ARKISHA
Nakarinig ako ng mga bulungan, may pakiramdam din ako na may mga matang nakatingin sa'kin kaya naman bigla akong dumilat para makita kung sino sila.
Napahawak ako sa dibdib ko dahil may ilang tao ang nasa loob ng silid na ito at mukhang pinagmamasdan nila ang pagiging sleeping beauty ko. Sa tantiya ko ay mga edad anim hanggang sampu ang anim na batang bisita ko ngayon.
Napaatras din sila mula sa akin, malamang ay nagulat sila nang bigla akong dumilat. Nabaling ang tingin ko kay Anissa nang humagikgik ito.
"Oh 'di ba sabi ko sa inyo maganda siya?" nakangiting pagbida ni Anissa sa mga batang kasama niya.
Uminit naman ang pisngi sa pagmamalaking nasa boses niya.
"Oo, parang siya yung inilalarawan sa kuwento ni Apo Laya, yung prinsesang natulog ng matagal na panahon bago nakita ng itinakda para sa kanya!" masiglang sagot ng batang babae na medyo may katabaan.
"Oo nga! Ang ganda niya! Mukha siyang prinsesa! Mukhang bagay talaga sila ni Dok Aki!" dagdag naman ng batang lalaki na medyo mahaba ang buhok.
Napaubo naman ako nang marinig ang sinabi nito, ang taong yelo na 'yon bagay sa'kin? Eh mukhang galit sa mundo ang isang 'yon eh!
"Gawis ay agew Ate Arki!" napangiti ako nang sabay sabay silang bumati sa akin, kahit hindi ko naintindihan ay pakiramdam ko mabuti ang sinabi nila kaya gumanti ako ng ngiti.
Pinilit kong umupo kahit medyo masakit pa ang mga sugat ko, inalalayan naman ako ng mga bata nang makitang nahihirapan ako.
"Thank you... good morning sa inyo!" nakangiti kong bati na nagpanganga lalo sa kanila.
"Pati ang boses niya maganda Issa, tao ba talaga siya o diwata?" wika ng isa pang batang babae na nakapusod ang buhok at may malaking mga mata, natawa ako sa sinabi niya, ako diwata? Eh sa paningin ng ibang tao eh engkanto ako o kaya may sapi.
"Hi! Ako nga pala si Arkisha Rose, Ate Arki na lang tutal mukha naman kayong mababait. Anong ginagawa niyo rito? Nasaan yung doktor na masungit?" nakangiti kong tanong sa kanila.
Nagkatinginan sila at naghagikgikan, "Naku Ate Arki ipapakilala ko po sa'yo ang mga kaibigan ko, siya po si Islaw, si Likha, Domeng, Aya, at si Carina po," pagpapakilala ni Anissa sa mga kaibigan niya.
"Hello sa inyo, salamat sa pagbisita at pagsilip sa'kin,"
"Ang ganda niyo po talaga Ate Arki, mukhang may katunggali si Ate Mutya sa atensyon ni Dok Aki!" wika ng batang lalaki na si Likha na ikinakunot ng noo ko, nababaghan ako sa mga sinasabi ng mga bata at hindi ko masundan ang pinag-uusapan nila.
Ni hindi nga ako nginingitian ng doktor na 'yun kaya paano nila nasasabi ang mga bagay na ito?
"Sadyang masungit po sa mga dayo si Dok Aki, pero mabait po siya, siya nga po ang palaging tumutulong dito sa amin, mukhang siya rin po ang papalit kay Apo Laya kapag nagretiro na po ito," paliwanag naman ng chubby na batang babae na si Aya.
"Kaya kailangan niya nang mag-asawa, naku mukhang bagay po kayo ni Dok Ate Ar-" natutuwang wika ni Carina pero naputol dahil may tumikhim ng malakas.
Nakatayo na at nakasandal sa hamba ng pinto ang doktor na pinag-uusapan namin. He have that amused reaction dancing in his brown eyes. Hindi siya nakangiti pero ang mga mata niya ay mukhang masaya habang nakatingin sa mga bata.
"Anong ginagawa niyo rito? May mga sakit ba kayo? Tara rito nang maturukan ko na kayo," nakangisi niyang turan na ikinalaki ng mga mata nila at mabilis na nagtakbuhan palabas ng klinika. Naiwan si Anissa na malaki ang ngiti habang pinaglilipat-lipat ang tingin sa amin.
"Ikaw Issa gusto mo bang maturukan?" tanong ni Aki at lalapit na sana kay Anissa pero mabilis na tumakbo ang bata sa akin at niyakap ako.
"Alam kong hindi mo gagawin 'yan Dok Aki, gusto ko lang po talagang makita si Ate Arki," tumingin sa akin si Anissa at ngumiting muli, "Ate pwede po bang dito ka na lang po sa amin? Gusto ko po kasing magkaroon ng ate..." biglang lumamlam ang mga mata nito.
Hinagod ko ang ulo niya at ngumiti, "Kailangan ko kasing umalis Issa eh, may kailangan akong puntahan sa Kalinga. Pero promise babalik ako dito bago ako bumalik ng Maynila,"
"Pero kung mambabatok po ang hinahanap mo ay mayroon din po kami rito, 'di ba po 'yon ang ipupunta mo sa Kalinga?"
Hindi ako makasagot at napatingin kay Aki na hindi ko mabasa ang isip dahil walang reaksyon nanaman ang mukha.
"S-sige Issa pag-iisipan ko ayos ba 'yon?" tanong ko habang hawak ang chubby niyang pisngi.
Ngumiti ito ng malawak at muli akong niyakap bago sumunod sa mga kaibigan niya. Inilihis ko ang tingin ko mula kay Aki at sinubukang tumayo pero agad kong naramdaman ang mainit na palad sa aking braso. Saglit kaming nagkatitigan, yung mga mata niya bakit gano'n? Parang nangungusap? Kung kanina hindi ko siya mabasa, ngayon naman may mga emosyon siya na hindi ko maintindihan...
Hindi ko man lang nagawang makakilos nang nauna siyang bumitaw sa akin, sa kabiglaanan ay natumba akong muli at ngayon ay tumama ang pang-upo ko sa sahig, 'Damn you!' pagmumura ko sa kanya sa isip ko.
"A-aray..." pag-arte ko pero hindi man lang ako nilingon ng damuhong iyon. Tuloy tuloy lang siyang lumabas at mula sa kuwarto ay naririnig kong nakikipag-usap siya sa mga babae sa labas ng clinic.
Pinilit kong tumayo at sumilip ako sa labas, napatanga ako nang makita ko siyang nakangiti, hindi ko maintindihan ang usapan pero nakikita ko ang kilig ng mga babae habang kausap ito.
Napaismid ako, kung alam lang ng mga ito kung gaano kasungit ang lalaking kausap nila ay baka di nila magawang makipagngitian, ungentleman pa!
Inalis ko sa kanila ang tingin ko at inilibot sa klinika, maliit lamang ito pero maayos at malinis. Mas malaki pa ang kuwarto ko sa mansyon pero mas malinis at organized ang itsura nito kesa sa kuwarto ko. Mahilig kasi akong magbasa kaya puno ng libro ang kuwarto ko.
Nadako ang tingin ko sa dingding at nakita ang sandamakmak na certificates niya, pero ang naka-agaw ng pansin ko ay ang diploma niya na napapalibutan ng iba't ibang litrato ng mga ka-tribo niya.
Wala sa sariling napahawak ako sa diploma, I smiled when I read that he's Summa cum Laude, I envy him, looks like he's indeed a nerd, he even topped the Board Exam!
"Dakila Akio Corpuz... Corpuz?" napakunot-noo ako nang mabasa ang apelyido niya, parang pamilyar...