“S-Sir Dominic, sinira niya ang buhay ko. Sinira niya ang pangalan ko. Kung anu-anong paninirang puri ang isinulat niya sa akin. Hindi na ito tama,” tungayaw ng kapwa writer ni Jermaine na si Novah o mas kilala bilang Bliss Azul.
Humagis sa harapan ni Jermaine ang bagong labas niyang nobela at nakataas ang kilay na sinundan iyon ng tingin nang damputin ng publisher niyang si Dominic. Nasa loob siya ng publisher’s office kasama ang editor niyang si Estella at ang co-writer niyang si Novah na namumula sa galit.
Puno ng tensiyon ang paligid pagpasok pa lang niya ng Beautiful Life Press kanina kung saan siya nagtatrabaho bilang romance novelist.. Hindi niya alam kung bakit siya ipinatawag sa opisina. Wala pa siya halos tulog mula sa pagsusulat nang matanggap ng tawag mula sa publisher niya para sa isang emergency meeting. Lutang na lutang pa siya. Asang-asa pa mandin siya na bonus iyon o kaya ay book signing na may kasamang libreng tour sa ibang lugar. Those small perks were heaven for her.
Anim na taon na siyang romance novelist at nakapagpa-publish na ng halos isandaang nobela. Hindi ganoon kalaki ang kinikita niya isama pa ang pressure na kailangang laging magsulat ng magaganda at bagong kwento para makapasa sa editor. Pero malaking bagay na sa kanya na di niya kailangang laging sumabak sa traffic para magtrabaho, kahit anong oras pwede siyang magtrabaho, mag-break time o magbakasyon, at may followers siya na napapasaya.
Wala siyang problema sa mga katrabaho maliban sa co-writer na si Novah. Nang makita niya si Novah sa opisina, she already smelled trouble. At nang makita niya ang bago niyang libro sa kamay nito, alam niyang kailangan na niyang ihanda ang sarili niya para sa isang matinding laban.
Binuklat ni Dominic ang libro at nakitingin din sa libro si Estella. “Paano mo naman nasabing sinisiraan ka ni Jermaine, Novah?”
“Look! Pinalabas niya sa nobelang iyan na ang kontrabida niyang si Lyra ay isang plagiarist. N-Na wala siyang ginawa kundi mangopya ng gawa ng ibang writers at magpa-victim kapag nahuli,” anitong nagsimula nang mangilid ang luha. “A-Alam ko na ako ang tinutukoy niya sa nobelang iyan. Ako ‘yan.”
Iniikot ni Jermaine ang mga mata habang pinagmamasdan ang pagtulo ng luha ng babae. Ever the drama queen. Pa-victim amf!
Unang pagpasok pa lang nito sa Beautfiul Life ay nagkabangga na silang dalawa. Sa unang nobela pa lang kasi nito ay nakatanggap na siya ng reklamo mula sa mga readers niya na ginaya nito ang mga characters, eksena at kwento mula sa ibang nobela niya at ng kaibigang writer. When confronted about it, pinalabas nitong inaapi niya ito at inaakusahan ng mali. Na ginagamit daw niya ang pangalan nito para kumuha ng atensiyon ng iba. Di pa man ito sikat ay nagmamalaki na ito. As if she needed her sorry name to be famous.
Matagal nang established ang pangalan niya sa larangan ng pagsusulat bago pa man ito dumating. She worked hard for her name. She worked hard to get her readers’ adoration. Matindi ang pagmamahal ng mga ito sa naisulat niya na ni-research at pinag-isipan niya. Kaya naman matindi ang pagdepensa ng mga readers kung may gagaya man ng mga gawa niya.
Kilala siya na hindi nagpapaapi lalo na’t napatunayan niyang may mga ginaya nga sa mga nobela niya. Nainis siya na huling-huli na nga ito sa panggagaya ay ayaw pa nitong tanggapin ang pagkakamali. She was even justifying it. Sa huli ay ito pa ang lumabas na kaawa-awa sa marami at siya na ginayahan ng sulat ang masama. Mapang-api daw siya sa baguhan dahil gusto niyang siya lang ang sikat.
What a cruel world. Siya na nga ang natapakan, siya pa ang masama sa huli. Pinamahala na niya sa publication ang naturang problema. Nagtimpi siya kahit na ang mga sumunod nitong istorya ay kahawig pa rin ng sa kanya. Kaysa magpaapekto sa problema ay ibinuhos na lang niya sa nobela ang naturang pangyayari sa buhay niya bilang therapy. Doon man lang makabawi siya dito. Good vibes na siya sa pagbawi dito, nagkapera pa siya.
“Uhmmm… excuse me? You are not Lyra. Ikaw ba si Lyra?” nakataas ang kilay na tanong ni Jermaine at prente lang sa pagkakaupo.
“S-Siyempre iniba mo lang ang pangalan pero ako ang pinatatamaan mo.” Binayo nito ang mesa. “Alam kong ako iyan! M-Masama na ang tingin sa akin ng mga tao dahil diyan.”
Matagal nang masama ang tingin ng ibang mga readers dito. Even some of their colleagues lost their respect for her. Some didn’t even get to respect her to start with because she had this attitude. Baguhan pa lang ito ay hindi na ito marunong makisama sa ibang mga writer. At kahit pa sabihin nito na hindi ito nangopya sa kanya, mga readers na ang humusga dito. They knew her novels by heart. Hindi mabubura ng kahit anong palusot ang verdict dito. Nangopya talaga ito. Nakakatawa lang na sinalo nito pati ang isang fictional character.
“Paanong naging ikaw? It is just a fiction,” giit niya at nagkibit-balikat. “Basahin mo nga ang disclaimer. Kung may nahahawig man na pangyayari o pangalan sa totoong buhay ay hindi iyon sinasadya. Kinailangan lang iyan sa istorya.”
Saka siya ngumisi dito. Kaya huwag mo namang saluhin lahat, Novah. Baka isipin ng mga tao dito, guilty ka talaga sa pagkopya sa kwento ko. Huwag ka naman masyadong magpahalata.
Noong una naiinis siya sa dahil lahat na lang ay ginagawa nitong big deal. Pero ngayon ay nag-e-enjoy siya. Akala kasi nito ay mabibitag siya nito. Pero bilang writer, alam niya kung paano hahayaan ang kalaban na ubusin ang sarili nitong lakas para sarili mismo nito ang masilo nito. She just needed to play her game a bit.
Matiim siyang tinitigan ni Novah. “K-Kundi mo ako pinatatamaan, s-sana hindi iyan ang isinulat mo.”
Tumaas ang kilay niya at tumingin kina Dominic at Estella. “Sir, Ma’am, nagtatrabaho lang ako dito. As far as I know, tumatanggap kayo ng mga nobela na papasa sa standard ninyo basta walang loopholes. So ano po ang karapatan ni Miss Bliss Azul para utusan ako kung anong dapat kong isulat at hindi? Matagal na ako sa industriyang ito. I know what I am doing.”
Higit sa lahat ay original ang gawa niya. Gusto sana niyang isigaw iyon sa mukha ni Novah pero nagtimpi lang siya. Sumusobra na ang isang ito. Wala ito sa lugar para turuan siya kung paano niya gagawin ang trabaho niya.
Keep your cool. Pasaan ba’t lalabas din ang tunay na kulay ng babaeng iyan. Kinakampihan lang siya ng mga boss dahil mabait at di makabasag-pinggan.
“As a matter of fact, my readers love that story. It is one of my best,” Jermaine added with confidence.
Iyon nga lang ay galit na galit ang mga ito sa kontrabidang si Lyra. Hindi na niya kasalanan kung si Novah agad ang pumasok sa isip ng mga ito na kontrabida. Basta nagsusulat lang siya.