Mabilis na lumipas ang mga araw at Intramurals na namin ngayong week. Nagsuot lang ako ng pants at casual blouse dahil wala rin namang klase dahil sa mga events.
"Bye Maaa!," sigaw ko habang tatakbong lumabas ng bahay. Nagmamadali ako dahil kay Sky at Harper na maaga akong pinapupunta sa school para tulungan sila sa inuutos sa kanila.
Sa jeep na ako nagsuklay ng buhok dahil tinatadtad na ako ng messages ni Sky.
"Hello," inis na sagot ko sa tawag ni Sky.
"Nasaan ka na ba?! Kapag di namin nagawa 'to, kasalanan mo!," rinig kong sagot n'ya sa kabilang linya.
"Sabing wait nga, 'di ba?! Anong gusto mo, paliparin ko tong jeep para sa'yo?!," inis na sabi ko saka ibinaba ang tawag.
"Ay shemay! Manong, para po!," muntik pa akong makalagpas sa school! Badtrip talaga 'yang si Sky!
Patakbo na akong pumunta sa isa sa mga room na nasa tabihan ng gymnasium. Hinihingal pa ako nang makarating ako para makita si Sky na nakaupo sa sahig habang kumakain ng hotdog sandwich.
Sinamaan ko s'ya ng tingin at tinawanan n'ya ako. Si Harper naman ay nasa may teacher's table at naglalagay ng tali sa mga banner.
Agad akong lumapit sa kan'ya para tumulong. Kakaunti lang naman ang gagawin pero kailangan ay matapos namin agad dahil may parade mamaya at gagamitin ang mga banner na ginagawa namin.
"Nasaan nga pala ang mga lobo?," tanong ni Harper. Tinuro ni Sky ang kabilang room kaya napatango kami. 
Maya-maya ay nakita namin si Kaydee at Maverick na nasa tapat ng pinto, mga mukhang pagod na pagod at dala nila ang ilang boxes ng lobo.
Agad namin silang nilapitan para kuhanin ang mga box ng lobo.
"Bakit gan'yan ang mga mukha n'yo?," takang tanong ko. Sinamaan naman nila ng tingin si Sky na ngayon ay nakakibit-balikat lamang at nakataas ang kilay.
"Inutusan kasi kami ni Sky na palobohin yang mga lobo na 'yan," mataray na sambit ni Kaydee.
Maya-maya lang din ay nakarinig na kami ng walang-katapusang sigawan ng dalawa sa room. Napakaiingay!
Hindi namin sila pinansin at nagtungo nalang sa table para ikabit ang mga lobo. 6:40 nang matapos kami, maaga pa para sa parade na gaganapin mamayang 7:30.
Dahil medyo napagod din ako sa pagtatali ay umupo muna ako para magpahinga. Naramdaman ko namang may umupo sa tabi ko at nang lumingon ako ay nakita ko si Maverick.
"Dala mo camera mo?," mahinang tanong ko sa kan'ya. Alam ko kasing kailangan nila ni Kaydee 'yon ngayon dahil sila ang kukuha ng mga pictures para sa event.
Nakita ko namang nanlaki ang mata n'ya at umaktong nagpa-panic.
"Hala! Oo nga pala!," narinig kong sabi n'ya saka kinuha ang bag n'ya para tingnan kung nasa loob ba ang camera n'ya pero wala.
Inis ko s'yang tiningnan at pinaghahampas ng notebook dahil wala s'yang dala.
"Bakit wala kang dala! Paano ka magpipicture n'an! Susumbong kita! Aaah, nakakainis ka!," tuloy-tuloy kong sabi habang pinaghahampas s'ya. Pilit naman s'yang umiilag.
"Aww! Ouch! Teka--! Wait lang Reign! May dala ako! Joke lang 'yon, sorry na! Aray!," tuloy-tuloy din n'yang sabi kaya natigilan ako. Maya-maya ay naglabas s'ya ng camera na dala n'ya.
Nag-peace sign tuloy ako sa kan'ya.
"Picture-an kita," nakangiti n'yang sabi sa akin.
"Ayoko"
"Hindi ako nagpapaalam," pagkasabi n'ya ay pinindot n'ya ang shutter ng camera kaya sinamaan ko s'ya ng tingin.
"Dali na kasi," pangungumbinsi pa n'ya kaya napabuntong-hininga na lamang ako saka sumang-ayon.
Ilang minuto pa kami nagpicture-an sa gilid ng room hanggang sa ipinakita n'ya sa akin ang mga picture.
"Pasado na ba, Miss?," tanong n'ya habang isa-isang pinakikita ang mga pictures ko.
Ngumiti naman ako, satisfied sa photoshoot na ginawa n'ya.
"Guys, tara na!," pagtawag sa amin ni Kaydee. Inayos naman namin ang mga gamit namin saka tumayo habang bitbit ang mga banner na pinamigay namin sa bawat section.
"Teka, paano pala si Reign? Sinong kasama n'ya?," tanong ni Sky at Harper.
Oo nga pala, kakanta sila mamaya pagkatapos ng parade para sa opening ceremony kaya maiiwan sila sa school para mag-prepare. Si Kaydee at Maverick naman ay hindi sasabay sa section namin dahil kailangan nilang magpicture.
Ayos lang naman sa akin na maiwan sa pila ng section namin dahil marami pa rin naman akong makakasama doon eh, pero nagulat ako nang sumagot si Maverick.
"Sa akin," sagot n'ya. Nanlaki naman ang mata ni Sky.
"Huh?," takang tanong ko. Nilingon naman n'ya ako.
"Sa'kin ka," sabi pa n'ya. Narinig kong naubo si Harper, mukhang narealize din naman kaagad ni Maverick ang sinabi n'ya. "Sa akin ka sasama. Sa akin at kay Kaydee. Sasamahan mo kami," pagpapatuloy n'ya saka naunang maglakad paalis.
Nagpaalam naman kami ni Kaydee sa kanila saka sumunod kay Maverick.
"Hoy Maverick," tawag ko sa kan'ya. Pinagtaasan n'ya naman ako ng kilay.
"Wala ka bang nickname?," tanong ko pa sa kan'ya. Si Kaydee ay nasa likod namin at nililibot ang mata sa paligid.
"Andrei nga, sinabi ko 'yon noong nagpakilala ako, 'di ba?," sagot n'ya. Ang stupid naman nito! Syempre ayoko s'yang tawagin ng Andrei kasi ang common na.
"Ihh, ayoko ng Andrei! Mavi nalang!," sagot ko sa kan'ya kaya sinamaan n'ya ako ng tingin. Maayos naman pakinggan ang Mavi ah?
"Ayaw mo n'on, binigyan kita ng nickname? Kapag daw binigyan ka ng nickname ng isang tao, importante ka sa kanila!," pagdedepensa ko pa sa sarili ko.
"Ahh, importante pala ako sa'yo?," takang tanong n'ya kaya nanlaki ang mata ko. Huh? Sinabi ko ba 'yon?
"Huh? Hahaha, s-syempre! As a friend! Hahaha," awkward kong pagpapaliwanag. Tumango-tango naman s'ya kaya hindi ko na s'ya pinansin.
Dahil sa hiya ay umuna ako sa paglalakad. Bakit ba napakabagal nilang maglakad eh kailangan nilang mag-take ng pictures?
Nasa may unahan na ako kung saan maguumpisa ang parade. Nakita ko rin naman si Kaydee at Maverick na palinga-linga, hinahanap ata ako.
"Mavi!," pagkuha ko sa atensyon n'ya saka ini-wave ang kamay para makita n'ya ako.
"Ang bagal nyo namang maglakad!," reklamo ko nang makalapit sila. Inabutan naman ako ni Mavi ng tubig. "Uy tubig, thanks!"
Ilang sandali pa ay nag-umpisa na ang parade. Naglakad nalang din ako at nasa likod ko si Mavi na nakuha ng mga pictures. Hindi ko na lang s'ya pinansin para hindi s'ya madistract sa pagkuha ng mga pictures.
Si Kaydee naman ay nagpaiwan dahil s'ya raw ang kukuha ng pictures sa may bandang gitna at likuran.
Ilang minuto na kaming naglalakad at medyo napapagod na ako. Idagdag mo pa ang ingay mula sa isang section na nakasabay ko sa paglalakad. Tapos napaka-init dahil tirik na tirik ang araw, wala pa man din akong dalang payong.
Maya-maya ay may dumaan sa tabi ko, nakita ko si Mavi na tatakbong pumunta sa unahan para mag-take ng pictures. Nakasimangot lamang ako habang nakataklob ang palad ko sa may mukha dahil sa init.
Naramdaman ko namang lumapit na rin si Mavi nang matapos sa ginagawa n'ya. Narinig ko s'yang natawa tapos ay inilapit n'ya ang camera niya.
"Tingnan mo ang itsura mo oh, nakasimangot ka," sabi pa n'ya. Aba, talagang nag-zoom in pa ha! Agad ko s'yang binatukan pero tumawa lang s'ya.
"Ang init kasi ih! Badtrip ka, d'on ka na nga!," iritang sabi ko saka s'ya ipinagtutulakan. 
Binilisan ko pa ang lakad ko para hindi ko s'ya makasabay sa paglalakad dahil nga badtrip ako sa kan'ya.
"Oh eto na, papayungan kita," rinig kong sabi n'ya. May dala nga s'yang black na payong at sakto lang ang laki sa amin. 
Hindi ako umimik at uminom na lang ng tubig dahil pakiramdam ko ay pagod na pagod ako.
Ilang minuto pa kaming naglakad hanggang sa makabalik kami sa school. Agad kong inupuan ang isang monoblock na nakita ko, wala nang pake kung mayroon bang nagmamay-ari doon.
Ipinikit ko na lang ang mata ko dahil parang nanakit ang ulo ko dahil sa init sa labas. Idagdag mo pa ang pagkalayo-layong lakarin na ginawa namin sa parade. 
Nanatili lang ako sa ganoong pwesto. Naramdaman kong may mga dumadaan sa paligid ko pero hindi ako nag-effort para imulat ang mata ko. Hanggang sa may naramdaman akong hangin, iminulat ko ang mata ko.
Nakita ko si Mavi na nakatayo sa tabi ng monoblock na inuupuan ko, at may hawak na pamaypay. Natawa ako sa itsura n'ya dahil ang inosente n'yang tingnan doon, color pink din ang pamaypay na gamit n'ya at may nakaburdang pangalan ng babae.
Nang mapansin n'ya na nakamulat na ang mata ko ay inabutan n'ya ako ng isang supot at water bottle. Naubos na rin kasi ang tubig na bigay n'ya kanina. May tinapay naman sa loob ng supot na iniabot n'ya.
"Kumain ka muna d'yan, ha? Baka mamaya, mahimatay ka pa d'yan," sabi n'ya sa akin na agad kong tinanguan. Nagutom din kasi ako eh.
"Umupo ka muna dito, hahanapin ko si Kaydee para samahan ka. May kailangan lang akong ipasa sa office, okay?," paalala pa n'ya. Kumakain naman ako kaya hindi ako nakasagot, tumango lang ako.
Bago s'ya umalis ay ginulo muna niya ang buhok ko kaya sumimangot ako. Ano ako, aso?
Ilang minuto lang din ay dumating na si Kaydee at humila ng isang monoblock para itabi sa akin. Nagstart na rin naman ang opening ceremony.
"Please welcome, the Glee Club! And give them a round of applause!," pagsasalita ng emcee. Isa-isa rin namang nagsipag-akyatan ang mga members ng Glee Club.
Nakita ko si Sky at Harper na kumaway sa gawi namin. Nakita ko namang sumimangot si Sky nang makita si Kaydee. Nginitian ko tuloy ng nakakaloko si Kaydee.
Ang ganda ng ipinakita na performance ng Glee Club, ang gaganda ng boses nila. Nang makababa sila sa stage ay nag-bangayan na naman na parang mga aso at pusa sina Sky at Kaydee.
Hindi namin sila inawat ni Harper at papunta na sana kami sa classroom dahil kukuhanin ni Harper ang extra shirt n'ya nang makasalubong namin si Maverick.
"Hi And--," hindi na natuloy ni Harper ang bati n'ya nang hilahin ako ni Mavi sa palapulsuhan.
"Bye!," sigaw n'ya habang hatak-hatak pa din ako. 
Saan ba kami pupunta? At bakit hinihila n'ya ako?
"Hoy saan ba tayo pupunta? Nagmamadali ka ba?," tanong ko. 
"Magsisimula na 'yung game ng volleyball, kailangan ko kumuha ng pictures at manood," sabi pa n'ya.
Oo nga pala, ngayon ang laban ng volleyball at kailangan nila mag-take ng pictures for documentation. 
"Pero bakit kasama ako?," takang tanong ko. Sa pagkakaalam ko ay sila ni Kaydee ang dapat magkasama, bakit napasali ako?
"Kasi nag-aaway pa sina Sky at Kaydee. Ayaw magpaawat at wala ata silang balak tumigil dahil asaran pa rin sila nang asaran. Kaya ikaw ang kumuha ng pictures in behalf of Kaydee," pagpapaliwanag n'ya nang makarating kami sa open court. 
Sumimangot naman ako. Akala ko pa man din ay pahinga lang ang gagawin ko maghapon pero nagkaroon ako bigla ng gawain!
Sa may unahang part kami naglagay ng mga gamit namin. Hindi rin naman kami mananatili sa pwesto na 'yon dahil hahanap kami ng magandang anggulo sa mga pictures na kukuhanin namin.
Ilang minuto na lang ay mag-uumpisa na ang laban kaya nagpaalam muna ako kay Mavi na mag-iikot-ikot ako para kumuha ng picture.
Sa kabilang part ng court ako pumwesto, nanood lang muna ako at paminsan-minsan ay kumukuha ng litrato.
Nage-enjoy lang ako sa panonood sa laro dahil hilig ko rin ang paglalaro ng volleyball. Nakangiti ako the whole time dahil malapit nang manalo ang team ng grade level namin. Madami ang nagchi-cheer sa magkabilang side ng court.
Napalingon ako sa kabilang side ng court at nakita si Mavi na may hawak na camera. Nagulat ako nang makita na sa akin nakatutok ang camera n'ya. Pero agad din n'yang iniwas. Hindi naman siguro sa akin nakatapat, assuming lang siguro ako.
Hindi ko na namalayan ang nangyari at nagulat na lang ako nang may maramdaman na parang may tumama sa ulo ko.
"Omygosh!," rinig kong sigaw ng mga tao habang nakahiga ako sa sahig, nahihilo.
Nalilito ako sa mga nangyayari sa paligid ko hanggang sa dumilim na ang paningin ko. Bago ko tuluyang isara ang mata ko ay narinig ko ang sigaw ni Mavi.
"Reign!," sigaw n'ya hanggang sa makalapit s'ya sa akin. 
Hindi ko na alam kung ano ang nangyari pagkatapos dahil nang buksan ko ang mata ko ay natanaw ko agad ang liwanag galing sa mga ilaw na nasa kisame.
Sinubukan kong umupo sa kama kahit medyo masakit pa ang ulo ko.
"Reign!," dali-daling tumayo si Harper sa upuan at nilapitan ako para tumulong sa akin sa pag-upo.
"Kumusta ka? Anong nararamdaman mo? May masakit ba sa'yo? Nahihilo ka ba? Nasusuka? Masakit ang ulo? Tatawag na ba ako ng nurse? May kailangan ka ba?," sunod-sunod n'yang tanong at kita ko ang pag-aalala sa mukha n'ya.
"Okay lang ako, Harper," natatawang sabi ko sa kan'ya. Nakita ko namang parang nabunutan s'ya ng tinik sa dibdib dahil sinabi kong okay lang ako.
"Sure? Wait, tatawag lang ako ng nurse," sabi n'ya saka dali-daling tumakbo para tumawag ng nurse.
"Reeeeigggn!," sigaw ng tumatakbong si Sky. Nilapitan n'ya ako at sinuri.
"May masakit ba sa'yo?," tanong n'ya kaya umiling ako. Binalingan n'ya ng tingin si Kaydee.
"Kasalanan mo 'to ih!," paninisi pa n'ya. 
"Ano? Bakit ako?," inosenteng tanong ni Kaydee sa kan'ya.
"Kung ikaw ang nagtake ng pictures, hindi si Reign ang masasaktan"
At doon nagsimula ang panibagong away ng dalawang kaibigan namin. 
Maya-maya ay nakita kong nakatingin sa akin si Mavi. Nginitian ko tuloy s'ya saka siya lumapit.
"Sigurado ka bang okay ka lang?" Mukha ba akong hindi okay?! Pang-ilang tanong na nila 'yan ah!
"Masyado mo akong pinag-alala," sabi pa n'ya saka ginulo ang buhok ko.