Simula
NAGMAMADALI at halos walang kurap na isinilid ni Katyarhina o "Katya" Dominique ang kanyang mga gamit sa malaking bag. Walang pag-aalinlangan at pagdadalawang isip ang kayang mga kilos. Isa lang ang tanging umuukil sa kayang isipan at iyon ay ang matakasan ang kanyang Ina na balak siyang ipakasal sa lalaking hindi naman niya mahal. 
Hindi niya tunay na Ina ang babae. Ito ay pangalawang asawa ng kayang ama na pumanaw dalawang buwan pa lang ang nakakalipas. May dalawa pa siyang kapatid sa kanyang step mom at pareho itong mga babae. Isang ka-edad niya at isang nasa limang taong gulang.
Kilala ang kanilang pamilya sa lugar dahil isa sila sa masasabing mayaman sa probinsya. Maraming natulungan ang kanyang ama at nabigyan ng trabaho kaya naman ganoon na lang ang pagdadalamhati ng lahat nang pumanaw ang kanyang ama. Lingid sa kaalaman ng lahat at ng kanyang pamilya ay may malaking problema palang iniwan ang kanyang ama. Kasabay nang biglang pagpanaw nito ay nalaman nilang mayroong itong iniwan na mga utang sa ibat-ibang kasosyo nito sa trabaho. Ang negosyo nito ay nalugi at ang kanilang mga properties ay unti-unting naibenta na lingid sa kanilang kaalaman. Ang natira na lang sa kanila ay ang mansyon na pamana naman sa kanya ng pumanaw ng Ina.
Isang linggo matapos ang libing ay nagsimulang maningil sa kanila ang mga taong pinagkautangan ng kanyang ama na labis nilang pinroblema. Wala na silang pambayad. Ang mansyon ang tanging natira sa kanila at hindi naman nila iyon pwedeng ipambayad dahil sila naman ang mawawalan ng tirahan. 
Hanggang sa isa sa kasosyo ng kanyang ama ang lumapit sa kanila at binigyan sila ng tulong upang mabayaran ang lahat ng utang ng ama ngunit may kapalit. Sa pamamagitan ng pagpapakasal niya rito na labis niyang tinutulan dahil bukod sa mas matanda ito na halos ka-edad ng kanyang ama ay hindi naman niya ito mahal. Nangako siya sa kanyang nasirang Ina na magpapakasal lamang siya sa taong mamahalin niya at mamahalin siya. Kesehodang hindi ito mayaman o kung ano pa man.
Ngunit sadyang mapilit ang kanyang step mom at siya ay sinabihang tanggapin ang tulong at ang kapalit nito para matapos na ang kanilang problema. Naipit siya sa pangakong binitawan sa Ina at sa responsibilidad na naiwan ng kanyang ama. Inaalala rin ni Katya ang kanyang mga kapatid lalo na ang bunso na wala pang kamuwang-muwang.
Naisip ni Katya na hindi solusyon ang pagpapakasal. Kung bakit siya ginigipit at hindi binibigyan ng pagkakataon para unti-unting bayaran ang mga utang ay hindi niya maintindihan. May duda siya na kaya siya ginigipit ay para makuha ng mga ito ang kagustuhan na pakasalan siya. Hindi rin naman lingid sa kanyang kaalaman na noong nabubuhay pa ang kanyang ama ay pilit din itong binibigyang suhestiyon ng mga kasosyo ukol sa pagpapakasal sa kanya.
Hindi siya kailanman pumayag kahit na iginigiit na ng ina. Kaya naman nang marinig niya ang plano ng ina na sapilitang pagpapakasal sa kanya ay napagdesisyonan niyang tumakas. Napagisip niya na iiwan din naman siya sa ere ng itinuring niyang Ina ay uunahan na niya ito. Ganoon na lamang ang kanyang sama ng loob sa babaeng itinuring niyang pangalawang Ina.
Matapos makapag-impake ni Katya ay palihim siyang lumabas ng kanilang bahay dala lamang ang kanyang mga mahahalagang gamit at iilang piraso ng mga damit. Lilisanin niya ang kinalakhang lugar upang matakasan ang masamang balak sa kanya at upang siya ay makalaya na.
Bumili siya ng ticket ng bus at sumakay papunta sa lugar kung saan malabo siyang matagpuan. Nang makasakay sa bus ay nangako siyang babalik sa lugar at saka niya haharapin ang mga utang na iniwan ng ama sa oras na siya ay may kakayanan na.
Chapter 1
"ANO PWEDE ka ba? Pansamantala lang naman habang wala ako. Hindi ka naman makikilala ni sir Valister kasi ngayon pa lang niya ako makakaharap. Hindi talaga ako makakapagtrabaho dahil alam mo naman ang sitwasyon ko Rhina," pakiusap ng kanyang kaibigan na si Julianna o Anna.
Hindi alam ni Katya kung sasang-ayon siya sa kaibigan dahil hindi naman lingid sa kaalaman nito na nagtatago siya. Simula ng makarating siya sa malayong probinsya ay isinaisip na niya na hindi siya maaaring umalis hanggat hindi humuhupa ang balita ng paghahanap sa kanya. Alam ito ng kaibigan niya kaya nagdadalawang isip siya kung papayag o hindi.
Si Anna ay isang katulong sa isang mayamang pamilya sa kanilang lugar. Nang malaman nitong nagdadalang tao ito ay bigla itong umalis ng mansyon dahil sa takot. Nasa kontrata kasi nito na hindi ito pwedeng mabuntis dahil ito ay pinag-aaral din ng mayamang pamilya. Malapit na itong magtapos sa susunod na tatlong buwan at ayon dito ay hindi na nito kakayanin pang pagsabayin ang pagtatrabaho at pag-aaral kaya naman ay pinakikiusapan siya nito para magpanggap pansamantala na "Anna" at maging katulong sa loob ng tatlong buwan. Kapag nakapagtapos na ito ay saka ito haharap sa mayamang amo para kausapin at sabihin ang totoo rito.
Hindi naman siya sang-ayon dito dahil hindi magandang solusyonan ng panibagong problema ang isa pang problema ngunit napagtanto niya na ganoon rin ang kanyang ginawa ng tumakas siya sa kanyang Ina inahan na balak siyang ipakasal sa iba.
"Paano naman ako makasisiguro na hindi ako makikilala ng amo mong iyon? Kasi Anna, mas maganda kung sasabihin mo na lang sa amo mo na nabuntis ka. Siguradong maiintindihan nila ito," wika niya rito.
Ang balisang mukha ng kaibigan ay mas lalo pang naging balisa at tila maiiyak pa. "Hindi nila ito matatanggap Rhina! Paniguradong tatanggalin nila ako sa trabaho at alam mo namang kailangang kailangan ko ang perang kinikita ko sa kanila. Maaari rin nilang itigil ang pagpapa-aral sa'kin dahil dito at alam mo ring ito na lang ang tanging pag-asa ko para maiahon sa hirap ang mga magulang ko kaya sige na naman Rhina, tulungan mo ako," nakikiusap nitong sabi at humawak sa dalawang kamay niya.
Napailing nalang siya at hindi na kumibo pa. Kahit ano naman ang sabihin niya ay hindi nito pinakikinggan. Ayaw naman niya itong sermunan dahil baka makasama ito sa bata. Hindi na nga tama ang ginagawa nitong pag-alala sa mga problema dahil nakakasama ito sa bata.
"Paano ka naman nakasisigurong hindi nila ako mahuhuli kung sakaling pumayag ako sa suhestiyon mo?"
Tila nagliwanag ang mukha nito at napangiti sa sinabi niya. "Siguradong sigurado ako! Nasa states pansamantala ang mga amo ko para magbakasyon doon ng matagal. Sa hinuha ko ay babalik sila sa araw ng graduation ko dahil nangako silang pupunta sa araw na iyon. Doon ko na rin sasabihin sa kanila ang nangyari. 
"Sa ngayon, nananatili ang bunsong anak ng mga amo ko sa mansyon at ngayon lang ito tumira sa mansyon kaya naman hindi ako nito kailanman nakita. Hindi ka rin magkakaroon ng problema sa ibang kasambahay sa bahay dahil alam nila ang sitwasyon ko at tumutulong din sila sa'kin. Pwera lang sa mga bagong kasambahay na hindi pa rin ako nakikita ddahil noong isang linggo ako umalis ng mansyon." 
Napabuntong hininga na lamang siya. Mukhang napag-planuhan na talaga ng kaibigan ang lahat at tanging siya na lang ang makakasira sa mga plano nito. Gusto niyang tulungan ang kaibigan ngunit nag-aalala rin siya para sa kanyang kalagayan.
"Paano naman ako kung ganoon? Paano kung may makakilala sa akin?" nag-aalala niyang  tanong dito. 
"Ako naman ang bahala sayo. Kung sakaling may maghanap sa iyo ay ako ang bahala at iwawala ko sila." 
Hindi siya kumbinsido sa sinabi ng kaibigan pero hindi naman niya ito maiiwan sa ere kaya pumayag na rin siya na ikinatuwa ni Anna. Tumayo ito at yumakap ng mahigpit sa kanya.
"Maraming salamat Rhina. Maraming salamat talaga! Hulog ka sa akin ng langit." 
Napangiti na lang siya sa sinabi nito. Mukhang hinulog nga siya ng langit dahil ang dami-dami niyang kailangang takasan. Sana lang ay hindi niya ito ikapahamak.