Gabing-gabi na pero hindi ako nakakaramdam ng pagod habang gumagawa ng design. Somehow ay naaliw ako sa ginagawa. Alam mo iyon, iyong parang nag-uumapaw ang energy mo sa trabaho mo. Nasa condo ako at mag-isang namumuhay dahil nasa edad naman na ako. Malapit na ako matapos sa ginagawa kaso ay pakiramdam ko ay mapuputol na ang batok ko sa ngalay. Uminat ako at sumandal sa swivel chair.
“Haaayyyy!” humihikab ako at uminat. Pakiramdam ko ay puputok ang mga buto ko sa likod sa matinding ngalay. Sumasakit narin ang mata ko kaya pumikit muna ako. Ilang minuto palang akong nakapikit nang marinig kong may nag-chat sa akin.
Wow naman! Gabing-gabi na ah!
Tumunog ulit ang phone ko kaya dinampot ko na iyon para basahin ang message. Si Michelle. Siya at si Ron ang mga matalik kong kaibigan since college. Sila ang nakakaalam ng halos lahat ng sikreto ko pati narin ang wagas kong pag-ibig kay Jace. Nagmessage si Michelle sa group chat namin. Yes. May group chat kaming tatlo eh! Para mabilis ang tsismisan.
“Beshy, alam mo na ba? Condolence!” chat ‘yon ni Michelle kaya nilokob ng kaba ang dibdib ko.
“Huh?! Anong condolence?” nagreply ako agad.
“Oww, hindi mo pa alam? Check mo profile ni Jace.”
Sa sobrang kaba ay hindi na ako nagreply kay Michelle. Hindi! Anong nangyari! Magkasama lang kami ni Jace last week! Tiningnan ko agad ang account ni Jace at nanlamig ako sa nabasa ko. Parang dinurog ang puso ko. Paano na ang pangarap ko?
Jace is in a relationship with Anne.
Iyon ang nabasa ko. What the?! Sino ang bruhang si Anne? Napasabunot ako sa buhok ko. Wala manlang nababanggit sa akin si Jace. Napakasakit. Nabasa ko pa ang mga congratulations ng mga kaibigan namin kay Jace. At may comment din ang hinayupak na Michelle! May ilan ding katrabaho si Jace na nag-comment ng sa wakas daw ay sinagot na si Jace ni Anne! Ibig sabihin ay matagal ng nanliligaw si Jace? Ni hindi manlang nito nabanggit sa akin. At least sana ay prepared ako sa sakit.
Nanginginig ang mga kamay ko. Sa totoo lang ay masakit talaga. Ilang taon ko ng lihim na minamahal si Jace. Imagine! Since college. Simula ng una ko siyang masilayan. Kahit na parang napapahiya ako sa sarili ko at kinakabahan ako ay binisita ko parin ang profile ni Anne. Mapait akong napangiti ng makita ang profile picture ng babae.
Maganda si Anne. Matangkad, morena, sexy at halatang alagang-alaga ang sarili. Idagdag pa na maganda siya manamit. Tiningnan ko pa ang ilang pictures ng dalaga. Para nga itong artista sa mga pictures niya. Kung gugustuhin siguro niya ay papasa nga siyang artista.
Ganito pala ang mga tipo ni Jace sa babae? Ano ba ang laban ko sa isang tulad niya. Kailan pa at saan siya nakilala ni Jace? Para pala akong baliw, umaasa na mapapansin ako ni Jace, iyon pala ay busy na ito sa panliligaw sa iba.
Sa ilan sa mga post ni Anne ay nabasa ko ang palitan nila ng comments ni Jace. Halata sa mga comments ni Jace na gusto nito si Anne. Napakaswerte naman ni Anne!
Hindi ko na namalayan ang mga luha sa mga mata ko. Bigla ay nag-ring ang cellphone ko at si Michelle ang tumatawag.
“Ano?!” masama ang loob na sagot ko.
“Ano na beshy? Hindi ka na kasi nagreply. Okay ka lang?”
“Oo naman,” sagot ko sabay singhot.
“What the?! Umiiyak ka? Seryoso?” malakas na tanong ni Michelle. Minsan iniisip ko kung kaibigan ko ba talaga ito o pina-plastic lang ako ng bruha na ito!
“Alam mo naman na mahal ko si Jace diba?”
Napabuntong-hininga si Michelle. Nai-imagine ko na napapakamot na naman siya sa hindi makati. “Oo nga, alam ko beshy. Pero sana noon mo parin alam na hindi ka niya type,” sagot niya.
“Napaka-brutally honest mo naman! Ano ba, tumawag ka ba para aluin ako o para insultuhin ako?” sagot ko at natawa si Michelle.
“Hay naku beshy! Alam mo kung gaano kita sinuportahan ha. Siguro naman ngayon titigil ka na? Tama na ang paghahabol kay papa Jace. Ang dami-daming may gusto sayo. Bigyan mo sila ng chance.”
“Beshy…Sa tingin mo, wala na talagang pag-asa?” tanong ko parin.
“Ayan ka na naman beshy eh. Kita mo nanga na may girlfriend na iyong tao.”
“Ang sakit beshy eh,” pumiyok na ako.
“Hayaan mo beshy, mawawala din iyan. Dapat magsimula ka na mag-move on habang maaga pa. Mukhang wala tayong laban kay Anne. Ang ganda eh. Tiningnan mo ba sa fb? Nakita ko ‘yong mga pictures nya mukhang—”
“Oo na! Maganda na! Nakita ko!” putol ko sa kaniya. Ayoko ng marinig ang mga papuri niya sa babae. Nakakainis ang Michelle na ito!
“Teka, hindi mo talaga alam na may nililigawan si Jace?”
“W-Wala talaga akong kaalam-alam,” sagot ko habang pinupunas ang mga luha.
“Sorry beshy. Wag ka ng umiyak,” sagot sa akin ni Michelle.
Natapos ang usapan namin ni Michelle ay gabing-gabi na. As usual, matiyaga siyang nakinig ng mga hinaing ko. Tulog na si Ron kaya hindi pa nito nababasa ang usapan namin ni Michelle sa group chat kanina. Pero hindi sapat ang mga words of wisdom, payo at encouragement ni Michelle para burahin ang sakit na nararamdaman ko. Dama ko parin ang lungkot.
Ang payo ni Michelle ay mag-move on na ako. Pero handa ba akong kalimutan ang ilang taon na pagmamahal kay Jace? Kung ako ang tatanungin ay gusto ko nalang na huwag mahalin ang binata. Pero ang malaking tanong, handa bang sumunod ang puso ko sa gustong mangyari ng isipan ko? Kaya ko ba na basta nalang burahin ang pagmamahal kay Jace?
Kung tutuusin ay hindi naman ngayon ang unang pagkakataon na nagkaroon ng kasintahan si Jace. Noong college kami ay nagkaroon narin ito ng girlfriend. At tulad ngayon ay nasaktan din ako noon ng labis. Pero hindi nagtagal at nag-break din ang dalawa na labis kong ikinatuwa. Ilang beses pang nagka-girlfriend si Jace pero sa tuwina ay nauuwi din sa hiwalayan iyon. Kaya naman kinukumbinse na ako ni Michelle at Ron na kalimutan na si Jace; dahil kung ilang beses ito naging “in a relationship” ay iyon din ang beses na nadurog ang puso ko. Pero simula ng maka-graduate kami ng college ay ilang taon na walang girlfriend si Jace. Syempre sumibol ulit ang pag-asa sa aking puso. Kaya nakakabigla na may girlfriend na ulit siya. At this time, hindi na siya college student. Professional na siya at mas matured. Feeling ko, this time, seryosohan na ang relationship niya with Anne! At parang imposibleng maghiwalay ang dalawa!