ACE POV
Kinuha ko ang tubig sa lamesa at ininom iyon. Hapon na akong nagising dahil nag-inuman kami nina Blaze sa bar. Nag-jamming na rin kami dahil matagal na naming hindi nagagawa iyon. Nakalimutan ko na rin ang mga nangyari noong araw na iyon at masasabi kong okay na ako. Kahit sina Bolt ay ganoon din. Nakakausap ko na rin sina Mom nang maayos at tanging si Aevan na lang ang hindi pa dahil hindi pa siya lumalabas ng kwarto.
Birthday na niya ngayon pero mukhang nakalimutan na niya kaya pagkatapos kong maligo ay bubulabugin ko na siya sa kwarto. Maghahanda rin sina Mom ng mga paborito niyang pagkain. Hindi ko kilala ang mga kaibigan niya kaya sina Bolt na lang ang pinapunta ko. Kailangan na niyang tigilan ang pagmukmok at kung hindi siya lalabas ay pasasabugin ko ang pinto ng kwarto niya.
Pumunta ako sa banyo para maligo. Papunta na rin sina Bolt dahil marami pa kaming aayusin. Magpapatulong din ako sa kanilang mag-decorate sa gazebo dahil abala sina Mom sa pagluluto ng mga pagkain. Hindi ko pa nga nabibilhan ng regalo si Aevan dahil hindi ko alam ang gusto niya. Mukhang hindi naman na siya mahilig sa Pokemon kaya balak kong tanungin muna siya kung ano ang gusto niya bago ako bumili. Baka kasi mamaya ay hindi niya magustuhan ang binili ko kung ako ang pipili. Nag-ayos na muna ako sa sarili bago lumabas at puntahan ang kwarto ni Aevan.
"Aevan! Hindi ka ba lalabas?! Birthday mo na ngayon at pupunta sina Bolt! Naghanda rin sina Mom kaya lumabas ka na riyan!"
Kinatok ko nang malakas ang pinto pero hindi siya tumutugon. Nilapat ko ang tainga sa pinto pero wala akong naririnig na ingay sa loob. Mukhang tulog pa siya kaya napagdesisyunan kong bumalik na lang mamaya.
Dumiretso ako sa ibaba at saktong kakarating lang nina Blaze. Kausap pa nila si Dad at may dala silang regalo para kay Aevan.
"Dre! Baka gusto mo kaming tulungan, bisita kami aba!" Si Bolt.
Natawa ako dahil ang laki ng dala niyang regalo. "Ano ba kasi ito? Doll house?" Tanong ko.
"Doll House ang wala!" Napapailing na sabi ni Blaze.
"Gago! Sikretong malupet. Huwag kang makialam... Ikaw ba ang may birthday?" Singhal ni Bolt. Binuhat ko naman iyon at naglakad papunta sa garden saka inilapag sa may lamesa.
"Tulungan ninyo akong magdisenyo. Pagandahin natin itong gazebo." Tinuro ko pa ang inflator at mga lobo na nakalagay sa kahon.
"Hanep! Ganito ka pala mag-welcome ng bisita!" Nakangiwing sabi ni Dave.
"Hindi manlang muna tayo paupuin eh no. May trabaho kaagad, hahaha! Kingina!" Reklamo ni Blaze.
"Pakyu! Mga bwisita naman kayo!"
"Paano ba ito gamitin?" Tanong ni Bolt.
Kinuha ko ang inflator at sinaksak. Kumuha rin ako ng dalawang size 12 na lobo at sinuot sa dalawang nozzle. Idiniin ko iyon kaya lumabas ang hangin at lumobo ang dalawang lobo nang sabay.
"Wow! Pa-try nga," namamanghang sabi ni Dave.
"Baka maputukan ako!" Singhal ni Bolt kay Dave dahil malapit sa kaniya ang lobo.
"Edi mabubuntis ka!" Natatawang sabi ni Blaze.
"Pakyu!"
"Mga abnormal! Ang aga-aga eh. Magpalobo lang kayo at ako ang gagawa ng arch," utos ko.
Mayamaya ay natapos din akong gumawa ng balloon arch. Namangha sila at hindi nila akalaing kaya kong gumawa non. Nanuod ako sa youtube kagabi kung paano kaya nagawa ko nang maayos.
Mayamaya ay lumabas sina Mom dala-dala ang pagkaing niluto nila. "Ang ganda naman ng ginawa niyo rito," Puri ni Mom. Tiningnan pa nila ng mabuti ang balloon arch na ginawa ko.
"Nasisiguro kong magugustuhan ni Aevan ito kapag nakita niya," ani Janice.
"Wow... ang bango naman niyan," sabi ni Blaze nang amuyin ang niluto ni Mom.
"Of course... ako ang nagluto kaya kumain kayo mamaya nang marami."
Sakto namang labas ni Dad at may bitbit na tray ng juice. "Uminom na muna kayo. Mukhang napagod kayo sa pag-decorate."
"Yown! Uhaw na uhaw na ako."
"Hoy Blaze! Lagyan mo rin kami!" Singhal ni Bolt.
"May mga kamay kayo, gago!" Tugon ni Blaze.
"Masamid ka sana!"
"Hindi pa rin kayo nagbabago," napapailing na sabi ni Dad. Inayos nina Dad ang isang lamesa para doon ilagay ang regalo ni Aevan. Sina Mom naman ay abala sa pagpupunas ng pinggan at kubyertos.
"Mas gwapo pa rin ako sa kanila. 'Di ba Tito?" Tanong ni Dave.
"Ang lakas ng hangin!"
"Putsa, Dre! Kumapit ka at baka matangay ka ng hangin!" Pang-aasar ni Bolt sa akin.
"Mga pakyu kayo!" Natatawang kong sabi. Kahit sina Mom ay natawa.
"Finally! Lumabas ka rin!" Lumingon ako dahil narinig ko ang sinabi ni Mom. Nangunot ang noo ko nang makita ang itsura ni Aevan at nakaramdam ako ng awa.
Ganito rin ba ang naramdaman nina Mom sa akin nang makita nila ako noon?
Parang mas matanda pa siya tingnan kaysa sa akin at ang laki rin ng nabawas sa timbang niya. Humaba rin nang kaunti ang buhok niya at para siyang pinabayaan sa lansangan. Hindi niya pinansin si Mom at nanatiling blangko ang ekspresyon niya. Hindi manlang niya tiningnan ang mga lobo na pinagpaguran namin.
Nagtaka pa ako dahil may hawak siyang maliit na speaker. Nagkatinginan kami nina Dave dahil hindi manlang tumingin sa amin si Aevan nang batiin namin siya. Dumiretso siya sa bakanteng upuan na nakalagay sa gitna.
Napailing at natawa siya nang makita ang mga paborito niyang pagkain. Ramdam kong hindi siya masaya at pilit lang ang tawa niya.
Mukhang hindi pa siya nakakalimot, tsk.
May sugat pa siya sa ilong at mga mata. Umiiyak pa rin ba siya hanggang ngayon? Maitim ang ilalim ng mga mata niya at halatang hindi siya nakakatulog nang maayos. Inilagay pa ni Janice sa harapan ni Aevan ang Pokemon cake at nagsimula naman siyang humiling.
Nagpakawala ako nang mabigat na hangin nang marinig ang hiling niya. Parang hindi si Aevan ang kaharap namin dahil nag-iba ang boses niya. Dati, kahit galit siya ay nandoon pa rin ang lambing sa pananalita pero iba na ngayon.
Ang laki ng epekto ng babaeng iyon sa kaniya. Masyado siyang na-attached kaya hindi pa rin siya makalimot hanggang ngayon, tsk!
Pagkatapos humiling ni Aevan ay inihipan na niya ang kandila at hindi manlang inalis ang paningin na para bang hinihintay niyang tumugon sa kaniya ang cake. Mayamaya ay umupo na siya nang pumayag si Dad sa hiling niya.
Parang hindi niya kami kilala kung makatingin siya sa amin. Umupo ako sa harapan niya at nagsiupo na rin sina Mom. Hindi kami nag-ingay at hinintay namin siyang magsalita. May kinuha siya sa bulsa at tiningnan iyon. Tinanong niya pa kami kung ano iyon.
Ano bang mayroon sa recorder?
Kumunot ang noo ko nang magsimula siyang magsalita at puro Tyra na naman ang bukang-bibig niya. Pwede bang kalimutan na lang niya iyon? Gusto ko siyang sigawan pero hindi ko ginawa dahil ito ang hiling niya sa amin, ang makinig kami sa kaniya, tsk.
Wala na kaming nagawa kundi ang makinig sa mga sinasabi niya. Mayamaya ay parang tinamad na siyang magkwento dahil ilang minuto siyang natulala. Nang makarekober siya ay pinindot na niya ang recorder at pinaliwanag niya pa iyon.
Edi... hindi talaga si Tyra ang dumakip kay Aevan?
Biglang natuyuan ang lalamunan ko sa 'di malamang dahilan. Maraming katanungan sa utak ko ang gusto kong masagot na pero kailangan ko munang mapakinggan lahat. Tumingin pa siya sa akin nang masama at hindi ko alam kung bakit ako nakaramdam ng kaba.
Itutuloy...