"Bella! Saan ka pumunta?" Tanong ni Eli sa'kin. "Wow, tinapay!" Agad niyang kinuha at nagsimulang kumain.
"Um-rlan ba sa l-obos?" Hindi ko maintindihan ang sinasabi niya.
"Ey ser-ry!" Tinignan ko lang siya habang ngumunguya siya, pagkatapos ay umiinom ng tubig.
"Wag ka kasing magsasalita kapag puno ang bibig mo.." Paalala ko sa kaniya.
"Sorry naman. Ano, umulan ba sa labas?" Nagtatakang tanong niya sa'kin.
Hindi ko pa pala natanggal yung sombrero ko. Agad ko itong tinanggal at umupo sa harap niya.
"Oo.." Tinignan niya yung sombrerong nasa lamesa.
"Diba, wala ka namang sombrero? Kanino 'yan?" Turo niya sa sombrero.
"Doon sa lalaki kanina.." Bumuka naman yung bibig niya. Kumuha ako ng tinapay.
"Hala, sino?! Gwapo ba? Taga saan daw? Ano'ng pangalan niya?" Sunod-sunod niyang tanong. Basta talaga lalaki interesado siya.
"Hindi ko alam. Binigay niya lang sa'kin 'yan. Tsaka malapit na akong mabangga kanina no'ng bike niya." Paliwanang ko.
"Dapat nagpabangga ka. Sayang naman." Pinitik ko ang noo niya."Aray!"
"Ang aga mo naman, Eli? Bakit?"
Inirapan niya ako. "Paano ba naman, yung alarm clock mo ang ingay-ingay!"
Natawa ako sa kaniya. May alarm clock nga pala ako. "Si Tita nga pala maagang umalis.."
"Ah, okay.." Tumingin siya sa'kin. "Eh, ikaw bakit ang aga mo?"
"Maglalaba kasi ako bago pumasok sa school."
"Sipag naman! Tara kain na tayo..Alam kong nagluto si mama." Tumayo siya. Naghahanda na para kumain.
"Ang aga pa, Eli. Alas-sais palang, oh."
"Ayos lang 'yan. Sige na.." Umupo nalang ako at sumabay sa kaniya.
Habang kumakain kami ay panay pa rin ang pagtatanong niya tungkol sa lalaki kanina.
"Ano gwapo ba?" Nag-isip ako at inalala ulit yung mukha niya kanina.
"Medyo.." Hinampas niya ang kamay ko.
"Gwapo siguro, no? Tsaka makikita mo pa siya ulit kasi isasauli mo yung cap niya! Yieee." Pang-aasar niya. "Ang dami mo ng boylet! Tapos hindi mo pa alam mga pangalan!"
"Kumain nalang tayo.." Kumuha ako ng pagkain at nilagay sa plato ko. "Nga pala, mag-aaply ako ng trabaho bukas."
Dahil nabilakuan siya inabutan ko siya ng tubig. "Bakit?"
"Simple lang. Kaunti nalang ang allowance ko at hindi ko gustong palagi nalang na manghingi sa parents ko."
"Ouch, naman." Hinawakan niya ang dibdib niya kunwaring nasasaktan.
"Gusto ko sanang pigilan ka pero alam kong alam mo naman na ang ginagawa mo. Tsaka kung gusto mong humiram sa'kin, ay manghihiram ako sa iba." Biro niya habang tumatawa.
"Salamat..Gusto ko lang talaga makatulong sa pag-aaral ko."
"Ah, basta pakilala mo sa'kin yung lalaki kanina kapag nagkita kayo ulit, ha?" Masasabi kong medyo malandi 'tong babaeng 'to.
"Ewan ko sa'yo."
Pagkatapos naming kumain ay naglaba ako habang si Eli ay naligo at nag-cellphone. Cellphone pa nga. Naghanda na rin kami para pumasok sa school. Kinuha ko yung sukli kanina at sinabihan ko si Eli na galing 'to kay Tita. Natuwa siya dahil makakabili daw kami ng maraming pagkain sa canteen mamaya.
Habang naglalakad kami para maghanap ng jeep na masasakyan papuntang school ay may lumapit kay Eli. May dala itong bag at nakasuot ng school uniform. Pamilyar sa akin ang lalaking ito. Nakikita ko siya paminsan-minsan sa school.
"Hi, Eli." Nahahalata ko namang kinikilig si Eli. Ngumiti siya at kumaway.
"Hi, Drew." Ngumiti naman pabalik sa kaniya si Drew. Pagkatapos ay tumingin siya sa'kin.
"Ah, Drew. Si Bella, bestfriend ko." Pagpapakilala niya sa'kin. "Bella. Si Drew, friend ko." Friend, huh?
"Hi, Bella." Ngumiti ako sa kaniya.
"Hi." Pagkatapos ay sila na ni Eli ang nag-usap. Medyo nakakahiya sila lang naman ang nag-uusap. So dapat hindi ako kasali. Pero sinenyasan ako ni Eli na manatili lang.
"Birthday ko nga pala bukas, Eli. I hope that you'll join the party. Ikaw din pala, Bella. Punta kayo.."
"May-" Pinutol ni Eli ang sasabihin ko.
"Sure, saan ba?" Diretsong tanong niya. Psh, interesado talaga.
"Malapit lang naman. Actually, gaganapin ang birthday party ko sa bahay. Tsaka don't worry wala ang parents ko. Out of the country for business. You can also wear anything you want." Paliwanag niya.
Tumingin naman sa akin si Eli. Parang sinasabing, 'Punta tayo, girl'. Tumango siya at ngumiti.
"Anong oras, Drew?" Tanong ni Eli. Sigurado akong late gaganapin ang party niya. "Kailangan ba may gift?"
"Okay lang naman kahit wala basta nandoon ka." Ani Drew. "Mag-s-start ang party by 7 pm. So I hope you guys will come. Lalo na ikaw, Eli. I'll see you there." Pagkatapos ay kumindat ito sa kaniya.
No'ng makalayo si Drew ay hinawakan ni Eli ang magkabilang pisngi niya. Namumula din siya.
"Gosh, Bella! Kailangan nating pumunta do'n!" Tili niya. "Anong susuotin kong dress bukas? Kyah! Bibili ba ako ng gift?"
"Pupunta ka do'n?"
"Ano ka ba, siyempre sasama ka! Invited ka din kaya! Tsaka sabado naman bukas." Inirapan ko siya.
"Eli, diba sabi ko sa'yo kanina kailangan kong maghanap ng trabaho bukas. Wala na akong allowance."
"Gosh! Pwede ko namang sabihan si mama. Tsaka papahiramin kita." Agad naman akong umiling.
"Hindi pwede. Sasabihin ko kay Tita na maghahanap ako ng trabaho. Pero hindi ako hihiram sa inyo. Gusto kong magtrabaho. Gusto kong kumita ng sariling kong pera."
"Sige! Basta sumama ka bukas, please? Promise, sasamahan kitang maghanap ng trabaho." Sambit niya."Tsaka ayaw mo ba no'n mababantayan mo ako bukas?"
Dahil wala naman akong choice, pumayag ako kay Eli. Tsaka para mabantayan ko din siya. Baka mag-iinom pa ang babaeng 'to.
"Basta, hindi tayo magtatagal doon. Tutulungan mo akong mahanap ng trabaho sa sunday."
"Sige, 12 am uwi na tayo." Anong 12 am? Masiyadong matagal.
"10 pm, uuwi na tayo."
"11 pm." Pakikipagtalo niya. "Sige na, Bella!" Tumango nalang ako bilang pagsang-ayon.
"Siya ba yung ka-date na sinasabi mo?" Tumango siya at ngumiti.
"Eh, alam mo ba kung nasaan ang bahay nila?"
"Siyempre naman. Nakapunta na kaya ako doon." Wait, what?
"Ano?! Kayong dalawa lang?"
"Gaga. Siyempre, hindi. Marami kami, noh!" Paglilinaw niya.
"Mabuti naman." Pagkatapos ay sumakay na kami sa jeep papuntang school.
Kinabukasan, maaga pa lang ay namimili na ng damit si Eli. Halatang excited. Sinabi naman namin kay Tita na may pupuntahan kami. Pumayag naman siya basta dapat uwi daw bago mag-12 am.
"Cinderella lang ang peg ni mama.."
"Mabuti nga 'yon para naman medyo mahaba ang tulog natin."
"Excited na ako, Bella!" Tiningnan niya yung orasan. "2 hours nalang, 7 pm na. Tsaka binati ko siya kaninang umaga. Sabi pa niya ako daw unang bumati sa kaniya!" Kilig na kilig na sabi niya.
"Ayos na ba 'tong dress ko?" Tanong niya.
"Lahat naman bagay sa'yo." Sagot ko. Bigla niya naman akong niyakap.
"Thank you, Bella. Bff talaga kita!"
Hindi ako nagsuot ng dress. Hinihintay namin hanggang sa mag-7 pm. Nagpaalam muna kami kay Tita bago umalis. Pinuri pa niya ang suot ni Eli. Sa akin naman, sinabi niyang simple lang daw pero bagay lang sa'kin. Nakalugay naman yung mahaba niyang buhok. Pinilit pa niyang isuot yung headband sa'kin kaya um-oo nalang ako. Bagay daw sa'kin dahil sa shoulder length na buhok ko.
Pagkarating palang namin sa tapat ng gate ang dami nang nakaparadang kotse. So I guess, maraming mayayamang kaibigan si Drew. Kasi even their house is kinda big. Their gate is tall and the color is black.
Nakarinig din ako ng loud music so I guess, nag-start na yung party. Tiningnan ko din yung phone ko, nakarating kami ng 7:15 pm.
Agad akong hinila papasok sa gate ni Eli. Mabuti nalang at pinapasok kami no'ng guard. Bakas sa mukha niya ang excitement. Pero habang naglalakad kami ay huminto siya.
"Bella, okay na ba 'tong ayos ko? Yung dress ko, okay na ba?" Mukha siyang kabado e maganda naman siya.
Tumango ako. "Oo naman, tsaka ano ka ba Eli. Kahit ano naman Eli bagay sa'yo." Ngumuso naman siya.
"Yan din yung sinabi mo kanina. Pero salamat." Tumawa siya. "Basta hindi lang ako ang mag-e-enjoy dito, ah? Mag-enjoy ka rin dapat. Minsan lang 'to."
"Okay. Basta bawal uminom." Nag-iba naman ang itsura ng mukha niya. Halatang hindi sang-ayon sa itsura ko.
"Kahit kaunti, bawal?" Tanong niya.
"Bawal. Bawal. Bawal. Okay?" Hinampas niya ako. "Aray naman!"
"Hindi na tayo bata, Bella. 18 na tayo kaya pwede na tayong uminom. Bawal kj." Hindi nalang ako nagsalita hanggang sa pumasok na kami sa loob. Ewan ko ba kay Eli, gustong gustong uminom.
Sinalubong naman kami ni Drew kasama ang mga kaibigan niya. "Hi Eli." Pagkatapos ay tumingin siya sa'kin. "Hi Bella."
"Drew! Happy Birthday." Bati ni Eli kay Drew. Ngiti naman ang isinagot ni Drew.
"Happy birthday." Tumango lang siya sa'kin habang nakangiti.
May binulong naman siya kay Eli, na naging dahilan kung bakit kilig na kilig ito. Tumingin naman ako sa mga kaibigan ni Drew. Lahat siguro mayaman. Sumenyas muna si Eli na aalis siya. Kaya ayon naiwan akong mag-isa.
Hanggang sa may lalaking lumapit sa'kin."Hi. I'm Ralph. Drew's cousin." Pagpapakilala niya sa'kin. May dala-dala siyang drink.
"Hello." Inabot niya ang isa niyang drink sa'kin.
"Wanna have some drink?" Agad naman akong umiling. Nagpunta lang naman ako dito para bantayan si Eli. Hindi ako pwedeng uminom.
"Don't worry, juice lang 'to. It doesn't contain alcohol."
"Thank you pero kukuha nalang ako ng pagkain. Ayokong uminom. Sorry."
"Then, fine." Parang ang sama naman no'ng pagkakasabi niya. Tumanggi lang naman ako. Pagkatapos no'n ay umalis na siya.
"Boys and their attitudes." Bulong ko. Naalala ko tuloy yung lalaki na tinulungan ko sa aso niya. Medyo masungit pa.
Nasaan na kaya siya?
"Bella! Ano kumuha kana ba ng pagkain?" Bungad sa'kin ni Eli.
"Mabuti naman at bumalik ka pa."
"Gaga. Siyempre naman. Hindi mo daw inalok yung drink na binibigay ni Ralph, bakit? Eh juice lang naman 'yon." Saan kaya niya nalaman?
"Eli, eh sa ayaw kong uminom e, kahit juice pa 'yon. Tsaka gusto kong kumain." Kumalma naman yung mukha niya.
"Ah, sige. Tara kain na tayo! Ano nagdala ka ba ng tupper ware? Para naman may dala tayo pag-uwi natin?" Umiling ako.
"Wala akong dala." Basta pagkain talaga, e.
"Di bale, maghahanap nalang ako ng paglalagyan ng pagkain. "
Hanggang sa makarating na kami sa lamesang pagkahaba-habang puno ng mga pakain. Pero may mga bantay naman. Takot sigurong maubusan ng pagkain.
Agad kaming kumuha ng mga pagkain. Kunti lang ang kinuha ko samantalang halos lahat ay gustong tikman ni Eli. Nauna pa siyang pumunta sa table. Naglalakad na sana ako pabalik ng may makabangga ako. Natapon sa kaniya ang kalahati sa pagkain ko. Bigla akong kinabahan at tumingin sa kaniya. Siya yung lalaki kanina, yung Ralph.
"What did you do?" Sabi niya habang hinahawakan ang damit niya.
"Sorry! Sorry talaga! Hindi ko sinasadya-" Pero pinutol niya yung sasabihin ko.
"Hindi mo sinasadya o tanga ka lang talaga?" Bulyaw niya sa'kin. Kung kanina ang lawak-lawak ng ngiti niya e ngayon parang galit na galit siya.
"Hindi ko naman sinasadya." May iilan na tumitingin sa'min pero babalik din sila sa mga ginagawa nila. Mabuti nalang at malakas yung music. Hindi gaanong mapupukaw ang atensiyon sa'min.
"Sa susunod tumingin-tingin ka naman. Hindi ka siguro sanay sa ganito. Stupid!"
Totoo naman na hindi ako sanay sa ganito. Pero hindi naman siguro tama na tawagin akong tanga.
"Ralph, easy. Damit lang 'yan. Hiram ka nalang kay Drew." Lumingon ako sa nagsalitang lalaki sa likod ko.
D-Diba siya y-yung sa malapit nang makabangga sa'kin?
"Psh." Pagkatapos ay umalis na siya. Halatang mainit ang ulo.
"Miss beautiful?" Tawag niya sa'kin. Pilit na kinikilala ang mukha ko. Ilang segundo ay ngumiti siya. "Ikaw nga! Magsalita ka naman!"
Hindi ko alam ang sasabihin ko. Medyo nabigla din ako. Tama nga siya magkikita pa kami ulit.
"H-Hello." Sabi ko tsaka nagpilit ng ngiti.
"Sabi ko na nga ba, e! Baka destiny talaga tayo!" Biro niya. Bagay sa kaniya ang suot niya ngayon. "Mabuti nalang at nagpunta ako sa birthday ni Drew."
"Bro!" Biglang lumapit sa'min si Drew. Inakbayan niya yung lalaki.
So magkakilala sila?
Nakasunod naman si Eli. Halatang gulat at nagpalipat-lipat ng tingin sa'min.
"Bella? Magkakilala kayo ni Rain?"