"Maiwan ko na muna kayo ate hehe, sa kwarto muna ako," saad ng kapatid ko.
"Dalhin mo na 'tong isang box ng pizza," wika ni Julian at kinuha naman ni Ethan ang inabot niya. Tumakbo siya agad papaakyat sa taas. Ang kulit talaga ng kapatid ko!
Naiwan naman kaming dalawa ni Julian dito sa baba pero hindi na siya nagsalita at nakatingin lang siya sa sapatos niya.
"Okay ka lang ba?" tanong ko at nilingon niya naman ako agad.
"I'm fine, don't worry," sagot niya. Parang naiilang siya sa 'kin, siguro dahil sa sinabi ni Ethan kanina.
"Gusto mo bang pumunta sa plaza?" muling tanong ko. Napansin ko agad ang pagkislap ng mga mata niya at ang unti-unting paglabas ng ngiti niya.
Tumayo ako bago inilahad ang kamay ko at ngumiti siya nang abutin niya ito. Nagpaalam muna kami kay Ethan bago kami umalis sa bahay. Nang makarating kami sa plaza, may kasalukuyang naglalaro ng basketball sa loob ng court at mayroon ding nagpa-practice ng sayaw. Nakaupo lang ako ngayon sa isang bench at si Julian naman ay bumili ng icecream.
"Here.. kainin mo na bago pa matunaw," sabi niya sabay abot sa 'kin ng icecream. Wala pang one minute no'ng umalis siya pero nakabili agad.
"Thank you Julian." Ngumiti naman siya at umupo na sa tabi ko. Sinimulan ko na ring kainin ang icecream na binili niya at sa totoo lang, ngayon lang ulit ako nakakain nito.
"Sabi mo sa 'kin dati hindi ka mahilig sa icecream," saad ko. Pinunasan niya muna ang bibig niya bago ako nilingon. Parang bata kung kumain.
"Sinabi ko ba 'yun?" inosenteng tanong niya. Sinamaan ko naman siya ng tingin na ikinatawa niya.
"Hindi ba pwedeng i-try? 'tsaka dati pa naman 'yun eh, iba na ngayon. Dati ayoko sa icecream pero ngayon gustong-gusto ko na lalo pa na kasama kitang kumain," nakangiting sambit niya. Hindi ko na gets kung ano ang pinupunto niya pero gusto ko siyang tirisin ngayon. Tumahimik na lamang ako at patuloy na kinakain ang icecream pero ang loko, nakangiti pa rin habang kumakain.
"Eukie, nagka-boyfriend ka ba noong umalis ako?" Buti na lang talaga hindi ako nabulunan dahil sa tanong niya. Naisubo ko ba naman kasi ang cone ng icecream.
Hindi siya nakatingin sa 'kin ngunit ang seryoso ng boses niya.
"Bakit mo naman naitanong 'yan? Sa susunod huwag ka nang kumain ng icecream, kung anu-ano kasi ang lumalabas sa bibig mo," tugon ko nang mailunok ko na ang cone. Buti na lang hindi bumara sa lalamunan ko.
"Bawal na ba magtanong ngayon?" seryosong tanong niya sabay lingon sa 'kin. Napalunok ako nang wala sa oras, shit! kinakabahan ako.
"Wala akong naging boyfriend, 'tsaka sino ba naman kasi ang magkakagusto sa 'kin?" sagot ko. Pero bigla siyang ngumiti na ipinagtaka ko. Abnoy talaga!
"You're beautiful Eukie, always remember that. Kahit sinong lalaki ay magugustuhan ka. Napakatalino mo, mabait, maalaga, masipag, magaling kumanta, magaling sumayaw at magaling tumugtog. Ano pa ba?" aniya at umaarteng nag-iisip. Napailing na lamang ako pero hindi ko napigilan ang mapangiti. Bukod kay Jessie, siya ang nag-iisang lalaki sa buhay ko na sinasabihan ako ng maganda.
"Masarap magluto, mabait at responsableng anak, at lalong-lalo na mapagmahal na kaibigan. Kaya malabo na walang magkakagusto sa 'yo at baka hindi mo lang napapansin, may mga lalaki palang palihim na nagmamahal sa 'yo," dugtong niya.
"Tigilan mo nga ako, 'tsaka wala akong panahon sa mga gan'yan. Kung meron mang nagkakagusto sa 'kin edi thank you pero hindi ako interesado. Makakapaghintay ang pag-ibig 'tsaka hindi naman ako nagmamadali," wika ko. Ngumiti naman siya nang pagkatamis bago umakbay sa 'kin. Pero bigla akong napaisip, may naging girlfriend kaya siya sa Taiwan?
"Julian Marquez, long time no see." Napatingin ako kung saan nanggaling ang hindi pamilyar na boses. Napatayo naman agad si Julian pero nanatili akong nakaupo.
Mayroong anim na lalaki ang naglalakad patungo sa direksyon namin at galing sila sa loob ng court. Nakasuot pa sila ng basketball jersey, siguro sila yung naglalaro kanina no'ng dumating kami rito. Pero ni isa sa kanila hindi pamilyar sa 'kin at sa tingin ko, kilala ni Julian ang mga 'to.
"Kumusta bro? tagal din nating hindi nagkita ah," wika nung lalaking nakasuot ng number 12 na jersey. Sa tingin ko, siya ang pinakamatangkad sa kanilang anim.
"Okay lang naman, kayo ba?" sagot naman ni Julian.
"Okay lang din bro, pogi pa rin as always." Nagtawanan naman silang pito dahil sa sinabi nung lalaking kulay violet ang buhok. Buti na lang bumagay sa kaniya pero parang boses babae siya tapos ang singkit pa ng mga mata niya.
"By the way, she's Eukie Valderama, bestfriend ko." Saka lang sila napatingin sa akin nang sabihin 'yon ni Julian. Siguro kung hindi pa ako ipinakilala ng kaibigan ko, hindi talaga nila ako papansinin. Sino ba naman kasi ako?
Tinatamad akong tumayo at napilitang ngumiti sa kanilang anim. Pero nakapagtataka yung isang lalaki na nasa likod nung lalaking kulay violet ang buhok. Iba kung makatingin sa 'kin pero nakangiti siya. Ang weird.
"Hi Eukie, I'm Remson Dela Torre," pakilala ng lalaking nakasuot ng number 12 na jersey.
"I'm Jackson Romualdez, nice to meet you," nakangiting pakilala nung isang lalaking may suot na eye glasses. Nakipag-shake hands din naman ako sa kaniya, pero jusko naman ang lambot ng kamay niya!
"I'm Stefan Salvador," pakilala rin naman nung lalaking naka-cap. Nginitian ko na lamang siya pero ang tipid ng ngiting isinukli niya. Ang damot naman.
"I'm Calvin Montenegro, ang pinakamabait sa grupo," yung lalaking kulay dark brown ang buhok. Sa tingin ko siya ang pinakamaingay at yung Stefan naman ang pinakatahimik.
"Carter Ortencio, ang pinaka-cute at pinakapogi sa aming lahat. Halata naman diba?" Ang kapal din ng isang 'to, gwapong-gwapo sa sarili. Siya ang lalaking may kulay violet na buhok. Inaamin ko, gwapo nga siya pero ang kapal niya sobraaaa!
"HOY SANDALI! BAKIT 'DI NIYO 'KO HININTAY?" sigaw ng isang pamilyar na boses. Lumingon naman silang anim at napatingin din ako pero hindi ko siya masyadong makita. Ang tatangkad ba naman kasi ng mga 'to, anong laban ng height ko sa height nila?
"Bakit kasi ang tagal mo bro? ano pa ang ginawa mo?" tanong nung lalaking hindi pa nagpapakilala sa 'kin. Pero wala naman akong pakialam, sino ba siya para kilalanin ko?
"Inayos ko lang ang suot kong sapatos," tugon nito nang makarating siya sa direksyon namin. Dumapo ang tingin niya sa akin pero gano'n na lang ang gulat niya nang makita ako.
Kaya naman pala pamilyar ang boses niya kasi nakilala ko na siya noong nakaraang linggo. Siya yung lalaki na naging dahilan kung bakit ako nagkabukol at siya rin yung lalaki na nagbigay sa akin ng nips. Akala ko pa naman nakalimutan niya na 'ko pero hindi pa pala. Small world, dito pa talaga kami muling nagkita.
"Oy, kumusta ka na?" tanong niya nang maka-recover siya mula sa pagkagulat. Nagtatakang napatingin sa kaniya ang mga kaibigan niya lalo na si Julian.
Pero feeling close rin ang isang 'to.
"Magkakilala kayo?" takang tanong ni Carter.
"Aksidente lang na nagkakilala kaming dalawa pero hindi ko pa alam ang pangalan niya," sagot niya habang nakatingin sa 'kin. Ano nga pala ang pangalan niya? nakalimutan ko na.
"Siya ba yung babaeng tinutukoy mo na dinala mo sa clinic last week?" tanong naman ni Jackson. Kinuwento pala niya 'ko sa mga kaibigan niya.
Napalingon naman agad sa 'kin si Julian ngunit may bahid ng pagtataka ang mga tingin niya.
"Ano ang nangyari, Kai? bakit mo dinala sa clinic si Eukie?" seryosong tanong ni Julian. Hindi naman agad nakasagot itong si Kai at sa tingin ko kinakabahan siya.
"Ahh Julian, hindi niya naman sinasadya yung nangyari. Ikukuwento ko na lang sa 'yo mamaya," singit ko. Napabuntong hininga na lamang siya at nginitian ako. Binalingan ko naman ng tingin yung si Kai, nakangiti rin siya habang nakatingin sa 'kin. Pasalamat ka, mabait ako.
"Magpakilala ka na kay Eukie bro," wika ni Calvin. Lumapit agad ito sa 'kin at nginitian ako nang pagkatamis na ipinagtaka ko.
"I'm Kai Ezekiel Alcantara, nice to meet you Eukie," nakangiting pakilala niya bago inilahad ang kamay nito sa akin.
"And I'm Russel Elliott Montero, ikinagagalak kitang makilala binibini," singit ng isang lalaki. Lumapit din siya sa akin at inilahad din ang kamay niya sa harapan ko. Nagkatinginan pa silang dalawa ni Kai pero anong sabi niya? Russel Elliott Montero?
So siya ang lalaking tinutukoy ng kapatid ko?