"ANO? Nagtry out ka sa basketball?" gulat na tanong ni Alyssa kay Rafa nang magkakasama silang nag-lunch. Alam niyang mahilig itong maglaro ng basketball dahil kasali rin naman ito sa basketball team nila noong highschool.
Nag-aalala lamang siya rito dahil baka mapabayaan ang pag-aaral at matanggal ang scholarship nito.
"Oo nga. Sayang kasi 'yong makukuhang allowance. Malaking tulong din 'yon," sambit nito kaya napailing-iling na lamang siya.
"Paano ang scholarship mo? Paano kung mapabayaan mo ang pag-aaral mo?" tanong niya kaya agad siya nitong inakbayan.
"Para namang hindi mo ako kilala. Kaya kong pagsabayin 'yan! Matalino yata 'to!" nakangising sambit nito kaya agad niyang siniko sa tagiliran.
"Siguraduhin mo lang! Kung hindi, isusumbong kita kay Tita Salome!" banta niya rito. Agad naman nitong tinaas ang kanang kamay na tila nangangako.
Naging matunog ang pangalan ni Rafael simula ng maging parte ito ng basketball team. Mahusay maglaro ang lalaki at madalas ay ito ang nakararami ng puntos. Naungusan nito si Ivan bilang starplayer. Dumami ang mga babaeng umaaligid dito kaya naman nagsimula siyang makaramdam ng inis. Gwapo naman si Rafa at malakas din ang karisma nito. Maganda ang pangangatawan dahil batak sa trabaho. Sunog lang ang balat dahil palaging pumapalaot tuwing wala silang pasok sa eskwela. Ngunit ang kayumangging balat nito ay bumagay sa brusko nitong itsura. Lalaking lalaki ang dating lalo na't nahahawig ito sa isang sikat na artista. Lalo na kapag nakatagilid at litaw ang panga.
Nang matapos ang laro ay agad niyang nilapitan ang kaibigan. Hindi na niya napapansin si Ivan dahil naiinis siya sa mga babaeng lumalapit kay Rafa. Noong nasa probinsya sila ay may mga babaeng humahanga rin dito pero hindi siya nainis dahil hindi naman lantaran kung lumandi ang mga ito. Hindi tulad ng mga babaeng kaeskwela nila ngayon na ang lakas kung humarot. Iba talaga ang Maynila, maraming mga liberated.
"Punasan mo'ng pawis mo!" singhal niya rito at inginudngod ang facetowel sa mukha nito. Naiinis siya dahil nakikipagngitian at batian pa ito sa mga babaeng naroon. Nang hindi makatiis ay hinila niya ito palayo roon. Tapos naman na ang praktis kaya maaari na silang umalis.
"Teka, bakit ka ba nagagalit? Tsaka saan ba tayo pupunta?" nagtatakang tanong nito. Agad niya itong binitiwan at hinarap.
"Eh, di bumalik ka ro'n! Tuwang tuwa ka namang landiin ng mga babaeng nandon!" singhal niya bago humalukipkip at tumingin sa malayo. Napangisi naman ang binata bago sinilip ang mukha niya. Tinalikuran niya ito at akmang aalis ng pigilan siya nito sa balikat.
"Nagseselos ka ba?" tanong nito habang malawak ang pagkakangiti. Agad siyang umirap at muling ibinaling ang mukha sa ibang direksyon para hindi nito makita ang pamumula niya.
"Nagseselos ka nga! Ayan, oh! Namumula ka!" natatawang sambit nito. Nang hindi siya umimik ay sinundot nito ng daliri ang pisngi niya. Agad niyang tinampal ang daliri nito bago padabog na muling tumalikod.
"Huwag ka nang magselos. Alam mo namang ikaw lang ang baby ko, eh! Mahal kita, ikaw lang 'tong ayaw sa akin, eh!" sambit nito. Hindi siya kumibo pero nawawala na ang inis na nararamdaman niya kanina lalo na nang akbayan siya at higitin palapit sa katawan nito.
Nakita niya pa ang grupo nila Ivan at nagtama pa ang paningin nila ng lalaki pero wala na siyang makapang kilig para dito. Ang buong atensyon niya ay nakay Rafa na ngayon ay nakayakap na sa kanya.
PAPUNTA siya sa library nang makabangga ang isang lalaki mabuti na lang dahil naagapan nito ang pagbagsak niya dahil nahawakan siya nito sa bewang. Kaagad siyang lumayo rito at akmang sisinghalan ang lalaki pero natigilan siya nang makita si Ivan na malapad ang pagkakangiti sa kanya. Wala na talaga siyang maramdaman na kilig para dito. Mas nakaramdam pa siya ng inis nang kumindat ito. Hindi man lang nag-sorry ang lalaki dahil nakabangga. Akmang lalagpasan niya ang binata nang pigilan siya nito sa kamay.
"Ikaw si Alyssa hindi ba? Napapansin kita lagi tuwing naglalaro kami. Palagi mong isinisigaw ang pangalan ko," sambit nito habang may pilyong ngiti sa mga labi. Namula siya dahil napapansin pala nito iyon. Pero matagal na iyon, hindi pa naglalaro si Rafael noon. Nakaramdam siya ng hiya at hindi alam kung ano ang sasabihin, paano ay ngayon lang siya nito papansinin kung kailan wala na siyang pakealam dito. Ngayon ay kay Rafa na ang buong atensyon niya tuwing nanonood ng basketball game.
"Gusto mong kumain? My treat. Pambawi man lang sa ilang beses kong pagkabangga sa 'yo," sambit nito. Kahit pala iyon ay natatandaan pa ng lalaki. Kung noon sana ito nag-aya ay malamang na kinikilig na siya ngayon. Buong akala niya ay hindi siya nito papansinin pero wala na siyang pakealam doon. Ngayon niya nakikita ang kapreskohan ng lalaki na noon ay hindi niya napapansin o talagang ayaw niyang pansinin dahil abala siya sa pagpapantasyang magkaroon ng mayamang prince charming.
"Wala na 'yon sa akin. Kalimutan mo na. Hindi kasi ako p'wedeng sumamang kumain sa iyo at baka magalit ang boyfriend ko," tugon niya at akmang tatalikuran ito. Agad namang nagtawanan ang mga kasama nito kaya nagtagis ang bagang ng lalaki.
"Paano ba 'yan, Ivan? Tinanggihan ka ng tsiks!" sambit ng mga ito habang inuulan ng tukso ang lalaki. Mabilis siyang pinigilan nito sa braso at hinatak palayo roon.
"Teka! Nasasaktan ako! Bitiwan mo nga ako!" sigaw niya. Pabigla siyang binitiwan nito sa lugar na wala gaanong tao. Agad niyang hinawakan ang brasong mahigpit nitong hinawakan kanina. Mamaya lang ay natitiyak niyang mamamantal na ito dahil sa higpit ng pagkahawak ng lalaki.
"Wala kang karapatang pahiyain ako sa harap ng mga kaibigan ko!" singhal nito kaya napatanga siya rito.
"Hindi kita pinahiya! May karapatan akong tanggihan ka dahil katawan ko ito. Hindi ako katulad ng ibang babae diyan na nahuhumaling sa 'yo!" singhal niya ng makabawi sa pagkabigla. Nanlisik ang mga mata nito nang tumitig sa kanya kaya hindi niya napigilang mapaatras sa takot.
"So, pinaasa mo lang ako?" mabalasik nitong tanong kaya lalo siyang nalito sa akusasyon nito. Kunot-noong tinitigan niya ito sa mata kung nababaliw na ba ito.
"Anong pinaasa? Teka nga! Hindi kita maintindihan, eh!" nalilitong sambit niya.
"Noong una ay todo cheer ka sa akin. Ano, pinaasa mo akong gusto mo ako? Tapos sasabihin mo ngayon na may boyfriend ka?" humakbang ito palapit kaya napaatras siya.
"Baliw ka ba? Paano kita paaasahin eh ngayon mo nga lang ako pinansin!" giit niya. Agad namang nagbago ang ekspresyon ng mukha nito. Naging maamo iyon at agad na humingi ng sorry.
"Sorry, hindi kasi ako makalapit dahil sa lalaking palagi mong kasama. Iyon ba ang boyfriend mo? Si Rafael Bermudez? Palaging nakabuntot sa 'yo kaya naman hindi kita malapitan. Babawi ako sa 'yo. Basta pagbigyan mo lang ako. Kumain naman tayo sa labas kahit isang beses lang. Gusto ko lang talagang bumawi. Pasensya na rin sa inasta ko kanina. Gago kasi 'yong mga kaibigan ko. Hindi ako titigilang buskahin kapag hindi kita nilayo doon. Huwag ka nang magalit sa akin, Alyssa," sambit nito. Sa haba at bilis ng pagsasalita nito ay hindi niya napigilang matawa. Para kasi itong batang nasukol at natatarantang magpaliwanag. Nakamaang naman ito sa kanya habang nakabungisngis siya.
"Sorry, ang cute mo kasi. Pero ang creepy mo kanina!" bulalas niya bago nag-peace sign. Ngumiti rin ito na tila nabunutan ng tinik sa dibdib.
Iyon ang simula ng pagkakaibigan nila ni Ivan na labis niyang pinagsisisihan ngayon.