Nang makapasok kami sa loob ay natigil ako sa paglalakad at naipikit ko sandali ang mga mata ko. Nasisilaw ako sa liwanag na bumungad sa amin. Dahan-dahan ko namang iminulat ang mga mata ko. Trying to adjust from the sudden brightness.
“Are you okay?” Bakas ang pag aalala sa boses niya nang tanungin niya ako.
Aww! Touch naman ako.
“Y-yeah, nasilaw lang.”
Watermelon ang theme ng welcome party. Kaya asahan mong lahat ng makikita mo sa paligid ay watermelon. Maging sa stage ay punong puno ng watermelon. Natatakam tuloy ako.
“Aldrin! Dito!” Halos magkasabay kaming napalingon ni Aldrin sa gawi kung sa’n namin narinig ang boses na ‘yon. Nakita namin si Sir Tairon at Chel na kumakaway sa amin. Kaya pumaroon kami sa kanila.
“Dito ka na sa tabi ko, Kels,” salubong ni Chel.
Tumabi ako kay Chel. Si Aldrin naman ay nakipag asaran pa kay Sir Tairon bago naupo sa tabi ko.
Woah! Hindi talaga ako makapaniwalang professor namin sila. Ang babata pa nila at ang ga-gwapo pa.
Dahan-dahang nag minimize ang musikang umaalingangaw sa buong gymnasium. Hanggang sa tuluyan na ngang tumahimik. May narinig kaming tumikhim sa stage kaya napatingin kaming lahat roon.
“Good evening students, faculty and staffs, and to our beloved Dean. Sir Richard Sy, good evening. I am Ken Melecio, your master of the ceremony for this evening. June 05, year of 2020, the Dewford Academy has 175 enrollees for the Education course, this includes the BSED and the BEED. 269 enrollees for the Criminology course, 98 for the HRM, 140 for Engineering, 222 for the tourism course, 300 for the Technical Vocational, and 165 for the course of BSBA. For a total of 1,194. So hello and welcome to Dewford Academy 1,194 students. Kaming lahat ay nagagalak at ito ang paaralang napili ninyo bilang katuwang niyo sa pag abot niyo ng inyong mga pangarap. Long speeches, no more. Dahil alam kong nagugutom na ang lahat,” Natawa ito sa sinabi, maging ang lahat ng mga nakikinig. “Kaya, ilabas na ang mga lechon and let’s enjoy the food everyone!”
Nagpalakpakan ang lahat. Bumaba ang emcee sa stage at nagsimula namang tumugtog ang sikat na kantang Twerk.
Totoo nga ang sinabi ni Chubby kanina na dalawampu ang lechon na hinanda. Mula sa malaking pintuan ng gymnasium ay nakahilerang pumasok ang dalawampung lalake na naka coat and tie, may dala itong tig iisang ulo ng lechon.
Nang makarating ang mga ito sa gitna ay sumayaw ang mga ito sa salin ng Twerk na tugtugin. Naghiyawan ang lahat. Ang iba nama’y pinukpok pa ang lamesa para lang makagawa ng ingay.
Nang matapos ang sayawan nila ay agad namang inanunsiyo na pwede ng simulan ang dinner.
“Sandali at ikukuha kita ng lechon,” bigla ay sabi ni Sir Aldrin.
“Sir, ako na po. Nakakahiya naman po sa inyo.” Akma akong tatayo pero pinigilan ako niya ako.
“Ako na,” aniya sabay tayo para pumunta sa table kung saan nakasadlak ang mga pagkain.
Katabi ko naman sa kabilang side ko si Chel at katabi naman nito si Sir Tairon. Ang magkapatid naman ay ‘di ko na alam kung saan napadpad.
Panay kwentuhan ang nagaganap kay Sir Tairon at Chel. Mukhang close na close sila, samantalang ako’y hindi masyadong kinakausap ni Sir Aldrin. Tahimik lamang ito.
"Bakit nga ba kasali kayo?" Narinig kong tanong ni Chel kay Sir Tairon.
“Nagkulang kasi ng lalake. Masyadong marami ang babae sa Dewford Academy,” sagot ni Sir Tairon.
Hindi ko narinig ang sagot ni Chel kaya nilingon ko ito. Pinapapak na pala niya ang hawak na crispy pata.
“Pasensya na kung natagalan,” si Sir Aldrin habang inilalagay sa lamesa ang kinuhang lechon.
“Ayos lang po,” nakangiting tugon ko.
Ngumiti siya sa akin at bumalik sa pagkakaupo.
“Ilang taon ka na?” tanong niya.
“Kaka-18 ko lang no’ng Abril. Kayo po?”
Maingat kong tinusok ng tinidor ang karne sa kare-kare at isinubo ito. Napatingin ako sa kanya nang naramdaman kong nakatitig siya sa akin.
“Oh! Sorry,” nahihiyang ibinaling niya sa plato ang kan’yang paningin.
“Bakit po?”
“Nothing. I-I just got 23 last April too.”
Lumiwanag ang mukha ko sa naging sagot niya.
“Wow! Magka birthmonth pala tayo.”
“April 2.”
Nanlaki ng bahagya ang mga mata ko. “April 2 rin ako. Naks! Magka birthday pa pala tayo.”
Nakita kong napangiti siya ng bahagya.
Muling kinuha ng emcee ang atensyon naming lahat nang magsalita ito mula sa stage.
“Good evening everyone. Now, if you’re done with the food. You can now invite your partners to dance here in front.”
Mabilis na tumayo si Sir Aldrin. Nag angat ako ng tingin sa kanya nang maglahad siya ng kamay sa akin. Nagbaba ako ng tingin sa kamay niya at napatitig doon.
“May I have this dance?”
Ngumiti ako sa kanya saka ko hinawakan ang nakalahad niyang palad. Tumayo ako at nagpatianod sa kan’ya nang igiya niya ako papunta sa gitna.
Nagsimula ng tumugtog ang mahinang awitin. Kasabay nito ang paghawak niya sa kamay ko at dahan-dahang inilapat sa balikat niya. Ang isang kamay ko nama’y hawak-hawak niya.
“Are you nervous?” Natatawang tanong niya.
“H-hindi naman po. Medyo lang. K-kasi ano... first time ko pong sumayaw.”
He just chuckled on the thought of me having no experience in dancing. Napaigtad ako nang ilapat niya sa bewang ko ang isang kamay niya.
“Just go with the flow, Kelsi.” Tila huni ng ibon ang naging tinig niya nang banggitin niya ang pangalan ko.
We started swaying from left to right. Gaya nga ng sabi niya ay sinusundan ko lang din ang bawat galaw niya.
“So, kumusta ang sayaw niyo ni Sir Aldrin kanina?” Kuryosong tanong ni Chel sa ‘kin.
Kasalukuyan kaming naghahanda para sa pagtulog. Naglalagay ako ng punda sa unan ko habang ang tatlo ay nasa kani-kanilang higaan na.
Dalawang double-deck bed ang meron dito sa room namin, ako ang nasa ilalim habang sa ibabaw ko naman ay si Chel. Sa kabilang double-deck naman ay si Chubby naman ang sa ilalim at sa ibabaw niya ay ang kapatid na si Curly.
“Omg! Nag sayaw kayo?” si Chubby.
“Ang swerte niyo naman. Pinapangarap ng maraming girls dito sa Dewford Academy ang makapareho at isayaw ang mga gwapong propesor na tulad nina Sir Aldrin at Tairon.” saad naman ni Curly.
Natigil naman ako sa pag-aayos at inalala ang nangyari kanina habang nagsasayaw kami.
Buong sayaw namin ay nakangiti lamang siya. Kumikislap ang kan’yang mga mata katulad ng mga tala sa kalangitan.
Ang sabi sa ‘kin ni Lola noon...
“Noong unang kita ko pa lang sa lolo mo noon, Apo, ay nabingwit na niya ang puso ko. Sa tuwing nakikita ko siyang naglalakad papalapit sa akin, ay nag iingay na kaagad ang puso ko.”
“Mararamdaman mo iyan apo, kung siya na ang nakatadhana sa iyo. Malalaman iyon ng puso mo.”
Napatingin ako kay Sir Aldrin. Ang gwapo niya talaga. Naghuhuramentado ang puso ko. Mukhang ito na nga ang sinasabi ni lola.
Baka siya na nga ang lalakeng nakatadhana sa akin.
“Hoy!”
Agad akong napatingala kay Chel na nasa taas nang bigla ay batuhin niya ang mukha ko ng unan.
“Anak ng! Kanina pa kami nagtatanong rito kong anong nangyari. Ikaw naman diyan, pangiti-ngiti lang.”
Nagtawanan ang magkapatid sa naging bulyaw ni Chel.
“Chel,” sabi ko at nangingiti pa.
“Oh?”
“In love na yata ako,” kinikilig na pahayag ko.
Binato ulit ako ng unan ni Chel.
“Matulog na nga tayo. Landi-landi ng isang ‘to.”
Nagtawanan pa silang muli pero ‘di ko na pinansin. Nahiga na ako’t hinayaan ang sariling matulala habang nakangiti. Pilit na sumasayaw sa loob ng isip ko ang bawat ngiti ni Sir Aldrin kanina.
Kinabukasan ay nagising ako ng maaga. Alas kwarto y media pa lang nang madaanan ng mga mata ko ang orasan na nakasabit sa dingding, malapit sa banyo.
Dahil excited na akong pumasok ay nagdesisyon na akong maligo habang tulog na tulog pa ang tatlo.
Nakailang kuskos rin ako sa balat ko. Talagang pinangkuskos ko pa ang bagong sabon na bili ko sa Watsons noong nakaraang linggo. Matipid ako sa sabon noon. Pero ngayon, mukhang kailangan ko nang mag stock ng maraming sabon.
“Ano ba ‘yan? Mukhang ipinangligo mo ang pabango ah.”
Napalingon ako kay Chel. Kakagising lang niya. Kasalukuyan akong nakaharap sa salamin at naglalagay ng kulay dark pink na lip tint.
Napatingin akong muli sa orasan. Mag a-alas sais na.
“Good morning,” bati ko kay Chel.
“Good morning,” tugon niya saka bumaba at nag dire-diretso sa banyo para maligo.
Ilang sandali pa, gumising na rin ang magkapatid. Nag agawan pa ito sa banyo nang matapos si Chel.
“Ano bang liptint gamit mo Kels? Bet ko ‘yang shade na suot mo ngayon,” si Chel habang nasa harap ng salamin at naghahanap ng pwedeng gamiting liptint.
“Iyang darkpink na may label na watermelon.”
Agad naman niya itong nahanap at naglagay ng kaunti sa labi niya.
“Tapos na ba kayo? Breakfast na tayo, nagugutom na alaga ko.” si Chubby.
“Dragon ba alaga mo diyan sa tiyan mo? Kaya ka tumataba eh, lagi kang gutom,” panunukso ni Curly.
“Ikaw naman kaya ka payat, kasi hindi ka nagugutom,” ganti ni Chubby kay Curly.
Nagbangayan na naman sila. Nagkatinginan kami ni Chel at nauna nang lumabas.
Ang dormitoryo ng Dewford Academy ay may hanggang sampung palapag. Nasa ikaapat ang room namin nina Chel. Nasa pinakababang floor naman ang napakalaking cafeteria.
Nasa harap na kami ng elevator nang makahabol sa ‘min sina Chubby at Curly.
“Ba’t nang iwan kayo?”
Hindi na namin nasagot ang tanong ni Chubby nang bumukas ang pinto ng elevator.
Nanlaki ang mga mata ko nang makita kung sino ang nasa loob ng elevator. Natigilan ako at halos ‘di ko maihakbang ang mga paa ko.
Kinurot ako sa puwetan ni Chel nang mapansin niyang nakatulala lang ako.
Nang makapasok kami sa loob ng elevator ay saka lang kami napansin ni Sir Aldrin at Sir Tairon. Busy kasi sila sa pag-uusap at kakatingin sa mga librong hawak nila kanina.
“Oh kayo pala ‘yan, Ms. Macasaet,” bati sa ‘min ni Sir Tairon. Ngumiti siya kay Chel bago sa aming tatlo nina Curly at Chubby. Ngayon ko lang napansin na may dimple pala siya sa kanang bahagi ng pisngi niya. Ang cute!
Matagal bago lumingon sa amin si Sir Aldrin at nang lumingon ito...
Nakangiti na at diretso ang paningin sa akin.
‘Oh god! Bagong ligo siya. Mukhang mabango.’
“Anong pabango ang gamit mo? Ang tapang ng amoy. Masakit sa ilong.”
At sabay-sabay silang napatingin sa akin. Napanganga ako. Dapat kasi isang spray lang, sapat na.