na. Sige, matulog ka na ulit," sagot niya sa inis na inis niyang kapatid.
Sa ikatlong pagkakataon, muli na naman niyang binawi sa dalaga ang gitara. At sa pagkakataong ito ay pinukolan na niya ng matatalim na tingin ang babae. Marahil dala ng sobrang hapo at antok ay tila panandaliang nawala ang kaniyang takot tungo sa babae at nagkaroon ng lakas ng loob upang tignan ito nang masama.
'Ang cute niya.' Habang nasa dalaga ang mga mata, wala sa sariling turan niya sa kaniyang isip nang biglang ngumuso ang babae sa muli niyang pagkuha sa gitara mula rito.
Yapos-yapos ang gitara ay bumalik sa pagtulog ang binata. Kagaya kanina, kinukuha na naman pabalik ng dalaga ang gitara. Ngunit dahil yapos niya ang bagay na iyon ay nararamdaman niya ang pagkuha nito.
Bahagyang idinilat ng antok na antok na binata ang kaniyang isang mata. Tanaw niya mula sa hinihigaan ang orasang nakasabit sa dingding ng kaniyang silid.
'4am,' mahinang sambit ng binata nang masilayan ang oras. Kaya naman pala inis na inis na ang kaniyang kapatid dahil mag-uumaga na ay hindi pa rin sila nakatutulog nang maayos.
"Sha-Sha," mahinang turan ng dalaga.
Bahagyang napaungol ang binata kasabay ng mariing pagpikit ng mga mata dala ng pagkainis at kagustuhang matulog na nang tuloy-tuloy.
Binitiwan niya ang gitara at sinipa palayo saka niya biglang kinabig pahiga ang dalaga. Idinantay niya rito ang kaniyang kanang braso at binti upang pigilan ito sa muling pagbangon.
"Matulog na tayo," wika ng binata sa tonong nagsusumamo. Talagang pagod at antok na antok na ito. Habang ang babae sa ilalim ng kaniyang braso at binti ay taimtim na nakatitig sa gitarang sinipa niya kanina.
Bago siya mahulog sa malalim na pagtulog ay narinig niya pa ang katabi na muling binanggit ang salitang Sha-Sha.