Synopsis
Matalik na kababata ni Jan si Mar, elementary pa lang sila noon nang magsimula ang kanilang friendship. Hindi inasahan ni Jan na darating ang panahon na magkakagusto siya sa kaibigan. Hindi naman kasi lingid sa sarili niya ang tunay niyang pagkatao. Alam niya at tanggap na niya noon na hindi siya straight na lalaki, na nagkakagusto sa kabaliktarang kasarian. Tanggap naman siya ng pamilya niya at maging ni Mar.
Nabuo ang kakaibang closeness sa pagitan nilang dalawa. Sa halos araw-araw na magkasama, nabuo rin ang pagtingin ni Jan para sa kaibigan. Hindi naman niya iyon, inaasahan at hindi rin niya iyon gusto sapagkat alam niya ang kahahantungan niyon.
Pilit niyang itinago kung ano mang nararamdaman niya sa kaibigan dahil alam niyang kapag nalaman ni Mar ang nararamdaman niya para rito, pwedeng masira ang friendship na nabuo nila sa mahabang panahon. Hindi rin siya sigurado sa nararamdaman ng lalaki para sa kaniya.
Pero sadyang mapaglaro ang tadhana dahil dumating sa puntong hindi na naitago pa ni Jan ang nararamdaman niya.
Ano kayang kahahantungan ng pag-ibig ni Jan para sa kaniyang matalik na kaibigan? Sa pagkakaalam ni Mar, ito na ba ang simula ng pagkasira ng kanilang pagkakaibigan?
PROLOGUE
"PAYATOT! Payatot!"
Yumuko na lang ako habang sinasabi sa akin ng mga kapwa ko bata ang pang-iinsultong iyon. Hindi na sa akin bago ang pagtripan ng kapwa ko mga estudyante. Noon pa man kasi, dahil sa pagiging mahinhin ko, binibully ako. Hindi ko rin magawang lumaban dahil natatakot akong mapatawag ng mga guro.
"Bakla ka ata, eh! Hindi mo nga kayang lumaban sa amin. Bakla! Bakla?" patuloy na pang-aasar ng mga kaklase ko sa akin habang nakayuko lang ako. Kinakabahan ako at natatakot sa kanila.
"Hoy! Anong ginagawa niyo sa kaniya?"
Hindi ako nag-angat ng tingin sa nagsalitang lalaki mula sa kung saan.
"Kung hindi kayo titigil, isusumbong ko kayo sa teacher," pananakot pa ng batang lalaki sa mga kaklase ko. "Ano?"
Narinig ko na lang ang mga yabag ng mga paa ng mga kaklase ko palayo. Dahan-dahan akong nag-angat ng tingin at tumambad sa akin ang isang batang lalaki, mas matangkad siya sa akin at ang gwapo niya.
"Hey, ok ka lang ba?" tanong niya sa akin. Lumapit pa siya sa akin at agad akong sinuri.
"S-Salamat," nahihiya kong sabi sa kaniya. Hindi rin ako makatingin sa kaniya. Para bang nagliliwanag ang mukha niya sa mga mata ko.
"Sa susunod kapag binibully ka nila, isumbong mo sa mga guro para hindi na nila ulitin iyan sa 'yo," payo ng lalaki.
"Salamat," balik ko uli sa kaniya.