Torch:
Pagkatapos kong maihatid si Jean sa kanyang silid ay nagtungo na ako sa opisina ni Kuya Sun. Binilinan niya ako kanina na may importante kaming pag-uusapan pagkatapos ng hapunan.
Nang makarating ako sa kanyang opisina ay kumatok ako ng tatlong beses sa pinto at naghintay sa kanya. Makalipas lang ang ilang segundo ay bumukas na ang pinto.
Naabutan ko na sa loob ng opisina si Blaze na tahimik habang malalim ang iniisip. Nakakapanibago ang pananahimik niya. Malayo sa Blaze na masyadong happpy-go-lucky na kanyang personalidad.
"Anong problema Kuya, bakit mo kami ipinatawag?" takang tanong ko kay Kuya habang paupo ako sa bakanteng silya sa harap mismo ng tahimik na si Blaze.
"Ilang araw ko ng napapansin na may mga lobong nagmamanman sa ating teritoryo." nakakunot-noong sagot ni Kuya Sun.
"Ilang araw ko na ring napapansin iyon. Noong una ay hindi ko pinansin dahil ang akala ko ay nagkataon lamang na napadaan sila. Pero hindi, eh. Araw-araw silang nagpapabalik-balik sa labas ng teritoryo at para bang may minamatyagan." mahabang wika naman ni Blaze.
"Rouge?" may pagtataka na ding tanong ko sa kanila.
Sabay pang napa-iling ang dalawang kaharap ko. Pagkatapos ay parehong mas sumeryoso ang mga mukha.
"Hindi, Torch. Kabilang sila sa isang pack. Hindi ko lang masigurado kung saang pack sila nabibilang." may kasiguraduhan sa tinig na sagot ni Kuya, na tinanguan naman ni Blaze bilang pagsang-ayon.
Lalong lumalim ang pagkakakunot ng aking noo sa nalaman. Kailan pa nagkaroon ng lakas ng loob ang miyembro ng isang pack na magmanman sa aming teritoryo. Unless, hindi nila alam na mapanganib dito o sadyang walang itong pakialam sa anumang mangyayari dito.
"Kailan pa ito nagsimula?" tanong ko.
"Last week pa. Hindi lang namin agad sinabi sa iyo dahil alam naming lalo ka lang mag-aalala. Lalo na sa kalagayan ni Jean ngayon." sagot ni Blaze.
"Shit. Bakit ngayon niyo lang sinabi sa akin? Paano kung hindi lang basta pagmamanman ang ginagawa nila? Paano kung--"
"Shut up, Torch." pagputol ni Kuya Sun sa iba ko pa sanang nais sabihin. "Ginawa lang namin iyon dahil ayaw na naming dagdagan pa ang pag-aalala mo." paliwanag ni Kuya.
Napahugot na lamang ako ng malalim na paghinga dahil sa katwiran nila. Aaminin kong ilang gabi na rin akong walang matinong tulog at pahinga. Kaya nga siguro mas pinili nilang ilihim sa akin ang mga bagay na ito.
"Bukod sa pagmamanman ng mga taong iyon, may iba pa ba kayong sasabihin sa akin?" tanong ko.
"Bukod sa iyo, nais kong bigyan ng iba pang tagabantay si Jean." seryosong wika ni Kuya habang nakatitig siya ng matiim sa aking mga mata.
Bigla akong napatayo sa aking kinauupuan dahil sa kanyang sinabi."No way, Kuya." matigas kong pagtutol sa nais nya.
"Yes way, Torch. Kaligtasan lang niya ang iniisip ko. Paano kapag wala ka sa tabi niya? Oh kaya ay ako, si Blaze? Sino ang proprotekta sa kanya?"
"I can and I will protect her, Kuya. Alam mo yan." sabi ko na may bakas na ng inis ang aking boses.
"Alam ko, Torch. Pero hindi sa lahat ng pagkakataon at oras ay magagawa mo siyang protektahan. May sarili ka rin na buhay." mahinahon niyang paliwanag.
Naningkit ang aking mga mata dahil sa tinuran niya. Matagal akong nakipagtitigan sa kanya bago nagpasyang tumalikod at lumabas ng opisina nya.
Pabalibag kong binuksan at isinara ang pinto ng kanyang opisina pagkalabas ko at dumiretso sa kwarto ni Jean.
Mahimbing na ang tulog nito. Napakapayapa ng kanyang mukha. Kung pagmamasdan mo ay hindi mo aakalain na napakabigat ng kanyang pinagdadaanan.
Marahan akong naglakad palapit sa kanyang kama. Maingat akong naupo sa gilid nito at pinagmasdan ko pa ng mabuti ang napakaganda niyang mukha.
Iniangat ko ang kanan kong kamay upang haplusin ang kanyang makinis na pisngi ng bigla itong gumalaw at tumagilid sa pagkakahiga.Ngayon ay mas napagmasdan ko ang kanyang mukha dahil nakaharap na siya sa akin.
Hinaplos ko ang buhok n'ya na nakatabing sa kanyang maputlang mga  pisngi na hindi nasisikatan ng araw. Inilihis ko ang ilang hibla ng kanyang buhok na tumatakip sa kanyang mukha. Pagkatapos ay  maingat kong iniipit ito sa kanyang tainga.
"Bakit ganito ang nararamdaman ko para sayo? Isipin ko pa lang na may ibang lalaking lalapit sa iyo ay kinakain na ako ng selos at galit?" pagka-usap nya sa sarili.
"Ano at sino ka nga ba sa buhay ko?" naguguluhan ko pang tanong.
Napahugot na lamang ako ng malalim na hininga at inayos ang kumot sa kanyang katawan. Bago ako tumayo sa kama ay kinintalan ko muna ng isang marahan na halik ang noo ni Jean.
Dumiretso na ako sa pinto at maingat itong binuksan. Iniiwasan kong makagawa ng anumang ingay na maaaring gumising sa kanyang mahimbing na pagtulog.
Pagkatapos kong maisara ng maayos ang pintuan ng silid ni Jean ay nagpunta na rin ako sa aking silid. Katapat lamang ito ng silid niya.
Kailangan ko ng matinong pahinga at tulog. Ilang gabi din akong di nakakatulog ng maayos dahil sa ilang araw kong pagbabantay kay Jean.
Nang makarating sa sarili kong silid ay dumiretso muna ako ng banyo. I need a cold shower. Pagdating sa loob ng banyo ay agad akong naghubad ng aking damit. Wala akong itinira kahit isa.
Habang umaagos ang malamig na tubig sa aking katawan ay pilit na umuukilkil sa aking isipan ang pinag-usapan namin nina Kuya Sun at Blaze. Tutol ako sa suhestiyon nila na dagdagan pa ng ibang tagabantay si Jean. Pero di ko maikakaila na tama lang nais nilang mangyari. Tulad ng sinabi ni Kuya Sun, hindi sa lahat ng oras at pagkakataon ay mababantayan at mapoprotektahan ko si Jean. Hanggang sa matapos ako sa pagligo ay magulo pa rin ang aking isipan. Kahit hangggang sa igupo na ako ng pagod at antok ay iyon pa rin ang nasa isipan ko.
Jean
Paglapat ng pintuan ng aking silid ay unti-unti kong idinilat ang aking mga mata. Ang buong akala siguro ni Torch ay mahimbing na ang tulog ko pero ang hindi nya alam ay nagpapanggap lamang akong tulog mula ng maramdaman kong pumasok s'ya sa aking silid.
Hanggang ngayon ay ramdam ko ang maingat na paghaplos n'ya sa aking buhok. Ang marahang paghawi at pag-ipit n'ya ng buhok ko sa aking tenga. Narinig ko rin ang sinabi n'ya na tila ba ay naguguluhan sa kung anumang nararamdaman n'ya. Hindi ko alam, pero bakit tila may kilig na hatid ang mga sinabi n'ya kanina?