ACE POV
May inilabas si Aevan na isang recorder. Iyon yata ang sinasabi niya kanina na para sa akin. Akala ko ay ibibigay niya sa akin pero sinalpak niya ang connector doon at mukhang pakikinggan din namin.
"Ito ang recorder na para sa iyo. Pakinggan natin para malaman mo kung gaano ka katanga at walang kwentang boyfriend sa kaniya, Kuya."
Para akong pinagkaitan ng hangin. Masakit man ay totoo ang sinabi niya.
"February 15, 4:30 AM... Hi Barney ko. JS Prom natin kagabi at hindi ko inaasahang makakasayaw kita. Alam mo bang sobrang saya ko? Ang totoo kasi ay ikaw lang ang gusto kong makasayaw. Alam mo bang hindi ko malilimutan ang moment natin? Pakiramdam ko ay lalo akong gumanda dahil sinayaw mo ako. Akala ko pa nga ay tayo lang ang tao. Hindi ko pa akalaing hahanapin mo ako at tutulungan sa mga animal na iyon. Ang malupet pa ay binuhat mo ako at nagtapat ka sa akin pagkarating natin sa kotse mo. Hindi ko na nga mabilang kung ilang beses mo akong niyakap nang gabing iyon. Alam mo bang gustong-gusto ko ang amoy mo? I love you, Barney ko."
Humagulgol ako nang marinig ang malambing niyang boses. Hindi ko akalaing ni-record niya ang mga nangyari noon.
Mahal na mahal mo talaga ako, Barney... pero ano ang ginawa ko? Masyadong naging sarado ang isipan ko at hindi manlang kita hinayaang magpaliwanag. Isa akong bobo!
"February 16, 8:35 PM... Hi Barney ko. Nagulat ako kasi pumunta ka sa bahay at sinundo ako. Alam mo bang kilig na kilig ako kanina? Ito ang espesyal na araw sa akin dahil ito ang unang araw na manliligaw ka sa akin. Nanghihingi pa ako palagi ng halik sa iyo pero sa noo mo lang ako hinahalikan. Ang daya mo talaga, pero kahit na ganoon ay mahal pa rin kita, Barney."
Hindi ako matigil sa pag-iyak. Naalala ko pa ang itsura niya kapag nanghihingi siya ng halik sa akin. Kahit ang itsura niya sa tuwing nadidismaya siya sa ginagawa ko kapag sa noo ko siya nahahalikan.
Bakit hindi ako naniwala sa kaniya? Bakit nagpalamon ako sa galit? Ako ang boyfriend niya pero ano ang ginawa ko? Napakagago ko dahil palagi ko na lang siyang sinasaktan!
"February 17, 11:50 AM... Hello Barney ko. Kamuntikan na akong hindi makapag-record ngayon dahil knock out ako kanina at ngayon lang ako nagising. Ito na ang huling araw na manliligaw ka sa akin dahil bukas ay sasagutin na kita. Binigyan mo ako ng tsokolate at kinain ko iyon sa room dahil natatakam ako. Ang sabi mo pa sa akin ay nasa loob non ang mga puso mo. Inaasahan kong hugis puso ang mga tsokolate pero pagkabukas ko ay hugis bilog siya. Nagtaka pa ako dahil iba ang lasa at gumuguhit sa lalamunan. Nakaramdam ako ng hilo at mainit ang pakiramdam ko. May halong alak pala iyong tsokolate na binigay mo sa akin. Hindi mo naman kasalanan iyon dahil hindi mo alam na mali pala ang nakuha ng lalaki at nagkapalit kayo. Natuwa pa ako dahil sinamahan mo ako at nag-cutting tayo... pero hinatid mo nga lang ako sa bahay at dumiretso ka na pauwi. I love you, Barney ko."
Para kaming namatayan dahil sa lakas ng paghagulgol namin. Napahawak ako sa dibdib dahil kumikirot iyon. Para akong inooperahan ng walang anaesthesia.
Bakit ngayon ko lang nalaman ang lahat ng ito?! Bakit ngayon lang lumabas si Aevan?!
Gusto kong itanong sa kapatid ko ang laman ng isip ko pero parang alam ko na rin ang isasagot niya.
"February 18, 7:49 PM... Hi Barney ko. Maaga kitang sinundo ngayon sa bahay ninyo. Natawa pa ako sa itsura mo kanina dahil para kang nananaginip ng gising at parang hindi ka makapaniwalang nasa harapan mo ako. Nag-date pa tayo bago pumasok at ang daming nainggit nang makita tayong magka-holding hands. Nagdahilan pa akong magbabanyo pero sa broadcasting room talaga ako pupunta at kasama ko si Blaze dahil haharanahin kita. Kinuha lang namin ang gitara at beatbox drum sa music hall nang walang paalam kaya nagmamadali kami at tumakbo kami pababa. Natapilok pa ako kanina at sumakit ang paa ko kaya sumampa ako sa likod ni Blaze. Kinabahan pa ako dahil nakita mo kami at bakas sa mukha mo ang selos. Nagulat ako non kasi binuhat mo ako na para bang isang sakong bigas... tapos dinala mo ako sa parking lot at doon tayo nag-part two! Hays... kinikilig pa rin ako hanggang ngayon. Alam mo bang masaya ako kasi ikaw ang naging boyfriend ko? I love you, Barney ko."
Halos araw-araw siyang nagre-record at lagi niyang sinasabi sa akin na mahal niya ako. Gusto kong ibalik ang nakaraan para itama ang pagkakamali pero hindi iyon kailanman mangyayari. Nasa huli nga talaga ang pagsisisi.
Kung nakinig lang ako sa kaniya non... edi sana hindi humantong sa ganito! Napakatanga ko at ang bobo ko!
Pinakinggan lang namin ang mga sinabi ni Barney hanggang umabot kami sa buwan ng Abril.
"April 17, 11:37 AM... Hi Barney ko. Maaga akong nagising dahil panunuorin natin sina Aevan na mangarera at gusto kong maranasan mo na mapanuod sila nang malapitan kaya sinorpresa kita pero ako ang nasorpresa kanina dahil niyakap ako ni Tracy at hindi ko akalaing magso-sorry siya sa akin. Masaya ako dahil tanggap na niya ang relasyon natin at ramdam ko ang sinseridad sa sinabi niya. Nabawasan ang mga problema ko at gumaan ang pakiramdam ko. Natawa pa ako sa iyo dahil bakas sa mukha mo ang takot nang humarurot ako ng takbo at alam ko ring nag-aalala ka sa kapatid mo. Sinanay ko nang sinanay iyan kaya naging magaling siya. Siguro kaunting kembot pa ay mas gagaling siya sa akin. Masaya ako dahil nakasama ko kayo ngayong araw at sana hindi na matapos pa ito. I love you so much, Barney ko."
Hindi rin matigil sa pag-iyak si Aevan. Pinatong niya pa sa upuan ang mga paa niya at sinubsob ang ulo sa tuhod.
"April 18, 11:19 PM... Hi Barney ko. Ilang beses ko itong pinag-isipan at napagdesisyunan ko nang sabihin. A-Ako ang lider ng hinahanap ninyo na organisasyon. Si Naomi naman ay kabilang sa mga mataas na ranggo. Hindi ko tunay na kapatid si Sebastian at hindi tunay na magulang sina Marvin at Katherine. Totoong anak nina Katherine si Sebastian at siya ang nag-aasikaso sa amin. Kahinaan ko ang pamilya ko at ayaw kong magaya kami sa ibang organisasyon. Ayaw kong gamitin ang pamilya ko laban sa akin kaya sila ang pinakilala ko sa inyo bilang magulang ko."
"Masyado kong iniingatan ang pagkatao ko at sa iyo ko pa lang sasabihin ang lahat ng ito. Ang pumunta noong intrams ay ang totoo kong mga kapatid. Sila ang kasama ni Bobbie non. Triplets kami at ako ang panganay. Si Tyson ang sumunod sa akin at si Tyler ang bunso. Sina Helen at Ben naman ang totoo kong magulang. H-Hindi ko alam kung paniniwalaan mo ako pero binaliktad kami ni Jiro at pinaniwala niya kayo na ako ang pumatay kay Jenny. Ako ang nagligtas sa kaniya at dinala siya sa malaking puno. Iniwan ko siya roon dahil nasa p-panganib si Zach at kailangan ko siyang puntahan. Tinawagan ko rin non sina Helen na puntahan si Jenny."
"Pinuntahan nga nila at nakita nilang buhay pa si Jenny. Akala ko ay dinala na nila sa ligtas na lugar si Jenny pero sinundan nila ako. Nakipaglaban kami ni Zach sa tauhan ni Jiro. Ako dapat ang babarilin ni Jiro non pero hinila niya ako at siya ang nabaril. Iyon ang sanhi ng p-pagkamatay niya. Umuwi ako sa Pilipinas para makalimot at nanirahan dito nang isang taon. Umuwi sina Helen dito at doon ko nalaman na namatay pala si Jenny at galit na galit kayo sa akin. May pinakita pa raw sa inyong video na pawang walang katotohanan."
"Pinatay ng tauhan ni Jiro ang tauhan ko at kinuha ang kasuotan niya para suotin. Nagpanggap siyang tauhan ko at pinatay si Jenny. Ilang beses na sinubukan nina Helen na kausapin sina Tracy pero hindi sila pinakinggan. Kahit na ganon ay hindi kami nagtanim nang sama ng loob sa inyo kahit hindi kayo naniwala sa amin. Ilang taon din ang pinagsamahan ng organisasyon natin at hindi kami basta-basta susuko para patunayan sa inyo na hindi kami ang pumatay kay Jenny."
"Pinababantayan ko rin kayo sa mga miyembro ko para masigurong ligtas kayo. Ako ang nagbabantay sa iyo at si Naomi naman kay Bolt. Si Bobbie ang nagbabantay kay Blaze at si Tyson kay Dave. Si Jazz ang pinabantay ko kay Aevan at sina Helen at Ben naman sa magulang mo. Nalaman ko ring minamanmanan ng tauhan ni Jiro si Aevan kaya binigyan ko siya ng recorder para mahanap ko siya at maprotektahan. Alam kong hindi niyo kami paniniwalaan kaya ito lang ang naisip kong paraan. Mahal na mahal kita... Barney ko."
Iniingatan niya ang pagkatao niya pero pinagkatiwalaan niya ako at sinabi pa rin sa akin. Isa talaga siyang magaling na lider. Hindi tulad ko na masyadong tanga at napaniwala sa kasinungalingan ni Jiro.
"Omg... H-Helen!" Napatingin ako kay Mom dahil humagulgol na siya.
"April 19, 1:27 AM... Hi Barney ko. Hindi ko alam kung hanggang kailan ko gagawin ito. Hinihintay kong kumilos si Jiro dahil lagi nilang minamanmanan si Aevan. Lagi kong niyayaya si Aevan mag-ensayo para maprotektahan niya ang sarili kapag may nangyaring masama sa kaniya. Tinuro ko ang mga galaw ko at kaunting ensayo pa ay magiging bihasa siya sa pakikipaglaban. May kutob akong gagawin ulit ni Jiro ang ginawa nila dati at palalabasin na ako na naman ang may sala para lalo kayong magalit sa amin."
"Ayaw kong dumating ang oras na iyon dahil masyado na akong napamahal sa iyo at natatakot na mahiwalay sa iyo. Natatakot akong hindi na kita makita... mayakap at hindi ko na maamoy ang pabango mo. Mami-miss ko lahat ng iyon. Hindi rin ako sigurado kung buhay pa ako pagkatapos non dahil alam kong magagalit kayo sa akin at hindi ako pakikinggan. Alam ko ang misyon niyo at matagal ko nang hinanda ang sarili ko kung sakaling mapatay ninyo ako. Sana dumating ang panahon na mapatawad ninyo kami at hindi puro galit ang nasa puso ninyo. Hindi ko alam... baka huling mensahe ko na ba ito o ano. Gusto ko lang malaman mo na mahal na mahal kita, Barney."
Gusto ko siyang kausapin at yakapin nang mahigpit. Gusto kong humingi ng kapatawaran at pagbayaran ang mga nagawa kong kasalanan. Gusto ko ring sabihin sa kaniya kung gaano ko siya kamahal ng higit pa sa buhay ko.
Itutuloy...