Habang nagsasayaw sina Eunice at Luna ay hindi nila napansin ang paglapit ni Halom kay Mirah. Nang balingan nila ang kaibigan ay isinasayaw na ito ng kanyang asawa. Todo ang kilig na naramdaman nila ng kasama.
"Kiss!" sigaw niya. "Maghahalikan na 'yan."
"Isang kiss naman diyan," dagdag ni Luna.
Mukhang nagkahiyaan pa ang bagong kasal.
"Hindi kayo nag-kiss kanina. Unfair naman kung matatapos ang gabing 'to na hindi kayo nagki-kiss," singit pa niya. 
"Ito na!" ani Mirah. Hinawakan nito ang magkabilang pisngi ng asawa pagkatapos ay tumingkayad at hinalikan ito.
"Wooohh!" masaya nilang sigaw. Ang ilang katutubo ay nakipag hiyawan na rin.
Nang mapagod silang sumayaw ay umupo na sila. Nadatnan nila sa mesa si Kayan, hawak ang anak nito. Sa tabi naman nito ay may dalawang binata na hindi niya kilala at si Limo, kasama ang bruhang si Marikit. Hindi pa niya nakakausap ang dalaga pero hindi na maganda ang kulo ng kanyang dugo rito. Umupo siya sa harap ni Limo, sa pagitan ni Mutya at ng binatang hindi niya alam ang pangalan. Napansin niyang tumingin sa kanya si Limo, gaya ng dati ay salubong ang mga kilay nito. Tinaasan niya na lamang ito ng kilay at sinimulang kainin ang prutas na nasa harap.
Ipinakilala siya ni Luna sa mga ito. Tipid na ngiti ang kanyang ibinigay lalo na kay Marikit, halata namang peke ang ngiti ng bruha sa kanya. 
Kinaumagahan ay nagpatuloy pa rin ang kasiyahan. Ang bagong kasal ay nagtungo sa sagradong yungib upang isagawa ang pinakahuling seremonya ng kasal. Isang araw na mananatili ang dalawa sa loob.
Palihim na sinundan ni Eunice ang ilang kalalakihan na naghatid kina Mirah sa yungib. Pagkarating ng mga ito roon ay pumasok ang bagong kasal sa loob pagkatapos ay iniharang ang malaking bato sa may labasan. Dalawang lalaki ang naiwan doon at binantayan ang pinto, ang ilan ay bumalik sa pagtitipon.
"Bongga! may bantay pa talaga sila. Tiyak na magiging maganda ang honeymoon ng dalawa sa loob. Walang istorbo eh hihhi!" Tatalikod na sana siya nang bumangga ang kanyang matangos na ilong sa isang matigas na bagay. Dahan-dahan siyang tumingala at sumalubong sa kanya ang salubong na mga kilay ni Limo. 
"Anong ginagawa mo rito?" hindi natutuwang tanong sa kanya ng binata.
"Hindi kita nakita sa grupo ng mga lalaki kanina. Anong ginagawa mo rito?" balik-tanong ng dalaga. "Curious ka rin ba kung ano ang ginagawa ng dalawa sa loob?"
"Hindi ako gaya mo. Napansin ko ang kakaibang kilos mo kaya naman sinundan kita, hindi ko lang akalain na tutungo ka rito sa sagradong yungib. Hindi ba nasabi sa'yo ni Luna na bawal tumapak sa lugar na ito ang hindi pa kasal? Teka, may asawa ka na siguro!"
Pinamewangan niya ito, “hoy! ipokritong adonis. Para sabihin ko sa iyo. Birhen pa ako. With a capital B-I-R-H-E-N,” naiinis niyang sambit. “Saka nandito lang naman ako sa labas, wala naman ako sa loob." 
"Kahit na, sagrado pa rin ang lugar na 'to," walang pasabi nitong hinawakan ang kanyang kamay at hinila siya palayo sa may yungib. "Sa oras na nakita ka nila tiyak kong hindi nila ito palalampasin."
"Nakita mo na nga ako, palalampasin mo ba ito?" 
Tumigil ito sa paglalakad at hinarap siya, binitawan na rin nito ang kanyang kamay na labis niyang ikinadismaya.
"Palalampasin ko 'to dahil kasal ngayon ni Halom at hindi ko siya gustong bigyan ng alalahanin, kaya naman sana umayos ka. Uulitin ko, sa lugar na 'to hindi mo magagawa kung ano man ang gusto mo," madiin nitong wika pagkatapos ay tumalikod at muling naglakad.
"May galit ka ba sa akin?" tanong niya.
Hindi ito sumagot at ipinagpatuloy ang paglalakad.
"Huwag mong sabihin na may hinanakit ka sa nangyari noong isang gabi. Wala naman akong nakita," aniya. “Nakatalikod ka tapos kalahati ng katawan mo nasa tubig. Anong makikita ko roon?" pabulong niyang dagdag.
Huminto ito kaya naman bumangga ang kanyang mukha sa likod nito. 
"Kanina pa namumuro 'yang katawan na 'yan ah," turan niya habang himas ang nasaktang ilong. "Pasalamat ka talaga at matipuno iyan," dagdag pa niya. "Oh salubong na naman ang mga kilay mo, manenermon ka na naman. Hindi ka ba nagsasawa?"
"Kung alam mong ilugar ang iyong sarili pati na rin 'yang lumalabas diyan sa bibig mo, wala kang maririnig kahit na ano mula sa akin. Pinalampas ko ang nangyari noong isang gabi maging ngayon. Pakiusap, umayos ka kung hindi mo gustong madamay sina Luna riyan sa ginagawa mo."
Hindi niya maiwasang sumimangot sa sinabi nito, at talagang idinamay pa ang kaibigan niya.
Muli silang nagpatuloy sa paglalakad. Mayamaya ay nakasalubong nila si Marikit, may dalawang babaeng nakabuntot dito.
"Limo," lumapit ito sa binata. "Saan kayo galing at bakit kasama mo ang taong-labas?"
"Nakita ko siyang pakalat-kalat kaya naman minabuti kong ihatid siya sa kinaroroonan ni Luna. Nakita mo ba siya?"
'Wow ha! pakalat-kalat talaga? Bakit hindi mo sabihing sinundan mo ako sa may yungib. May pagka etchos din pala ang lalaking ito!' himutok ng isip.
Sinabi ni Marikit kung saan nito huling nakita si Luna. Inihatid nga siya ni Limo sa kinaroroonan nito.
"Saang lupalop ka na naman napadpad at bakit kasama mo si Limo?” tanong ng kaibigan.
"Nakita ko siyang pakalat-kalat kaya naman nakiusap akong ihatid ako sa iyo. Pumayag naman siya," pagsisinungaling niya. Hindi niya naman pwedeng sabihin na nakita siya ng binata na nagmamanman sa labas ng sagradong yungib.
Lumipas ang isang araw at lumabas na sa loob ng yungib ang bagong kasal. Inaya nila ang dalawa na sabayan sila sa pagkain.
"Blooming tayo ngayon. Mukhang maganda ang nangyari sa loob," aniya na ikinapula ng pisngi ni Mirah. 
"Ano ka ba, Eunice, kumakain tayo saka mo na lang siya kausapin," sita sa kanya ni Luna.
"Curious lang ako," binalingan niya si Halom. "Maalam ka ba sa mga ganoong bagay, like wala namang sex education dito sa lugar n'yo. Walang pang internet na pwedeng kuhanan ng impormasyon. Paano kayo nagkaroon ng kaalaman? Pinapangaralan ba kayo ng magulang n'yo? O nagkaroon kayo ng wet dreams tapos iyon ang sinunod n'yo?"
Halos masamid na ito sa kanyang tanong, maging ang ilang binata sa mesa ay tila naintindihan ang kanyang sinabi at iisa ang naging reaksyon ng mga ito. Maliban na lang kay Limo na walang karea-reaksyon sa kanyang sinabi. Wait! Naintindihan kaya nito ang winika niya? imposible namang hindi. 
"Walang nagturo sa amin. Siguro parte na rin ng pagiging lalaki namin ang nagsasabi kung ano ang gagawin, mga ganoong bagay ba," si Kayan na ang sumagot. "Ano nga pala ang sex education at wet dreams?" 
"Ito 'yon~" hindi na niya naituloy ang sasabihin dahil nilagyan ng karne ni Luna ang kanyang bunganga.
"Pagpasensyahan n'yo na, gutom lang ito kaya maraming nasasabi," saad nito.
Agad niyang iniluwa ang karneng isinubo sa kanya, "what the~ anong kakarne 'to?"
"Sila 'yong madalas sumira sa isang relasyon," sagot ni Mirah na halatang nagpipigil ng tawa.
Nanlaki ang kanyang mga mata sa sinabi nito. She excused herself, at pumunta sa gilid upang magmumog. Pagkaalis niya ay humagalpak ng tawa sina Luna at Mirah. Mga bruhang ‘yon!
Nang araw na 'yon ay inilabas ang mga alak at nagpakalunod dito ang karamihan. Maagang nagpaalam si Luna dahil may anak pa itong aasikasuhin, nagtungo na lamang siya sa kanyang kubo at doon nagmuni-muni. Abala ang lahat kaya wala rin siyang makakasama sa paggawa ng kalokohan. 
Makalipas ang dalawang araw ay bumalik sa siyudad sina Halom at Mirah, ngunit pinaiwan siya. Wala sa usapan na magdadala roon ng taong-labas si Halom kaya naman ang idinala nito ay mananatili sa lugar na 'yon.
Actually hindi na siya nagulat nang sabihin iyon ni Amang Nilo, swerte na nga niya at hindi siya ibinalik ng mga ito sa piitan. Nakiusap si Kayan sa ama na hayaan siyang sumama kina Halom tutal hindi naman siya mapanganib, ngunit marami sa kanilang kanayon ang hindi natuwa sa nais nito. Sa huli ay nanatili siya sa tribo.
"Parang ang relax mo naman ata, sinabi nilang hindi ka na makakaalis dito. Hindi ka ba nababahala?" tanong sa kanya ni Luna nang mapansing wala lang sa kanya ang naging pasya ng tribo.
"We don't know baka biglang mag-iba ang ihip ng hangin."
"Hindi ka ba hahanapin nila Tito? Sigurado ka bang alam nila na dito ka pumunta? Hindi ka naman siguro nagsinungaling sa kanila."
"I swear, alam nilang dito ako pumunta. Pumayag sila dahil nagsinungaling ako, sinabi kong nag-iba na ang pinuno sa lugar na 'to at binago ang ilang patakaran. Sinabi kong tumatanggap na kayo ng bisita basta may kakilala ito rito sa loob."
"Naniwala naman sila?" parang hindi ito nakumbinsi sa binuo niyang rason.
"Siguro, pinayagan ako eh," kibit-balikat niya.