Maingat kong pinadaan ang hintuturo ko sa bunganga ng wine glass na nasa ibabaw ng mesang kaharap ko. Gusto kong umuwi pero ayoko. Gusto ko ng mahiga sa kama ko at magpahinga pero ayokong matulog. Gising man ako o tulog, patuloy akong binabangungot.
Paano kung ako ang may gawa ng sunog sa sanctuary ni Mom ng hindi ko namamalayan?
'Yan ang paulit-ulit na tanong ko sa aking isipan. May mga oras na nakakagawa ako ng masama na hindi ko namamalayan at animo'y may kung ano o kung sinong kumokontrol o sumasanib sa akin.
Yumuko ako at inis at hinampas-hampas ang ulo ko. Bakit ba kasi kailangang maging ganito ako? Napapagod na ako. Hindi ko na maintindihan ang sarili ko.
"Sinasabi ko na nga ba't nakatadhana tayo."
Tumigil ako sa aking ginagawa at napatingin sa nagsalita. Suminghap ako at umayos ng pagkakaupo matapos makita ang lalaking nakita ko rin sa rooftop. Nginisian ako nito at naupo sa kabilang sofa na malapit lang sa inuupuan ko, at uminom ito sa alak niya.
"Hindi ito nakatadhana, ikaw itong sunod ng sunod sa akin." malamig kong sambit at pinulot ang baso ko sabay uminom roon.
"Sigurado ka?" usal nito at ilang saglit lang ay may lumapit na tatlong kababaihan sa amin, ah mali- sakaniya. Naupo ang dalawa sa magkabila nitong hita habang ang isa ay nasa likuran niya at malanding minamasahe ang balikat nito.
Pambihira, bakit kailangang may masaksihan akong ganito gayong gusto ko lang mapag-isa at kwestyunin ang sarili ko kung ako ba ang may pakana sa sunog sa sanctuary. Ah tama, bakit ba kasi sa isang club pa ako nagpunta imbes na sa bahay nalang?
"Girls, ilang oras na nga ulit tayong narito?" tanong ng lalaki sa mga babae.
"Halos tatlong oras narin," sabay-sabay nilang sagot kaya tinaasan ako ng kilay ng lalaki na para bang ipinapamukhang nagkamali ako.
Inirapan ko nalang siya at ipinagpatuloy ang pag-inom ko. Pansin ko ang ginagawa nitong panlalandi sa tatlong babae pero hindi ko sila sinusuway o tinatapunan ng atensyon, nakatutok parin sa nangyari sa sanctuary ang isipan ko. Papatayin ako ni Mom kapag ako ang gumawa ng sunog na ikinamatay ng tatlo niyang alagang kuting- I mean tigre.
Ilang saglit lang ay narinig ko ang malakas na boses ng lalaki na inaaya ang tatlo sa kwarto. Alam kong pinaparinig niya sa akin iyon pero bakit niya naman kailangang iparinig pa sa akin? Hindi ko naman siya pakikialaman dahil may sarili akong problema at hindi ko siya kilala.
Naglakad ang mga ito paalis at ako ay mag-isang naiwan. Ilang segundo lang ay may naupong muli sa tabi ko pero hindi ko iyon pinansin.
"Aish," bulalas nito at inagaw ang basong hawak ko sabay ininom ang alak na laman nu'n dahilan upang mapunta sakaniya ang atensyon ko at natigilan ng makita ito.
"Diego, anong ginagawa mo dito?"
Ibinaba nito ang baso at ngumiwi sabay napatingin sa akin.
"Inaya ako ng mga kaibigan kong pumunta rito," sagot niya at may itinurong mesa kaya napatingin ako roon at nakita ang grupo ng mga kalalakihan at dalawang kababaihan. "E ikaw?" tanong nito pabalik sa akin.
"Ayokong umuwi," tangi kong sagot at yumuko. Napa-isip ako hanggang sa ilahad ko sakaniya ang aking kamay na ipinagtaka nito. "Posasan mo ako."
"At bakit ko naman gagawin 'yun?"
"Feeling ko ay ako ang sumunog sa sanctuary ni Mom kaya ibalik mo na ako sa kulungan bago pa ako huntingin ni Mom."
Natigilan ito at pinagmasdan lang ako habang nakapaningkit ang kaniyang mga mata, hanggang sa matawa siya at kinurot ang pisngi ko kaya kinunotan ko siya ng noo.
"Bakit mo pinisil ang pisngi ko?"
"Kasi ginamit mo ang salitang 'feeling' kaya alam ko na agad na hindi ka sigurado at may kalahating tyansang hindi ikaw ang gumawa nu'n. Kung sakali mang ikaw ang gagawa nu'n ay paniguradong sasabihin mong, 'ano sa palagay mo?'. Kilala na kita kaya hindi kita poposasan ngayon." lintana nito.
Inirapan ko nalang siya at muling sinalinan ng alak ang baso ko pero natapon iyon dahil may humawak sa braso o at marahas akong hinila patayo.
Siya nanaman?!
"Ano bang ginagawa mo?" taka kong tanong sa lalaki na may hawak sa aking braso. "Bitawan mo nga ako!" Kinalas ko ang pagkakahawak nito sa braso ko pero mas lalo lang nitong hinigpitan ang pagkakahawak roon.
"Ano bang problema mo?" kalmadong tanong ni Diego rito, ayan na, lumalabas na ang pagiging cool niya. "Hindi mo ba alam na may batas na nagpapatupad na maaari kang makulong dahil lang sa marahas mong paghawak sa isang tao lalo na sa babae?"
IMBENTO.
Ewan ko kung totoo 'yun dahil wala akong alam sa batas na 'yan pero wala pa naman akong naririnig na ganiyang kaso. Sa pambubugbog, oo pa. Tsaka minsan may pagkaloko-loko ang taong ito na ginagamit ang pagiging pulis niya, nag-iimbento ng kwento na walang katotohanan na paniniwalaan ng makikitid ang ulo.
Nakita ko ang pagngisi ng lalaki at may inilabas mula sa coat pocket niya, isang ID.
"Isa akong prosecutor," sambit nito at ibinalik iyon sa loob ng kaniyang coat pocket. "Kaya 'wag mo akong pangangaralan tungkol sa batas." dagdag pa nito at iniangat ang kaniyang kanang kamay.
Nanlaki ang mata ko dahil mahina nitong sinampal-sampal ang pisngi ni Diego ng tatlong beses.
Bwisit! Ano bang ginagawa ng lalaking ito?
Binawi ko ang aking braso mula sakaniya at nilapitan si Diego upang awatin ito kahit na hindi pa siya gumagalaw sa kinatatayuan niya.
"Diego, tara na. Umuwi na tayo," usal ko at kumapit sa braso nito sabay hinila siya pero muli nanamang hinawakan ng lalaking prosecutor kuno ang braso ko.
Suminghap ako at ipinikit ang aking mata. Sinubukan kong pakalmahin ang aking sarili pero naramdaman ko ang marahas na paghila sa akin ng lalaki dahilan upang mapabitaw ako sa braso ni Diego.
Ang mapalapit pala sakaniya ang gusto ng gagong to ah.
Iminulat ko ang aking mata at nakitang kaharap ko na siya. Ikinuyom ko ang aking kamao at malakas itong sinuntok sa mukha, dahilan upang mapaatras siya at nasapo ang kaniyang pagmumukha.
Ang kaninang club na puno ng hiyawan ng mga nagkakatuwaan ay natahimik at napunta sa direksyon namin ang kanilang atensyon. Sino ba naman ang hindi mapapahinto nang makitang sinapak ng isang patpating babae ang mukha ng lalaking may malaking katawan?
"Stay away from me, bastard." malamig kong sambit at pinulot ang tissue sa ibabaw ng mesa ko. Pinunasan ko ang aking kamao at ihinagis sakaniya ang tissue. Muli kong hinarap si Diego at hinila na ito palabas ng club. Pagkalabas na pagkalabas ay hinarap ako ni Diego kaya naman napatingin ako sakaniya.
"Hindi mo na dapat ginawa 'yun. Hindi mo ba narinig na isa siyang prosecutor?" hayag nito na ikinataas lang ng kilay ko.
"The hell I care?" malamig kong sagot at napahikab. "Nasubukan ko ng pumatay ng piloto, sundalo, maging ng judge at iba pa- prosecutor lang siya kaya anong dapat kong ikatakot?"
Suminghap nalang ito at napaiwas ng tingin.
"Pero... ginawa mo 'yun dahil ayaw mong ako ang gumawa sakaniya nu'n, hindi ba? Ayaw mong baka kapag sinuntok ko siya ay mawalan ako ng trabaho at-"
Itinapat ko sa labi nito ang aking hintuturo at pumikit upang ipakitang naririndi ako sa boses niya.
"Ginawa ko iyon dahil ilang beses niya na akong sinusundan. Para sa akin iyon, hindi para sa'yo. Tsaka ka na gumanti kung may oras ka. Sa ngayon, umuwi na tayo." pagpapatahimik ko sakaniya. Tumango naman ito at naglakad na patungo sa kotse niya. Kapwa kami pumasok roon at humarurot na ito palayo.
Ang totoo ay parehong iyon ang rason ko kung bakit ko sinuntok ang lalaking iyon. Maaaring kriminal ako, pero hindi ko maatim na api-apihin ang pamilya ko lalo na kung nakikita ko ito ng harapan.
I'm a demon, with a heart.