Hindi sa di niya naa-appreciate ang pag-aalala ng lola niya. Nakakasakal na kasi minsan at parang napakaliit lang ng mundo niya dahil dito. Everything had to be done under her line of vision.
"Basta susunduin kita sa airport bukas. Baka mamaya may mga lalaking umaaligid sa iyo diyan."
"Wala po,” kaila niya. Nakaka-attract ang bago niyang anyo pero kung mayroon man ay di niya pinapansin dahil di niya type.
"Mabuti naman dahil may ipapakilala ako sa iyo na apo ng kaibigan ko. Tumawag sa akin ang kaibigan ko noong high school na matagal naglagi sa London. Nabanggit ko sa kanya na may apo akong dalaga at eksakto naman na may apo siyang binata na hinahanapan niya ng mapapangasawa. Justine, bagay na bagay sa iyo ang apo niya. Guwapo, matalino at may magandang negosyo. Thirty-two pa lang siya pero marami nang achievements,” may himig ng kilig sa boses nito.
"Lola, kung guwapo ang isang lalaki at may magandang negosyo imposibleng walang girlfriend iyan,” naghihinala niyang sabi.
"Wala nga dahil pihikan siya. Masyadong liberated ang mga babaeng nakakasalamuha daw niya. Gusto niya ng mahinhin, galing sa magandang pamilya, di magaslaw at tiyak na di pera lang ang habol sa kanya at magiging mabuting maybahay. Ikaw na iyon, Justine. Kaya dapat mapaghandaan ang dinner next week. Ikaw ang magluluto para ma-impress sila."
“Yes, Lola. I really have to go. I love you. Tatawag na lang po kami pagbalik namin sa resort."
Natahimik siya at naisip ang irereto dito ng lola niya. Kinakabahan siya na baka di lang simpleng reto iyon. Oras na matipuhan ng lola niya ang apo ng kaibigan nito ay baka ipagkasundo na silang ikasal. Noon pa iyon sinasabi ng lola niya pero tatango-tango lang siya bilang masunuring apo. Kung mangyayari iyon ay baka bilang na ang masasayang araw niya. Parang mahirap yatang isipin na maikakasal siya sa lalaking di niya kilala o maaring di rin niya tipo o mahal.
"Anong sabi ni Lola Concha? Binulabog na ba niya ang buong pwersa ng militar ng Pilipinas sa pag-aalala sa iyo?" tanong ni Yngrid nang bumalik siya sa tabi nito at nakipili ng souvenir T-shirt. Walang lugi sa kanila ang mga tindahan ng souvenir at pasalubong. Lahat kasi ay binibilhan nila. Kung pwede nga lang ay iuwi na niya ang buong Camiguin ay gagawin niya sa sobrang pagkagusto niya sa lugar na iyon.
"Muntik na. Buti na lang nagka-signal at nasagot ko ang tawag ni Lola kundi tatawagan na daw niya ang PNP Chief,” aniya at itinirik ang mata.
"Ibang klase talaga. Kahit ang PNP Chief uutusan ng lola mo para proteteksiyunan ka,” sabi ni Dreamilyn. “Daig pa niya ang tatlong tiyahin ko sa higpit.”
“Don’t mention it. Gusto ko na lang mag-enjoy ngayon at huwag na nating pag-usapan si Lola.” Natanaw niya ang guide nila sa harap ng souvenir shop. “Nasa labas na ang guide natin. Let’s go. Excited na akong mag-hot spring."
Baka sakaling makatulong ang pagbababad sa mainit na tubig para mawala ang tensiyong naramdaman niya. Dati naman ay okay lang sa kanya na um-oo at tanggapin ang lahat ng sinasabi ng lola niya. Parang robot siya na sunod lang nang sunod sa utos.
Gusto niyang sabihin sa mga kaibigan niya ang alalahanin niya pero ayaw naman niyang masira ang masayang bakasyon nila dahil sa lang sa lola niya. Gusto na lang niyang kalimutan. Ilang oras na lang ang natitira sa kanya para magpakasaya nang di nakatali ang pakpak niya. Sasamantalahin na niya.
"May makita na kaya tayong hunk dito?" tanong niya nang pumasok sila sa resort at inikot agad ang tingin sa paligid.
"Sana nandito si Kenji Matsunaga para may sasagip ulit sa akin kapag nalunod ako," sabi ni Yngrid at niyakap ang sarili. "Kenji, oh, Kenji. Nais ko ulit maramdaman ang mga bisig mo sa akin.”
Sa Bahay Bakasyunan sa Camiguin tumutuloy ang sikat na model na si Kenji Matsunaga na crush ni Yngrid. Ito rin ang hero ni Yngrid na nagpakalunod para lang masagip at mayakap ni Kenji Matsunaga.
"Effective pa ba ang pagpapalunod sa iyo?" tanong niya dito.
"Bakit di mo subukan para malaman mo?" hamon nito sa kanya. "Ako pa ang
magtutulak sa iyo."
"Saka na. Wala pa naman akong ma-sight na guwapo at hunk,” nakangiti niyang sabi.
Ano kaya ang pakiramdam ng yakapin ng isang guwapo at matipunong lalaki? Ang pumaloob sa bisig nito? Gusto rin niyang maranasan iyon bago man lang siya maikasal sa lalaking di naman niya kilala o gusto.
Ayaw niyang umasa sa sinumang irereto ng lola niya. What she wanted was a vacation fling. Isang lalaki na magpapakilig sa kanya kahit sandali lang. Oras na makita niya ang pinakaguwapo at matipunong lalaki sa hot spring resort na iyon ay ibibigay niya ang numero niya dito. Who knows? Baka yayain pa niya itong mag-dinner.
She just wanted to do something drastic and wild. It was not as drastic and wild as kissing a stranger but it would do. Gagawin niya iyon para may maganda siyang alaala na minsan sa buhay niya ay gumawa siya ng isang bagay na ginusto niya. Na di siya sunud-sunuran sa lola niya. Hindi naman siguro siya mapapahamak sa simpleng challenge na iyon sa sarili niya. It would be exciting yet safe.