Narinig na naman niya ang pagkanta ng lalaki na wala sa tono. "Lumayo ka man sa akin at ako'y iyong limutin..."
Muntik na niyang maibagsak ang hawak na palanggana nang makitang hubad na ang polo nito. Nakatayo ito at nanuyo ang lalamunan niya habang pinagmamasdan ang muscles sa abdomen nito. Walang senyales ng taba sa katawan nito. Nakakita na siya ng maraming abs ng lalaki. Pero ngayon lang siya naapektuhan ng ganito. Nangingingi ang buong katawan niya at pinangangapusan siya ng hininga.
Sinisimulan nitong baklasin ang sinturon nito at parang nang-aakit pa habang kumakanta. Sa halip na umiwas ng tingin at tumakbo palayo o kaya ay sapakin ito para makatulog na ito nang tuluyan at di na nito ituloy ang paghuhubad ay nakatayo lang siya doon at pinapanood nito habang hinuhubad ang pantalon. It was like watching a stripper. Sa halip na mandiri siya ay parang nae-entertain pa siya. Hindi lang basta na-entertain. She was immensely enjoying it as her eyes devoured his body.
Libido alert! Libido alert!
Ito ba ang sinasabi ng kaibigan niyang si Krizzha? Na delikado daw kung kailan nagkaedad ay saka magkakainteres sa lalaki. Dahil kapag tinamaan siya, daig pa niya ang teenager. Raging hormones and all. At delikado iyon. Delikadong-delikado. Di nga lang niya alam kung kaninong puri ang nanganganib - sa kanya o sa lalaking ito.
Boxer shorts na lang ang natira dito at hinawakan nito para hubarin din. Bigla siyang natauhan at tumili. Noon lang siya tumili sa buong buhay niya. "Huwag! Huwag mong ituloy ‘yan!" utos niya.
Lumingon ito sa direksiyon niya. Then he gave her a lazy look and smile. Nataranta siya. That combination was lethal. He became charming.
Ibinaba niya ang palangganang muntik na niyang maibagsak. Tinakbo niya ang kumot na nakatupi sa tabi ng cabinet at dali-daling ibinalot ang katawan nito. Mabilis na mabilis ang tibok ng puso niya at huminga siya nang malalim nang sa wakas ay nabalutan na ang katawan nito.
"Mahiga ka na. Please."
Inalalayan niya itong humiga. Sumunod naman ito sa kanya at ipinikit ang mga mata. Salamat naman! Mas malaking gulo kung magpipilit itong magpatuloy sa striptease nito. Hindi niya alam kung paano ito iha-handle.
Nanginginig pa rin ang kamay niya nang kunin ang palangganang may tubig at pigaan ang bimpo. Ano bang ginagawa ng lalaking ito sa kanya? May mga iba namang lalaking naghuhubad sa harap niya sa public beaches pero hanggang doon lang iyon. Wala siyang nararamdamang kakaiba. But this man could make her hot all over.
Maingat niyang pinunasan ng bimpo ang mukha nito. Naglasing nga ito dahil sa babae. Na may babae itong mahal pero magpapakasal na sa iba. Iyon ay kung pagbabasehan niya ang kwentong lasing nito. Sino ba talaga ang lalaking ito? Bakit nasasaktan ito samantalang pwede naman nitong pakasalan ang kahit sinong babaeng gusto nito?
Umungol ito nang pinunasan niya ang leeg nito. "Wag mo na siyang pakasalan. Akin ka na lang. Promise. I won't leave you anymore."
"Di pwede. Kasi nangako na ako ako sa lolo ko na gagawin ko ang responsibilidad ko sa pamilya ko. Ginagawa ng pinsan ko ang responsibilidad nila. Now it is my turn." Parang baliw siya dahil sinasagot niya ang mga pakiusap nito. Mukha siyang tanga pero baka kahit siya ay kailangan din ng kausap sa buhay na haharapin niya. Kahit pa sa isang lasing.
Hinawakan nito ang kamay niya at idinilat ang mga mata. "Marry me."
Natigagal siya. Inaalok siya nito ng kasal? No. Inuutusan siya nitong pakasalan ito. Not a romantic proposal. At malamang ay iyon din ang tono ng lalaking pakakasalan niya. Kung normal siyang babae ay magrerebelde siya sa ganoong utos. Maliban na lang kung nagipit siya at walang pagpipilian.
"Yes," narinig na lang niyang lumabas sa bibig niya.
"Thank you." Umaliwalas ang ngiti nito at nakangiting natulog. Parang ang simpleng sagot niya ang nakapagpagaan ng mundo nito.
Natawa na lang siya. That was outrageous! Sinong mag-aakalang tatanggap siya ng marriage proposal sa isang estranghero? Sa isang lasing na estranghero. Parang mas lasing pa siya dito.
Iniligpit niya ang damit nito. Sa bulsa ng pantalon nito ay nakuha niya ang cellphone nito na naka-off. Marahil ay empty battery. May wallet din doon pero di niya alam kung bakit di niya sinilip para malaman kung anong pangalan nito.
No. Wala na siyang iba pang gustong malaman tungkol dito. Kahit pa ang pangalan nito. Magugulo lang ang isipan niya. Tama nang ginulo nito ang sistema niya sa isang gabi.
Nalaglag ang maliit na kahon mula sa bulsa nito. Binuksan niya iyon at napasinghap nang makita ang diamond ring. An engagement ring.
Kung ganoon ay may babae talaga itong aalukin ng kasal. Well, siya na ang babaeng iyon dahil tinanggap niya ang marriage proposal nito. Isinara niya ang kahita at ipinatong sa mga damit nitong itiniklop niya.
Inilabas niya ang natitira pa niyang gamit at iniempake sa sala. Subalit paulit-ulit na bumabalik ang isipan niya sa estranghero sa kuwarto niya.