Fritz' POV
"Oh la la~" sabi nila Ryle at Sven pagkalabas ko ng fitting room dito sa men's cloth, si Yohan? Halata namang nagpipigil ng tawa 'di pa ilabas, nagmumukha siyang may eyeglasses na goldfish na tinapon sa kanal.
"Neon green para kay Sven, orange para kay Yohan at pink and blue na polka dots para sa akin," pagsusuri ni Ryle sa akin mula ulo hanggang paa. Natalo kasi ako sa teks na nilaro namin kanina. Mga kupal, may mga buhok na sa kili-kili nagawa pang maglaro ng teks, tapos ang lakas ng loob na yayain ang isang gwapong katulad ko.
At saka, naka-ilang round kami kakalaro ng teks pero, talo talaga ako. Bahala na, ang mahalaga mas gwapo ako sa kanila.
"I believe that there is something missing." sabi ni Yohan, kaya sinamaan ko siya ng tingin pero wala 'yon sa kaniya.
"Ano 'yon p're?" nakangising tanong ni Sven.
"Orange cat headband," sabi niya at kinuha ang orange na headband na may tenga ng pusa na design mula sa bag niya at binigay sa akin.
"That's from the girl last night, naiwan niya," sabi niya at inayos ang salamin, humalakhak naman ang dalawa at ngumiwi ako. Sabi na, gabi-gabi iba't-ibang babae kasama nito.
Labag sa loob na sinuot ko ito, nabayaran na naman na nila 'yong mga binili na suot ko ngayon, basta isusuot ko ito buong araw.
Malayo ang distansya ng tatlo sa akin nang lumabas kami, umaakto sila na parang hindi nila ako kilala. Madami ang tumitingin sa akin at bumubulong-bulong pa, heh, anong pake-alam nila kung naka-headband ako na color orange, naka-hoodie na neon green ang kulay, blue and pink polkadots na pants at orange na sapatos? Ano ngayon kung baduy ako?
Mas gwapo pa rin ako sa mga jowa nilang binubulungan nila.
Taas noo akong naglakad papasok sa MilkTea shop.
"Task number 1, bumili ng milktea at bumanat sa crew, dapat kiligin siya," bulong ni Ryle sa tabi ko at tinapik ang balikat ko bago umalis.
Taragis na task 'yan, dapat pala nang-prank na lang ako sa mansyon kesa maglaro ng teks na mas magaling pa 'ata ang sampung taong gulang na bata kesa sa'kin.
Dahil pagdating talaga sa childhood games wala akong alam. Paano naman kasi—
Ah! Fritz 'wag mo na isipin 'yon, masisira kagwapuhan mo.
Bumuntong hininga ako at dumiretsyo sa counter 'tsaka nag-order.
"Miss, tea ka ba?" tanong ko gamit ang nakaka-akit kong boses, natigilin siya sa paglilista ng kung ano at nakakunot ang noo na tumingin sa akin.
"Ahm... bakit?" tanong niya at pabebeng pinalobo ang pisngi. Kinagat ko ang pang-ibaba kong labi.
"Kasi tea-namaan na 'ata ako sa'yo," sabi ko sabay kindat sa kaniya. Ngumiti naman siya at inilagay ang ilang hibla ng buhok sa ilalim ng tenga niya. Lumingon ako sa direksyon nila Sven na tawa ng tawa sa labas ng shop, nakita kong nag-thumbs up sa akin si Yohan bago tumawa.
Pagkaharap ko sa babae ay ibinigay na niya 'yong milk tea ng naka-ngiti.
"Ahm, ito na order mo cutie boy, pa-ayos na lang ng color choices next time, ehe," sabi niya pa bago pabebeng ngumiti sa akin at ibinaling ang atensyon sa susunod na customer.
Nakasimangot akong lumabas ng shop papunta sa direksyon ng tatlong mokong.
"Musta dude? In fairness tumawa ha, ano ba sinabi mo?" natatawang tanong ni Ryle, inabot ko sa kaniya ang milk tea na agad naman niyang kinuha.
"Na ang papangit niyo, ano sunod na task?" tanong ko sa kanila, nagkatinginan naman sila.
"Find a random girl then date her..." sabi ni Yohan at huminto para mag-isip. "Hmm, let's see, ngayong araw lang siguro, just take a selfie with her. Hindi ka na namin sasamahan." sabi niya at tumango naman 'yong dalawang tuta sa likod niya.
"Final task mo na 'yan dude, next time pogs naman laruin natin," sabi niya at tumawa, nakitawa na rin si Ryle.
Mga abnormal.
Bumuntong hininga ulit ako, taragis na teks na 'yan.
Inilibot ko ang tingin sa mall at natigilan ng makita ang masayang pamilya na naglalakad.
Palihim ako napangiti ng mapait, kailan kaya ang uwi nila Mom?
Naglakad-lakad na lang ako habang inililibot pa rin ang paningin. Ano ba'ng klaseng mga babae 'to, kung ikukumpara sa dalawa 'kong kambal ay medyo malayo pa sila, aba syempre boto ako sa dalawa 'kong twin sister.
Hintayin ko na lang magkajowa ang mga 'yon at magluto ng popcorn para panoorin kung paano tustahin ni Puti 'yong boyfriend nila. OA eh, basta ako chill lang tapos kapag may ginawa silang hindi maganda sa dalawa kong twin sister... hmm, gagawin ko na lang siguro silang canvas.
Napangisi ako, pwede 'yon ah.
Natigilan ako ng may maramdamang malamig na kung ano sa dibdib ko at saka ko nakita ang babaeng nanlalaki ang matang nakatingin sa ice cream niyang nakadikit sa neon hoodie ko.
"Ay, ano ba 'yan..." reklamo niya at pinunasan ng panyo ang hoodie ko ng hindi ako tinitignan. "Sayang naman," sabi niya at tumingin na sa akin matapos niya magpunas.
Nagtitigan kami, aba sa ice cream niya pa talaga siya concern ah, hindi ba pwede sa natapunan ng ice cream niya?
Teka–
"Ikaw?/ Ikaw?!" sabay na sabi namin dahilan na mapatingin sa amin ang ibang tao rito.
"Anak ng– ikaw nga," sabi ko at kunwaring hindi makapaniwala. Nanlalaki ang mata niya at namumula ang mukhang nakatingin sa akin bago tumikhim.
"Ikaw rin, ikaw nga," sabi niya at tinignan ako mula ulo hanggang paa bago, tumitig sa mukha ko.
"Ikaw, bakit ka nakatingin sa akin?" tanong ko gamit ang mapang-asar na tono, maya-maya at humalakhak siya, dahilan na mapatingin ang mga tao sa amin kaya medyo nataranta ako.
Taragis na babae 'to ang lakas tumawa ampo–
"Owemji! I can't believe na 'yong nasampal ko ay baduy magsuot ng damit!" sabi niya at humalakhak ulit.
Natameme ako habang pinagmamasdan siyang tumatawa mag-isa.
Inilibot ko ang paningin ko at nakitang nagbubulungan at mahinang tumatawa ang ibang nakatingin sa amin.
Sinigaw niya na baduy ako, plus sinigaw niya pa na sinampal niya ako at idagdag pa ang katotohanang nasampal niya talaga ako.
Anak ng– malas ulit.