Nagising ako dahil sa tumatamang liwanag sa mata ko. Napabalikwas ako nang makitang wala na akong katabi.
Petchay! Nakakahiya ako pa ang late na nagising!
Nagmadali akong pumasok ng banyo at nag-ayos ng sarili. Tinahak ko kaagad ang malawak na daan at mataas na hagdan pababa. Natigilan ako nang marinig ang sigaw nila.
"Happy Birthday Vinea and Taxon!"
Natutop ko ang bibig ko. Nakangiti silang lahat sa akin. Nasa gitna nila si Taxon may hawak na cake. May sumabog na kung ano nang makita ko iyon ay ang mga nagagandahang bulaklak na hindi ko alam kung saan galing.
Birthday ko? Magka-birthday kami ni Taxon?
Kinuha ko ang phone ko at nanlaki ang mata ko nang makita kung anong date na. Mas matanda sa akin si Taxon ng apat na taon. Hindi ko naman aakalaing magka-birthday pala kami. 19 pa lang ako at siya ay 23 kaya nga graduate na siya.
"Happy birthday! Happy birthday, Happy birthday Taxon and Vinea," kanta nila na sinasabayan pa ng sayaw ni Elle at Jave.
Tumulo ang luha ko. Hindi ako makapaniwalang ginawa nila ito sa akin, sa amin. Hindi ko naman sila talaga lubos na nakakasama pero heto at nasorpresa ako.
Kinuha ni Elle ang hawak na cake ni Taxon at itinulak ito papunta sa akin. Napatulala ako sa hitsura niya parang tumigil ang mundo. Naka-white v-neck siya na shirt at hindi ako nagkakamaling 'yon 'yong sinabi kong shirt na bagay sa kaniya.
Lumalapit siya nang lumalapit ramdam ko ang tila ba pagbagal ng kilos ng lahat.
"Happy birthday, Blabby." Napamaang ako nang makita ang maganda niyang ngiti. Lumalagabog nanaman ang dibdib ko.
Petchay! Hoy, heart 'wag malandi may boyfriend ako.
Pinigilan ko ang kilig na gumagapang sa akin. Ang saya ko ay lumalala, ang tibok ng puso ko ay para bang nagsasabing lalabas na siya at walang pasabing ipagsisigawan na tinitibok nito si Taxon. Pinigilan ko ang sarili ko dahil mali ito, maling-mali.
Dapat ay mag-best friend lang kami.
"Happy Birthday, Mr. Horrible." Ngumiti ako at ginulo ang buhok niya. "Nakalimutan ko ang birthday ko, hindi ko alam na magka-birthday pala tayo. Paano mo nalaman 'yon?"
"I know everything about you."
"Talaga?" Umakbay ako sa kaniya kaya nagtilian sila.
Tiningnan ko sila at pinakadiinan ang salitang "Best friend," kaya naman natahimik sila.
"Salamat! Salamat sainyong lahat!" Tumulo na ang luha ko habang pinapasadahan ng tingin sila.
Isa-isa silang yumakap sa akin. Nang si Elle na ang yumakap ay hindi ko na binitawan kaya tumawa sila.
"Hihi." Nahihiya kong binitawan si Elle.
Lumapit si Jave kaya nag-init agad ang pisngi ko.
"Happy Birthday, Vinea." Nakangiti niyang sabi.
"Salamat!" Kinuha ko ang phone ko. "Pwede ba tayong mag-picture?" Nagulat man siya ay ngumiti na rin.
Sasamantalahin ko na ang pagkakataon na kasama ko sila baka wala nang next time. Ang pogi talaga ni Jave! Bagay na bagay sila ni Elle.
"Taxon!" Masama ang tingin niya pero lumapit pa rin. "Picturan mo kami." Nakasimangot niyang kinuha ang phone.
Masaya naman akong lumapit kay Jave. Nakataas ang kamay na naka-peace at wacky, si Jave naman ay nakangiti lang.
"Ang ganda!" Sabi ko habang pinapasadahan ng tingin ang picture. Paalis na si Jave pero hinila ko ulit siya. "Tayo naman nila Elle!" Nagpa-cute pa ako kaya wala siyang nagawa.
"Elle!" Hinila ko siya sa braso at dinala ko silang dalawa ni Jave sa mala-stage na nakalagay sa sala na may nakalagay na 'Happy Birthday, Taxon and Vinea'
Malapad akong ngumiti habang hawak ang braso ni Elle at Jave. Naiiyak na ako sa tuwa.
"Yehey!" Nagtatalon ako papunta kay Taxon at yumakap sa kaniya. "Thank you so much!" Umiyak na ako sa dibdib niya. "Ang saya-saya ko." Para akong baliw na umiiyak tumatawa pa.
Natawa si Taxon sa hitsura ko. "Anything for you." Nakangiti niyang tinanggal ang luha ko.
Napatigil ako nang makitang may inilabas siyang tali sa bulsa. Inayos niya ang buhok na humaharang sa mukha ko at inipit iyon. Nakangiti ko siyang pinagmasdan. Talagang pinag-aralan niya ang gawaing iyon.
"Oh fuck! So sweet!" Nakangising sabi ni Kil.
Lumapit siya at tinapik ang balikat ni Taxon. "Happy Birthday, Kuya." Tumingin siya sa akin. "Happy birthday, Vinea. Destiny nga naman!" Pang-aasar niya pa at umalis na rin, kinulit si Arah.
"Baby!" Napalingon kami sa magandang babaeng nagsalita.
Namaang ang bibig ko nang makita sila. Si Mr. Laurent Baider at may iba pang kasama.
Petchay! Posible bang lolo ni Taxon ang may-ari ng school? Oo nga! Baider!
Baider, Baider, Baider!i
Sobrang yaman nga talaga nila!
Lumapit si Taxon at nagugulat akong kasama niya akong pumunta sa kanila. Humalik si Taxon sa magandang babae kahit ang tingin nito ay nasa akin.
"Happy Birthday, Baby," Niyakap niya si Taxon at pinanggigilan pa.
"Mommy, she's Vi--" Hindi na naituloy ni Taxon ang sasabihin dahil ito na ang lumapit sa akin at yumakap.
"Vinea!" Nagugulat ako dahil sa biglaan niyang pagyakap nang kumalas siya ay ngumiti ako.
"Happy Birthday, Vinea! Ako ang mommy ni Taxon, Laureyna Anmela Baider," magiliw niyang sabi sa akin.
"Napakaganda niyo po!" Namamangha kong sabi.
"Ikaw rin, kaya ka nga gusto ni-"
"Mommy!" Tiningnan na siya nang masama ni Taxon pero tumawa lang ito. Ngumiti ulit siya sa akin. "Feel at home, hija. Enjoy!" Nakangisi siyang tumigin ulit kay Taxon. "Enjoy! I know you'll enjoy"
"Happy Birthday, Hija." Nakangiting bati sa akin ni Mr. Baider.
"Salamat po." Nahihiya ako pero malapad ko siyang nginitian.
"Daddy, si Vinea." Ngumiti sa akin ang lalaki.
Kamukha niya si Kil. Lahat naman sila ay mala-artista ang hitsura.
"Hi, beautiful lady. I'm Jerex Blunt," nakangiti niyang bati sa akin.
"Hello po."
Naagaw ng atensyon ko ang baby na karga ng isa pang babae. Lumapit si Kean at humalik dito.
"Asawa siya ni Kean, si Qiyannie Elizabeth Tosler, anak nila si Qiera Kesh Valencia." Nakangiting sabi ni Taxon sa akin.
May anak na pala siya at asawa. Lumapit ako sa kanila.
"Hi!" Magiliw kong sabi parehas silang ngumiti ni Kean. Gusto kong panggigilan ang baby nila. "Ang cute!"
"Gawa ka na rin," biro ni Kean sa akin.
"Ayaw ko bata pa ako," pakikipagbiruan ko rin.
"Walang bata-bata attorney na si Taxon."
Talaga pa lang mapang-alaska silang magkakaibigan.
"Best friend ko lang siya," tumawa ako.
"Best friend with benefits-- aray!" Natigilan siya nang hampasin ni Elle.
"Kung anu-ano sinasabi mo!" Asik niya rito.
"Nagbibiro lang, Beautiful," tumawa siya. Napatingin ako sa tawa ni Kean.
Namamangha talaga ako sa mga hitsura nila daig mo pa ang mga goddess. Ako lang yata ang pangit dito.
"Staring at Kean?" Kunot noong tanong ni Taxon.
"Eh, kasi." Hinawakan ko ang baba ni Taxon ibinaling sa kaliwa't kanan. "Bakit ganyan ang mga hitsura niyo? Ang pogi!" Namamangha kong sabi kay Taxon. Nakita ko ang pagporma ng ngiti sa labi niya.
"Pogi ako?"
"Oo. Magsisinungaling pa ako 'yon naman ang totoo! Look!" Hinawakan ko pa ang ilong niya. "Ang tangos!"
Kinapa ko ang ilong ko. "Hindi naman masyadong matangos ilong ko," tumawa ako kaya natawa rin siya.
"You're crazy."
"Baliw talaga ako," nagtawanan kaming dalawa.
"Baliw sa akin?" Natigilan ako nang sabihin niya iyon.
"Hoy, petchay! Feelingero ka."
Hinila ko na siya papunta sa nagkakagulong sila Jave, Rev at Kil. Naglalagayan sila ng icing sa mukha. Nang malagyan si Jave ay nanlaki ang mata ko nang gamitin ni Elle ang hintuturo upang kunin ang icing sa pisngi niya at kainin iyon.
Waahh! Ang sweet!
Kinilig ako nang sobra kaya wala sa sariling nakikuha rin ako nang icing at nilagyan ang tungki ng ilong ni Taxon. Sumama ang tingin niya sa akin.
"Ang cute," tinawanan ko ang mukha niya.
Pero nagulat na lang ako nang may maglagay sa pisngi ko, nang lingunin ko iyon ay si Rev. Kumuha ako ng mas marami at hinabol siya.
"Woah!" Sigaw niya nang mahuli ko siya at tinapalan ng icing sa mukha saka ako tumakbo. Nang makalapit ako kay Taxon ay sa kaniya ko inilagay ang natitirang icing sa kamay ko.
Habang kumukuha ay nagulat akong may naglagay ng icing sa mukha ko. Si Elle! Tumatawa siyang tumakbo, hinabol ko rin siya pero nagulat ako nang makita kong nakangisi na sa akin si Jave, Kean at Rev. Napaatras ako at napapikit na lang dahil nakikini-kinita ko na ang hitsura ko dahil sa daming icing sa kamay nila pero ilang segundo ang lumilipas na walang dumadamo sa mukha ko hanggang sa narinig ko na lang ang malakas na tawanan.
Natawa rin ako nang makita kong si Taxon pala ang humarang para saluhin lahat ng icing na dapat ay sa akin. Punong-puno ng icing ang mukha niya, masama ang tingin sa kanila.
Malakas na tawanan ang nangibabaw na maging ang mga magulang niya at si Mr. Baider ay malakas ang tawa.
Lumapit pa ako at hindi nakontento inilagay ko pa sa kaniya ang icing na nasa kamay ko. Halos ihilamos ko na sa kaniya ang parehas na kamay.
"Nice!" Masama niya akong tiningnan pero nang makita niya ang ngiti ko ay nakita ko rin ang ngiti niya.
May nag-flash kaya napalingon kami roon.
'Ayon nanaman si Jave at kinukuhaan kami ng picture. Tinanggal ni Taxon ang icing sa mukha at saka inilagay sa mukha ko.
Ibang-iba ang saya ko ngayon. Para bang napunan ang kakulangan sa buhay ko. Kahit naman magkaibigan lang kami ni Taxon ay masaya talaga akong kasama siya kahit pa nagsusungit siya, natural na sa kaniya 'yon.
Hindi pa natapos ang kasiyahan namin. Lahat kami ay nagsipagtakbuhan papunta sa dagat. Parang mga batang nag-uunahan. Hawak ko ang kamay ni Taxon at hinila siya habang tawa nang tawa.
"Ang lamig!" Sigaw ni Rev nang marating namin ang dagat. Binuhat niya si Ali at inikot-ikot.
Hanggang kailan ba ako maiinggit sa couple na may masayang relasyon?
"Ahhh! Impakto!" Karga ni Jave si Elle at saka inihagis sa dagat. Ang lakas ng tawa ni Jave.
Tumulo ang luha ko nang maalalang kahit bati man lang ni Brekley, wala!
Nagmadali akong pumunta sa buhanginan nang mag-ring ang phone ko.
"Nasaan ka? May surprise sana kami pero nilamok na kami ni Jerick dito wala ka pa rin!" Dire-diretsong sabi ni Cecelia.
Natawa ako. "Talaga? Nasa Camarines Norte ako. Kasama ko sila Elle! May surprise rin sila sa akin, ang saya rito! Salamat nga pala Cecelia hindi mo nakalimutan ang birthday ko. Salamat sainyo ni Jerick!" Masaya kong sabi.
"Ikaw talaga! Enjoy ka lang diyan. Happy Birthday!"
"Happy Birthday!" Ibinigay niya kay Jerick ang phone kaya siya naman ang bumati.
"Salamat!"
Walang mapaglagyan ang saya ko pero agad na kumirot ang puso ko dahil wala talagang naalala si Brekley. In-open ko ang facebook ko at lalo pa akong napahagulgol nang makita ang post ni Brekley may kaakbay na babae. Hindi ko dapat lagyan iyon ng malisya pero ang makalimutan niya ang birthday ko.
Ang sakit!
Kahit nakalimutan ko iyon may mga tao pa ring nakaalala para sa akin.
Naramdaman ko ang pagtabi ni Taxon kaya walang pasabing yumakap na ako sa kaniya at humagulgol ng iyak sa dibdib niya.
"Hindi man lang naalala ni Brekley wala talaga akong halaga sa kaniya. Hindi niya nga siguro ako mahal." Yumakap siya sa akin at ramdam ko ang higpit noon.
"Don't waste your tears. Ako... mahal kita."