(Collaboration Chapter)
Elyon Yoo
Pagmulat ko, tumambad sa akin ang kisame ng bahay. Nakarinig ako ng mga taong nag-uusap 'di kalayuan sa akin kaya napatingin ako kung saan iyon nagmumula. Medyo malabo ang imahe nila pero tiyak kong mga lalaki sila.
Teka, lalaki?
May lalaki sa bahay ni Master Hagiza!
Pabalikwas akong bumangon, bagay na ikinalingon ng dalawang lalaki. Nanlaki ang mga mata ko nang makilala ko sila. I mean, hindi ko sila kilala sa kanilang pangalan pero pamilyar sila sa akin.
Teka anong ginagawa nila rito? At sa kwarto ko pa talaga?
Hinawakan ko ang mukha ko upang matiyak kung nakasuot pa nga ba ako ng maskara.
Nakahinga naman ako ng maluwag nang makumpirmang suot ko ito. Napatingin ako sa dalawang binatang titig na titig sa akin. Nakaramdam tuloy ako nangpagkailang. "Ba-baka puwede huwag niyo po akong titigan?"
Itinaas ko na lang ang kumot ko para matakpan pa ang ibabang mukha ko.
Napansin naman ng isa na hindi ako komportable kaya medyo binaba niya ang mga mata niya, saglit nga lang 'yon dahil nagsalita rin siya, "Mabuti naman at gising ka na. Kumusta na ang pakiramdam mo?" tanong niya. Siya 'yung madalas na nakikita ko sa labas ng academy na minsang nakakausap ni Rune at Frigelle. Hanggang ngayon hindi ko alam kung sino sa dalawa ang girlfriend niya. "You're wondering why we are here in front of you?"
Halata ba ako masyado?
"Ahm, may sugat ka kanina. Malalim ang tama pero maayos ka na ngayon," muli niyang sabi.
"S-sugat?" Nag-flashback ang mga nangyari kanina. Naalala ko ang pagsugod ng mga halimaw sa harapan ko at kung paano nila muntikang wakasan ang buhay ko... Agad kong kinapa ang tagiliran at balikat ko na pinuruhan kanina pero wala akong makapang benda, wala na rin akong maramdamang sakit.
Paanong nawala?
Ibinalik ko ang tingin sa dalawang binata na nakaupo na ngayon sa sahig na malapit sa akin. "You fought those black ninja's kaya ka may sugat. Nandito kami dahil tumulong kami kanina bago ka mawalan ng malay," paliwanag ng isa nitong kasama.
Ang lalaking ito...
Ang dating niya ay katulad ng kay Carlisle. Mukha siyang suplado sa panlabas na anyo pero parang mas matino pa ang isang 'to kesa kay Carlisle. Siya iyong nakita ko nitong nakaraang araw sa gubat. "I'm Vincent." Pakilala nito sa akin habang titig na titig siya sa akin na parang nakikita talaga niya ang mukha ko. Kahit nakamaskara at nakataas pa rin ang kumot sa kalahati ng mukha ko ay naiilang pa rin ako sa tingin niya.
Tumango lang ako sa kanya. Naiilang ako kaya hindi ko magawang makapagsalita.
Nagtinginan ang dalawang binata sa isa't isa. Ilang segundo rin silang nasa ganoong kalagayan bago nag-iwas si Vincent ng tingin.
Ilang minuto na ang lumipas subalit wala pa ring gustong magsalita sa aming tatlo. Kung pagmamasdan sila para silang nag-uusap sa isip.
Wala ba silang balak magsalita? Problema nila?
Dahil nakatingin lang ako sa kanila kaya mas lalo ko silang napagmasdan. Hindi ako masyadong mahilig magkomento pagdating sa ayos, pisikal, o tingin ko sa isang lalaki pero masasabi kong kabilang sila sa mga pinagkakaguluhan ng mga babae.
Napayuko na lang ako at ibinaba ang kumot, muli kong kinapa ang tagiliran ko.
Paano ako gumaling?
"I'm Kyzhen." Napatingin ako sa lalaki na mukhang Japanese ang mukha. "Marahil nagtataka ka kung bakit nawala ang mga sugat mo at nawala ang kahit anong bahid nito..." Muli itong lumingon sa kasama niya pero agad din naman nitong binawi at tumingin sa akin. "Mahirap paniwalaan pero... Immortal kami."
Namilog ang mga mata ko dahil sa sinabi ni Kyzhen, kung hindi ako nagkakamali ng pangalan niya. Bigla rin akong nakadama ng kaba nang marinig ko ang salitang immortal. Hindi pa rin pala ako sanay kahit na marami ng nangyari sa akin at nakaharap na mga kakaibang nilalang.
"Ang mga umatake sa'yo ay mga black ninja na kabilang sa mga hukbo nang isang nilalang na gusto ng kadiliman at kapangyarihan," paliwanag ni Vincent. "Hindi pa namin alam ni Kyzhen kung bakit ka itake ng mga ito at nais tapusin. Maswerte ka at naroon agad si Hagiza para iligtas ka. Sumunod lang naman kami nang makaramdam ng dark forces sa paligid. Hindi kami ---- masamang tao."
Wala naman akong sinabing masama sila.
Ah, naghinala lang ako ng konte.
Konte lang talaga.
"He's right. Nakilala na rin namin si Hagiza. Maniwala ka man sa hindi ginamot kita sa pamamagitan nang ano... Nang..." Napahawak na ito sa batok niya at parang nag-iba ang kulay ng kanyang mukha.
Bakit siya namumula? Nahihiya ba siya o ayaw niyang ibunyag ang abilidad niya? "Naiintindihan ko kung hindi mo kayang sabihin. S-salamat sa pagliligtas niyo sa buhay ko." Yumuko ako bilang pasasalamat.
Naalalala ko na. Noong nakabungguan ko si Kyzhen, ang alam ko may sugat talaga ako no'n pero biglang nawala noong maalalayan niya ako. Healer pala siya.
"Walang anuman." Si Vincent na ang nagsalita dahil parang napipi na si Kyzhen. "S-sige sa labas lang kami. Magpahinga ka muna. Isipin mo na lang na isa kami sa mga kabalyero mo. Basta pagbutihan mo na lang ang tadhana mo. Ah... Instinct ko lang!" Agad naman na siyang tumayo.
Sa totoo lang, wala akong maintindihan sa sinasabi ni Vincent.
"Aalis na tayo?" tanong ni Kyzhen.
"Kung gusto mo maiwan ka!" Pagsusungit ni Vincent at tinalikuran na kami.
Bipolar ata ang isang 'to. Kanina lang okay siya, ngayon parang magkasing-ugali na sila ni Carlisle.
"H-Huh? H-hindi! Ang sungit mo talaga!" Tumayo na rin ito. "S-sige Miss... Labas lang kami. Magpahinga ka na." Mukha itong balisa habang sinusundan si Vincent.
Ang weirdo na nila. Parang kanina lang ang tino nilang kausap ngayon para na silang ewan.
Ganoon pa man. "Elyon po," mahina kong sabi. Wala naman sigurong masama kung ibigay ko ang pangalan ko. Niligtas nila ang buhay ko. Niligtas ako ng mga kabalyero ko---kuno. Bahagya akong ngumiti tanda ulit ng pasasalamat ko.
"Sige, Elyon. Magpahinga ka na." Ito lamang at tuluyan na nilang sinara ang pintuan.
Pabagsak akong humiga sa kama. Inalala ko ang mga nangyari kanina. Inalala ko ang sinabi ni Vincent kung bakit ako sinugod ng mga halimaw.
-
-
"Ang mga umatake sa'yo ay mga black ninja na kabilang sa mga hukbo nang isang nilalang na gusto ng kadiliman at kapangyarihan."
-
-
"Kadiliman?"
Pinipilit kong unawain ang mga nangyari, subalit hindi makapag-process sa utak ko ang sinabi ni Vincent. "Sino ang tinutukoy niya?"
Kinapa ko ang tagiliran ko. Gusto kong matawa sa mga nangyayari pero hindi ko magawa.
Si Kyzhen, hindi pala siya pangkaraniwang nilalang...
Teka...
Napabalikwas ako ng bangon at tumingin sa pintuan. Kung girlfriend niya si Frigelle o si Rune, alam kaya nila ang tinatagong sekreto ni Kyzhen?
Muling bumukas ang pintuan at niluwa no'n si Master Hagiza na may dalang pagkain. "Kumain ka na at muling magpahinga." Matapos malapag ang pagkain ay tumalikod na rin ito at naglakad para muling lumabas ng kuwarto.
Tinanggal ko ang maskara ko. "Master..." Napahinto si Master Hagiza at bahagyang lumingon sa direksyon ko. "S-sorry. Wala po akong nagawa kanina."
Ang alam ko kasi malakas na ako pero ewan ko ba? Hindi pa rin mawala sa sistema ko ang pagiging duwag. Masyado atang nagimbal ang utak ko kanina kaya hindi ako nakapag-isip ng matino. Lumapit sa akin si Master Hagiza at...
"Aray... Ano po ba?" Pinukpok niya ang ulo ko ng kutsara. Paano niya nakuha ang kutsara sa tray ng hindi ko napapansin?
"Hindi ko na alam kung anong gagawin ko sa'yong bata ka!" Napasimangot na lang ako sa sinabi ng matandang hukluban. "Manatili ka muna rito dahil maraming tao sa labas."
"May mga bisita po tayo?" Akala ko 'yung dalawang binata lang 'yung naandito sa bahay, meron pa palang iba. Akala ko kanina hallucination ko lang 'yung mga naririnig kong boses babae.
"Kakarating lang ng iba. Kasama nila 'yung mga tumulong sa iyo."
Isang tango na lang isinagot ko. Tumayo na ito at lumabas na ng kwarto.
Palibhasa kahoy ang ding-ding kaya rinig ko ang pinag-uusapan ng mga tao sa ibang parte ng bahay. Dahil nga nag-adjust na rin ang pandinig ko kaya mas malinaw kong naririnig ang sinasabi nila. Ngayon alam ko na ang pakiramdam ni Master Hagiza dahil kahit may pagitan na ding-ding, naririnig pa rin nito ang mga bulong ko. Pero matanda na siya eh... Dapat mahina na ang pandinig niya.
Sinumulan ko nang kumain habang nakikinig sa pinag-uusapan ng mga tao sa labas ng silid ko.
-
-
"Kailangan namin ang mahalagang bagay na iyon upang magamit sa isang forcefield! Ang apat na elemento ay ilalagay sa apat na sulok ng Green Valley upang hindi na ito mapasok ng kahit anong dark forces."
"Nabanggit na rin iyan ng mga Ducentibus nang ma-divert ko sila sa lugar namin. Maaring iyan din ang pakay ni Lijon sa lugar na ito dahil hindi ito magkakainteres kung walang makapangyarihang bagay na nakatago rito."
-
-
'Yung Lijon ba ang tinutukoy kanina ni Vincent? Kung tama ang pagkakaintindi ko ang apat na elemento talaga ang target nila. Pero bakit damay ako? Bakit ako ang puntirya nila, hindi ko naman hawak ang mga elemento?
"Saka ano 'yung Ducentibus?"
Uminom ako ng tubig at muling pinakinggan sila.
-
-
"Kayanga nga kami sumunod ni Khorie dahil sa bagay na iyan."
"Hindi ko alam kung maniniwala kayo pero kailangan na nating umalis sa lugar na ito. Ang hinahanap nating bagay ay... Hindi nakalaan para sa atin."
"What do you mean? Kung nagpunta kayo rito para sa isang kalokohan kailangan na ngang umuwi... Ngunit kayo lang!"
-
-
Kilala ko ang boses ng huling lalaking nagsalita. Alam kong kay Vincent iyon. Mukhang iritang-irita ang tono ng boses nito. Kailangan ko na ba talagang maniwala na masungit siya? Pero bakit sa akin okay naman ang pakikitungo niya?
-
-
"Hindi ito kalokohan! As what you'd thought always, Ares."
-
-
Ares? Akala ko ba Vincent ang Pangalan niya? Nagkamali lang ba ako nang pagkakakilanlan ng boses? May kaboses ba si Vincent sa mga bisita ni Master Hagiza?
-
-
"Sa palibot ng root valley, lagi naming nakikita ang isang puting bagay na hindi namin alam kung ano! Hindi ko rin maintindihan kung bakit tanging kami lang ng kaibigan ko ang nakakakita sa bagay na iyon. Isang gabi nang sinundan namin ang liwanag bigla itong naghugis tao at nagsalita. The elemental stones we searched are already fated to anyone or someone else. Hindi ang mga God's, hindi rin sa mga katulad naming Ducentibus o kahit sa mga sorcerer at wizards!"
-
-
Wala na akong maintindihan sa mga sinasabi nang babae. Ang tanging naunawaan ko lamang na nakalaan na ang apat na elemento sa iba.
Pero sino?
Bigla akong nakaramdam ng antok. Medyo malabo na rin ang boses na naririnig ko.
A-ano bang nangyayari sa akin?
Napatingin ako sa basong wala nang lamang tubig. Kinuha ko iyon at inamoy. Bakit hindi ko ito naamoy kanina? Batrip naman oh. Si Master Hagiza talaga, nilagyan ng pampatulog ang inumin ko!
Gusto ko pa sanang makinig pero hindi na kinaya ng katawan ko at napabagsak na lang ako sa higaan ko at nagdilim na ang paningin ko.
*******
Sa muli kong pagmulat, kisame na naman ng bahay ang sumalubong sa akin. Dahan-dahan akong umupo habang hawak ang aking ulo. Though ramdam ko ang gaan ng pakiramdam, marahil sa tulong ng pagpapahinga subalit tila may nararamdaman akong nakakatakot na enerhiya na naman sa paligid. Ito ang dahilan kung bakit bigla akong nagising.
Hindi ko gusto ang enerhiyang ito dahil parang hindi kinakaya ng ulo ko ang nakakatakot na energy. 'Yung pakiramdam na parang lumalaki ang ulo ko at nagtatayuan ang balahibo sa aking katawan.
Agad kong sinuot ang maskara ko at lumabas ng kwarto upang malaman ko kung anong nangyayari sa paligid. Napahinto ako nang makita ang tatlong babaeng nakaupo sa japanese table, mukhang seryoso rin ang pinag-uusapan nila. Napansin ako nang isa kaya nagsalita na ako. "Anong nangyayari rito?" Lahat naman sila ay napatingin sa akin.
Nakilala ko 'yung isang babae. Kung hindi ako nagkakamali siya 'yung nasa school. May kasama siyang foreigner na lalaki. Ang natatandaan ko pa sinusundan niya ako.
"I-ikaw pala iyon?" Gulat na gulat na naman 'yung tingin niya sa akin, maging ang iba nitong kamasa. "Siya ba? O another half mask again?" Mukhang hindi siya sigurado kung ako ba talaga ang nakita niya sa school o hindi. May iba pa ba sa school na nagmamaskara? "Ikaw pala ang tinutukoy ni Hagiza sa amin. Ngayon alam ko na kung bakit walang nababasa si Anchises tungkol sa identity mo dahil isa ka palang itinakda..."
Itinakda? Itinakdang maging vessel ba ang tinutukoy nila?
Paano naman nila nasabi na ako nga ang itinakda? Kung ako nga 'di sana hindi na ako dadaan pa sa kung anu-anong proseso.
"Huwag kang mag-alala kung bakit namin alam, nasabi na ni Hagiza ang ibang detalye at wala kaming balak sa bagay na iyon."
Ano naman kayang pinagsasabi ni Master Hagiza sa mga ito? Akala ko ba may alinlangan siya sa akin?
"Hi!" Masayang bati ng isa nilang kamasamang babae. "I'm Po, ito si Jho at Jona. Ate na lang ang itawag mo sa amin."
"O-opo."
Shems, hindi ako sanay maging magalang. Halos kasing edad lang nila si Vincent kung titingnan sa mga itsura nila pero hindi ko rin iyon tinawag na Kuya Vincent. Ang awkward siguro sa pakiramdam pero mukhang kailangan ko rin talaga silang igalang. "Nabanggit na rin ni Master Hagiza ang ibang detalye." Kahit ang totoo'y hindi ko pa nakikita si Master Hagiza simula nang makatulog ako. "Ako po si Elyon." Yumuko ako bilang paggalang sa kanila.
"Pasensya ka na at nagulo namin ang lugar niyo, pero wala naman kaming balak na masama. Nagkataon lang na ----" Nahinto si Ate Jona sa pagsasalita.
Mukhang alam ko na kung bakit. 'Yung enerhiya na naman na naramdaman ko sa kwarto kanina. Mas malapit na siya sa amin.
Balisa na rin ang iba pa naming kasama. Teka, nasaan na ba si Master Hagiza, pati 'yung alaga niyang baboy ramo?
Aalis na sana ako upang hanapin si Master subalit nagulat ako sa biglang pagsulpot ng Lalaking may nakakatakot at madilim na enerhiya.
Si-sino siya?
"Kamusta mga binibini? Nagkita tayong muli." Isang nakakatakot na ngisi ang ginawad nito sa aming lahat.
"H-hindi! Si Lijon!!!" Napatingin ako kay Ate Jho. Kung ganoon siya pala ang taong tinutukoy nila.
Nagulat si Ate Jona. "Bumalik ka sa kwarto, Elyon. Hindi ka dapat mapahamak."
Hindi ko gusto ang ideyang ito. Kahit duwag ako hindi naman ako basta-basta umaatras sa laban. Hindi ko rin sila pwedeng pabayaan kahit na mas matanda sila sa akin.
"Sinadya ko talagang paghiwa-hiwalayin ang mga bantay niyo upang masolo ko kayo at makuha ang pakay ko..."
Hindi rin siya makasarili, ano?
"Akala niyo siguro hindi ako makakapasok sa bulok niyong shield? Walang sino mang immortal ang makakapantay sa lakas ko! Tandaan niyo iyan mga Ducentibus. Ikumusta niyo na lang ako sa impyerno."
Shield? May shield silang ginawa? Bakit parang hindi ko ramdam?
"Lazerio!"
Kasabay nang pagbigkas nito ng spell kung hindi ako nagkakamali, may lumabas sa kamay nito na dark strips. Nanlaki ang mga mata ko habang papalapit ito sa amin.