Chapter Four
HALOS NANLAKI ANG MGA MATA ni Ella nang makita niya ang lugar na tinatayuan ng bahay nila Jinuel. Madilim na ang buong paligid pero sa pamamagitan ng mga street lights ay nakita kung gaano kalaki ang gate na automatikong nagbukas. May dalawang armadong lalaki ang nagbabantay roon na nagawa pang sumaludo pagkadaan ng sasakyan nila.
Pinalinga-linga ni Ella ang kanyang paningin. Kitang-kita rin niya kung gaano kalawak ang bakuran na dinaraan ng sasakyan nila na parang dinaig pa nito ang isang Golf Field. May nakita ulit siyang mga armadong lalaking naglilibot roon. 
Ilang saglit pa, natanaw na ni Ella sa di kalayuan ang isang malaking bahay. Wait, bahay pa iyon o isang palasyo? Isang modernong palasyo na dinaig pa yata ang Malacañang Palace sa laki. 
Habang papalapit ang sasakyan nila sa tapat ng naturang bahay ay nakita niya ang ilang taong nakapila ng diretso. Mapalalaki man o Babae, halos iisa ang suot na kulay ng uniform ng mga ito. 
Huminto na ang sasakyan. May isang lalaki ang nagbukas ng pintuan sa backseat. Halos hindi maputol-putol ang pagkamanghang nararamdaman ni Ella habang pababa siya ng sasakyan.
Ito na ba ang bahay ni Jinjin ngayon? 
Nang bumaba na rin si Jinuel sa sasakyan ay may sumalubong ritong ilang babaeng may bitbit ring ilang mga itim na kahon. 
Inabot ni Jinuel ang mahabang bagay na bitbit nito sa unang babaeng sumalubong rito. Wala talagang ideya si Ella kung ano ba ang mahabang bagay na iyon at kanina pa nito bitbit iyon. 
"Linisin n'yo 'yang mabuti!" bilin pa ni Jinuel. 
"Copy," anang babae saka nakuha pa itong yumuko sa lalaki saka humakbang palayo. 
Gulat na napatingin si Ella rito. Pero ang lalong kinalaki ng kanyang mga mata nang maglabas ng isang baril si Jinuel na dinukot pa nito sa bandang likuran nito. 
Wait, totoong baril ba iyon? 
Wala sa loob na napalunok si Ella.
"Halika," biglang baling sa kanya ni Jinuel. 
"Ha?" gulat niya. 
"Halika," anito saka marahan nitong hinila ang coat sa suot ni Ella. 
Wala nang nagawa pa si Ella kungdi ang mapalapit rito. At ganoon na lang ang panlalaki ng mga mata niya nang may dinukot si Jinuel sa kanang bulsa ng coat. At may nilabas roon ang tatlong balisong. Meron pa itong dinukot sa ilang bulsa ng damit na hindi niya akalain na naroroon sa coat na suot niya. 
Grabe, daig pa nito ang bulsa ni Doraemon! 
Pagkaraan ay may dinampot muli si Jinuel sa itim na kahon na bitbit ng isa pang babae. Isang relo? Napansin ni Ella na halos lahat ng taong naroroon ay may suot na ganoong relo.
"Welcome back, Doc!" anang boses ng isang babaeng nanggaling mismo sa sinuot nitong relo. 
"Wow, hi-tech!" komento ni Ella. 
Napatingin sa kanya si Jinuel. 
Para namang nailag si Ella. Dahil pakiramdam niya ay para siyang batang manghang-mangha sa kanyang nakikita.
"Sumunod ka sa akin!" serysoong utos ni Jinuel sa kanya.
Kahit labis ang pagtataka ay nagawa pa ring sumunod ni Ella sa lalaki papasok sa maala-palasyo nitong bahay. Kung namangha na siya kanina sa labas palang ay lalo na nang makita niya ang loob nito.
Parang hotel sa ganda!
Para siyang malululala. 
At alam niya na hindi basta-basta ang mga gamit naroroon. 
Nakaagaw rin ng pansin niya ang malaking Wedding Picture ni Ate Lyra at ng asawa nito. Halos napaawang ang bibig niya sa gulat. Hindi kasi niya akalain na totoo ang hinala nilang magkakaibigan na nakapag-asawa nga ng mayaman si Ate Lyra kaya biglang umangat bigla ang buhay ng mga ito. At mukhang hindi basta-basta ang lalaking nabingwit nito. Mukhang artistahin! 
Aaminin niyang nakaramdam siya ng inggit sa maala-fairy tale na love story ni Ate Lyra. Daig pa nito ang nakajackpot sa lotto!
Napatingin siya sa isa pang Potrait kung saan nakita niya ang family picture ni Ate Lyra at ang asawa nito na may kargang dalawang sanggol. 
"Kambal ang naging anak ni Ate Lyra?" biglang tanong niya kay Jinuel.
"Oo," maikling tugon nito.
"May lahi pala kayong kambal!" komento niya.
"Sa side ng bayaw ko! May kakambal siya!" tugon ni Jinuel saka siya tinalikuran.
Sumunod siya rito. Pero muli siyang napahinto nang mapansin naman niya ang isa pang picture kung saan naroon ang anim pang kapatid nito na lalaki na kapwa mga binata na. 
"Grabe! Mukha kayong K-pop Boy Group!" natatawang komento muli ni Ella, "Dati para lang kayong mga batang hamog. Pero ngayon, ang laki na ng pinagbago ninyong pito. Lalo na si Ate Lyra!"
Hindi kumibo si Jinuel. 
"Tito Jinjin!" sigaw ng batang lalaki at walang sabi-sabi na patakbo itong sumugod sa kanila.
Nagulantang si Ella dahil nakita niyang naka-arko ang mga kamay ng naturang bata na may hawak na isang espada!
Wait! Totoong espada ba 'yun o isa lang laruan? 
Hindi alam ni Ella pero natakot siya para kay Jinuel.
Napatili siya. 
"Stop it, Cade! Tinatakot mo si Ate Ella!" saway ni Jinuel sa bata na nagawa nitong makaiwas. 
"Ate Ella?" natigilan ang bata sabay ang tingin sa kanya, "New toy ba iyan, Tito?" 
"New toy?!" gulat siyang napatingin kay Jinuel. Ano ba ang tingin ng batang ito sa kanya isang barbie doll? Well, maganda naman talaga siya. 
"A new trainee!" napabuntong-hininga si Jinuel. 
"A new toy!" tuwa ng bata. 
"Sabi nang hindi siya new toy!" singhal ni Jinuel sa bata. 
"You're back!" 
Kapwa sila napatingala sa hagdanan ng makarinig sila ng boses ng isang lalaki roon. 
Napakunot ang noo ni Ella. Inisip niya kung sino ito sa anim na kapatid ni Jinuel. At ganoon na lang ang panlalaki ng mga mata niya ng makilala ito. 
"Jun?!" 
Napakunot ang noo nitong tinignan siya, "And who are you?"
Natigilan si Ella. Pero nagawa pa rin niyang ngitian ito, "Ako ito si Ate Ella mo. Hindi mo na ako natatandaan?"
Lalong napakunot ang noo nito at napatingin ito kay Jinuel na parang humihingi ng tulong sa kapatid. 
"Five or six years old ka palang kasi noon. Kaya hindi mo na siya masyadong natatandaan. Kalaro mo siya doon sa dati nating tinitirhan!" sabi na lang ni Jinuel.
Muling na patingin sa kanya si Jun kaya ngumiti siya rito. 
"Ate Ella?!" 
Napabaling na naman ang tingin ni Ella sa hagdanan nang marinig niyang may tumawag kanyang pangalan. At ganoon na lang ang panlalaki ang mga mata niya nang makilala kung sino iyon. 
Si Cobi. 
"Ikaw ba talaga iyan, Ate?" tuwa nito nagmamadali itong lumapit sa kanya.
"Oo, ako nga ito!" tuwang sinalubong din niya ito, "Grabe, binatang-binata ka na! Ang guwapo pa!" 
"Hindi naman," nahihiyang sabi nito. 
"Mahiyain ka pa rin!" sabi niya rito. 
Tumawa naman ito. Saka ito napatingin kay Jinuel, "Bakit ka nga pala nandito? Nagkabalikan na ba kayo ni Kuya Jinjin?"
"Ha?!" sabay pa nilang reaction ni Jinuel. 
"Now, I remembered! Ikaw sana iyong kadate ni Kuya Jinjin noon sa Rizal Park!" bulaslas ni Jun.
"Oy!" saway ni Jinuel sa kapatid.