“May gusto ka bang kanta? Kakantahan kita sa susunod kong live broadcast”
Hindi niya alam kung paano idi-discourage ang babae at maging magalang pa rin. Hindi pa siya nabibigyan ng ganitong klaseng atensyon ng isang babae. Mahiyain ang mga kababaihan sa Lakandula. Kahit pa tungkol sa project ang usapan, nahihiya pa sa kanya na makipag-usap. Tanging ang kaibigan at kababata niyang si Janneth ang malakas ang loob na makipag-usap sa kanya pero hindi ito tulad ni Thalia na nagpapa-cute sa kanya at ‘di nahihiyang ipahiwatig na gusto siya nito. Hindi siya sanay at naaalibadbaran siya.
Umiling si Marvene at nanatiling di ngumingiti. “Wala. Hindi mo ako kailangang kantahan, Thalia. Mas matutuwa siguro ako kung makikita ko na mataas ang grades mo sa susunod na exam natin. Mas magiging masaya ang magulang mo.”
“Sige ba. Basta para sa iyo,” sabi ng dalaga. “Pupusuan mo ba ang posts ko kapag mataas ang nakuha kong grades?”
“P-Pwede naman,” aniya at nagkibit-balikat. Hindi niya alam kung bakit siya pumapayag pero kung magfo-focus ito sa pag-aaral, baka makalimutan na nito ang pagpapa-cute sa kanya.
“Yes!” Nakakuyom ang palad ni Thalia na akala mo ay tumama ng jackpot sa raffle o kaya ay nalaman ang sagot para masugpo ang climate change. Abot-tainga ang ngiti nito nang bumaling sa ibang kaibigan. “Girls, mag-advance study tayo mamaya.”
Umingit ang kaklase nilang si Lovelyn. “Akala ko ba magsu-shoot tayo ngayon sa paggaya sa make up ni Liza Soberano? Sabi mo nahihilo ka kapag nag-a-advance study.”
“Sinabi ko ba iyon? Mas masarap mag-advance study,” kontra ni Thalia at matamis na ngumiti sa kanya bago kumaway bilang pagpapaalam. “Basta ‘yung pupusuan mo ha?”
Tumango na lang siya habang nagngingitngit. Parang namanipula siya lalo na ng kapatid niyang si Miley. Lahat na lang ay pumapabor kay Thalia. Napatango pa siya ng kaklase ngayon na pusuan ang post nito. Hindi ba’t parang ine-encourage pa niya ito na mag-post at magpa-cute sa kanya? Lalo siya nitong ‘di titigilan.
Mukhang may hindi siya tutulungan sa project at assignment mamaya pag-uwi.
“PUPUSUAN daw ni Marvene ang post ko kapag mataas ang grades ko. Kaya kailangan ko na maintindihan itong activity natin sa Filipino.”
Lampas ng Mount Everest ang kilig ni Thalia matapos humiram ng libro sa library para sa book report nila sa Filipino. Kapag may mga literatura na kailangan nilang basahin, sumasabay siyang mag-aral sa ibang kaibigan. Sabay-sabay silang nagbabasa nang malakas para masundan niya ang mga salita.
“Akala ko ba ayaw mong mag-aral mag-isa dahil nahihilo ka sa letra?” tanong ni Pietra. “Wala naman tayong schedule na mag-group study.”
“Okay lang. Kailangan kong ipasa ito agad para naman paulanan ako ng puso ni Marvene. Hindi pa rin ako nakaka-recover na pinusuan niya ang post ko tapos nanood pa siya ng presentation ko. Isipin mo na lang kung ano pa ang gagawin niya kapag tumaas ang grade ko. Baka mag-comment na siya next time.”
“Ang tiyaga mo diyan kay Marvene. Nuknukan naman ng suplado ang isang iyan,” nakaismid na sabi ni Dulce. “Himala nga na nag-heart siya sa post mo. ‘Di halos nag-o-online iyan.”
“Saka ‘di halos namamansin iyan sa amin na kaklase niya. Kinakausap lang niya ‘yung mga matatalino katulad niya,” dagdag naman ni Jessamae.
“Hindi naman siguro siya ganoon ka-snob. Kinausap naman niya ako kanina.” At kimi siyang ngumiti.
“Ikaw lang ang nagsabi niyan. Para sa mga tulad natin na ‘di kataasan ang grade, parang hangin lang ang tingin niya sa atin,” kontra ni Dulce.
“Baka nahihiya lang siya sa tulad nating magaganda. Ganyan kasi ang ibang matatalino. Sa klase lang magaling pero socially awkward. Hindi alam kung paano makisama at makipag-usap sa iba kasi naka-focus sila sa pag-aaral. Pero binigyan naman niya ako ng chance na maging parte ng buhay niya at mapansin niya.” Tinapik niya ang balikat ni Dulce. “Okay na iyon.”
“Kailangan ba talagang ganyan ang gawin mo para lang mapansin ka ng gusto mong lalaki, Thalia? Marami ka namang admirer sa internet saka sa school natin. Kahit nga hindi ka pa sikat, marami pa rin magkakagusto sa iyo,” ani Pietra.
“Basta alam naman ninyo kung bakit nagustuhan ko si Marvene, ‘di ba?” tanong niya at sinulyapan si Pietra.
“Oo na. Siya lang naman ang nakapagpatigil ng mundo mo.”
Ilang araw pa lang nilang kalilipat noon sa Lakandula. Bored na bored na siya sa bahay at wala pa siyang bagong kaibigan. Dahil sa taas ng upa sa Maynila, pinili ng magulang niya na lumipat sa Lakandula. Simple at tahimik na bayan lang iyon. Malayo sa gulo ng Maynila at presko pa ang paligid dahil sa bukid at kabundukan. Unang nakabili ng lupain doon ang tiyuhin niya at nagpatayo ng panaderya. Doon inilipat ang hardware nila dahil mas mura doon.
Hindi madali na iwan ang Maynila at ang mga kaibigan niya. Malayo na siya sa mall at sa mga lugar na madalas niyang pasyalan kasama ang mga kaibigan. ‘Di na rin siya makaka-attend ng mga concert o madalas makakanood ng sine. Mula sa private school, napilitan siyang lumipat sa nag-iisang public school sa Lakandula. Mahigpit daw muna sila ng sinturon at simplehan ang pamumuhay.
Gusto na rin sana niyang isuko ang blogging at ibenta ang laptop, camera at cellphone niya. Hindi pumayag ang mga magulang niya dahil pinag-ipunan niya ang mga iyon at regalo naman ang camera ng Tita Celine niya dahil gusto nito na magpatuloy siya sa pagba-blog niya dahil passion daw niya iyon.
Lumipat sila noong bakasyon. Pero dahil bago pa lang sa Lakandula at walang mai-blog dahil ‘di pa siya maipasyal sa lugar. Abala pa ang mga tao. Kaya kaysa magmukmok sa bahay, sumama siya sa pinsang si Ate Marge sa palengke. Mas malakas daw ang internet doon at para naman maipakita niya sa followers at mga kaibigan kung ano ang bagong buhay niya sa Lakandula. Sabi ng pinsan niya, ang palengke daw ang pinaka-interesanteng lugar sa bayang iyon. Doon daw niya makikita ang iba’t ibang mga tao sa Lakandula at ang ugali ng mga ito.
Para sa isang blogger na gaya niya, interesante iyon lalo na’t malayo na siya sa mga nakagawian niyang pag-usapan sa mga blog niya. Bago sa kanya ang konsepto ng palengke dahil sa mall sila naggo-grocery ng mama niya. At nang mauso ang online shopping, sa internet na sila umoorder.
Nakakanibago ang sari-saring tao at mga amoy doon. Sari-sari ang mga tao at bilihin. Halo-halo rin ang mga amoy at tunog. Abala siya sa pag-video nang mapansin niya ang matandang babae na namamalimos. Hindi pinapansin ang matandang babae at sinabihan din siya ng pinsan niya na huwag itong pansinin dahil maayos naman daw ang buhay nito at may mga anak sa ibang bansa. Naging libangan na lang daw ng matandang babae ang pamamalimos.
Isang matangkad na lalaki na sa palagay niya ay ‘di nalalayo ang edad sa kanya ang lumapit dito at hinatian ito sa turon na binili nito. Akala niya noong una ay maglola lang ang mga ito pero nalaman niya sa pinsan niya na ugali na daw ng lalaki na saluhan ang matandang babae.