*-*-*-*-*-*-*-*
(iv)
-------------------
Lumipas ang ilang araw at biyernes na naman. Halos tatlong subject lang yata ang mayroon kami ngayong araw dahil halos kadalasan kasi ay hindi na pumapasok ang mga teacher. Tinatamad yata dahil sa kaunting bilang ng estudyante.
Matapos ng huling encounter ko kay Ace ay hindi ko na siya nakita pa ulit. Mas mabuti na rin 'yon. Kumukulo lang ang dugo ko sa kaniya. Nakakainis siya at ang kahanginan niya.
"Oy, may naghahanap sa 'yo sa labas."
Napatingin ako kay Stella nang sabihin 'yon. Nginitian ko siya bago isinilid sa bag ang librong binabasa.
Paglabas ko sa pintuan ay isang pigura ng tao ang sumalubong sa 'kin. Bahagyang nakasandal sa pader at nakatingin sa sahig. Gulo gulo na naman ang buhok at nakabukas ang polo na suot kaya nakikita ang puting T-shirt nitong panloob.
Akmang paalis na sana ako nang mag-angat ito ng tingin. Tumayo ito ng tuwid at nginitian ako. Bahagya siyang kumaway. Hindi ko siya pinansin at tinalikuran na lang. Hindi ko alam kung anong dapat i-react sa harap niya.
"Wait, may gusto lang akong sabihin."
"Ano?"
Umatras siya nang bahagya sa sinabi ko. Natakot yata sa tono ng pananalita ko.
"Pwede bang 'wag dito? Pinagtitinginan kasi tayo."
Napairap na lang ako at sumunod sa kaniya. Totoo ngang nakatingin na pala sa 'min ang ilang mga grade 10. Kaunti lang kasi ang nakakaalam na si Ace ang tinuturuan ko sa ngayon, kaya siguradong nagtataka silang makita na magkasama kami. Na may kasama at kausap ako.
Huminto siya sa Math Garden na intersection lang naman ng grade 9 and 10 building. Iginiya niya ako paupo habang nakangiti.
"Ano bang sasabihin mo?"
"Okay. Nakalimutan kong busy ka nga pala lagi. Ano kasi,"
Hindi ko alam kung nahihiya ba siya o ano. Bahagya itong tumikhim at tumayo nang maayos.
"Ano?"
"Excited."
Bulong nito. Tatalikod na sana ako ulit para umalis nang magsalita ulit siya.
"Sorry."
Mahinang sabi nito. Nilingon ko siya at pinagtaasan ng kilay. Napatikhim ulit siya.
"Hindi ko naman alam na pikunin ka pala eh. At saka, nilalamon ako ng konsensya ko. Geez, nakakahiya 'to."
"Okay."
Seryosong sabi ko. Tiningnan ako nito nang nagtataka.
"Okay?"
Pag-uulit nito sa sinabi ko. Tumango ako bago sumagot.
"After lunch, maghihintay ako sa library."
"Wait, tuturuan mo na ulit ako?"
Hindi ko na siya sinagot at dumiretso na lang sa faculty room para kausapin si Ma'am Aydalla.
Masayang masaya siya nung sinabi kong tuturuan ko ulit si Ace at joke lang yung sinabi ko nung isang araw. Tumawa lang siya at tuwang tuwa talaga.
"Si Ace pala yung tinuturuan mo?"
Pang-uusisa ng isa kong kaklase habang nag-aayos ako ng gamit. Malapit na rin kasi ang lunch.
"Oo."
Tipid na sabi ko saka siya saglit na tiningnan. Hindi na ulit ito nagtanong pa at kinuha na lang ang bag niya saka nagpaalam sa 'kin, eksaktong pagtunog ng bell. Senyales na lunch time na.
--------------------
"Hunyo."
Napatunghay ako at napatingin kay Ace nang umupo ito sa harap ko. Nakangiti na naman ito habang ang buhok ay gulo gulo at hindi nakaayos ang suot na polo.
"Hunyo?"
Takang tanong ko. Natawa siya at nangalumbaba habang nakatingin sa 'kin.
"Oo? Hindi ba, June Rye Romero ang buong pangalan mo? June as in Hunyo."
Pagpapaliwanag nito. Hindi na lang ako umimik. Sa halip ay binuklat ko ang math book na dala.
"Pwedeng magtanong?"
"Ano?"
Walang buhay na tanong ko habang hindi siya tinatapunan ng tingin.
"Nakakita ka na ba ng pagong na ubod ng sungit?"
Tiningnan ko siya at pinagtaasan ng kilay. Hindi ko makuha ang pinagsasabi ng taong 'to.
"Ano?"
"Ikaw 'yon."
Natatawang sabi nito.
"Okay."
Sagot ko. Natigil siya sa pagtawa at nagtataka akong tiningnan. Mukha siyang dismayado sa sagot ko. Siguro iniisip niyang mapipikon ako sa simpleng banat niyang gano'n.
Sa huli, wala siyang ibang nagawa kundi ang makinig sa mga pinagsasabi ko. Halos patapos na rin ang lunch break at nakita kong pabagsak na ang mata niya. Siguro ay hindi sanay sa matagal na pakikinig at pag-upo lang na hindi dumadaldal. Tinitingnan ko kasi siya nang masama sa tuwing binabalak nitong magsalita. Tatagal lang kasi at mapapahaba at bukod pa ro'n, nasa loob naman kami ng library. Baka mapalabas kami nang wala sa oras dahil sa ingay.
"Time na. Hays, feeling ko naubos yung kinain ko kanina."
Reklamo nito habang humihikab at sumandal sa upuan niya. Pumikit siya habang inaayos ko naman ang mga gamit ko. 15 minute bago ang first subject namin nang magpasya akong ipagpatuloy bukas. Tingin ko naman ay may natutunan siya kahit kaunti. Siguro kung sa buong libro ng math book, isang page pa lang ang alam at nakukuha niya.
"Kailan pala ang next session natin?"
Tanong pa nito. Tiningnan ko ang relo ko at nagkibit balikat. Hindi ko naman kasi alam at isa pa ay medyo magfo-focus din kasi ako sa pag-aaral. Tiyak na mas hihirap ang lessons ngayon.
"Ganito na lang."
Kumalkal siya sa bag niyang mukhang wala naman yatang laman. Inilabas niya ro'n ang isang malaki at mamahaling touch screen na cellphone.
"Anong gagawin ko riyan?"
"Ah? Save mo number mo?"
Patanong nitong sabi habang hawak pa rin ang cellphone niya. Umiling lang ako.
"Wala akong cellphone."
Tipid na sabi ko. Tiningnan niya ako na parang gulat na gulat at saka ngumiti.
"Hindi ka binibilhan ni tita?"
Pang-uusisa pa nito. Nagtataka ko lang itong tinignan.
"Tita?"
"Oo?"
Pinagtaasan ko siya ng kilay. Hindi ko alam kung bakit ang weird ng mga tanong niya at ewan kung saang lupalop niya napulot 'yon.
"Sino 'yon?"
Tanong ko na tinutukoy ang 'tita' na sinasabi niya.
"Yung nanay mo?"
Patanong ulit na sabi niya. Umupo siya nang maayos at ibinulsa ang cellphone niyang malaki. Tinaasan ko lang siya ng kilay habang nakakunot ang noo. 'Tita niya si Mama?'
"Pinsan kita?"
Natahimik siya at walang kurap na nakatitig sa 'kin. Hindi siya kumikibo at hindi ko alam kung bakit at anong gimik niya. Hanggang sa tumawa siya nang malakas. Akala mo ay end of the world na.
Nakahawak pa ito sa tiyan niya. Napairap na lang ako. Wala namang nakakatawa sa sinabi ko.
"Shhh."
Isang malakas na palo sa mesa ang narinig namin at sabay kaming napatingin sa Librarian na masamang nakatingin sa kaniya.
"Okay okay, sorry."
Natatawang sabi nito habang nakataas ang dalawang kamay bilang pagsuko kuno.
"Grabe. Hindi ko alam na ganiyan ka ka-slow. Imagine, yung pinaka matalino ganiyan ka lowgets? Balita 'to dapat."
Manghang saad niya habang pailing-iling pa. Hindi ko na lang pinansin.
"Ang ibig kong sabihin, hindi kita pinsan. Paggalang lang 'yon sa nanay mo."
Paliwanag pa nito.
"Okay."
Tanging nasabi ko na lang. Kahit hindi ko naman alam kung anong pinagsasabi niya. Natawa ulit siya pero pinigilan niya kahit papaano.
"Pupunta ka na ba sa room niyo?"
Tumango lang ako bilang sagot saka isinukbit sa balikat ang bag ko at binitbit ang mga libro.
"Pwede bang sumabay sa 'yo?"
Nagkibit balikat lang ako at sabay na kaming lumabas ng library. Habang hindi pa rin siya tumitigil sa kadadaldal.
"Seryoso, wala ka ba talagang cellphone?"
"Wala."
"Bakit wala?"
Sunod niyang tanong.
"Distractions. Ayoko."
Tumango tango siya at humikab ulit. Animo'y walang pakialam sa paligid niya. Nag-unat pa ito ng braso.
"Ganiyan ka ba talaga?"
"Bakit?"
Balik tanong ko at tiningnan siya. Nakatingin din siya sa 'kin. Umiling lang ito at bumulong ng kung ano. Hindi ko na lang pinansin pa.
"Gusto mo bang ihatid kita sa classroom niyo?"
Tanong ulit nito habang nasa tapat na kami ng Math Garden. Kaunting minuto na lang ay magsisimula na ang klase kaya umiling ako. Baka ma-late siya sa klase nila at isa pa ay hindi niya naman obligasyon na ihatid pa ako. Baka napipilitan lang din siya at bukod pa ro'n ay hindi naman ako bata na maliligaw pa kaya kailangang ihatid.
"Ayaw mo?"
Tumango ako. Napabuntong hininga na lang siya habang ako ay tumalikod na at hindi na siya nilingon pa. Narinig ko pa ang sinabi nitong
'See you next time'.