DUMATING ANG kinabukasan at labis ang excitement na nararamdaman ni Ellie. Pakiramdam niya'y malapit na niyang makamit ang inaasam na tagumpay at ang RTV network ang magdadala sa kaniya sa kasikatan na siya ring posibleng maglalapit sa landas nila ng ultimate crush niyang si Renz Joaquin.
Masaya pa niyang ibinalita kay Ronnie na a-attend nga siya ng acting workshop ngayon, gayundin kay Kiara na madalas mangumusta sa kaniya. Subalit hindi niya akalaing magkaiba ng magiging reaksyon ang dalawa dahil kung masaya si Kiara para sa kaniya ay tila humadlang naman doon si Ronnie. Bagay na bahagya niyang ikinatampo rito.
"Alam ko ang mga dapat kong gawin, Ronnie, hindi mo ako kailangang diktahan," inis na sabi niya mula sa kabilang linya habang nakikita niyang malapit-lapit na siyang bumaba ng bus.
"Ellie, alam ko at suportado kita ro'n. Pero hindi mo kasi ako naiintindihan, e. Ellie, ayoko lang na maapektuhan ka sa malalaman mo."
"Na ano ba kasi?"
"Ellie, nabalitaan kong sumali rin sa acting workshop ng RTV network si Lanie."
Bahagya siyang natigilan. Hindi niya akalaing kayang sundan ni Lanie ang landas na tinatahak niya. Patunay lamang na nuknukan ito ng kainggitan sa katawan. Lingid sa kaniyang kaalaman ay niligawan nito ang management ng RTV network para maihabol ito sa listahan ng mga talents.
She sighed sharply. "E, ano naman kung nandoon siya?"
"Ellie, naririnig mo ba ang sinasabi mo? Of course, hindi mo ba naisip na baka insultuhin ka na naman niya? At paano kung plano lang niyang pabagsakin ka at para hindi ma-absorb bilang artista?"
"Sa tingin mo ay magpapaapekto ako sa kaniya? Ronnie, wala ka bang tiwala sa kakayahan ko?"
"Of course, mayroon. Malaki ang tiwala ko sa'yo--"
"O, iyon naman pala, e. Sana sa paraan lang na 'yon ay mapanatag ka na, na hindi ako basta-basta matatalo ni Lanie." Tipid pa siyang napangisi. "Nahigitan ko nga siya sa ranking ng Mutya ng Pilipinas, 'di ba? Kaya tiwala lang at kakayanin ko 'to." She sighed again. "Ronnie, nandito na ako, e-- kaunti na lang at maaabot ko na ang pangarap ko, aatras pa ba ako?"
Walang nagawa si Ronnie kundi ang sumang-ayon sa sinabi niya. Na para rito naman ay hindi ito pabor na mag-artista pa siya gayong sumisikat naman na siyang vlogger dahil sa collaboration nilang dalawa. At ang ikinatatakot pa ni Ronnie, kapag sumikat na si Ellie ay mas magiging busy na ito at tuluyan na nitong papasukin ang mundo ng showbiz, na para rito ay isang malaking foul na kung kailan naman napapalapit na sila sa isa't isa ay saka naman magkakaroon ng chance na mapalapit din ito sa crush nitong si Renz.
Nagmamadali si Ellie na makarating sa building ng RTV network workshop room dahil nakarating sa kaniyang kaalaman na naroon na sila Yohan. At sa pagpasok nga niya sa workshop room ay nakita niyang nagbibida-bida si Lanie at binigyang pansin agad ang kaniyang pagdating. "O, she's here, the one that was really a reverse definition of an early bird. Kailan ka ba darating nang mas maaga tuwing may mahalagang appointment kagaya nito?" Hindi agad siya nakasagot sa pang-iinsultong iyon ni Lanie, bagama't batid niya na tagumpay nitong nakuha ang atensyon ng lahat. Pero nang tingnan niya ang direksyon nila Yohan ay halatang nag-aalala ang tingin nito para sa kaniya. Sa halip na sumagot ay marahan niyang inilapag ang mga gamit. At kahit na nakararamdam nang pagtaas ng presyon ay pinili niya na lamang na manahimik.
"Hayaan mo na lang, kahit kami ay kanina pa iniinsulto niyan, at sino ba siya para insultuhin tayo?" tanong ni Alexa sa kaniya.
"Isa siya sa naging kapwa ko kandidato sa Mutya ng Pilipinas, pero hindi ko rin alam kung paano siya nakahabol sa listahan nating mga aspiring talents," sagot niya na sinigurado niya namang hindi maririnig ni Lanie.
"Naku, tingin ko ay mayaman 'yan kaya ganiyan siya kung umasta," wika ni Yohan. Bagay na hindi naman inaasahang marinig ni Lanie.
"So, you are talking about me?" Bahagya pa itong natawa. "Well, kung hindi n'yo pa ako kilala, ako lang naman si Lanie Fernandez, came from a rich family so that, I can do what I want to do in life." Pasimple pa itong napasulyap kay Ellie, tila iniinsulto ang katulad niyang mahirap.
Hanggang sa hindi na rin siya nakapagtimpi at nagawa na itong sagutin. "Kaya ba nandito ka para patunayan sa akin na kayang-kaya mo akong maliitin? At ano ba itong sinabi mo na kumakapit lang ako sa isang media influencer para sumikat? Bakit? Hindi pa ba 'to patunay na pinaghihirapan ko rin ang bawat achievement ko sa buhay? Lanie, watch your words, hah? Hindi kasi maganda na nagmamaliit tayo ng kapwa natin. Pero sige, kung diyan ka masaya sa pang-iinsulto mo sa akin, insultuhin mo lang ako, pero makikita mo, balang araw, niningning din ako na parang bituin sa langit."
Hindi na nakasagot pa si Lanie sa mahabang sinabi niya. Bagama't nanatili lamang na nakataas ang kilay nito sa kaniya at sa harap ng mga kasamahan nila.
Hanggang sa mapawi na lamang ang tensyon na iyon sa pagdating ng kanilang mga trainers na sina Mrs. Lexie Guevarra at Mr. Page Gilmore. Doo'y masayang ipinakilala ng mga ito si Lanie bilang bago sa listahan ng mga aspiring talents.
Hanggang sa tinipon na sila nitong lahat at nagbigay ng isa pang anunsyo.
Matatandaang hindi biro ang naging unang pagsalang nila noon sa acting workshop ng RTV network, pero hindi naman nila akalain na mas magiging mahirap ngayon. Lalo na't magkakaroon na ng pagpili sa mga nakitaan ng potential mula sa simula pa lang.
At tumahimik na ang lahat nang magsalita ang mga trainers na sina Mr. Page Gilmore at Mrs. Lexie Guevarra. Nauna namang magsalita si Mrs. Lexie Guevarra, "Everyone, I want you to take it seriously, dahil kung sa tingin n'yo ay mahirap pa lang dito sa acting workshop, well, I would say, na mas magiging mahirap kapag talagang isinalang na kayo sa production."
Sumang-ayon naman dito si Mr. Page Gilmore at nagsalita, "So, we as your trainers, are expecting that you will broaden your talent as far as we can see.
Gusto namin 'yung may wow factor talaga, right, Mrs. Lexie?" Napatango naman si Mrs. Lexie Guevarra sa sinabi nito habang hindi magkamayaw ang kaba ng lahat.
Samantalang si Lanie Fernandez ay tila confident pa rin sa sarili lalo na't malakas ang backer nito sa RTV network. Ikaw ba naman na maglabas ng malaking pera para lang sa inaasam na kasikatan. And as a matter of fact, barya lang naman talaga sa pamilya ni Lanie ang inilabas na pera para makahabol ito sa acting workshop at para mahigitan ang kinaiinisan nitong si Ellie.
Ilang sandali lang ay isa-isa na silang isinalang mula sa pagkuha ng facial expression. Nakakailang man gawin para kay Ellie dahil naroon ang taong hindi bumibilib sa kaniyang kakayahan ay pinili niya pa rin gawin ang kaniyang best at para na rin mapatunayan dito na mali ito ng kinakalaban. At kung na-challenge siya sa nararamdaman kanina ay heto siya ngayon at hinaharap ang tila butas ng karayom para sa inaasam na pangarap.
Samantala'y nakatuon lamang ang tingin sa kaniya ng lahat, lalo na sina Yohan, Alvin, Ferdie, Miguel, Eunice, Sonia at Alexa na nagpapakita ng suporta sa kaniya. Hanggang sa bigyan si Ellie ng isang senaryo ng mga trainers na kailangan niyang i-acting kung saan ay dapat mangibabaw ang kaniyang facial expression. Hindi niya alam kung paano ba sisimulan gayong ang senaryo ay nawalan ng magulang at siya ang tumayong bread winner ng pamilya. Out of their knowing na sadyang sumasalamin ang senaryong ito sa kaniyang buhay.
"Hindi n'yo alam kung gaano kahirap kumita ng pera at kung gaano kabigat sa akin na saluhin ang responsibilidad na 'to tapos gaganituhin n'yo lang ako?"
Buong puso niyang ibinigay ang mga dayalogong iyon ayon sa kaniyang nararamdaman. Kaya naman hindi niya akalaing totoong emosyon ang kaniyang maipapakita habang nag-a-adlib siya ng mga dialogues. Little did she know, sobrang sakit mawalan ng magulang, but she didn't know how the impact of her acting to everyone, except for Lanie na halata namang inggit na inggit sa kakayahan niya.
Hanggang sa hindi niya namalayang namamayani na ang palakpakan ng mga trainers sa kaniya, kasabay din ng palakpakan nila Yohan at ng iba pa nilang mga kasama. At sa puntong iyon ay dali-dali siyang nagpunas ng luha na hindi niya akalaing marami-rin rin ang naibuhos mula sa kaniyang pag-acting.
All is well until the final result has been announced. At hindi niya akalaing isa siya sa mapipiling mga aspiring talents na magkakaroon ng chance na makasama sa eksena ng isang magaling na artista. Subalit, sa kabila ng achievement na 'yon ay batid niya na makakasama niya rin si Lanie dahil di hamak na may kakayahan din ito sa acting skills.
"Masaya ako na halos lahat tayo ay mabibigyan ng chance na makasama sa eksena ang paborito nating artista na si Francine Toledo. Ang galing kaya no'n! Ang alam ko ay bagong absorb lang din siya rito sa acting workshop, e," ang sabi ni Alexa.
"Oo nga, at may nabalitaan pa akong siya raw ang posibleng bagong magiging love team ni Renz Joaquin!" kinikilig na sabi pa ni Eunice.
Kaya naman ang magandang mood ni Ellie ay tila napawi sa narinig. Pero dahil ayaw niya naman magpahalata na apektado siya ay pinili niya na lang na tingnan ang good side sa mga posibleng mangyari. "Excited na akong makatrabaho sila!" sabi pa niya.
"Pero, paano na sina Sonia at Alvin? Malalayo tayo sa kanila," nag-aalalang wika ni Alexa.
Kaya naman ang lahat ay nalungkot para kina Sonia at Alvin na hindi pinalad na magkaroon ng chance para maisalang na sa production. "'Di bale, marami pa namang next time, 'di ba? At magkikita-kita pa naman ulit tayo sa mundo ng showbiz?" nangangarap na sabi ni Sonia.
Saka naman tipid na napangiti sina Ellie,
Yohan, Alvin, Ferdie, Miguel, Eunice, at Alexa. "Oo naman! Sigurado kaming by next time ay ma-a-absorb na kayo!" pagpapalakas ng loob pang sabi ni Yohan.
Doon nama'y nagyakapan silang lahat habang nakita naman nilang kasalukuyang kausap ni Lanie sina Mrs. Lexie Guevarra at Mr. Page Gilmore. "Ang unfair lang, 'no? Bakit na-absorb agad itong si Lanie gayong first time niya lang naman um-attend ng acting workshop. E, para sa akin, hindi naman siya gano'n kagaling um-acting, e," inis na wika ni Eunice.
"Ano ka ba, hindi n'yo ba napapansin? Pera-pera na lang ang labanan, maraming p'wedeng magawa ang pera. Saka, given na rin na maganda siya kaya na-absorb," wika ni Ferdie.
"Hay naku! Wala 'yang ganda niya kung anong sama naman ng ugali niya!" inis na apila ni Alexa.
"Tumigil na kayo, ang mabuti pa ay gawin na lang natin ang best natin sa pagdating na isalang na tayo sa production. At kayo naman, Sonia at Alvin, hindi pa rito nagtatapos ang lahat. There is always a room for improvement, palagi n'yong tatandaan 'yan," mahabang sabi ni Yohan. Kaya naman hindi na napigilan ni Sonia na mapayakap dito bilang pasasalamat habang gano'n din naman ang pag-akap nina Yohan at Alvin sa isa't isa. Na para kay Ellie ay isang pundasyon ng mabuting pagkakaibigan.
"Pero, ikaw ba, Ellie? Kakayanin mo bang makatrabaho si Lanie kapag nagkaroon ng chance na magkasama kayo sa isang teleserye? E, kung insultuhin din kami niyan kanina, akala mo kung sino, e," wika ni Alexa na sandaling ikinatigil niya.
"Bakit hindi? Saka, hindi dapat tayo magpaapekto sa kaniya, 'no? Saka makikita naman ang tagumpay sa dami ng projects na maibibigay sa atin sa mundo ng showbiz, e. Iyon, doon talaga ang realidad, hindi rito. Kaya relax lang kayo, Sonia at Alvin, balang araw ay magkakasama-sama rin tayo sa mundo ng showbiz."
"Thank you, Ellie," sabi ni Sonia at niyakap din siya nito katulad nang pagyakap nito kay Yohan. Habang si Alvin naman ay umakbay sa kaniya.
Subalit, naagaw naman ang atensyon niya sa magkakasunod na missed call ni Ronnie. At ang ikinalaki pa ng mga mata niya ay nang mabasa ang huling mensahe nito. "Tapos na ba ang workshop n'yo? Nandito ako sa labas ng building, hinihintay ka."