“THANK you so much, Frenny! Sobrang saya na nakasama kita ng ilang araw sa bahay. Gusto ko pa sana na mag-stay ka dito kaya lang kailangan mong pumunta ng university ngayon,” may lungkot sa boses ni Cheska ng banggitin nito ang huli.
“Pasensya ka na Cheska at may biglaan akong dapat asikasuhin ngayon. Hayaan mo at babawi ako bago ang araw ng pag-alis mo,” nakangiti niyang sabi.
“Aasahan ko iyan, Frenny.” Niyakap siya nito. “Ingat ka sa biyahe.”
“Salamat, Frenny,” sabi niya at nagsimula ng maglakad palabas ng gate.
Mabilis siyang nakarating ng university. Hinanap niya agad si Professor Cindy sa loob ng admin office. Mukhang napaaga siya ng punta dahil halos wala pang tao sa loob. Lumabas muna siya saglit. Palinga-linga siya sa paligid at nagbabakasaling makita o masalubong ang dahilan ng kanyang pagpunta. Pinag-isipan niyang mabuti na mag-quit na lamang sa offer ng eskwelahan na i-monitor ang lalaking sobrang yabang. Tutal mayaman naman ito at tiyak na makakahanap agad ng maipapalit sa kanya. Pipilitin niyang makakuha ng part-time na trabaho kahit saan para masuportahan ang pag-aaral niya. Ayaw niya na rin ma-stress ang Lolo at lola niya kung kaya’t siya na mismo ang gagawa ng paraan para sa kanyang mga pangangailangan.
Sa di kalayuan ay nakita niyang papunta sa kanyang direksyon ang tatlong lalaki na nag-uusap habang naglalakad. Bumangon muli ang kanyang inis dahil sa lalaking nasa gitna na sobrang yabang ultimo sa paglalakad. Maririnig mula sa malayo ang mga tili ng mga babaeng nakakasalubong at nakakasabay nito. Kung todo naman ito ngiti sa pagbati na akala mo sobrang bait. Napakunot-noo siya sa isiping pagbabalot-kayo lamang ang ipinapakita ng lalaki sa ibang tao lalo na sa mga babaeng humahanga dito.
“Naku! Kung alam lang nila ang totoong ugali ng Dion na yan!” pailing-iling pa siya.
“Hey kitten! Hinihintay mo rin ba ako?”
Nabaling ang pansin niya sa boses na iyon at ng lumingon ay halos magkalapit na sila ng lalaki.
“Bakit naman kita hihintayin?” tugon niya dito.
“Well, kanina pa kasi kita napansing nakatingin sakin. Kaya huwag ka ng mahiya na aminin,” anito at saglit na hinawakan at pinisil ang ilong.
“Sorry ha? Nagkakamali ka sa iniisip mo.” Pagkasabi niya ay tumalikod na siya at nagsimula ng maglakad palayo dito.
“Hey!” sigaw nito. Hindi niya ito pinansin“Gusto ko lang malaman niyo na ang babaeng iyan ay patay na patay sa akin. Ayaw niya lang aminin pero lagi niya akong sinusundan kung saan man ako magpunta.”
Napatigil siyang humakbang ng marinig ang malakas nitong sinabi. Palalampasin niya ang nangyari sa fast food dahil kasama niya ang kaibigan ngunit nag-igting pa lalo ang inis at galit niya sa ginawa nito ngayon. Hindi niya hahayaang bastusin siya nito sa harap ng maraming tao. Dahan-dahan siya pabalik sa kinaroroonan ng lalaki at nakita niya ang mala-aso nitong ngiti.
“So, aaminin mo na ba na gustong-gusto mo ako? Come on, huwag ka ng mahiya…” natigil ito sa sasabihin ng malakas na lumagapak sa pisngi nito ang kamay niya.
Kahit matangkad ito sa kanya ay pilit niyang masampal ito para matigil na ang sasabihin.
“Wala akong gusto sa iyo. Itatak mo iyan sa isip mo.” aniya. Akma siya nitong hahawakan sa damit ngunit mabilis siyang nakaiwas. Nilapitan niya ulit ito at walang alinlangang tinuhod sa gitnang bahagi ng katawan nito.
“Ahhh!” sigaw nito dahil sa sakit na naramdaman.
“Pakitandaan, Dion Wang. Hindi lahat ng babae ay magkakagusto sa isang tulad mo.” Masama niyang sinulyapan ito pati na rin ang dalawa pang kasama nito. Naging maugong ang usap-usapan ng mga taong nakasaksi sa nangyari doon.
“KUMUSTA Dion?” narinig niyang tanong mula kay tyron.
“Mukha ba akong okay?” Sapo-sapo niya ang gitnang bahagi ng kanyang katawan. Grabe ang inabot niya sa maliit na babaeng iyon! Sinubukan lang naman niya kung kakagat ito sa ginawa niya ngunit baliktad ang nangyari. Siya pa ang napasama!
“Well, hindi ko inaasahan na gagawin ni Tiffany iyon. Mukhang nagalit ng husto ang little kitten mo,” sabi ni Zack.
“For sure na-hurt iyon kaya nagawa niya sayo iyan.” Ngumiti si Tyron sa kanya.
“Bakit kasi ang tapang ng maliit na babaeng iyon? Sinusubukan ko lang naman siya,” nakasimangot niyang sabi.
“See? I’ve told you, she is very unique and special to you,” si Zack.
“Anong special doon?”
“Dude, maaaring hindi mo pa maamin ngayon pero sa tingin ko sa kanya ka lang naging ganyan.” Tinapik siya sa balikat ni Tyron.
“Anong ibig mong sabihin?”
“Alam mo ba na sa lahat ng babaeng nakilala mo ay sa kanya ka lang naging masama? I mean, hindi ka naman marunong mambastos ng babae pero pagdating kay Tiffany nawawala ang pagka-gentleman mo,” diretsong sabi ni Tyron.
“Ewan ko ba pero naiinis ako sa maliit na ‘yun!” sambakol ang mukha niyang sabi.
“I think you should apologize to her,” mariing sabi ni Zack.
“Why?!”
“Maaring alam niya ang ginawa mo kahapon that”s why nagawa niya sayo ‘yan kanina,” dagdag pang sabi ni Zack. “Nakita ko siyang nakikinig sa pinag-uusapan ng mga crew dahil sa ginawa mo.”
“Ibig sabihin mabait pa si Tiffany kasi kahit na alam na niya ang ginawa mo, hindi ka niya inaway agad. Ikaw itong nagpadalos-dalos,” sabi ni Tyron.
Napabuntong-hininga na lang siya habang nakatingin sa dalawa.