“Basta.”
“Anong basta? Burahin mo ‘yung striptease,” anito at inagaw ang notebook sa kanya. “Bawal sa mga bata iyon. Saka ba ang nakasulat dito? Prinsesa ng…”
Dinamba niya si Carson para mabawi ang notebook. Hindi nito pwedeng makita kung ano ang nakasulat doon. Hindi pa ngayon ang oras. Nagulat na lang siya dahil nakakubabaw na siya dito. Naka-unat ang T-shirt sa harap ng dibdib niya habang inaabot niya ang notebook. And he was staring at her chest with wide eyes. Na parang noon lang siya nito nakita.
“D-Don’t move,” anang lalaki.
“Bakit? ‘Yung notebook ko.” Inusod niya ang tuhod para lalo itong maabot hanggang bumangga sa katawan nito.
He hissed and his face was in agony. Mariin itong pumikit. Tinapik niya ang dibdib nito. “Hoy! Okay ka lang? May sakit ka ba? Hoy!”
“Just get off me,” paangil na utos nito.
“Aalis lang ako dito kapag ibinalik mo ang notebook ko,” kondisyon niya.
“Oo na. Oo na,” sabi nito at di na nag-abalang makipagkulitan sa kanila. “Burahin mo na ‘yang striptease.” At umusod ito palayo sa kanya. Mukhang bad mood na ito at bigla na lang tumayo saka iniwan siya.
“Anong nangyari doon?” tanong ng kapatid niya na nasalubong si Carson.
“Ewan ko,” usal niya at nagtatakang sinundan ng tingin ang lalaki.
“Baka naman inasar mo siya.”
Pagak siyang tumawa. “Ako? Ako pa talaga ang mang-aasar sa kanya?”
“Ang lakas mo kasing mang-asar minsan.”
“Hindi kaya,” kaila niya at niyakap ang notebook.
May nakita ba itong kakaiba sa notebook niya? Nabasa ba nito ang isinulat niya tungkol dito? Lalo pa siyang kinabahan nang natagalan itong bumalik.
Kinatok ito ng kapatid niya sa banyo. “Hoy! Bakit ang tagal mo diyan. Naligo ka na yata?”
“Mainit kasi ngayon. Maalinsangan.”
Hala! Baka naligo siya bigla dahil mabaho ako. Pasimple niyang inamoy ang sarili. Nakakahiya naman! Amoy pawis yata ako tapos nadikit sa kanya.
“Kuya, mabaho ba ako?” tanong ni Nailah sa kapatid.
“Kailan ka pa na-conscious kung mabaho ka o hindi?” Ginulo ng kapatid ang buhok niya. “Naks! Nagdadalaga ka na talaga. Baka naman may sasagutin ka na sa mga manliligaw mo at gusto mo nang maging mabango.”
“Sino ‘yung lalaking gusto mo?” madilim ang mukhang tanong ni Carson na nakatayo sa pinto ng balkonahe.
Kinabahan siya. Paano kung may hinala na itong siya ang gusto nito kaya mainit ang ulo nito? Saan siya nagkamali? Paano nito nahalata?
Iniwas niya ang tingin dito. “Si Haring Jinheung ng Kaharian ng Silla. Siya ang gusto ko.”
“Sino daw?” tanong ng Kuya Lance niya. “Hari ng ano?”
Isang ngiti ang gumuhit sa labi ni Carson. “Wala. Ihahatid ko na kayo. Kailangan pang mag-review ni Nailah nang hindi kung sinu-sinong lalaki ang naiisip niya.”
Kung alam lang nito na ito lang ang lalaking naiisip niya.
“ABA! Dalagang-dalaga ka na bigla. Samantalang noong nakaraang umuwi ka dito lukot-lukot pa ang damit mo. Marunong nang mag-ayos ang anak ko,” puna ng Aling Laura nasa sala sila habang hinahaplos ang buhok niya.
“Akala ko nga siya ang ipapakilalang girlfriend mo,” sabi ni Senyora Gemalyn na yakap-yakap sa baywang si Carson na akala mo ay batang paslit pa rin ang binata. Miss na miss ito ng babae. “Akala ko sa dami ng mga girlfriend mo sa Manila, may ipapakilala ka na sa akin.”
“Ma, I’m too young to settle down. Di po ako nagmamadali.”
Napailing na lang si Senyora Gemalyn. “The problem is that I am growing old. Gusto ko namang makita ang mga apo ko.”
“Si Mama, gusto agad tumanda.”
“Pakiramdam ko lang kasi napakabilis ng panahon. And I am afraid I am missing so much. Tingnan mo nga may muscles-muscles ka na,” anang si Gemalyn at pinisil-pisil pa ang braso ni Carson. “Si Nailah nga ilang linggo ko lang huling nakita biglang nagbago na. Lalo siyang gumanda hindi ba, hijo?”
“Parang wala namang masyadong nagbago sa kanya,” kaswal na komento ni Carson na di man lang siya pinag-interesan na tingnan.
Nag-freefall ang puso ni Nailah mula sa kalawakan. Wala daw nagbago sa itsura niya samantalang halos hatinggabi na siya natulog para lang magpatulong mamili ng magandang damit na isusuot at nang ma-impress si Carson. Nanginginig siya sa lamig sa short sleeved chiffon blouse at knee-length na skirt pero wala pala itong napansin.
“Magmiryenda na tayo. Kwentuhan mo ako,” sabi ni Senyora Gemalyn.
“Ma, lagi naman po tayong nagtatawagan at naka-video chat. Lagi pa ninyo akong tine-text. Wala na po akong maging maikukwento sa inyo,” biro ni Carson.
“Senyora, pwede po bang iuwi ko muna ang gamit ko sa bahay?” tanong ni Nailah nang hindi makatiis.