Chapter 9
Trixie POV
Dumating tanghali. Talaga namang nakakabagot kapag unang araw nang pasukan. Mas lalo pa akong nawalan nang gana dahil iniisip ko sila Andrie Scott , Jason Guivarra at AJ sa AIS. Kapag ganito ay hindi muna kami pumapasok, sikretong gumagala at tumatambay kaming apat, sa lugar na kami lang ang estudyanteng naroroon.
"Uy, nilalangaw na pagkain mo, ubusin mo na" aniya ni Raja. "Iniisip mo sila?"
Napatingin sa akin sila Acyl na ngumunguya at si Jae na sumubo pa lang. Hindi ako diretsong makatingin sa kanila.
"Ang bigat kasi sa pakiramdam na iniisip nilang wala na ako, pero ang totoo tumakas lang ako"
"Alam niyo ba na pakiramdam ko ngayon ay basta ko na lang silang iniwan?" dagdag ko.
Natigilan sila.
"Trixie…" Jae
Nagbuntong-hininga ako. "Nami-miss ko lang naman sila. Gusto ko nang sabihin na 'andito ako, hindi ko sila iniwan. Lalo na si AJ…"
Ramdam kong nagtinginan silang tatlo. Marahil ay nauunawaan naman nila ako sa sitwasyon ko.
"Nagbago si AJ para sa 'kin. Ginawa niya ang lahat para mapatunayan lang ang sarili niya. Sila Andrie Scott at Jason Guivarra na naglakas ng loob na kaibiganin ako. Ano ba kasi ang mayroon kay Ara? Sino ba talaga kayo? May koneksyon ba kayo sa kanya?"
Sa halip na sagutin ako ang nagtinginan muli silang tatlo. Lagi na lang kapag pangalan ni Ara ang lumalabas sa bibig ko.
"Lagi na lang ganyan ang reaksyon niyo. Magtitinginan at mananahimik. Palagay ko hindi ko na kailangang sabihin ang tungkol sa buhay ko sa AIS, dahil mukhang alam niyo naman. Pero 'wag niyo naman sanang iwasan ang tanong ko kapag tungkol kay Ara" litanya ko at isa-isa silang tinapunan ng tingin.
"Wag kang mag-alala sa mga kaibigan mo. May isa sa kanilang alam kung nasaan ka. Ihanda mo na lang ang sarili mong sabihin sa iba, palagay ko maiintindihan ka rin naman nila, tama?" ani Raja.
Kumunot ang noo ko sa sinabi niya. Tumitig ako rito nang puno ng pagtataka.
"M-May nakaalam ng totoong nangyare sa 'kin!? S-sino!?"
" Jason Guivarra " matapos niyang sabihin iyon ay bumalik siya sa pagkain.
"J-Jason Guivarra? Bakit? P-pano-"
"Kaibigan mo pala ang mokong na 'yun" tumayo ito bitbit ang isang baso.
"Ex ko" umalis ito at tumungo sa counter.
"Ex ni Raja si Jason Guivarra !!?-" Malakas kong sabi, dahilan para takpan ni Jae ang bibig ko.
"Trixie, hinaan mo boses mo!" Acyl
"Shhh" Jae. Inalis na nito pagkakatakip ng kamay niya sa bibig ko.
"Bakit? Bawal ba malaman dito? May makakaaway ba siya?"
"Hindi naman. Sikat ang mga taga AIS, once na malaman nila 'yan paniguradong dudumugin si Raja. Ayaw niya ng maraming tanong sa mga taong hindi naman niya ka close. Tamad 'yan magsalita" Ani Acyl. "Since sinabi na niya ang about kay Jason Guivarra , sa dorm mo na siya tanungin about sa iba pang details. Si Jae muna magkukwento"
Saktong bumalik na si Raja sa table namin, may dala itong pitsel ng tubig.
"Ako… Ano…" Panimula ni Jae. "Dati akong AIS, hindi mo siguro ako matandaan, ikaw din naman hindi ko matandaan, hehe. Maraming sections kasi 'dun. Nahuli ko kasi si Ara na pumasok sa faculty room, kakatapos pang rin ng exams 'nun. Syempre faculty kaya sumilip ako kung ano ang ginagawa niya pero hindi ko makita masyado. Hanggang sa pagbukas niya ng pinto ay nakita niya ako. Pagkatapos ipinasa niya sa 'kin ang ginawa niya. Tinangka ko raw pumasok sa faculty para palitan ang sagot sa test papers ko. Siya mismo ang nagdala sa 'kin sa office ng dean, at ako naman ay walang kaalam-alam. Actually hindi ko naman siya kaklase, pero simula 'nun binantaan niya ako. Ginawa niya rin akong sunod-sunuran sa mga utos niya. Kaya umalis na lang ako sa AIS. Sayang lang rin ang awards ko 'dun, nadungisan dahil sa kanya"
"Seryoso!? Ano ba ang problema niya at ganyan siya!? Eh, ikaw Acyl?"
"Nasiraan niya ako sa ex ko. Ang galing nga niya, masyadong magaling pagdating sa salita. Lifetime topak na niya 'yun. Nagtransfer lang ako dito ng nag-away kami sa labas ng school. Nalaman ng dean, syempre kampi sa kanya, kaya imbis na ako ang mapaalis, ako ang kusang umalis. Normal na ata sa kanya ang may ganoong saltik"
"Waa, nakakahighblood talaga ang babaeng 'yan. Isumbong na kaya natin s'ya. Maghanap tayo ng ebidenysa laban sa kanya! Nakakairita, kalbuhin ko siya eh! Akala mo kung sinong magaling, kapit lang naman sa taas" Litanya ko.
"Sa dorm na tayo mag-usap niyan. Magta-time na, balik na tayo sa classroom" ani Raja.
Madali naming inubos ang pagkain at pumasok na lang sa room. Ganoon pa rin naman at walang pagbabago ang ingay at gulo ng estudyante. Paupo pa lang ako ng seat ng pumasok bigla si adviser namin, ang teacher kaninang umaga. Mayroon na itong name tag, Jem ang pangalan.
"Guys, sinabihan kami na kailangan na raw nating mag-elect ng class officers. Tapos na kasi sa ibang rooms. Madalian lang kasi may gagawin pa ako"
Gaya nga ng sinabi ay madali lang iyong natapos. Halos hindi naman nagbago ang officers dahil kung ano ang nakaraang officers nila rito ay iyon na lang ang napagkasunduang ilatag. Hindi naman big deal sa mga aming lahat iyon, basta responsable ang officers na mga iyon. Si Jae ay secretary, si Acyl ay vice president at si Raja ay Buss. Manager. Si Lucas pala ang Escort nila at si Nika ang muse. Awtomatikong ang mga officers na iyon ay magiging representatives sa school government.
"My ghad! Pageant na naman. Lucas ikaw na ang bahala sa 'kin. Dating gawi na lang tayo" Ani Nika.
"Sige. Gawa na akong steps in advance" ibinigay nito ang ballpen na nahulog ni Niki.
Nag-high five silang dalawa. Mukhang close na close sila. Siguro ay sanay na silang dalawa sa ganoon. Sila siguro ang palaging magkatambal sa pageant dito. Maganda si Niki, kaso ang kalat mesa niya. Kung titignan ay hindi ito pala linis ng gamit niya.
"Oy, makatingin kay Lucas ah. Matunaw 'yan" tinapik ako ni Raja. "Gusto mo ba malaman ang mga…bagay bagay tungkol sa kanya?"
"Huh? A-anong sinasabi mo?"
"Tsk tsk tsk asus, marami na kayong ganyan. Ideal boyfriend 'yan ng nakararami. Mabait, matalino, may itsura, may talents. Maging kaibigan ka lang 'nya swerte ka na, ma effort 'yan." Sinamaan ko siya ng tingin. Sa halip na tumigil ay tinawanan lang ako. "Nakakatakot ka palang tumingin. Hindi uubra sa 'kin 'yan dahil ganyan din kapatid ko"
"Ha?"
"Hakdog Trixie. Iba ang galawan ng mata mo 'wag kang ano"
"Anong galawan ba sinasabi mo? May itsura 'sya, eh ano naman ngayon?" Pinalo ko siya sa braso.
"Aray ko naman! Sakit ah! Naku, mga ganyan marupok 'yan. Marupok 'to"
"Manahimik ka nga!"
Oo na gwapo siya. Ano naman ngayon? Natural naman sa babae ang ga'nun!
"Raja" lumapit si Lucas sa amin. Sinulyapan ko si Raja, ayun at pinipigilang matawa.
"Oh?"
"Ah, ikaw na lang" nilingon niya ako. "Ikaw na lang ang sumama sa 'kin ngayon sa music studio. Baka magkainteres kang sumali sa club" nakangiti niyang sabi habang nakatingin sa akin.
"H-Ha? H-hindi kasi ano-"
"Sige na Trixie, guitarist si Raja 'dun. Ako naman eh walang interes sa mga ganyan. Extra points 'yan" aniya ni Acyl.
Palibhasa ay wala itong alam sa mga pinagsasabi ni Raja sa akin. Sinulyapan ko siya muli. Nakatingin na ito sa bintana, alam kong natatawa na ito ngayon.
"Tara na" pagyaya sa akin ni Lucas. Nauna itong lumabas kaya sumunod na lang ako.
Hindi naman kalayuan ang music studio mula sa room. Nauna siya pumasok roon. Pero saglit akong napatigil ng makita amg karatula sa kabilang room.
Dance studio…
Sinilip ko mula sa maliit na bintana amg loob ng room. Kaya lamang ay hindi ko gaanong makita. Maliit lang na bahagi ng malaking salamin ang nasulyapan ko.
"Trixie, anong ginagawa mo 'dyan? Kanina pa ako salita ng salita sa loob wala ka naman pala"
Hinarap ko siya. "Ay, sorry"
Sandali niyang tinapunan ng tingin ang pintuan ng dance room.
"Dancer ka?"
"O-oo"
"Ako rin. Tara na sa loob, tulungan mo akong hanapin ang pinapahanap ni Nika. Tsaka, ngumiti ka naman. Nakabusangot 'yang mukha mo"
Tuluyan na kaming pumasok doon. Kompleto ang lahat ng mga gamit, studio talaga ang dating katulad ng mga ginagamit ng professional musicians at singers para sa recordings. Nanatiling naghahaluhog si Lucas ng gamit sa isang cabinet na puno ng folders. Habang ako naman ay iginala ang mata ko kung saan-saan. Nahagip ng mga mata ko ang isang maliit na picture, naroon Lucas, Raja, at ang iba pa nilang kasama sa banda.
"Nandito ka lang pala" Tumayo ito at nagpunas ng pawis sa noo gamit ang palad niya.
"Ano 'yan?" Tanong ko.
"Tula na ginawa ni Nika noon, ibibigay niya na lang sa kabilang section" sabay kaming lumabas ng studio.
"Bakit?"
Akmang isasara ko ang pinto ng maunahan niya ako. Muntikan na niyang mahawakan ang kamay ko. Tinignan ko siya at mukhang hindi niya napansin iyon. Nagsimula na lang kaming maglakad.
"Favor kasi 'to ng class president sa kabilang section. Magaling kasing gumawa ng tula si Nika, gagawin ata nilang kanta 'to. Siguro gagamitin nila sa pageant"
"Ang aga naman 'ata ng mga estudyante dito para 'dyan?"
"Malaking puntos kasi ang kaakibat ng mananalo. Points ng buong section. Mahalaga ang teamwork dito. Makikita mo na lang" ngumiti siya.
Lihim akong napangiti. Napakakomportable niyang kasama. Hindi tulad ng ibang lalake akala mo kung sino. Bigla ko naman tuloy naalala ang mga kaibigan ko sa AIS. Kamusta na kaya sila. Si Jason Guivarra , ano kaya ang ginagawa niya ngayon, alam pala niyang buhay pa ako.
Jason Guivarra POV
"TUBIG!!" malakas na ungot ko. Nabulunan ako ng chitchiryang kinakain ko.
"Hinay kasi sa kinakain" inabutan ako ni Andrie Scott ng bottled water.
Mabilis na nilagok ko iyon at nahimasmasan. Nandito kami sa madalas naming puntahang kapag wala pang normal classes. May dala akong pagkain na sana ay sa akin lang, pero binawasan nitong dalawa.
"May nakaalala 'ata sa 'yo" Ani AJ
"Sino naman makakaalala sa 'kin?" ngumuya ulit ako.
"Aba malay namin sa buhay mo?" aniya.
Hindi ko na siya sinagot at kumain na lang. Naramdaman kong nag-vibrate ang phone ko. Hindi lang isa kundi apat na beses. Alam ko kung kanino galing iyon. Kinuha ko ang phone ko at binasa ang naunang message.
"Sinabi ko na kung ano kita"
Ang pangalawa.
"Bakit pa ba ako nadawit sa kalagayan niyo? Pasalamat ka ,ah"
Pangatlo.
"Sasabihin ko sa kanya ang ibang detalye mamaya."
Panghuli.
"Paalala lang. Walang ibang kahulugan 'to"
Buntong-hininga kong ibinalik ang phone ko sa bulsa.
Wala nga, wala kung wala.
Tumayo ako. "Cr muna ako" pagpapaalam ko sa kanila.