"Hoy!" Halos mapasubsob ako nang may isang lalaking nagpatong ng braso niya sa balikat ko. hindi ko inaasahan na si Joeros lang pala. "Sabay na tayo pumasok," aniya at nginisihan ko lang siya. "Mukhang bad mood tayo ngayon ah,"
"Sumabay ka na lang sa paglalakad, dami pang sabi, e," sambit ko at pinagkrus ang braso.
"Sungit mo 'te, alam mo ba iyon?" aniya habang nakatitig sa akin.
"Tantanan," sambit ko at narinig ko ang pagsinghpa niya ng hangin. "Jei!" napansin ko si Jei, 'di kalayuan sa amin kaya't tinawag ko siya.
Kumaway siya sa akin at kaagad akong tumakbo para makatakas kay Joeros. Iinisin lang niya ako kayaas mabuti pang sumabay na lang sa kaibigan ko.
"Sino 'yong kasabay mo?" aniya habang nakakunot ang noo at sa tingin ko ay kinikilala niya 'yong lalaki. "Si Joeros ba iyon?" tanong niya at tumango ako habang nakataas ang isang kilay. "Huwag mo na lang pansinin, mahilig talaga iyan mang-asar lalo na't sa mga babae," aniya.
"May chika pala ako," sabi ko at ngumiti nang matindi. "Hindi ba kahapon lumipat na ako, e sakto nagsialisan 'yong mga kasama ko sa dorm. N'ong naglinis na ako, e bangkalat talaga ng room. Isipin mo, underwear nila nasa loob ng refrigerator," kwento ko at gumusot ang kaniyang mukha.
"Sa ayos ng mukha n'ong mga iyon? Gan'on pala kadugyot?" aniya at tumawa na lang. "Hayaan mo na't ang mahalaga ay nandoon ka na, ikaw ang magsisilbi nilang yaya,"
"Yaya talaga? Kung alam ko lang na gan'on ang gagawin ko e 'di sana naghanap na lang ako ng trabaho, magkakapera pa ako," sambit ko.
"Puwede mo naman silang hingian ng pera, e. Namimigay din, lalo na iyong si Joeros, may pagkauto-uto rin kasi," aniya at itinaas nang paulit-ulit ang kaniyang kilay.
"Talaga ba? Gagi, mauto nga minsan," sambit ko at tumawa. "Tara na nga, baka ma-late pa tayo," pagyaya ko.
Tatlong subject ang mayroon ako ngayong araw at hanggang alas singko ng hapon iyon kaya tinapos ko lang. Sayang at hindi kami magkakasama ni Jei dahil sa mas maaga siyang umuwi sa akin.
Pagkabukas ko ng pinto ay nakita ko silang apat, nakasalampak sa sofa, nanonood ng t.v.
"Bakit ngayon ka lang?" tanong ni Joeros sa akin, himala seryoso siya ngayon ha. 'Yong hitsura niya, mukha talagang seryoso.
"Nag-aral ako malamang, estudyante rin ako," sagot ko at inilapag ang gamit ko sa kwarto ni Marvin.
Pagkatingin ko sa kanila ulit ay gulat na nakatingin ang dalawa, si Christian at Lawrence. Samantalang si Marvin at blangko lamang ang tingin sa akin pati si Joeros.
"Diyan ka natulog kagabi?" gulat na tanong ni Rens. Tumango naman ako bilang sang-ayon. "Akala ko dito ka sa sofa natulog..." aniya, pahina nang pahina ang boses.
"Dito nga sana ako matutulog kasi apat lang ang kwarto kaso sabi ni Marvin, doon na lang daw ako sa kwarto niya. Maluwag daw kasi doon," napakurap nang ilang beses ang dalawa at biglaang tumayo si Joeros.
"Puwede ka namang matulog sa guest room, akala ko ba naglinis ka? Bakit hindi mo alam na may guest room?" tanong niya at pumunta sa kusina.
"Joe, baliw ka ba? Ginawa na nating bodega iyon. Siya na nga naglinis nitong buong dorm, pati ba naman iyon?" Ani Christian at narinig kong humagikhik si Joeros.
"Oo nga pala," aniya at uminom ng tubig.
"Hindi ko aakalaing malaki ang dorm dito at hindi na rin ako magtataka kung bakit halos kapresyo ng tuition ang bayad dito," ngumiti ako nang sarkastiko at pumunta sa kusina para kumain ng tinapay.
"Hindi ko alam na may klase ka pala ng alas singko, e 'di sana hinintay kita para may kasama ka. Delikado sa labas," Ani Joeros sa akin habang kumukuha ako ng palaman at tinapay.
"Malay ko ba saka bad trip ako sa'yo kanina 'di ba. Hilig mo lang naman ay ang mang-asar, 'di ko alam na may caring side ka pala," sagot ko habang nagpapalaman.
"Aba syempre naman, anong akala mo sa akin? walang pakialam, gan'on?" tanong niya at ngumiti ako nang tipid at tumango. "ay grabe, nakaka-offend iyon ha," aniya at kunwari nasaktan talaga.
"tigilan mo nga iyang drama mo," sambit ko at kumagat sa tinapay.
"Gusto mo ipakilala ko sa'yo kaming lahat dito? Kung ano kami at ano ang ugali namin?" suhestiyon niya at tumitig lang ako dahil hindi ko naman alam ang isasagot ko. "Si Lawrence, masipag mag-aral pero mas masipag mag-ML. Si Marvin, siya ang pinakamayaman sa aming apat, masipag naman siya mag-aral kaso mas trip niya makipagsapakan. Si Christian naman, medyo baklain," aniya at ngumiti.
"Hindi pa ako pumapayag sa suhestiyon mo pero sinabi mo na," sambit ko at tumawa nang kaunti. "Paano mo nasabing baklain si Christian, e mukha naman siyang makisig?" tanong ko.
"Isang beses kasi nakita ko siya nakikipagkilitian sa tropa niyang lalaki sa corridor ng building ng department nila," aniya at tumawa nang malakas.
"Ngi, ang bilis mo naman mag-jump into conclusions. Napaka-judgmental mo sa lagay na iyan ha," tugon ko.
"Hindi gagi, medyo malambot siya at maarte,"
"Mayayaman kayong lahat dito kaya normal lang iyon lalo na kung hindi talaga kayo lumaki na makahawak man lang ng alikabok," sabi ko at tumayo na. "Tapos na ako kumain, ikaw?"
"Kumain ba ako?" aniya at tumayo rin.
"Oo nga pala," napakamot ako sa tuktok ng ulo ko at halos masubsob na naman ako nang bigla niya iyong kamutin habang naglalakad kami. "Ang bigat ng kamay mo, ano ba?" reklamo ko habang tinatanggal ang kamay sa ulo ko.
Naupo ako sa sahig para makinood sa pinapanood nila. Nagulat ako nang sabay-sabay silang nagsitayuan at inilapag ang unan sa sofa. Naupo rin sila sa tabi ko na siyang talagang ikinagulat ko.
"Bakit kayo naupo sa sahig?" tanong ko habang tatawa-tawa.
"Kapag sinabihan ka ba namin na tumabi ka sa amin sa sofa, papayag ka? Syempre hindi 'di ba, sasabihin mo 'hindi huwag na, nakakahiya'," sagot sa akin ni Lawrence at tumawa.
"Tigilan niyo nga pagiging gentleman niyo diyan kay Lauren, basta ako, dito ako sa sofa," ani Joeros at sumalampak sa sofa, nakapatong pa ang ulo sa palad.
Hinampas ni Christian ang balakang niya at tumawa. "Kahit kailan, hilig mong mang-asar ano?" aniya at tumango naman si Joeros. "Ilan nga 'yong inasar mo na na-fall sa'yo?"
"Marami, 'di mabilang sa daliri," sagot niya pero pakiramdam ko ay nagiging hambog siya. Napataas na lang 'yong gilid ng labi ko.
"Ahh, sige," Ani Christian.
Nanood na lang kaming lima sa t.v. at pagtapos ay ginawa na namin ang kani-kaniya naming gagawin.
:)