WilderBeast Pack
"May balita na ba kayo tungkol sa anak ko at sa taong dumukot sa kanya?" ang agarang tanong ng Alpha sa kanyang Gamma.
"Alpha, wala pa kaming balita tungkol sa inyong anak. Ngunit sa taong dumukot sa kanya ay mayroon na." wika naman nito.
"Hanggang ngayon ay wala pa rin kayong balita sa kanya. Ilang taon na mula ng mawala ang aking anak. Pero hanggang ngayon ay hindi nyo pa rin siya nakikita." malungkot na wika ng Alpha.
"Patawad, Alpha. Ngunit ginagawa na namin ang lahat upang mahanap ang iyong tagapagmana." pagpapaumanhin naman ng kanyang kausap.
"Alam ko naman iyon." wika nito na may bahid pa rin ng lungkot ang tinig. "Anong ibabalita ninyo tungkol sa taong dumukot sa kanya?" pag-iiba niya ng usapan.
"Matagal ng nakakulong ang Mafia King, Alpha." sagot ng Gamma.
"Nakakulong?" may pagtataka sa tinig at nakakunot ang noong tanong ng Alpha.
"Oo, Alpha. Matagal na siyang nakakulong."
"Paano?" naguguluhan pa ring tanong nito.
"Nadakip siya ng grupo ni Smithly Reid sa teritoryo ng DarkStone, Alpha. Ilang taon na rin ang nakakalipas magmula ng mangyari iyon." sagot nito.
"Kung ganoon, nasaan ang aking anak?"
"Iyon ang aming inaalam sa ngayon, Alpha."
Nanlulumong umupo sa kanyang upuan ang Alpha. Tila gusto na niyang panghinaan ng loob. Ilang taon na nga ba niyang hinahanap ang kanyang nag-iisang anak at tanging tagapag-mana.
Labis na siyang nangungulila dito. Mahigit dalawampung taon na magmula ng kunin ito sa kanya. Ganoon na katagal.
"Alpha." mahinang tawag ng Gamma.
Tumingin lamang ang Alpha sa kanya ng walang anumang salita.
"Mayroong nakapagsabi sa amin na mayroong anak na lalaki sa ibang babae ang Mafia King na halos kaedad lamang ng inyong nawawalang anak. Hindi pa kami nakakasiguro kung siya na ba ang anak ninyo na matagal niyo ng ipinahahanap." mahabang paliwanag nito.
Tila naman nabuhayan ng loob ang Alpha sa narinig nitong balita mula sa Gamma.
"Kung gayon, alamin ninyo ang lahat tungkol sa lalaking tinutukoy ninyo."
"Masusunod, Alpha."
"Maaari na kayong umalis kung wala na kayong iba pang ibabalita." ang wika ng Alpha na may matipid ng ngiti sa mga labi.
❇❇❇❇❇❇
Madwolf Territory
Nakahiga ako sa kama at tahimik na nakatitig sa kisame ng aking silid ng marinig ko ang marahang pagbukas ng pinto. Bumaling ako dito upang alamin kung sino ang nagbukas. Nakita ko ang nakangiting mukha ni Torch bago siya tuluyang pumasok ng aking silid.
"Bakit?" tanong ko habang nanatili lamang ako sa aking pagkakahiga.
"Wala naman. Gusto lang kitang makita. Miss na kasi kita." nakangiting sagot naman niya.
"Kaninang umaga lang tayo magkasama, Torch." wika ko na nakakunot-noo sa kanya.
Napatawa naman siya dahil sa sinabi ko. "Masama bang mamiss ko ang aking prinsesa?" natatawa pa niyang sabi.
Napa-irap naman ako sa sinabi nya. Pero bakas naman ang tipid na ngiti mula sa aking mga labi. Tinapik ko ang espasyo sa aking tabi upang paupuin sya. Naintindihan naman niya ang ibig kong sabihin kaya umupo siya dito.
Hindi na ako nagulat ng bigla na lamang niya akong ibinangon at kabigin palapit sa kanya, pagkatapos ay pinalibot ang kanyang mga braso sa aking katawan. Nasanay na ako dahil lagi niyang ginagawa ang pagyakap sa akin, lalo na kapag kaming dalawa lamang ang magkasama.
"Inaantok ako Princess. Samahan mo akong matulog." paglalambing niya sa akin.
"Pero ayokong matulog." nakasimangot kong sabi sa kanya.
"Please." pagmamakaawa niya.
Napabuntung-hininga na lamang ako.Alam kong di niya ako titigilan hangga't di ako pumapayag, kaya't tumango na lamang ako sa kanya bilang pagsang-ayon.
Napangiti naman siya ng maluwang. Pagkatapos ay nahiga na sa aking kama at hinila ako pahiga sa kanyang matitipunong dibdib at muling ipinalupot ang kanyang mga braso sa aking katawan.
Inangat ko ang aking paningin upang pagmasdan ang kanyang mukha. Bakas ang pagod at antok sa kanyang mukha. Saglit pa lamang s'yang nakahiga ay nakatulog na siya.
Madalas ang ganitong eksena sa pagitan naming dalawa. Parang napaka natural na lamang para sa amin ang matulog siya sa loob ng aking silid. Natural na tanawin na lamang din ang makita na nakayakap siya sa akin na para bang kahit sa kanyang pagtulog ay nais pa rin nya akong protektahan.
Unti-unting kumurba ang aking labi para sa isang ngiti. Bakit ganito? Bakit kakaiba ang saya na nadarama ko sa tuwing siya ang kasama ko? Bakit mabilis  ang pagtibok ng puso ko sa tuwing yayakapin niya ako?
Hindi ko maintindihan ang nadarama ko para sa kanya. Normal lamang ba na makadama ako ng ganito para sa kanya? Pero bakit hindi ko naman nararamdaman ang mga ito kila Kuya Sun. Maging kay Kuya Blaze at kay Nova. Tanging kay Torch ko lamang ito nadarama.
Nakatulugan ko na ang pag-iisip sa mga bagay na iyon ng hindi ko namamalayan. Nang magising ako ay papadilim na ang paligid. Nilingon ko ang kasama kong natulog.
Mahimbing pa rin ang tulog nito. Para bang ilang araw siyang walang tulog. Hinayaan ko na lamang na matulog muna siya upang makabawi  sa antok at pagod.
Dahan-dahan kong inalis sa pagkakayakap ang kanyang mga braso. Malapit ko na itong matanggal ng bigla na lamang itong gumalaw sa pagtulog at mas hinigpitan pa ang pagkakayakap sa akin.
Napangiwi ako dahil sa nangyari. Kailangan ko ng magpunta ng banyo dahil naiihi na talaga ako. Pero paano ako makakaalis kung ganito kahigpit ang yakap niya sa akin.
Sinubukan ko muling iangat ang kanyang mga braso ng dahan-dahan upang hindi siya magising. Sa pagkakataong ito ay nagtagumpay na akong alisin ang mga braso nya.
Maingat akong umalis mula sa pagkakahiga ko sa kanyang dibdib at nagmamadaling nagtungo sa banyo. Tapos na akong umihi ng makarinig ako ng mahinang lagabog na nagmula sa loob ng silid.
Hindi nagtagal ay narinig ko ang natatarantang pagtawag ni Torch sa aking pangalan. Napa-iling na lamang ako.
"Nandito lang ako sa loob ng banyo." pasigaw kong sagot.
Saglit lang ay nakarinig ako ng sunud-sunod na pagkatok sa labas ng pinto.
"Princess." pagtawag niya sa akin.
"Sandali lang." sabi ko bago nagmamadaling buksan ang pinto ng banyo.
Pagbukas ko ng pinto ay nakasimangot na mukha ni Torch ang bumungad sa akin.
"Bakit ka umalis ng hindi man lang nagpaalam sa akin?" tanong niya.
"Ang sarap kasi ng tulog mo kaya hindi na kita ginising. Tutal gumamit lang naman ako ng banyo." sagot ko naman sa kanya.
Hindi pa rin maipinta ang pagmumukha nito bago ako hilahin palabas ng banyo at dumiretso sa aking kama. Naupo sya sa gilid nito at hinila ako paupo sa kanyang mga hita. Pagkatapos ay niyakap ng mahigpit bago sinubsob sa pagitan ng aking leeg ang kanyang mukha.
Ilang sandali pa ay nag-angat itong muli ng mukha at tumitig sa akin.
"Basta sa susunod, huwag ka ng aalis sa tabi ko ng hindi nagpapaalam." sabi niya matapos ang mahabang katahimikan.
Tumango na lamang ako upang hindi na humaba ang usapan. Kahit naman kasi mangatwiran ako sa kanya ay wala ring mangyayari. Kaya mas mabuti pang sumang-ayon ako sa mga gusto niya para matapos ang usapan.
"Mag-ayos ka na, malapit ng maghapunan. Hihintayin na kita para sabay tayong bumaba." utos nya, bago ako marahang pakawalan.
"Okay." sagot ko bago mag-ayos ng sarili.
Saglit pa ay nakaayos na ako at pababa na kami papuntang komedor. Nang makita kong maraming tao sa sala ay biglang napahigpit ang hawak ko sa kamay ni Torch na naka-alalay sa akin. Nakayuko akong naglalakad habang papunta ng komedor para lamang iwasan ang tingin ng mga taong masayang nagkwekwentuhan sa sala.
"Okay ka lang?" mahinang tanong ni Torch sa akin.
Tumango na lamang ako sa kanya bago ipinagpatuloy ang paglalakad. Nakarating kami ng komedor na nakayuko pa rin ako.
Ipinaghila ako ng upuan ni Torch at inalalayan sa pag-upo bago sya humila ng para sa kanya. Magkatabi kami sa mesa. Ipinagsalin pa niya ako ng pagkain sa aking pinggan.
Sa buong durasyon ng hapunan ay tahimik lamang ako. Tanging pagtango at pag-iling lamang ang sagot ko sa mga sinasabi nina Kuya sa akin. Tahimik lang akong nakikinig sa kanilang usapan.
Matapos ang hapunan ay hinatid na ako ni Torch sa aking silid. Bago siya magpaalam ay humalik pa siya sa aking noo at pagkatapos ay pinapasok na ako sa aking silid.
"Goodnight, my Princess." dinig ko pang wika niya bago ko maisara ang pinto.