|| CIELO LOCKHEART ||
"Bakit pala nasa field ka kanina? Si Blaire, nasaan na? Bakit hindi mo siya kasama?" tanong ko kay Yujin habang sabay na kaming naglalakad pabalik sa classroom.
"Pabalik na sana ako kanina sa classroom ng maisipan kong dumaan muna sa field. Dumaan kasi ako sa office nila Lianne kanina para mag-report kaso pagdating ko naman doon, walang tao. Si Blaire naman, magpapasa lang ng project kaya naghiwalay na kami kanina ng dadaanan." sagot ni Yujin sa mga tanong ko.
Pagbalik namin sa classroom, nakita namin si Alisa na naroon na sa kanyang upuan. Nang makita niya kami, agad kumaway sa kanya si Yujin pero inirapan niya lang ito. Mukhang asar pa rin siya sa nangyari kanina. Naroon na rin sa loob si Blaire. Agad kaming lumapit ni Yujin sa kanya.
"Nandiyan na pala kayo." nasabi ni Blaire ng makita niya kami. "Pero teka, kanina lang ay kasama ko kayo ah? Saan ba kayo nagpunta at napahiwalay kayo sa akin?"
"Hindi ata kita maintindihan, Blaire." taka kong tanong.
"Hindi ba't kasama ko kayo ni kuya kanina?" tanong ni Blaire.
"Hindi ah. Hindi nga kami magkasama ni Cielo kanina eh." sagot ni Yujin.
Nagtataka naman kaming tinignan ni Blaire. Totoo naman ang sinabi ni Yujin. Bigla naman ay inakbayan ni Yujin ang kapatid niya.
"Hay naku, Blaire. Nagugutom ka na naman siguro no?" tanong ni Yujin kay Blaire. "Ang takaw mo talaga."
"Heh! Hindi ako matakaw!" depensa agad ni Blaire sabay tanggal sa braso ni Yujin sa balikat niya. "Pero maiba ako. Nabasa niyo ba ang nakapaskil doon sa may bulletin board sa labas?"
"Alin doon? Parang wala naman akong napansin." sagot ko.
"Ang sabi, may importante daw na sasabihin ang dalawang members ng Infinita Magia sa mga estudyante mamaya kaya magkakaroon ng assembly sa main hall mamaya." paliwanag ni Blaire.
"Biglaan iyon ah. Bihira lang kung magpatawag ng assembly ang dalawang 'yon ah? Ano kaya ang sasabihin nila?" biglang sabi ni Yujin.
Kasabay nito ay tumunog na ang bell. Nagsibalikan na ang mga kaklase ko sa kani-kanilang mga upuan. Nakita ko rin si Vincent na kakapasok lang sa classroom. Agad itong naupo sa bakanteng upuan na naka-puwesto sa unahan.
Pumasok sa classroom ang isang lalaki na tansiya ko ay nasa mid-30's. Siya na ata ang sunod na magtuturo sa amin. Inobserbahan ko siya. Mukha naman itong mabait at pakiramdam ko ay isa siyang approachable na tao.
Nang mailagay na nito ang kanyang mga gamit sa desk, inilibot nito ang kanyang paningin sa buong klase. Nang makita niya ako ay bigla itong ngumiti.
"Ikaw siguro ang bagong estudyante dito, tama ba?" tanong nito sa akin.
"Opo." Tumayo naman ako sa aking upuan. "Ako po si Cielo Lockheart." pagpapakilala ko.
"Natutuwa akong makilala ka, Ms. Lockheart. Ako naman si Professor Walter. Ako ang nagtuturo ng Magical History ng buong Terra Magia at Gelomiah." pagpapakilala nito sa akin. "Puwede ka nang umupo."
Sinunod ko si Professor Walter.
"Magsisimula na tayo sa ating leksiyon. Ang ating pag-aaralan ngayon ay ang kasaysayan ng buong Gelomiah."
Tumikhim muna ito bago magsalitang muli.
"Alam naman nating lahat na ang Gelomiah ay ang eskuwelahan na nagtuturo ng iba't-ibang mahika. Marami din na mga kilalang wizard ang nagmula din dito. Ito rin ang nag-iisang eskwelahan sa buong Terra Magia na nagtuturo ng halos lahat ng mahika na maaari ninyong malaman." pasimulang pagpapaliwanag ni Professor Walter sa amin. Nilibot nitong muli ang kanyang paningin sa klase bago muling magpatuloy.
"Pero wala sana ang Gelomiah ngayon kung hindi dahil sa eksistensiya ni Gelom. Isinunod ang pangalan ng eskuwelahan sa pangalan niya. Si Gelom ay isang kilalang wizard na nabuhay daang taon na ang nakakalipas. Isa rin ito sa mga makapangyarihang nabuhay sa ating kasaysayan."
Agad na nagtaas ng kamay si Vincent.
"May tanong ka, Mr. Oereal?"
"Itatanong ko lang po. Tulad ng sinabi ninyo, isang makapangyarihan na salamangkero si Gelom. Pero bakit hindi siya nakahanay sa mga kinikilalang wizard sa buong Terra Magia?"
"Magandang tanong, Mr. Oereal." Komento ni Professor Walter sa tanong ni Vincent. "Sa katunayan, sinadya iyong mangyari. Hindi talaga isinama sa kasaysayan ng buong Terra Magia ang pangalan ni Gelom sapagkat nasangkot ito sa pinagbabawal na mahika."
Pinagbabawal na mahika?
"Hindi lahat ng mahika ay maaaring gamitin ng isang salamangkero. Mayroon din iilan na kailanman ay hindi natin gamitin dahil maaari itong magdulot ng masamang epekto sa ating kapaligiran. Noon ay nakilala si Gelom dahil sa taglay nito ang kakayahang gawin ang lahat ng salamangka. Dahil nais nitong ibahagi ang kanyang kaalaman, nagtayo ito ng isang eskuwelahan at tinawag niya itong Gelomiah. Noong una ay naging maayos naman ang mga pangyayari sa loob ng paaralan. Ngunit sa hindi maipaliwanag na pangyayari, si Gelom ay hindi nakuntento sa kanyang kakayahan. Naging ganid ito sa kapangyarihan hanggang sa umabot siya sa puntong kahit ang pinagbabawal na mahika ay kanyang ginamit."
Pinansin ko naman ang buong klase. Lahat ng estudyante dito ay nakikinig talaga kay Professor Walter.
"Bago pa makagawa ng mas malalang sitwasyon si Gelom, nagtipon-tipon ang apat na mahuhusay na salamangkero na nagmula sa iba't-ibang angkan upang pigilan si Gelom. Ang mga salamangkerong tinutukoy ko ay nagmula sa angkan ng mga Dreste, Destale, Stendler at Lardeu. Kinulong nila si Gelom sa isang tore na dito lang sa buong Terra Magia makikita. Nilagyan din nila ng makapangyarihang seal ang nasabing tore upang walang sinuman ang makaramdam sa kapangyarihan nito."
Nagkaroon naman ng kaunting ingay sa buong klase ng malaman namin kung saang angkan nagmula ang apat na mga salamangkero. Alam kong hindi basta-basta ang mga pamilyang pinagmulan nila Lianne, Freya at Sir Chandler ngunit hindi ko lubos akalain na malaki pala ang naibahagi ng mga pamilya nila sa kasaysayan ng Gelomiah.
Ngayon naman ay si Alisa ang nagtaas ng kamay upang magtanong.
"Ano na pong nangyari kay Gelom sa loob ng tore?"
"Walang makakapagsabi. Sa tagal ng panahon ay maaaring namatay na ito sa loob. Ngunit, kahit na ganoon ay nananalaytay pa rin dito ang kanyang kapangyarihan kung kaya't ang henerasyon ng tatlong salamangkero na tumalo kay Gelom noon ay binabantayan pa rin ang tore hanggang ngayon. Para naman sa eskuwelahang ito, ipinagpatuloy pa rin nito ang pagtuturo ng salamangka sa mga estudyanteng karapat-dapat na matuto dito. Hindi naman ibig sabihin na dahil sa ang nagtayo nito ay naging masama ay ititigil na ng eskuwelahan ang magandang pagtuturo nang magagaling na salamangka na nasimulan dito."
Si Blaire naman ngayon ang nagtaas ng kanyang kamay.
"Professor, kanina lang ay sinabi ninyong apat na salamangkero ang pumigil kay Gelom upang hindi nito maisakatuparan ang masasama niyang hangarin. Ngunit bakit tatlong henerasyon na lamang ng mga salamangkero ang pumoprotekta sa tore? Saan na napunta ang salamangkerong nagmula sa Lardeu?"
"Ang ika-apat na salamangkero ay nawala na lamang. Marami ang nagsasabing sawa na ito sa mabibigat niyang responsibilidad kung kaya't pinili na lamang nito ang lumayo sa isang lugar na maaari siyang mamuhay ng payapa. Ang salamangkerong tinutukoy ko ay ang nag-iisa na lamang na nabubuhay sa kanilang angkan. Dahil sa kanyang pagkawala, unti-unti na rin siyang nakakalimutan kasama ang kanyang angkan na Lardeu." paliwanag ni Professor Walter.
"Nagkaroon po ba siya ng pamilya?" biglang tanong ni Yujin.
"May posibilidad na nagkaroon siya ng pamilya."
"Ibig sabihin, hanggang ngayon ay maaaring nagpatuloy ang henerasyon nila?" alanganin kong tanong.
"Walang sinuman ang nakakaalam ng kasagutan sa iyong katanungan kundi siya mismo, Miss Lockheart." nakangiting sagot ni Professor Walter.
Nagpatuloy pa sa pagtuturo si Professor Walter hanggang sa matapos na ang klase. Hanggang ngayon ay naiisip ko pa rin ang nasabi ni Professor Walter sa klase kanina. Sinabi nitong pinagpapatuloy pa rin ng Gelomiah ang pagtuturo ng salamangka sa mga karapat-dapat. Ibig bang sabihin nito ay karapat-dapat din ako dahil sa nakatanggap ako ng imbitasyon na dito mag-aral?
ㅡㅡㅡ
Sabay-sabay na kaming tatlo nila Yujin at Blaire na nagpunta sa main hall. Pagpunta namin doon ay halos nagtipon na ang lahat ng mga estudyante sa main hall. Natural lang daw na mapukaw ang atensiyon ng mga estudyante sa biglaang assembly dahil sobrang bihira lang daw talaga gawin nila Lianne at sir Chandler ito.
Nang ilibot ko ang paningin ko sa buong lugar, nakita kong nakatayo lang mag-isa si Vincent habang nakasandal sa isang pillar. Agad akong tumakbo palapit sa kanya.
"Vincent!" tawag ko sa kanya.
"Ikaw pala, Cielo. Buti at natandaan mo pa ang pangalan ko." sabi nito ng makita niya ako. Kasabay nito ay nginitian niya ako.
"Syempre naman! Kaibigan na kita, hindi ba?" tanong ko.
"Oo naman." malumanay nitong sagot.
"Vincent! Hindi ko akalaing makikita kita dito!"
Sabay pa kaming napalingon sa direksiyon ni Yujin. Patakbo itong lumapit sa amin habang kasunod niya lang si Blaire.
"Para namang hindi tayo nagkita kanina sa klase niyan." natatawang sita ni Vincent kay Yujin.
"Ganoon talaga! Kaibigan kita eh!" proud na sabi ni Yujin.
Binalingan naman ng pansin ni Vincent si Blaire.
"Hi Blaire. Kumusta na?" nakangiting tanong ni Vincent.
"Ayos lang naman ako." nakangiti ring sagot ni Blaire.
Ako lang ba o parang napansin kong medyo namula si Blaire ng kumustahin siya ni Vincent? Napalingon naman kaming tatlo bigla kay Yujin dahil bigla-bigla itong nagsasalita ng malakas.
"Ally! Nandito kami, Ally!" kumakaway-kaway pa ang dalawang braso ni Yujin nang makita niyang kakapasok lang ng main hall ni Alisa. Hindi na sana niya kami papansinin ngunit ng bigla niya kaming tignan ng paisa-isa, lumapit ito sa amin.
"Hi Alisa. Salamat nga pala sa pinahiram mo sa akin na notes kanina. Eto na nga pala ang notebook mo." sabi ni Vincent.
May kinuha itong notebook sa bag niya at iniabot iyon kay Alisa. Nakangiti namang kinuha iyon ni Alisa.
"Wala naman akong ginawa. Pinahiram lang kita ng notes." sabi nito.
"Hala, ang daya! Bakit si Vincent, pinapahiram mo ng notes tapos ako hindi? Diskriminasyon!" biglang react ni Yujin.
Nakataas naman ang kilay ni Alisa nang tignan niya si Yujin.
"Bakit naman kita papahiramin? Hindi ka naman nag-aaral kaya hindi mo na kailangan ng notes."
"Nag-aaral naman ako ah!" depensa ni Yujin.
"At kailan naman nangyayari iyon?"
"Once a month! Hah! Patunay lang iyon na isa akong special!" proud na sabi ni Yujin.
"Special? Psh. Mukha kang special child." sabi ni Alisa sabay irap kay Yujin. Si Blaire naman ang hinarap ni Yujin.
"Ano na, Blaire? Hindi mo man lang ipagtatanggol ang kuya mo?" tanong nito sa kapatid niya.
"Bakit pa? Mukhang totoo naman ang sinabi ni Alisa patungkol sa'yo." sagot ni Blaire kay Yujin. Sa amin naman ni Vincent bumaling si Yujin.
"Kayo ba? Cielo? Vincent? Konting suporta naman oh!"
Kibit-balikat lang ang isinagot ni Vincent sa kanya. Ako naman, ibinaling ko ang tingin ko sa ibang direksiyon.
"Grabe naman kayo! Akala ko ba magkakaibigan tayo dito? Bakit ganito kayo sa akin? Group hug nga!"
Wala na kaming oras para magreact dahil agad kaming hinila ni Yujin para yakapin.
"Ano ba, Yujin?! Bumitaw ka nga!" asar na sabi ni Alisa at hinampas nito ang braso niya. Pero hindi bumitaw si Yujin hangga't hindi ito nakukuntento.