Chapter Two
"TOTOO? BUMALIK ANG EX MO?" 
"Bwisit ka talaga! I-broadcast ba?" inis na saway ni Ella sa kaibigan niyang si Myrna matapos niyang isangguni rito ang muli nilang pagkikita ni Jinuel sa hospital. Muntikan pa nga niyang ipukpok sa ulo ng kaibigan ang isang bote ng gin na hawak niya dahil sa lakas ng boses nito.
Kasalukuyan silang sa tapat ng tindahan ni Aling Linda sa mga sandaling iyon. Kakagaling lang niya sa hospital nang harangin siya ng mga kabarkada niyang nag-iinuman na naman. 
"Ano'ng itsura niya ngayon? Payatot pa rin ba?" natatawang tanong naman ng isa pa niyang kaibigan na si Kakay, at nagawang nakipag-apiran kay Myrna. 
"Uy, grabe kayo kay Jinjin! Kahit payatot iyon, cute pa rin iyon! Kaya nga nainlove itong si Ella, diba friend?" depensa naman ng isa pa niyang kaibigan na si Glenda. 
"Tigilan n'yo nga ako!" inis niyang saway sa mga ito. 
"Hindi ka happy na makita siya ulit?" Usisa ni Kakay.
Hindi kumibo si Ella. 
"Hala siya! May feelings pa rin ba?" may halong pang-aasar ni Myrna saka ito nagsalin ng alak sa baso. 
"Ano kasi..." napakamot ng ulo si Ella saka siya ang tumagay kahit wala namang sinasabi ang mga kaibigan niya na para sa kanya iyon, "...Para kasing nanliit ako sa sarili ko. After thirteen years, mukhang natupad na niya ang mga pangarap niya sa buhay. Samantalang ako, ganito pa rin! Hindi ko akalain na isa pala siya sa board member ng hospital kung saan naka-admit si Papa!" 
Sabay-sabay na nanlaki ang mga mata ng tatlong niyang kaibigan, at gulat na napatingin sa kanya.
"Weh? Di nga?" duet ng mga ito. 
"Diba nagulat kayo?" saka siya kumagat ng inihaw na isaw bilang pulutan nila. 
"Hindi kaya nanalo sa Lotto 'yung ate nila? Remember, hindi na sila nagpakita noong nasunugan sila!" hinala ni Myrna. 
"Posible!" pagsang-ayon ni Kakay. 
"Mga baliw! Kamo nakapangasawa si Ate Lyra ng mayaman kaya ganoon! Posible iyon dahil maganda naman si Ate Lyra noh!" depensa ni Glenda. 
Nagpatangu-tango naman sila Myrna at Kakay.
Nasa ganoon silang pag-uusap nang marinig ni Ella ang matinis na boses ni Aling Linda. 
"Hoy, Ella! 'Yung utang n'yo kaylan n'yo babayaran? Aba, ang tagal na 'nun ah!" galit pang sita ng matanda sa kanya,
Napakamot muli ng ulo si Ella. Ito ang dahilan kung bakit ilag siya kaninang lumapit sa kanyang mga barkada. Sa tuwing makikita na lang siya ay ito at ito na lang ang laging sinasabi nito sa kanya. Oo, utang naman nila iyon pero minsan kasi nakakairita na rin sa pandinig, lalo na kapag paulit-ulit. Daig pa ni Aling Linda ang pirated CD na tinitinda sa bangketa ng Quiapo. 
Wait, mayroon pa noon? 
"Aling Linda, huwag kang mag-aalala ok?Babayaran kita! Maghahanap na rin ako ng matandang mayamang madaling mamatay!" inis niya. 
"Hay naku, maganda ngang pakinabangan mo 'yang ganda mo!" sabi nito.
Natawa naman siya sa sinabi nito. Kahit kasi galit ito ay nagawa pa rin siya nitong sabihan na maganda. 
"Tama si Aling Linda, beh!" segunda ni Myrna, "Pakinabangan mo 'yang ganda mo! Malay mo, iyon din ang ginamit ni Ate Lyra kaya nakabingwit ng mayaman!"
"Grabe kayo!" gulat niya.
"Ano ba kayo? Isipin n'yo nga. Magkano lang ang sahod sa pagiging barista? Pero nagagawa niyang pag-aralin ng sabay-sabay ang pitong kapatid niya. Imposibleng walang sumusuporta sa kanyang madatong!" dagdag pa ni Myrna. 
"Samantalang kayo, tatlo lang kayo ng Papa at Mama n'yo! Pero hirap na hirap kayong buhayin ang pamilya n'yo!" segunda pa ni Kakay.
Hindi na nakakibo si Ella. Maski siya ay nagtataka noon kung papaano nagagawang buhayin mag-isa ni Ate Lyra ang pitong kapatid nito kung tanging pagiging barista lang sa isang maliit na coffee shop ito nagtatrabaho noon. Ang natatandaan niya, may nabanggit si Jinjin sa kanya noon na sekreto ng ate nito na natuklasan nito. Hindi na naman niya iyon inusisa pa dahil ayaw na din naman sabihin sa kanya ni Jinjin noon.
"Ano? Payag ka na? Subukan mo lang isang gabi!" aya na sa kanya ni Myrna. 
"Oi, Myrna! Huwag mong demonyohin si Ella! Baka mapatay ka ni Mang Lucio kapag nalaman niyang niyaya mo na naman si Ella sa bar na pinagtatrabuhan mo!" babala ni Glenda. 
"Ano ka ba? Mamatay na nga si Mang Lucio sa sakit niya, iyan pa rin ang iniisip mo!" saway ni Myrna.
"Pag-isipan mong mabuti," payo naman ni Kakay. Kasalukuyan na rin kasi itong nagtatrabaho sa bar kasama ni Myrna.
"Actually, nag-offer si Jinuel ng tulong kina Papa," pag-open na rin niya rito.
"Ay wow naman!" sabay-sabay na komento ng mga kaibigan niya pero iba't iba naman ang expression ng mga mukha nito. 
"So, ganoon na lang? Hahayaan mong ipapasan sa ex mo ang lahat ng gastos sa hospital?" tanong ni Myrna. 
"Kaya nga lalo akong nanliit sa sarili ko!" pag-amin niya. 
"Tandaan mo, hindi naman habambuhay na tutulungan kayo ng tao! Saka imposibleng wala iyang kapalit!" hinala ni Kakay, "Naku, dhay! Kung ako sa'yo, sisimulan ko nang akitin 'yang si ex mo! Single pa ba?" 
"Malay ko!" napakibit-balikat si Ella. 
"Single o hindi, sunggaban mo na! Ngayon pang madatong na siya!" natatawang mungkahi ni Myrna. 
"Grabe kayo!" napapailing na komento na lang ni Glenda. 
"Kontra bulate ka talaga, eh!" reklamo no Myrna kay Glenda. 
"Bakit bulate ka ba?" banat nito. 
"Ano'ng plano, Ella? Kung sakaling tulungan kayo ni Jinuel sa pagpapagamot sa Papa mo, gusto mo ba magkaroon ng utang na loob sa ex mo'ng nag-ghost sa'yo? Ikaw na rin nagsabi na nanliit ka sa sarili mo nang nakita mo ulit siya." 
Hindi na kumibo pa si Ella. 
Matagal-tagal na rin siyang niyaya ng mga kaibigan niya sa bar na pinagtatrabahuan ng mga ito. Minsan natutukso na rin siyang sumama lalo na sa tuwing nalalaman niya kung gaano rin kalaki ang kinikita ng mga ito. Pero may dangal siyang hinahawakan. 
Saka malaki ang takot niya sa kanyang Papa. 
Pero tama rin naman ang mga kaibigan niya. Aanuhin niya ang dangal kung nasa bingit ng kamatayan ang Papa niya dahil sa sakit nito. 
Oo, nag-offer sa kanila ng tulong si Jinjin. Pero hanggang kaylan iyon? At dadagdag lang iyon sa mga utang nila na kailangan niyang bayaran. Hangga't maaari, ayaw niyang magkaroon ng utang na loob sa lalaking iyon. Kaya hangga't may nakikita siyang pagkakakitaan, susugaban niya. 
"Okay sige!" payag na niya na kinagulat ng kanyang mga kaibigan. 
"Grabe, ang bilis mong magkapag-isip ah!" natatawang komento ni Kakay.
"Patay tayo d'yan!" react ni Glenda.