Theo's POV
Mahal ko siya. Hindi ko alam kung paano at bakit ko naramdaman ito. Siguro ay hindi naman mahalaga kung may rason ka sa pagmamahal. Basta bigla ko na lang itong naramdaman sa kanya. 'Yung tipong nahahawa ako sa mga ngiti niya. Nababaliw ako kapag hindi ko siya nakakausap. Naiinis ako kapag nakikita ko siyang malungkot o umiiyak. Hindi ako mapakali kapag hindi ko siya nakikita. Naiisip ko ang buhay ko kapag kasama ko siya. Malakas ang tibok ng puso ko kapag naririnig ko ang pangalan niya o kaya'y malapit siya.
Sapat na bang rason iyon para masabi kong mahal ko siya? Ganun ba kapag nagmamahal ang isang tao? Kasi sa totoo lang, kaunti pa lang 'yan sa mga nararamdaman ko sa tuwing kasama ko siya.
Nakilala ko si Cleo nang tumuntong ako sa kolehiyo. Accountancy ang kinuha kong kurso. Block mates kami. Nasa unahan siyang row samantalang nasa pinaka-likod naman ako. Unang araw ko sa kolehiyo at syempre puro introduce yourself ang ginawa namin. May dalawang subject ako noon at siya ang parating nauuna sa pagpapakilala. Cleo Alisha Liquigan daw ang kanyang pangalan. Malaking advantage sa akin na nasa likod ako at napagmamasdan ko siya sa harap. Kahit likod lang niya at ang kanyang mahabang ash na buhok ang nakikita ko ay ayos na ako.
Kinwento ko kaagad kay Kuya Stanley iyon. Sa kanya ako madalas nagsasabi. Ayokong tuksuin ako ng kambal kong si Shey kung sakaling sa kanya ako magsabi. Paniguradong sasabihin niya iyon sa pinsan naming si Chace at sa mga magulang ko.
"Crush mo ba?" Iyon ang tanong ni Kuya Stanley sa akin nang ikwento ko.
Crush nga ba ang tawag dun? Oo, siguro. Kasi maraming kinukwento sa akin si Shey tungkol sa mga crush niya. Tumango ako kay kuya.
"That's normal, bro. Make her an inspiration to your studies. Hirap pa naman ng kinuha mong course." Tawa niya.
"Pero inspiration ko naman ay kayong family ko."
Nagtaas siya ng kilay. "Bakit ako? Inspiration ko rin kayo noon hanggang ngayon. It's just that, she's my real inspiration now." Ang kanyang girlfriend ang tinuran niya.
"Do I need to tell her?"
"It's up to you, Theo. Crush pa lang naman 'yan. Malay mo may makita kang ibang babae. And I know girls. Iiwasan ka nila kapag nalaman nilang may crush ka sa kanila." Tumawa ulit siya.
Kaya ang ginawa ko ay tinago ko sa sarili ko ang nararamdaman kong iyon. I met some friends. Block mates ko rin sila. At maswerte na sigurong matatawag dahil kasama sa grupo namin si Cleo. Ako, si Cleo, Dean, Dale, Troy, Celine, Hazel, at Lyra ang naging magkakaibigan at magkakasama.
"Crush ko talaga si Zed e. Kaso ikaw yata ang gusto nun, Cleo." Dinig kong usapan ng mga girls nung nasa room kami. Hindi dumating ang prof kaya nagtambay na lang kami dito.
"Nililigawan na nga yata siya e." Siniko ni Hazel si Cleo.
"Hindi no. Bestfriend sila ni Kuya Clint kaya palagi siyang nasa bahay, close na rin kami." Paglilinaw ni Cleo.
Medyo nakahinga ako ng maluwag. I know Zed Roces. Palagi nga siyang kasama ni Clint Axell, ang kuya ni Cleo. Kasali sila sa basketball sa kanilang department. Sina Dean at Troy ay kasali rin sa basketball ng aming department pero kaming dalawa ni Dale ay hindi sumali. Hindi kami mahilig sa larong iyon pero alam namin kung paano laruin.
"Pero diba crush mo rin siya? Naku! Kung ako ikaw, araw araw akong kikiligin." Tumawa silang girls.
Inayos ko ang salamin ko at umupo ng maayos.
"Oy! Oy! Lalaki na naman pinag-uusapan ninyo!" Singit ni Dale sa usapan.
"Bakit? Inggit ka? Gusto mo ikaw pag-usapan namin?" Umirap si Celine.
"Crush mo si Zed?" Sumingit na rin ako sa usapan ng mga girls.
Lahat sila ay napalingon kay Cleo. Tumingin naman siya sakin at namula ang kanyang pisngi.
"Oo..." Nahihiya niyang sabi.
Parang may tumusok sa puso ko. Inaasahan kong hindi ang magiging sagot niya. Pero ano pa bang magagawa ko? Si Zed ang gusto niya at hindi ako. Kaibigan lang ang turing niya sa akin.
"Ouch, bro!" Tinapik ni Dale ang balikat ko.
Sinapak ko siya. Mabuti na lang hindi iyon napansin ng mga babae dahil naghihiyawan na sila sa kilig.
"Paano kung ligawan ka?" Tanong ni Lyra.
"Malabo 'yun no." Ngumiti si Cleo.
"Cleo, kanta ka na lang. Lalaki na naman topic n'yo!" Sabi ni Dean saka kinuha ang gitarang dala niya.
"Ay sus! Kapag kayo pinag-uusapan mga girls, hinahayaan namin kayo." Sabi ni Celine.
"May nasasaktan na kasi." Makahulugang sabi ni Dean.
"Sino?" Tanong nila.
Sinamaan ko ng tingin si Dean pero hindi man lang siya tumingin sa akin. Tumawa lang siya at nag-umpisa ng tumugtog ng gitara.
Tanging ang mga boys lang ang nakaka-alam na may gusto ako kay Cleo. They're boys. Nahalata nila agad ako kaya hindi na ako naglihim sa kanila. But they were just quiet about it. Iyon nga lang, kapag nag-aasaran, minumuntik nila ako.
Second year na kami. 2nd sem of first year nang mabalitaan naming nililigawan na nga ni Zed si Cleo. Mas naging close kami ni Cleo at sa akin siya nag-oopen up. Hindi ko alam kung nagsasabi din ba siya sa mga girls. Panigurado? Babae sila.
Sa akin siya nagsasabi ng problema. Sa akin siya umiiyak. Sa akin siya nanghihingi ng advices. At sa araw araw naming pagsasama, sobra sobra ang pagpipigil ko sa tuwing sumasama si Zed sa amin. At kung minsan ay inaagaw niya si Cleo sa tabi ko. Ano bang magagawa ko? Siya ang manliligaw.
May group study kami ngayon sa bahay nina Dean. Wala kasi ang parents niya kaya doon kami matutulog. Saturday naman at wala kaming pasok. Malapit na kasi ang prelim exams namin at nakagawian na namin na magkakasamang mag-review. Nagawa na rin namin mag-group study sa bahay. Simula kasi nung nagkaayos na sina mommy at daddy ay bumalik na kami sa bahay ni daddy.
Habang nagtatali ako ng sintas ng sapatos ay may kumatok sa pintuan ng kwarto ko. I'm sure it's Shey. Nagpapatulong kasi siya sa isang project niya.
"Theo, I'll come in." Aniya at binuksan ang pintuan. Pumasok siya at tumabi sa akin sa kama. "Saan ka pupunta? I told you na tulungan mo ako!"
"Shey, kaya mo na 'yan. Aalis ako."
"Saan ka nga pupunta?" Naririnig ko na sa boses niya ang pagbusangot niya.
"May group study kami kina Dean."
"Kina Dean? Pwede sumama?" Nagningning ang mga mata niya.
"May project ka diba? Saka tigilan mo na nga si Dean, may nililigawan na 'yun!" Sabi ko.
"Crush lang naman!" Tumawa siya. "Kay Kuya Stanley na nga lang ako magpapatulong o kaya kay Chace!"
"Kay Chace na lang, Shey. Baka busy si kuya." Tumayo na ako at kinuha ang bag ko.
"Oo na! Tss. Nagpaalam ka na ba kina mommy?"
"I'm not like you na magpapaalam kapag nakabihis at paalis na." Inirapan ko siya.
"Whatever, Theo! Bastedin ka sana ni Cleo!"
Nalaglag ang panga ko. Binalak ko na rin kasi na magtapat ngayon kay Cleo. I don't care kung nanliligaw na si Zed sa kanya. Pwede naman ako manligaw din at bahala na si Cleo kung sinong sasagutin niya.
"Huh! I caught you! Ang galing ko talaga!" Pumalakpak siya.
"How did you know?"
"It's obvious, Theo. Palagi kitang nakikita kasama si Cleo. Tapos todo pabango ka ngayon? Ayieeeh!"
"Bakit? Masama bang magpabango?"
Tumawa pa siya lalo. "Torpe ka pala, Theo?"
"Ewan ko sayo, Shey! Labas na! Aalis na ako!"
Tumatawa siyang lumabas ng kwarto ko. Nagpaalam na ako kina mommy at daddy. Pinapayagan nila ako sa mga sleep over samantalang si Shey ay hindi pa. Sa september 20 ay magde-debut na siya. Gustuhin man niyang maghanap ng escort ay hindi pwede dahil ako ang kakambal niya at birthday ko rin iyon kaya ako ang escort niya. Kahit na busy ako kay Cleo ay binabantayan ko pa rin siya. Hindi ako pumapayaga na may manligaw sa kanya pero hinahayaan ko siyang magka-crush at sa akin pa siya nag-oopen.
Nilabas ko na ang susi ng motor ko. Gusto ni daddy, bilhan na ako ng kotse pero umayaw ako. Ang sabi ko, kapag 21 na ako o kaya ay next year. Si Kuya Stanley ang may kotse na. Sumasabay sa akin si Shey kapag pumapasok kami. Pati siya ay nagde-demand na ng kotse pero hindi naman siya ang masusunod.
Nag-drive na ako papunta kina Dean. Kinakabahan ako. Nagpatulong na ako sa mga kasama ko at kahit ang mga girls ay alam na. Tahimik naman sila at bigla silang nag-divert sa akin. Ako na ang sinusuportahan nila imbes na si Zed.
Pagkarating ko sa bahay nina Dean, halos kasabayan ko lang din sina Troy na sinundo ang mga girls.
"Naiinis talaga ako kapag nakikita ko motor mo, bro. Sawa na ako na sa kotse. Ayaw naman ni dad mag-motor ako." Sabi ni Troy pagkalabas niya sa kanyang sasakyan.
Ngumisi ako. "Kotse pa lang kasi ang bilis mo na magpatakbo. Paano pa kapag motor?"
Napalingon ako sa mga girls na lumabas sa sasakyan ni Troy. Napansin agad nila ang hinahanap ko.
"Hindi siya sumabay. May maghahatid daw sa kanya." Sabi ni Lyra.
"Sino? Si Zed?" Tanong ko.
"Prolly!"
Hindi ko na lang pinansin. Pumasok na kami sa bahay nina Dean. Agad nag-serve ng makakakain ang kanilang maid. Kakatapos lang mag-workout ni Dean nang puntahan niya kami sa sala. Dito kami nagwo-workout sa kanila kapag nagkayayaan. May mga equipments naman kasi sila. May sarili siyang gym. Mayaman e.
"Nagre-ready ka for tomorrow?" Ngisi ni Troy kay Dean.
"Anong meron?" Tanong ko.
"Inaya siya nung nililigawan niya sa apartment nila." Humalakhak siya.
Natawa na lang din ako.
"Eww!" Reklamo ng mga girls.
Ilang sandali lang ay nakarinig na kami ng sasakyan sa labas. Sabay sabay kaming sumilip sa bintana. Lumabas si Zed sa kanyang sasakyan at pinagbuksan ng pintuan ang babaeng pinapangarap ko lang. Lumabas si Cleo nang mga ngiti sa labi. Nag-usap sila at hinalikan ni Zed sa pisngi si Cleo. Napasinghap ang mga kasama ko. Hindi ko alam kung anong mararamdaman ko. Selos? Galit? Hindi ko alam.
Dire-diretso si Cleo sa pagpasok. Humalik agad siya sa mga girls. Siniko naman ako ni Dale na nasa tabi ko. Hindi ko siya tinapunan ng tingin. Umupo din si Dean sa kabilang side ko.
"What's with the kiss, Cleo? Kayo na?" Tanong ni Dean.
Hindi pa rin ako tumitingin sa kanya. Sobrang sakit lang. Kung kailan nagdesisyon na akong magtapat sa kanya, saka naman naunahan na ako. Shey was right. Torpe ako.
"Oo," nahihiyang sagot ni Cleo.
Lahat sila ay natahimik. Even the girls na dapat ay nagsisigaw na sa saya at kilig para sa kaibigan nila. What would I expect? They're torn. Magiging masaya ba sila para kay Cleo o malulungkot para sa puso kong patay na?