"Ano ha? May label na ba, Aika Jan Cortez?" Nang-aasar na tanong ni Nono.
Parang nagdidilim ang paningin ko at gusto ko siyang itulak sa dagat dahil sa pang-aasar niya. Hiyang-hiya na ako dahil hanggang ngayon ay hindi pa rin binibitawan ni Totoy ang kamay ko.
"B-Bitiw na nga," bulong ko kay Totoy.
Naramdaman ko naman ang pagbitiw niya sa kamay ko pero hinawakan naman niya ang pareho kong balikat, bago iniharap sa kanya. Narinig ko ang panunukso ng iba naming kaibigan, pero wala akong nagawa dahil nakaharap na ako sa kanya.
"Sa akin ka na lang kasi tumingin, crush, para hindi ka na mahiya." Bulong niya rin sa akin. Muli niyang binitawan ang balikat ko at ibinalik sa kamay ko ang pagkakahawak.
Tulad ng sinabi niya ay hindi na ako humarap sa mga kaibigan namin at nasa kanya lang ang atensyon.
"Sigurado ka na diyan Jade!? Hindi naliligo yan!" Malakas na sigaw ng kung sino.
Mabilis kong hinarap ang walang hiyang sumigaw at nakita ko ang ngi-ngisi-ngising si Carlos. Sa sobrang inis ay tumayo ako mula sa aking kinatatayuan at ibinaling ang paningin kay Kyla.
"Wag mong sasagutin yan, Kyla! Hindi na nag be-brief yan!" Ganti kong sigaw sa kanya.
Nakita ko ang panlalaki ng mga mata ni Carlos at Kyla. Pati ang atensyon ng aming mga kasama ay nabaling rin sa kanila.
"Ay, taray! Kayo rin may something? Ano ba yan!" Tili ring sabi ni Nono.
Nagpapalitan lang kami ng masamang tingin ni Carlos at ako ang unang bumawi dahil hinila na ako ni Totoy paupo.
Muntik na akong mapaatras papunta kay Mayora Letlet nang makita kung gaano kalapit ang mukha sa akin ni Totoy.
"Can I court you?" Tanong niya ulit sa akin.
"A-Ayan ka na naman sa court-court na yan, m-mahirap nga lang ka—"
"Pwede ba kitang ligawan?" Pagpuputol niya sa sinabi ko na agad namang nagpamaang sa akin.
"A-Ano?" Hindi makapaniwalang tanong ko at parang hindi niya iyon tinanong sa akin kanina.
"Yes or no?" Pabulong niyang tanong sa akin.
Ilang beses akong napalunok habang nakatingin sa kanya, titig na titig din siya sa aking mga mata.
"Y-Yes?" Mahinang sabi ko at na naging patanong pa.
"Yes!?" Malakas na sabi niya at nanlalaki pa ang mata.
Napalakas ang pagsabi niya do'n dahilan para mapunta na naman sa amin ang atensyon ng mga kasama.
"Hoy! Ano yan?" At nagsimula na naman silang mag tuksuhan.
Hindi ko sila pinansin at namumula ang mukhang itinago ko ito sa mga palad. Narinig ko ang mahinang pagtawa ng katabi ko, dahilan upang mapatingin ako sa kanya. Binigyan niya lang ako ng malapad na ngiti at bumulong sa tainga ko.
"Sisimulan ko na ang panliligaw ko." Huli niyang saad, bago kami tuluyang nagka hiwa-hiwalay.
"Hay! Good morning ganda," bati ko sa sarili ko habang nakatingin sa salamin at parang tangang nag pose pa roon na parang model.
Sinimulan ko na naman ang morning routine ko bago ako bumaba sa kusina. Nadaanan ko pa yung orasan namin na nasa sala, at ngayon ko lang nalaman na 8:46 na pala ng umaga.
Mukhang napasarap tulog ko. Beauty rest ba.
Malaki ang ngiti ko habang papunta sa kusina, naririnig ko na ang malakas na tawanan nila nanay at tatay na nagmumula doon. Ipinagtaka ko naman ang isang boses na hindi pamilyar, at sigurado rin akong hindi siya si kuya.
Nanlalaki ang mga matang napatakbo ako papunta sa kusina ng mapagtanto ko kung sino iyon, at muntik na akong himatayin, hindi dahil nakita ko si Totoy na nakikipag tawanan kela nanay, kundi dahil sa sama ng tingin sa akin ni kuya.
Patay na!
Agad-agad kong nilapitan si kuya at mahigpit siyang niyakap sa leeg.
"Good morning sa napaka-gwapo kong kuya," sabi ko at mas hinigpitan pa ang pagkakayakap sa leeg niya.
"Aika!" Sigaw sa akin ni nanay dahilan para mabitawan ko si kuya.
Nakanguso akong bumaling kay kuya at nakitang maluha-luha na ito at bahagyang nangingitim habang masama pa rin ang tingin sa akin.
"Balak mo ba talaga akong patayin!?" Nanggagalaiting tanong niya sa akin.
Nginusuan ko lang siya at uupo na sana sa tabi niya ng biglang magsalita si Totoy.
"Good morning, crush," bati niya sa akin.
Nanlalaki ang mga matang bumaling ako sa kanya, napakalaki ng ngiti niya at parang gusto ko siyang batuhin ng pinggan na nasa harap ko. Sunod kong tinignan ay sina nanay at tatay na pareho naman nakangiti kaya nakahinga ako ng maluwag. Akmang ibabaling ko na sana ang tingin ko kay kuya, pero huli na ang lahat, naunahan na ako ng batok niya.
"'Wag ka ng tumingin," pabulong niyang sabi at halatang naiinis.
Nagpatuloy na lang ako sa pagkain at rinig na rinig ko ang usapan nila nanay at Totoy, si nanay ang interviewer habang si Totoy naman ang interviewee.
"Pwede ko po bang ipagpaalam si Aika?" Agad na tanong ni Totoy, kaya muntik ko nang maibuga ang pagkain ko.
"Hindi!"
"Oo naman!"
Magkasabay na ani ni nanay at kuya sa magkasalungat na tono at sagot. Nakita ko ang pagkailang sa mukha ni Totoy habang na kay kuya ang paningin.
Tignan natin kung mapanindigan mo yang panliligaw mo pagdating sa kuya ko.
Halatang hindi niya alam kung anong sasabihin at sinong susundin kaya naman agad nang nagsalita si nanay.
"Ano ba yun, hijo? Mag di-date ba kayo ni Aika? Ayos lang, kahit hindi mo na iuwi." Rinig kong sabi ni nanay na parang kinikilig.
Narinig ko ang mahinang pagtawa ni Totoy kaya tinignan ko lang siya ng masama.
"Pupunta po sana kami sa isla puso, yung isla po diyaan sa harap. Magbabangka lang po kami--"
"Ano!? Pagsasagwanin mo ang kapatid ko!? Aba, ni hindi ko nga yan inuutusan magtapon ng basura tapos pagsasagwanin mo lang!? Wag ka nang manligaw kung gano'n." Pagalit na ani ni kuya at nanlilisik ang matang tinignan si Totoy.
Ang sweet! Totoo namang hindi niya ako pinagtatapon ng basura eh, pero ako yung pinaglilinis niya ng buong bahay habang tagatapon lang siya ng basura, iyon lang naman ang gawain niya eh.
Sasagutin ko na sana si kuya, pero naunahan na ako ni Totoy kaya pinili ko na lang manahimik.
Nakakahiya naman kasi, mukhang ako pa ang out of place dito.
"Kasama po namin sila Carlos at Kyla, kami po ni Carlos ang magsasagawan." Napapahiyang saad ni Totoy.
Hindi na naman sumagot pa si kuya nang si nanay na mismo ang pumayag sa anyaya ni Totoy. Pinabilisan pa ni nanay ang pagkain ko na animo'y gustong-gusto na along mapalayas dito sa bahay.
Pagkatapos kung kumain ay nagbihis muna ako ng damit at hindi na naligo. Eksakto namang pagkalabas ko ng bahay ay nandoon na naghihintay si Totoy. Malaking ngiti ang iginawad niya sa akin na sinagot ko lang ng taray, inilahad niya ang kamay niya sa akin kaya benelatan ko lang siya..
Bago inabot ang kamay niya.
Hays, hirap ng marupok.
Hawak-kamay kaming naglakad hanggang sa maka-abot kami sa sea wall. Nakita ko na agad ang pangit na mukha ni Carlos kahit nasa malayo pa kami sa kanila, at isa lang ang masasabi ko.
Mukha siyang dugyot pag katabi niya si Kyla.
Nakataas agad ang kilay ko sa kanila ng makita kong tinitignan nila ang mga kamay namin ni Totoy na magkahawak.
Binigyan lang ako ni Carlos ng nang-aasar na tingin habang si Kyla ay mukhang natakot sa inasal ko.
Nagpatuloy na kaming bumaba sa sea wall at inalalayan nila kaming sumakay sa bangka, may mga pagkain na rin doon. Sinimulan na nilang itulak yung bangka habang nakasakay lang kaming dalawa ni Kyla. Nang makaabot na sa medyo kalaliman ay isa-isa na silang sumakay, sabay kuha ng tig-isang sagwan.
Nagsimula na kaming umandar papunta sa isla puso, kitang-kita ko ang pawis ng dalawang lalaking kasama namin dahil sa pagsasagwan.
Ilang minuto lang ang nakaraan at nakarating na rin kami sa isla, doon kami bumaba sa likod at sabay pa kaming bumaba ni Kyla.
Grade six pa ako no'ng huling punta ko dito, kaya naman hindi ko na pinigilan ang napakalaking ngiti na pilit inilalabas ng magaganda kong labi.
Mukhang magiging masaya to!