Everything is like a fossil fuel being discovered after thousands of years. This dream provides important evidence of Delta Calamus extermination. How is our past is being hidden in the deepest form of manipulation and lies. How the Alphas' past are being manipulated by greedy families.
Isang lalaki ang nagpakita. Sumisigaw ng kapangyarihan ang kaniyang presensiya. Ang dulo ng kaniyang kulay asul na kapa ay marahan na humahalik sa makintab na sahig. Hindi ko maianag ang kan'yang mukha, pero pakiramdam ko ay kilala ko siya kahit hindi ko pa siya nakasalimuha kahit ni isang beses.
Umupo siya sa pinakamagara at pinakamagandang upuan na nasa dulo ng mataas na lamesa. Ang mga nilalang na nakapaligid sa lamesa ay nakatayo, hinintay ang kaniyang pag-upo. Meron silang pagpupulong at ang lalaking nagsusuot ng kulay asul na kapa ay hari.
Nagsalita ang hari, ngunit hindi ko naririnig ang kan'yang boses. Umupo ang lahat pero hindi ko pa rin makita nang maayos ang kanilang mga mukha. Para silang nasa larawan na kinain na ng panahon o 'di kaya'y tinatakpan ng ulap ang kanilang mga mukha.
Pagkatapos umupo ang lahat ay nagsimula na ang kanilang pag-uusap. Hindi ko pa rin naririnig ang kanilang mga boses. Ang tanging may kulay lamang ay ang hari-ang kaniyang kasuotan, korona, at ang kaniyang upuan. Tulad ng pangkaraniwang panaginip, nakalilito ang panaginip na ito.
Sa gitna ng pagpupulong, may dumating na lalaki. Pahati na bumukas ang malaking pinto at pumasok ang isang lalaking nagsusuot ng magarang kasuotan na kulay berde-kulay ng bansang Summa, ang aking bansang pinagmulan. Tulad ng iba, hindi ko nakikita nang maayos ang mukha ng bagong dating na lalaki, pero pamilyar sa akin ang kaniyang presensiya.
"Ako si Christopher Balindong. Ako ang kumakatawan sa Summa," sabi ng bagong dating na lalaki.
Kasali si Papa sa panaginip na ito? Nakaraan ba ito o kinabukasan?
"Humihingi ako ng paumanhin. Ang aking mga magulang, ang mga namumuno sa Summa, ay hindi makadadalo sa pagpupulong na ito sapagkat ay may yumaong na Elder at may mahalang gampanin ang aking mga magulang sa gagawing ritwal mamaya," dagdag ni Papa at yumuko, simbolo na tapos na ang kaniyang pagsasalita.
Tumugon ang hari, ngunit hindi ko pa rin naririnig. Baka si Papa lamang ang aking naririnig dahil siya pa lamang ang aking nakasalamuha habang ang iba ay hindi pa. Hindi ko sila kilala at hindi pamilyar sa akin ang mga boses nila.
Umupo si Papa malapit sa hari. Pagkatapos ay sinulyapan niya ang mga singsing ng hari. May singsing siya sa kasal at isa pang sising na kulay asul ang bato. Hindi ko alam kung anong uring bato ito pero sa loob nito ay parang may usok na gumagalaw, pilit na lalabas mula sa loob ng bato.
Bumaling kay Papa ang hari kaya agad na umupo nang maayos si Papa. Tila ba bawal na tumingin sa singsing ng hari. Kinausap siya sa hari. Lumipas muna ang ilang segundo bago sumagot si Papa.
"Maganda ang naisip niyo, mahal na hari. Ikabubuti iyan sa mga Alpha kaya sang-ayon ako," magalang na sagot ni Papa.
May ilang sumang-ayon kay Papa at meron namang sumalungat pero muling nagsalita ang hari. Mayamaya ay muli siyang humarap kay Papa at kinausap siya. Saglit na napaisip si Papa sa mga sinabi ng hari. Titig na titig siya sa mukha ng hari, parang hindi kapani-paniwala ang sinabi niya.
"Susubukan natin, mahal na hari. Mananatili ang problema kung hindi natin ito hahanapan ng solusiyon," wika ni Papa.
Ngumiti ang hari, parang ipinagmalaki niya na sang-ayon sa kaniya si Papa. Muli na namang nagsalita ang hari. May ilang nagsalita, ngunit tulad ng hari, hindi ko pa rin naririnig ang mga boses nila. May isang kinausap si Papa dahilan kung bakit ang atensiyon ng lahat ay nasa kay Papa na. Base sa mukha ni Papa ay parang hinahamon siya sa lalaking huling nagsalita.
"Kung hindi magtatagumpay ang plano ng mahal na hari"-sumulyap si Papa sa hari pagkatapos ay tumingin sa lahat. Huminto ang kaniyang matapang na tingin sa lalaking humamon sa kaniya- "handa akong gamitin ang aking potentia upang ayusin ito."
Saglit na katahimikan ang bumalot sa malawak na silid. Mayamaya ay nakarinig na ako ng mga masipang palakpakan. Palakpakan na ibinibigay nila kay Papa dahil sa katapangang ipinapakita niya, pero bakit para sa akin ay kamalian ang ginawa ni Papa? Parang magdudulot ito ng malaking problema sa lahat.
Natapos ang pagpupulong at umalis ang ilan. Naiwan sa silid ang hari at si Papa. Nang isinara ang pinto ay muli silang umupo at saglit na nagtinginan sa mga mata.
"Sa totoo lang, kinakabahan ako sa aking plano, Christopher." Sa unang pagkakataon ay narinig ko ang boses ng hari, ngunit hindi ko alam kung sino ang may-ari nito. Kung maririnig ko ang boses niya sa totoong buhay ay makilala ko siya.
Sumilay sa mga labi ni Papa ang ngiting nagbibigay-pag-asa sa hari bago siya tumugon. "Ako rin, mahal na hari. Malaki ang ating problema kaya mahirap na proseso ang ating madadaanan."
"Alam ko kung paano gumagana ang potentia mo, Christopher. Alam kong susuko ang iyong katawan kapag hindi magtatagumpay ang aking plano," nag-aalalang wika ng hari.
Yumuko si Papa. Alam kong naisip niya kanina sa pagpupulong ang tungkol sa sinabi ng hari. Pwedeng siyang mamatay kung ano man ang balak niyang gawin.
Tumango-tango si Papa, desidido sa kaniyang plano. "May naiisip akong paraan, mahal na hari, na pwedeng magpapatuloy sa aking misiyon kung sakaling hindi magtatagumpay ang iyong plano."
Kumunot ang noo ng hari. Kung ano man ang paraan na naiisip ni Papa ay parang nagdadalawang-isip ang hari kung sasang-ayon ba siya o hindi. "Ano ang ibig mong sabihin, Christopher?"
Tumingin nang maigi si Papa sa mga mata ng hari. "May anak sa labas si Abaddon. Hindi pa niya ito nabibigyan ng lamia o baka wala talaga siyang balak na bigyan ito. Bubuntisin ko siya. Habang wala pa siyang lamia, malaki ang posibilidad na magiging katulad sa akin ang aming anak. Magiging healer ang aming anak."
Ako ba ang tinitukoy ni Papa? Ibig sabihin, nakaraan ito. Kung sa ganitong paraan nagsimula ang relasiyon ng aking mga magulang, ibig sabihin hindi nila minahal ang isa't-isa. Hindi ako bunga ng pagmamahalan. Isinilang ako sa mundong ito upang tapusin ang ano mang sinimulan ng aking ama.
Nanlaki ang mga mata ng hari. Gusto niyang magsalita, pero walang lumabas sa kaniyang bibig. Napagbuntong-hininga na lamang si Papa dahil sa reaksiyon ng hari.
"Alam kung mataas ang respeto mo sa mga kababaihan, mahal na hari. Gano'n din ako. Pinahalagahan ko rin ang esensiya ng pamilya. Mamahalin ko po si Gra-" Natigil si Papa. Mukhang may nasabi siyang mali. "Mahal ko po si Graciana," pagtatapos ni Papa sa kaniyang salita.
Parang bumagal ang lahat. Mula sa baba ng hari patungo paitaas ay unti-unti kong nakikita nang maayos. Nasilayan ko ang magandang ngiti ng hari. Unti-unting nawawala ang ulap na humaharang sa kaniyang mukha, ngunit tumigil ito at lumipat ang aking isipan sa ibang sitwasiyon.