MAYA-MAYA pa, sigaw nang sigaw si Aeros habang pinapalabas ang malalakas niyang kidlat. Kahit na halos mamaos na ang kaniyang boses sa pagwawala. Hindi inaasahan ni Largus na sa kaunting oras ay nagawa nitong sirain ang kaniyang Lightning Cube ngunit hindi niya na iyon ipinagtaka.
“Bagong henerasyon ng Thunder God. Subukan natin ang bagong gising mong kapagyarihan, binata.”
Bawat paglapag ng kidlat niya sa lupa ay nakakalikha ito ng malalim na butas habang ang ibang natatamaang puno nito ay nasusunog.
"Sylphus, bumalik ka na ro'n. Masiyadong delikado rito kaya iwan mo muna kami!" utos ni Largus kay Sylphus, kasabay niyon ay ang pagsalubong niya sa kidlat ni Aeros gamit ang kulay dilaw niyang kidlat.
"Ngunit kom--"
Hindi niya nagawang tapusin ang kaniyang sasabihin nang magsalita si Largus.
"Ako na muna ang bahala rito. Kapag naman may masamang mangyari, tatawagin kita," nang marinig iyon ay sinunod na lamang niya ang utos nito.
"Inazuma no uzu!" (Lightning vortex) sigaw ni Largus habang lumalabas ang kulay berdeng kidlat sa kaniyang kaliwang kamay na hugis bilog.
Iyon ang ginamit niyang panangga sa ligaw na kidlat ng binata na kung saan-saan lang napupunta. Sinasalubong niya ito dahilan ng malalakas na pagsabog.
Kung gaano man kalakas ang kidlat ni Aeros na papunta sa kan'ya ay gano'n din kalakas ang atake na ginagawa ni Largus.
Sandali namang napatigil sa paglipad si Sylphus sabay lingon sa lugar na kinaroroonan nina Largus. Habang nasa ere ay nakikita niya ang mga ilaw na sanhi ng mga kapangyarihan nina Largus at ng binata.
Pawang malalaking paputok na kapag sumabog ay nag-iiwan ng kulay.
"Huwag kang magpipigil! Ilabas mo ang totoo mong kapangyarihan, lalabanan kita!" panghahamon ni Largus sa wala na sa diwang si Aeros.
Namamanghang napatingin si Largus sa binata na kahit wala sa huwisyo ay nagawa nitong gamitin ang Inazuma no yoroi (Lightning armor) na tanging ang bihasa lamang ang may kakayahang gumamit.
"Napakainteresante. Napakagaling, binatang Aeros!" namamangha niyang sambit habang nakapaskil ang ngisi sa kaniyang mukha.
"Ilabas mo kung ayaw mong lamunin ka ng sarili mong kapangyarihan. Ilabas mo!"
Nilalabanan naman siya ni Aeros tulad ng kan'yang plano.
Kapwa sila lumilipad sa ere na sa sobrang bilis ay hindi iyon masusundan ng ordinaryong mga mata.
Ngunit kahit gaano pa kalakas ang kidlat niya, hindi niya naman matamaan si Largus kaya naman ay wala siyang nakuha kung hindi bugbog.
Naaawa man ay walang ibang nagawa si Largus kung hindi gawin iyon. Iyon ang nagsisilbing paraan niya para matulungan ang binata dahil ramdam niya ang paghihirap nito.
Ramdam niya ang pagpipigil nito.
Sa diwa naman ng binata ay wala siyang makita kung hindi kadiliman. Puno ng katahimikan na pawang nasa pinakailaliman siya ng lugar na hindi niya alam kung saang parte ba ng mundo iyon.
Lumulutang siya habang hindi naiintindihan ang kaniyang nararamdaman. Ngunit sa di kalayuan ay may ingay siyang nararamdaman ngunit masyadong malayo para iyon ay maintindihan.
"Ang bagal!" asik ni Largus sabay bigay ng malakas na suntok sa batok ng binata dahilan upang bumulusok ito pababa.
Nang bumagsak siya sa lupa ay isang malaking butas ang naging pinsala nito ngunit si Aeros ay hindi pa rin nakakabalik sa kaniyang huwisyo. Para pa rin itong walang galos na maramdaman kahit na dumurugo na ang kaniyang ulo at naglalandas iyon pababa sa kaniyang mukha.
Ngunit tumayo pa rin siya sabay walang emosyon na tiningala ang kulay berde na lumulutang sa ibabaw niya at iyon ay si Largus.
"Sugod, Aeros. May mas ilalakas ka pa, hindi ba?" panghahamon sa kaniya ng komandante kaya wala sa sarili siyang lumipad pataas at pinantayan si Largus.
Sinugod ni Aeros si Largus nang biglaan. Sa isang iglap lang ay na sa harapan na siya ng komandante. Akmang susuntukin niya ito nang mabilis itong umilag at binigyang siya ng malakas na sipa sa kaniyang sikmura.
Sumuka siya ng dugo habang umuubo ngunit ilang segundo lang din ay sinugod niya ulit ang komandante.
"Ilang beses ko bang dapat sabihin sa iyo na ilabas mo? Hindi lang ito ang kaya mo, binata," sambit ni Largus sabay punta sa likuran na Aeros, kasabay niyon ay ang pag-atake niya rito gamit ang lightning vortex.
Paulit-ulit na bumulusok si Aeros sa lupa pero bumabangon pa rin. Kapwa silang naghahabol ng hininga habang inaatake ang bawat isa. Suntok, atake at sipa ang ginagawang pagsugod sa kaniya ni Largus ngunit hindi naman kalakasan.
"Tama iyan, Aeros. Sige, sugod!" sigaw ni Largus sabay atake ulit kay Aeros gamit ang kaniyang Kaminari yari (Thunder Spears) na nagawa namang ilagan ng binata.
Iyon ay tatlong sibat na gawa sa kidlat. Bawat paggamit niya rito ay tatlong sibat ang sabay na lilipad patungo sa kalaban na may kaakibat na bilis.
Paulit ulit na pinapantayan ni Aeros ang paglipad ni Largus. Maging ang Thunder Spears ay ginaya niya dahilan upang panandaliang nanlaki ang mga mata ni Largus.
Sa ibabaw ni Aeros ay nakalutang ang tatlo niyang sibat na gawa sa kidlat at ang kaniyang kaliwang kamay naman ay may Lightning vortex.
Dumami ng dumami ang Thunder spears at lumalaki ng husto ang lightning vortex niya. Bahagya pa nitong itinaas ang kaliwa niyang kamay habang nag-iipon pa rin ng enerhiya kung kaya't bahagyang napaatras si Largus.
Lumalakas na rin ng husto ang hangin sa kanilang paligid. Ang puno'y nagsasayawan na, ang mga dahon nagliliparan na pawang malaking ipo-ipo.
Sa pagkakataong 'yon ay bumilis ang pagtibok ng puso ni Largus. Mabilis na lumandas ang kaniyang pawis sa kaniyang katawan habang hinahabol ang paghinga.
Nakatuon pa rin ang tingin niya sa binata na ngayon ay halos hindi na makilala dahil sa pagbabago ng kaniyang emosyon. Ang mga mata niya'y mas lalong naging asul at ang kaniyang katawan ay nilalamon na ng Lightning armor habang Malaki ang kaniyang pagngisi.
"Sylphus!" sigaw ni Largus nang ibato na ni Aeros ang Thunder Spears at Lightning vortex sa kaniyang direksyon na magkasabay.
Ilang segundo lang mula nang isigaw ni Largus ang kaniyang pangalan ay nakarating na agad si Sylphus. Agaran niyang iniharang ang kaniyang Wind barrier na nakapalibot na ngayon sa kanilang dalawa. Kinapalan at pinalakas niya ito dahilan upang mabilis na humupa ang kaniyang enerhiya.
Habang si Largus naman ay isinagawa ang Lightning vortex. Pinantayan niya ang laki ng kapangyarihan ni Aeros at sinalubong sa kapangyarihan ng binata.
Si Sylphus ang depensa habang si Largus naman ay opensa.
Hindi iyon naging madali. Sa lakas ng kapangyarihang nagkasalubong ay halos nadadala na si Largus at Sylphus kaya mas lalong pinalakas ng dalaga ang kaniyang depensa.
"Argghh!" bulalas ni Largus sabay puwesto ng kaniyang mga binti upang hindi tuluyang matangay ng hangin at dahan-dahang umabante kasabay ng pagpapalaki niya ng kaniyang Lightning vortex.
"Komandante!" sigaw ni Sylphus nang marinig ang mahinang impit ni Largus. Iyon pala ay may tumagos na isang kidlat na sibat sa barikadang depensa ni Sylphus at tumama iyon sa hita ni Largus.
Pansamantalang nawala sa balanse ang wind barrier ni Sylphus ng ilang segundo pero hindi naman iyon nawala. Nakatayo pa rin naman ang kaniyang komandante hanggang sa tuluyan nang nilamon ng kaniyang kulay dilaw na kidlat ang kapangyarihan ni Aeros.
Sa sobrang lakas ng impact ay nagsiliparan ang mga sanga ng puno sa magkabilang direksyon. Maging ang mga malalaki at malilit na bato ay sumabay na sa lakas ng hangin dahilan ng pagkakaroon ng sugat ni Sylphus sa kaniyang katawan dahil sa mga daplis. Dumudugo na rin ang kaniyang ilong at habol ang kaniyang paghinga.
Ilang segundo ang itinagal ng pagsabog bago ito natapos. Umabot pa hanggang simbahan at sa kabilang bayan ang pagyanig na nangyari dahilan upang pansamantalang nagtaka ang mga tao at nagsipasukan sa kani-kanilang tahanan.
Pagkatapos ng malakas na pagsabog ay ibinaba na nila ang kani-kanilang spell. Halata ang paghingal ni Sylphus habang pinupunasan ang dugo ng kaniyang sugat sa pisngi at ilong habang si Largus naman ay nakatamo ng di kalalimang sugat sa kaniyang dibdib maliban sa tama niya sa kaniyang hita dahilan upang mawalan siya ng balanse.
Si Aeros naman ay siyang pagkahulog nito pababa nang wala ng malay. Wala na rin sa kaniyang katawan ang Lightning armor. Ang kaniyang kaliwang kamay at braso ay nasunog sanhi ng sobrang pag gamit niya ng Lightning vortex kanina.
"Ayos lang kayo, komandante?" Napatingin si Largus sa nagsasalitang si Sylphus.
Kapwa habol ang kanilang paghinga habang nakatuon ang tingin sa binatang si Aeros na nasa lupa nakahandusay.
Napahinga sila ng malalim. Imbes na sagutin si Sylphus ay kinamayan na lamang ito ni Largus upang umalalay sa kaniya sa pagtayo at upang madaluhan ang binata.
Hindi man halata ay sobrang pagod ang idinulot sa kan'ya ng binata. Hindi kasi umayon sa kaniyang inaasahan ang naging laban nila.
Palibhasa ay wala sa huwisyo kung kaya't nagagawa niya ang kilos na hindi naman dapat. Pawang ibang katauhan ang kumokontrol sa katawan nito.
Napailing na lamang si Largus sabay sulyap sa walang malay na si Aeros. Mahimbing ang pagkakatulog nito sa kabila ng mga natamong pinsala.
"Napakainteresante. Hindi ko iyon inaasahan," sa kabila ng mga natamong sugat ay kumurba ang ngiti sa mukha ni Largus habang nakatitig lang sa kaniya ang dalagita.