"Bini, dito ka na sumakay!" alok ng isang tricycle driver nang dumaan siya sa kanto.
Nagbingi-bingihan si Bini at tumanaw ng jeep sa kalsada. Matapos ang usapan nilang mag-ina ay agad siyang umalis ng bahay. Ayaw na niyang makipagtalo rito baka hindi lang sila magkaintindihan.
"Bini," Lumapit si Mark, ang kaklase niya noong highschool at ka-baranggay.
"Hatid na kita," malambing na alok nito nang magsalubong ang tingin nila.
"Hindi na kailangan. Kaya ko, hindi naman ako tanga," muling tumanaw si Bini sa mga parating na sasakyan.
Narinig niya ang tila pambubuyo at panunukso ng kapwa driver ni Mark sa kanila. Pinilit niyang sumeryoso, sa tuwing pumapasok siya sa trabaho ay lagi na lang ganito ang senario.
Katulad niya, single rin si Mark, kasing-tanda at kalapit bahay niya lang kaya madalas silang gawing loveteam.
"Bini, ihatid na kita sa trabaho."
Mabilis siyang luminga rito habang pinipigilan ang pagbaha ng inis sa mukha. Sandali pa niyang tinapunan ng masamang tingin ang grupo ng matatandang driver sa 'di kalayuan.
"Mark, kaya ko na nga. Atsaka, jeep ang hinihintay ko," pigil ngunit matigas na bigkas ni Bini.
"Sungit mo naman. Libre, hindi kita sisingilan," pamimilit nito habang hawak-hawak ang sariling towel.
Napatingin sila nang may humintong motor sa gilid ng daan. Dahil naka-helmet ay hindi niya makita ang mukha nito.
"Pasensiya ka na. Kanina ka pa ba naghihintay?" tanong nito at nang itaas ang helmet ay nakapakurap siya.
"Allen?"
Tiningan ni Allen ang binatang lumapit sa kaniyang bestfriend na si Binibini. Mukhang nakuha naman ng tricycle driver ang tingin na iyon kaya agad na umatras, tumalikod at naglakad paalis.
"Anong ginagawa mo rito?"
"Kailan ka pa nakauwi?"
Sunod-sunod na usisa ni Bini habang nakamulagat sa kaibigan. Ilang linggo na rin kasi itong umuwi sa probinsiya dahil sa pamamayapa ng isa sa mga kamag-anak nito.
"Hindi ka na ba papasok at magkukwentuhan na lang tayo?" Abot-tengang ngiting tanong nito.
Napatingin siya sa helmet na inabot nito bago sa mukha ng binata.
"Sige na. Angkas na."
"Hindi na. Magje-jeep na lang ako," tanggi niya.
"Sige na. Late ka na o!"
Nagulat si Bini nang hawakan siya sa braso ni Allen at maingat na isinuot sa kaniya ang helmet. Wala na siyang nagawa nang igiya siya nito sa likod ng motor.
Habang nagmamaneho si Allen ay nananatili ang mga kamay ni Bini sa likod para kumapit. Kung may lalake man siyang kaunting pinagkakatiwalaan ay iyon ang kaniyang highschool bestfriend na si Allen.
Pero nang pareho na silang magkatrabaho ay madalang na silang magkita at magkasama nito.
"Salamat," saad ni Bini nang maibalik ang helmet sa kaibigan.
"Your welcome."
"Nga pala, nakinig ako kagabi ng show mo. Sana hinayaan mo muna na makapag-usap iyong dalawa-"
"Hep! Hep! Hep!" putol niya kasabay nang pagtaas ng kamay para pahintuin ang binata sa pagkukwestiyon ng ginawa niya.
"Basher ka ba?" mataray na tanong ni Bini.
Napailing at napangiti na lang si Allen habang pinagmamasdan ang kaibigan. Lalong natawa ang binata nang pameywangan siya nito.
"Huwag mo nga kwestyunin ang mga payo sa kapwa ko babae. It's a girl thing," maarteng katwiran niya kasabay nang pag-snap sa hangin.
"Oo na, ikaw na si Binibini Macaraeg! Ang tagapagtanggol ng mga kababaihan!" Natatawang litanya nito.
"Ganiyan dapat ang sinasabi mo, hindi kinuwestiyon mo ako," Nakahalukipkip at mayabang niyang saad.
"Sige na, pasok na."
Ibinaba ni Bini ang mga braso at sumeryoso. Sinalubong niya ang tingin ni Allen na nananatiling nakangiti sa kaniya.
"Salamat ulit sa paghatid."
Tinanguan lamang siya nito, matapos ngitian ang binata ay tumalikod na siya at tuluyang pumasok sa istasyon. Napailing na lang si Allen habang sinusundan ng tingin ang palaban at hinahangaan niyang matalik na kaibigan.
"Thank you, Mr. Tien."
Nagsalubong agad ang mga kilay ni Bini habang papasok. Nauulinigan at naabutan niya si Seya na yakap-yakap ang kanilang Station Manager.
"Ano naman kayang drama nito?" bulong niya sa sarili habang nakatitig sa ka-trabaho.
"Dj Bini," pigil ang malakas na boses ni Chum nang hatakin siya sa gilid.
Dinala siya ni Chum palayo ng ilang pulgada sa grupong nakapalibot kay Seya. Bahagyang bumulong sa kaniya ang intern.
"Show na naman niya ang top rating."
"Bitter ka?" naiinis at balik bulong niya.
Kahit hindi sila maayos ay hindi siya kailanman nainis na laging nasa top spot ang show ni Seya. Masaya siyang kahit papaano ay may nakikilalang show sa station nila.
Nowadays, humihina na rin ang High Vibe Radio station. Noong nakaraan lang ay halos nasa huling pwesto ang istasyon nila sa buong Pilipinas. At nakalulungkot iyon.
"Dj Bini!"
Awtomatikong ngumiti sina Bini at Chum kahit bahagyang nagulat na napansin sila ng kanilang Station Manager na si Tien.
"Hello, Sir Tien!" nagulat ngunit kinontrol niya ang pagiging kaswal sa pagbati.
"Congrats," Itinaas nito ang kamay, kahit nagtataka ay inabot naman niya iyon.
"Your show got the second spot."
Nagkatinginan sina Bini at Chum, hindi nila napigilan ang mas malawak pang pagkakangiti. Nakipagkamay rin ang station manager nila sa kaniyang intern.
"Kayo talaga nila Dj Seya ang lucky charm ng station natin," matamis na nakangiting papuri sa kanila ni Tien.
"Salamat po, Sir. Lalo na sa tiwala n'yo."
Muling nagsalubong ang mga mata nila ni Chum at agad na naghawak-kamay at parang mga batang tumalon dahil sa saya.
"Dj Bini!" masayang aniya naman ng kaniyang intern.
"Talagang ayos na sa inyo ang laging pangalawa 'no?"
Mabilis pa sa kidlat ang paglaho ng mga ngiti nila sa labi ni Chum. Ang masayang mga mata nila ay naglaho at rumehistro ang pagkaseryoso.
"Bini, Bini, Bini, give me a good fight. Don't get satisfied for always being in the second spot," hamon ni Seya.
Bumuntong hininga si Bini at pinukol ang ka-trabaho ng tingin. Noon pa man ay lagi na lang nito ipinagmamayabang na lagi itong nauuna.
"Seya, Seya, Seya, I am not here to compete nor to impress you. I'm just doing my job, my job to empower women. Show their worth-"
"Oh, cut it out, Bini! Style mo lang iyan, para makakuha ng mataas na rating."
"And, how can you empower women and how can you help them see their value?"
"After you find out, the early pregnancy of your younger sister?"
Natigilan si Bini at awtomatikong tumalim ang tingin kay Seya. Ngumisi lang ito sa kaniya habang parang balewala lang ang sinabi tungkol sa personal na buhay niya.