"May kulang pa ba sa mga gamit na dadalhin mo, anak?" tanong sa akin ni Mama habang tinutulungan akong iayos ang mga dadalhin ko.
"Mga personal necessities na lang po, Ma."
"Kailan ka bibili?"
"Mamaya po. Sabay na po kami nila Ash."
Nakahiwalay na ang mga damit na gagamitin ko sa bawat araw. Naghati na rin kami ni Ash sa mga dadalhin. Sa akin ang kumot at unan na gagamitin namin at sa kanya naman ang higaan. Sa akin ang tabo at sa kanya ang timba.
"Mga anong oras ba?" patuloy lang kami sa pag-aayos namin ni Mama nang marinig namin ang ingay mula sa labas.
"Ngayon na, Ma. Andyan na si Ash." tumayo ako at lumabas ng kwarto.
Nakita ko agad si Ash na kausap na ngayon si Crisha. Lumapit ako sa kanilang dalawa kaya pareho silang tumingin sa akin.
"Ano? Tara na." pag-aya sa akin ni Ash.
"Wait lang. Magpapalit lang ako ng damit." tumango sya at pumasok na ako sa kwarto.
Nag-aayos pa rin si Mama ng mga gamit ko. Lumapit ako sa aking cabinet para kumuha ng damit.
"Aalis na kami, Ma." pagpaalam ko.
"Si Ash lang ba ang naandyan? O andyan din si Zoren?"
"Si Ash lang po. Sa bayan na po namin kikitain si Zoren."
"Oh sige at magbihis ka na. Pupunta lang akong kusina para makapagluto na." nang makalabas na si Mama ay nagpalit na ako ng damit. Nagsuklay at nagpabango bago lumabas sa kwarto.
Nagpaalam muna kami kay Mama bago kami umalis. Nang makarating sa bayan ay agad naming chinat si Zoren.
Samahan ng mga PATAY GUTOM ƪ(‾.‾")┐
Pinakamaganda sa Grupo
-Zoro asan ka na? Andito na kami sa bayan.
Pinakagwapo sa Grupo
-Andito ako sa Franks, nagutom ako sa kahihintay sa inyo.
Pinakakyut sa Grupo
-Ginawa mo pa kaming dahilan ng pagiging patay gutom mo.
Pinakagwapo sa Grupo
-Nagsasabi lang nang totoo.
Pinakamaganda sa Grupo
-Huwag mo kaming lokohin. Kilala ka namin. Raulo to.
Pinakagwapo sa Grupo
-Pinagtutulungan nyo na naman ako. Ako na nga yung nag hintay ako pa yung na-agrabyado.
Pinakakyut sa Grupo
-Huwag ka magdrama, di bagay sayo.／(≧ x ≦)＼
Pinakamaganda sa Grupo
-Kumain ka na lang. Gutomlang yan. Hintayin mo na lang kami.
"Tara na. Magdadrama lang ang isang yun." pag-aya sa akin ni Ash na tinanguan ko naman.
Naglakad lang kami papuntang Franks kasi malapit lang naman yun sa paradahan ng dyip. Malayo pa man kami ay tanaw na namin si Zoren na sunod-sunod ang kagat sa burger. Napaka PG talaga.
Kumaway ito sa amin nang makita kami. Pati tuloy mga taong naandun ay napatingin sa amin dahil sa ginawa nyang pagkaway.
"Parang hindi ka nakakain kagabi sa sobrang bilis mong ubusin yung burger." ani Ash nang makaupo na kami. Hindi naman makapagsalita si Zoren dahil puno ang bibig nito. Napaubo ubo pa sya sa sobrang dami ng laman ng bibig nya.
"Ilang burger ba ang ipinasak mo sa bibig mo?" nakangiwi kong sabi. Sabay naming pinanuod ni Ash si Zoren na hampasin ang dibdib nya at ang mabilis na pamumula ng mukha, leeg at tenga nya. "Ate, isang tubig nga po." sabi ko kay ateng nagse serve. Agad naman itong kumuha at iniabot sa akin. Inabot ko ito kay Zoren na patuloy pa rin sa pag-ubo. Hinahampas na rin ni Ash ang likod nito.
"Ayan. Ang takaw kasi masyado." saad ni Ash na patuloy pa ring hinahampas nang mahina sa likod si Zoren. Mabilis na binuksan ni Zoren ang tubig at uminom. "Hay naku." sabay kaming napahilamos sa mukha ni Ash nang muli syang umubo dahilan kung bakit may tumalsik na tubig sa amin.
"Napakagandang salubong naman nyan Zoro." may panggigigil na saad ni Ash dahilan kung bakit natawa si Zoren na unti-unti nang nakakabawi. "Huwag mo akong matawa tawanan masasampal kita."
Napailing na lang ako dahil magsisimula na naman silang magbangayan. Kumuha na lang ako ng pera sa wallet ko at binayaran ang tubig na pinainom kanina kay Zoren. Nakalibre pa nga.
Nang matapos na si Zoren sa pagkain at sa bangayan nila ay umalis na kami para makapamili na. Magkasabay kaming dalawa ni Ash sa paglalakad at nasa likod namin si Zoren na syang nagtutulak ng push cart.
Busy na kaming dalawa ni Ash sa pamimili nang magsalita si Zoren.
"Pustahan tayo ano." nagkatinginan naman kami ni Ash at sabay ding nilingon si Zoren.
"Pustahan saan?" sabay pa kami ni Ash sa pagtanong.
"Kapag kami ang nag over all champion ililibre nyo akong dalawa." nangunot ang noo naming dalawa sa sinabi ni Zoren. Ang confident na mananalo sya ah.
Tumingin ako kay Ash at ganoon din sya sa akin. Parang konektado ang isip naming dalawa dahil sabay kaming ngumisi at sumagot kay Zoren.
"Okay, sige." mga nakatingin lamang kami sa isa't isa at parang mga tangang nakangisi. Ang mga bumibili ay nagtatakang nakatingin sa amin.
Matapos naming mamili ay kumain kami sa isang karenderya na talaga nga namang masarap ang mga ulam. Kanya-kanya kami ng ulam at syempre kanya-kanya rin ng kain. Kanya-kanya ring pagdadamot sa ulam kapag may nanghihingi.
Nagpapababa na kami ng kinain nang may dumating na grupo ng kababaihan. Maingay ang mga ito at parang tinutukso ang isa sa kanilang kasamahan.
"Yieeeehhhh sino yun ha?"
"Ang gwapo nya talaga bessy."
"Sana all kilala nya."
"Sana all nakakausap si kuyang pogi."
Ilang pang-uulit pa ang sinabi ng mga ito sa babae bago nila mapagpasyahan na umorder na.
"Taga East University yang mga yan ano?" pagtanong ni Zoren matapos naming panuorin ang grupo ng mga kababaihan.
"Oo. EU nakalagay sa P.E jogging pants nila oh." sagot ni Ash na itinuro pa ang suot na jogging pants ng mga ito.
Matapos ang usapan tungkol sa mga babae kanina ay umalis na kami roon. Dahil wala na kaming ibang gagawin ay umuwi na kami para na rin maihanda na namin ang mga kulang na gamit na aming dadalhin.
6:00 ng gabi ay naihanda ko na ang lahat. Nakailang check pa ako kung may kulang pa ba. Ilang ulit din akong tinanong ni Mama kung ayos na ba ang mga dadalhin ko.
Pagkatapos naming kumain ay tinawagan namin si Papa through skype. OFW si Papa at apat na taon na syang nagtatrabaho sa Malaysia bilang isang caregiver. Umuuwi lang si Papa kung may espesyal na okasyon katulad ng birthday ko, ni Crisha, ni Mama at ni Papa. Kapag new year at christmas ay umuuwi din sya para sabay sabay naming i-celebrate ang kaarawan ni Hesus at para salubungin ang bagong taon.
"Mag-iingat ka doon, Cristel." ani Papa nang mapunta ang usapan namin sa gagawin naming camping para sa recollection.
"Opo, Pa."
"Kapag may oras ka na pwede mong i-text si Mama mo o kaya ako ay i-text mo agad kami para naman alam namin na okay ka lang." tumatango tango lang ako sa mga bilin ni Papa at ni Mama para sa darating naming camping bukas.
Nang matapos ang pakikipag-usap namin kay Papa ay pumasok na kami sa kanya-kanya naming kwarto.
Agad akong humiga sa kama at yinakap ang teddy bear na regalo pa sa akin ni Papa nung Seventh Birthday ko.
Alas nueve nang magising ako kinaumagahan. Hapon pa naman ang alis ko papuntang school. Ngayon na ang camping namin at hindi ko maiwasan ang kabahan kahit na recollection lang naman iyon. Pero syempre ay excited din naman ako.
Inilabas ko na ang bag na dadalhin ko sa aming sala para madali ko na lang itong kukuhain mamaya paalis. Tinawagan ko na rin si Ash at Zoren at pareho na rin silang naghahanda sa pag-alis. Ilang paalala pa ang sinabi sa akin ni Mama bago ako naligo.
Pagpatak ng Alas tres ng hapon ay umalis na ako ng bahay. Tinext ko na rin si Ash at Zoren na papunta na ako.
Ako(Zoren-tot):
Papunta na akong school.
Zoren-tot:
Papunta na rin ako.
Ako(Ashiya-pot):
Papunta na akong school. Kita na lang tayo dun.
Ashiya-pot:
Hay naku! Andito na lang ako. Napaaga alis ko hahaha.
Ako:
Wow. Early bird. Sana all.
Ashiya-pot:
Excited lang.
Nang makarating sa school ay agad ko itong sinabi sa kanila. Tinanong ko rin kung saang part sila ng school. Nasa quadrangle daw sila.
Buong lakas kong binuhat ang mga gamit ko at tinungo ang daan papuntang quadrangle. May mga nakasabay pa ako na papunta na rin doon. Nakita ko rin ang isa sa kakilala ni Zoren. Lucy? Lorna? Lily? Nakalimutan ko na pangalan, basta nakikita ko na sya dati na kausap si Zoren.
Hinanap ko si Ash sa quadrangle at agad ko naman syang nakita dahil sa sobrang ingay nya at agaw pansin talaga sya. Nakangiwi akong lumapit sa kanya at kinaltukan ito. Inis naman syang humarap sa akin.
"Ano ba?! Ang sakit ha!" sigaw na wika nya. Mas lalong sumama naman ang mukha ko sa itsura nya.
"Anyare sayo? Para kang tanga na nagsisinayaw dyaan." tinanggal ko ang dahon na nahulog sa ulo nya. "At saka, ano yang nasa mukha mo? Para kang clown." tukoy ko sa make-up nya. Mukha talaga syang clown.
Umikot naman ang mga mata nya sa akin bago ako sinagot. "Dare ito ng pangit na Zoro na yun. Kung hindi ba naman sya nagdaya edi sana ako ang nanalo sa aming dalawa." mababakas ang inis sa boses nya at sa itsura nya ay handang handa sya na isako si Zoren at itapon sa ilog.
Tumango tango na lang ako at di na nag aksaya ng oras na itanong kung ano ang laro nilang dalawa dahil alam kong puro kalokohan lang ito.
Sa halip na panuorin si Ash na nagpatuloy sa pagsasayaw na parang baliw ay pumunta ako sa isang bench para makaupo na rin ako dahil talagang bigat na bigat na ako sa mga dala kong gamit. Hindi pa man nag-iinit ang pwet ko ay natanaw ko na si Zoren na kahit malayo pa ay tanaw ko na ang lalamunan sa sobrang lawak ng pagkakatawa sa nakikita. Pero OA na ako masyado.
Naiiling na lang ako na tinanaw sila. Si Zoren na patuloy pa rin sa pagtawa na parang wala ng bukas at si Ash na masama ang tingin dito pero patuloy pa rin sa pagsasasayaw. Napayuko na lang ako dahil sa pinaggagagawa nilang dalawa sa buhay nila.
Kailan ba magtitino ang dalawa na ito?
*****