Tuluyang bumigay ang pinto ng tadyakan ni Father Ben. Mabilis na pumasok ang dalawa upang hanapin ang mag-ina. Sabay silang napatingala sa hagdan ng makitang naroon si Alice. Gumagapang ito pababa sa baitang ng hagdan habang tumutulo ang malapot na laway. Malawak ang pagkakangiti nito habang marahang gumagapang pababa.
"Ka Ipeng!" sambit nito na para bang nakakaloko. Akmang lalapit pa ito nang mapansin ang pari. Marahas itong tumingin kay Father Ben at sumingasing sa labis na galit.
"Hindi ka magtatagumpay! Hindi!" sigaw nito sa pari bago mabilis na umatras. Para itong gagambang gumagapang paatras sa hagdan. Napakabilis ng kilos nito. Mabilis silang umakyat upang sundan ang diablo. Sa taas ay naabutan nila si Alicia na namimilipit sa sakit. Ang bata naman ay mabilis na nakarating sa dulong kwarto. Binuksan nito ang pinto at pabalibag na isinara. Nakita ni Father Ben ang lahat at maging ito'y hindi makapaniwala. Nagkalat ang mga gamit na tila nadaanan ng ipo-ipo ang bahay. Ngayon ay kumbinsido na siyang sinasapian nga si Alice.
"Alicia!" sambit ni Ka Ipeng at tinulungang makatayo ang babae. Napapangiwi ito sa sakit ngunit pinilit niyang makatayo.
"Father!" kumapit ang babae kay father Ben habang luhaan ang mga mata. "Tulungan mo ako, Father! Iligtas mo ang anak ko mula sa diablo!" humahagulgol na sambit nito. Halos lumuhod ito sa harap ng pari na maagap naman siyang inalalayan para tumayo.
"Alicia, ipapaalam ko kaagad ito sa arsobispo para maisagawa agad ang eksorsismo. Ipinapangako kong mababawi natin ang anak mo," tugon ng pari na ikinailing ng ginang.
"Father, ang anak ko! Hindi na makapaghihintay pa ng bukas! Tulungan mo kami, Father!" pakiusap ng babae. Nagsusumamo ito habang ang pari ay hindi malaman ang gagawin.
"Kailangan nating dumaan sa tamang proseso, Alicia. Hindi maaari ang gusto mong mangyari," giit muli ng pari. Nanghihinang napadausdos na lamang ng upo si Alicia habang umiiyak. Mabilis naman itong inalalayan ng pari habang si Ka Ipeng ay mabilis na bumaba sa kusina upang kumuha ng tubig.
Sa silid na niya nadatnan ang dalawa habang nakaupo sa kama si Alicia. Inabot niya rito ang isang basong tubig para makainom bago niya inalalayang mahiga. Nanghina na ang babae sa labis nitong pag-iyak at panginginig dala ng takot.
Hinarap naman ni Ka Ipeng ang pari at pinakiusapan. "Father–" kaagad na pinutol ng pari ang sasabihin niya.
"Ka Ipeng, aalis muna ako upang humingi ng pahintulot sa arsobispo. Isa pa'y kailan lang ako naordinahan bilang kura paroko ng bayang ito. Hindi ako pahihintulutan ng arsobispo upang magsagawa ng eksorsismo ngunit sinisigurado kong mahusay at mas may kaalaman ang ipapadala niya rito." Mahabang paliwanag ng pari. Hindi na napigil ni Ka Ipeng ang maluha. Lumapit siya sa pari at hinawakan ito sa kamay bago impit na napaiyak.
"Nakikiusap ako, Father, tulungan mo si Alice. Kapag napahamak siya–kapag namatay siya ay parang namatayan muli ako ng anak sa ikalawang pagkakataon!" humahagulgol na wika nito.
"Ka Ipeng–"
"Father, kritikal na ang kalagayan ng bata. Alam kong sa ganitong pagkakataon lalo't emergency ay pahihintulutan na kayo ng simbahan."
Isang malakas na kalabog ang narinig nila mula sa silid ni Alice. Napabalikwas ng bangon si Alicia ngunit agad ring napahiga ng makaramdam ng labis na kirot sa balikat.
Sila Ka Ipeng at Father Ben ay patakbong tinungo ang pinanggalingan ng pagkalabog. Patuloy ang ingay kaya naman nasundan nila ito. Mabilis na binuksan ni Father Ben ang pinto at bumungad sa kanya si Alice. Nakaupo ito sa lapag habang inuuntog ang sarili sa pader. Agad itong dinaluhan ni Ka Ipeng ngunit marahas siyang hinawi ng bata.
"Sinabi ko nang huwag kang makialam!" singhal nito habang nanlilisik ang matang nakatingin sa matanda. "Dahil pakialamero ka ay papatayin ko na ang batang ito!"
"Alice! Lumaban ka!" sigaw ng matanda habang pinipilit na tumayo mula sa pagkakasadsad sa sahig.
"Inuutusan kita demonyo! Lubayan mo ang batang iyan sa ngalan ng Diyos!" sigaw ni Father Ben ngunit humalakhak lamang ang bata.
"Hindi mo ako mapapaalis! Mamamatay muna ang batang ito!" sigaw ng diablo. Tumayo ang bata at sumandal sa pader. Gumapang ito roon na tila ba gagambang umaakyat patungo sa kisame! Ngunit nakaharap sa kanila.
"Sa ngalan ng Diyos Ama! Anak at Espiritu santo! Umalis ka sa katawan ng batang 'yan!" Inilabas ng pari mula sa bulsa nito ang dalang rosaryo at itinutok sa bata.
"Hindi! Hindi mo ako mapapaalis!" sigaw ng bata. Nasa kisame na ito at bumuwelo para lumundag patungo sa direksyon ng pari. Sabay silang natumba sa sahig. Nagpambuno silang dalawa ngunit nasa ilalim ang pari. Hawak ng bata ang braso niyang may hawak na rosaryo at pilit itong pinipigilan upang hindi magamit sa kanya.
Pinilit ni Ka Ipeng na tumayo at nagdasal sa wikang latin. Ang orasyong inaral niya para sa pagpapaalis ng sapi. Lumapit ito sa bata na ngayon ay nanggigigil na nakatingin din sa kanya.
"Sinabing huwag kang makialam! Kung hindi ay isang bata na naman ang mamamatay ng dahil sa 'yo!" singhal nito na nagpatigil sa kanya. Sinamantala iyon ni father Ben. Mabilis siyang kumilos upang magkapalit sila ng p'westo.
"Ka Ipeng, kunin mo 'yong bag ko sa silid ni Alicia!" utos nito sa matanda habang pigil sa kamay ang nagwawalang bata.
"Father, ito na!" sambit ni Alicia na kapapasok lamang sa silid habang iniaabot ang bag. Kanina ay nakita nito sa silid niya ang bag ng pari kaya pinilit niyang lumabas kahit sumasakit ang buong katawan niya.
"Iyong bibliya, Alicia, pakiabot sa akin!" Agad namang binuksan ni Alicia ang bag at iniabot sa pari ang kailangan nito.
"Father, tulungan mo ako!" lumambot ang mukha ng bata at nagsimula itong umiyak. Nagsusumamo ang mga mata nito habang nakatitig sa pari.
"Hindi mo ako malilinlang, diablo!" mariing wika niya. Unti-unting sumilay ang ngiti sa mga labi ng bata hanggang sa tuluyang humalakhak.
"Wala ka nang magagawa! Akin na ang batang ito! Hindi mo ako mapapaalis! Mamamatay na muna ang bata bago mo ako mapaalis sa katawang ito!" Nagsimulang muling magwala ang bata. Tumulong na rin si Ka Ipeng upang mapigilan ang pagwawala nito ngunit sadyang napakalakas ng pwersang nagmumula sa bata.
"Maghanap ka ng matibay na pantali, Alicia!" muling utos ng pari. Kailangang maigapos ang bata sa kama upang maisagawa na niya ang pagpapalayas ng diablo.
"Ah!" sigaw ng bata habang pilit itong nanlalaban. Ginagamit na rin nito ang ngipin upang gawing panlaban sa pari. Pilit nitong inaabot ang kamay ng pari upang kagatin ngunit pinipigilan naman ni Ka Ipeng.
Bumalik si Alicia na may dalang tali at may kasamang mga kapitbahay na nakiusyoso na rin dahil sa narinig na ingay.
Tinulungan ng mga ito ang pari at si Ka Ipeng upang magawang maitali ang bata. Nagwawala ito at sumisigaw. Nangangalmot kapag nakakawala ang mga kamay nito mula sa pagkakahawak ng mga tao. Kahit ang sarili nito'y kinakalmot rin nito.
Si Alicia ay umiiyak at halos hindi magawang tignan ang kalagayan ng anak. Nagtagumpay silang maigapos ang mga kamay at paa ng bata habang nakahiga sa kama. Pilit nito iyong tinatanggal habang nagmumura sa labis na galit.
"Alice anak lumaban ka!" hiyaw ni Alicia. Humahagulgol ito habang pinakakalma naman ng ilang kapitbahay.
"Mama, m-mahal k-kita!" sambit ng bata. Umiiyak ito ngunit saglit lang ay muli itong tumawa ng malakas.
"Mahal kita, Alice! Patawarin mo ako sa nagawa ko sayo. Nabulag ako pero minahal kita, Alice. Lumaban ka. Ayaw ko nang mawalan muli ng anak!" humahagulgol na sambit ni Alicia.
"Lumaban ka Alice! Sinabi mo sa akin na lalaban ka!" sambit naman ni Ka Ipeng habang luhaan din ang mga mata. Habang nakikita niya ang bata ay muling bumabalik sa alaala niya ang mga nangyari sa anak na si Cindy.
Para siyang ibinalik sa kahapon noong nakikipaglaban siya sa diablong si Lilith. Subalit ngayon ang may kasama na siya na isang lingkod ng Diyos.