Sinikap ni Erin na gumising nang maaga upang hintayin ang paglabas ni Muel sa bahay nito. Alam niyang pang-umaga rin ang klase ni Muel dahil nakasagap din siya ng tsismis mula kay Neriza na may transferee student sa higher section at pareho rin sila na nasa 3rd year high school.
Hindi nga siya nabigo, nakita niyang papalabas na si Muel at malungkot pa rin ang itsura. Ginulat niya ito nang mabilis niya itong salubungin at harangan sa paglalakad.
“Ako ito, ang may-ari ng CD ng bandang masakit sa tainga. Kaya ibalik mo na ang CD, pati na rin ang magazine!” masiglang bungad ni Erin. Pasigaw pa iyon, tama lang upang gisingin ang natutulog na hormones sa katawan ni Muel na mukhang lantang gulay. Ngunit nagawa pa rin siya nitong i-ignore at nagpatuloy lang sa paglalakad.
“Ako ito, ang may-ari ng CD ng bandang masakit sa tainga. Kaya ibalik mo na ang CD, pati na rin ang magazine!” ulit ni Erin hangga't sa makarating na sila sa kanto malapit sa hintayan ng mga sasakyan. Gano'n pa rin, tila walang naririnig si Muel.
Nang makakita ng papalapit na bus, sumulyap si Muel kay Erin at inismiran lanang ito. Sinakyan niya iyon at si Erin naman, hindi pa rin nagpatinag sa pagsunod sa kanya. Talagang tinabihan pa siya nito sa upuan na kanyang pinili.
“Ako ito, ang may-ari ng CD ng bandang masakit sa tainga. Kaya ibalik mo na ang CD, pati na rin ang magazine!”
Lahat ay napatingin sa kanila. Nanlaki ang mga mata ni Muel at bahagyang hinawakan ang kwelyo ni Erin. “Tumigil ka, nakakahiya ka.”
“Ibalik mo na kasi ‘yong CD ko,” pabulong na pakiusap ni Erin kasabay ng pagyuko niya. Bahagya siyang napangiti nang maamoy niya ang banayad na pabango ni Muel nang magkalapit sila. Maski siya ay nahihiya na rin sa ginawa niyang pagsigaw. Ang iba kasi sa mga pasahero ay umiidlip pa bago makarating sa kanilang destinasyon.
Nagmamadaling bumaba si Muel nang makarating sila sa eskwelahan at hindi pa rin pala siya tinatantanan ni Erin.
“Ano bang gusto mong gawin ko para ibalik mo na yung cd ko huh?” habol pa ni Erin at pilit na inaabot ang backpack ni Muel.
“Binayaran ko yun ng 450. Dapat bayaran mo ako. Cash on delivery pala yon!” nababagot na tugon ni Muel bago magpatuloy sa paglalakad. Malapit na sila sa entrance gate ng school at natigilan siya dahil nakita niyang papasok pa lang ang kakilala niyang si Cheska. Kaklase niya ito at buti na lang, nasa iisang section lang sila. Tuluyan na niyang naiwasan si Erin nang lapitan niya si Cheska.
Habang si Erin naman ay natulala sa kanyang nakita. Nasaksihan lang naman niya kung paano magpaka-gentleman si Muel sa popular girl sa school nila. Siguro nga ay kasintahan na niya ito. Bagay din naman silang tingnan na magkasama.
“Oo nga naman, ang gwapo ay para sa maganda. Pero pag gwapo na pangit ang ugali, hindi nararapat sa isang babaeng maganda!”
Naagaw niya ang atensyon ng guard dahil sa kanyang pagsigaw. “Erin Lababo, dalian mo flag ceremony na! Yari ka na naman sa guidance counselor!”
“Opo! Heto na po!” Kumaripas din siya ng takbo.
****
“Ako ito, ang may-ari ng CD ng bandang masakit sa tainga. Kaya ibalik mo na ang CD, pati na rin ang magazine!”
Kusang tumiklop ang mga palad ni Muel pagkarinig niya sa sigaw ni Erin. Ayon sa isa niyang kaklase, kanina pa ito naghihintay sa kanya. Nauna kasing mag-lunch break ang ibang section. Nahihiya siyang sinulyapan si Cheska na isasabay niya sanang magpunta sa canteen para kumain bago ang susunod nilang subject.
Nilapitan ni Muel si Erin nang may pagbabanta sa kanyang tingin. “Mamaya ibabalik ko.”
Kahit mabilis niyang binawi ang tingin kay Erin, napansin pa rin niya ang biglang pag-aliwalas ng mukha nito dahil sa ipinangako niya ngunit minabuti niyang isawalang-bahala iyon dahil mas maganda pa rin ang mga ngiting nakikita niya kay Cheska. Bukod sa conflict niya sa mga magulang, si Cheska rin ang dahilan kung bakit siya lumipat ng school dahil gusto niya itong sundan. Cheska was his first love and until now, hindi nagbago ang damdamin niya para rito.
Sinundan pa rin ni Erin sina Cheska at Muel ngunit palihim nga lang. Napapansin niya na tanging si Cheska lang ang tinitingnan ni Muel at parang wala itong pakialam sa ibang tao. Sabagay, kung lalaki nga lang din si Erin, siguradong magkaka-crush din siya kay Cheska.
Normal naman sana ang mga pangyayari para kay Erin ngunit bigla na lang naging bayolente si Muel. Pinaupo muna nito si Cheska bago kwelyuhan ang isang lalaki at saka iyon sinunggaban ng magkakasunod na suntok. Nagsigawan ang lahat at mabilis na umawat ang isang janitor at dinala kaagad sila sa principal's office.
****
Kaklase ni Muel ang nakasagupa niya kanina at pinatawan kaagad sila ng kaparusahan ng principal. Pinapili pa sila kung suspension o community service pero walang pinili doon si Muel. Hiniling niya na magpalipat na lang sa lower section at ipinatawag na rin ang kanyang mga magulang. Labis ang panghihinayang ng adviser ni Muel dahil nasa higher section na siya at ipanlalaban sana sa quiz bee para mag-represent sa kanilang paaralan.
Siguro blessing na ang pangyayaring ito na kahihiyan para sa iba. Naghilamos muna siya sa comfort room bago sulyapan ang mukha sa salamin. Nagtamo siya ng pasa sa panga at pisngi. Natawa na lang siya. Mukhang sinaniban ni Manny Pacquiao ang kaklaseng kanyang nakaalitan ngunit alam niyang panalo siya dahil napaputok naman niya ang nguso nito.
Singdilim ng ulap ang kanyang anyo nang lisanin niya ang school. Nagbabadya ang ulan at wala siyang payong ngunit wala naman siyang pakialam kahit mabasa pa siya ng ulan. Blangko ang kanyang isip, naglalakad siya at hindi niya alam kung uuwi pa siya ng bahay. Sinabi kasi ng kanyang ama na naghihintay na ito sa pag-uwi niya para makapag-usap daw nang masinsinan. Pero alam niyang hindi naman sa pag-uusap mauuwi ang lahat. Hinahanda na lang niya ang katawan niya dahil paniguradong bubugbugin na naman siya nito.
“Pssst. Ibabalik mo na ang CD ko ‘di ba?”
Awtomatikong nilingon niya si Erin. Dahil sa pangungulit nito, kahit papaano'y napawi ang bigat ng mga alalahanin niya. “Oo, samahan mo muna ako pag-uwi.”
Nauna siyang lumakad at nakabuntot lang sa kanyang likuran si Erin. Hindi na rin napakali si Erin at talagang nais niyang malaman kung ano ang nangyari kay Muel matapos itong kausapin ng principal kanina. Pero, hindi naman sila close.
“Anong sabi ng principal?” Natutop agad ni Erin ang sariling bibig. Dapat kasi ay hindi niya isasatinig ang mga katagang iyon. Napahinto si Muel at sinamaan na naman ang pagkakatitig sa kanya.
“Ililipat ako sa section n'yo. Masaya ka na ba?” naiinis na sagot ni Muel.
“Hindi, baka ikaw na ang maging top 1 sa'min pag nandoon ka na,” nakasimangot na tugon ni Erin. “Threatened ako sa tulad mong magiging quiz bee representative sana sa national division.”
Nakaramdam din siya ng kirot sa mga salita ni Muel, alam niyang nakakahiya para sa tulad nito ang mapunta sa mababang pangkat dahil lang sa isang insidente pero hindi naman niya ugaling magtago ng sentiments paminsan-minsan.
“Mag-aral ka kasi nang mabuti at tigilan mo na ang pag-a-idolize sa bandang hindi maintindihan ang hairstyles at pangit ang mga kanta,” pang-aasar pa ni Muel. Mabilis niyang napuna ang pagbusangot ni Erin. Batid niyang apektado ito nang husto kapag idol na nito ang kini-criticize na parang handa itong makipagpatayan.
“Hoy, nag-aaral kaya ako at sila ang inspirasyon ko!” bwelta pa ni Erin. Napangisi si Muel.
“Anong pangalan mo pala? Hinihingi mo sa'kin ang CD mo tapos hindi ka man lang nagpakilala?” Pinarisan ni Muel ng nakakalokong pagngisi ang tanong na iyon.
“Erin.”
“Erin?”
Napakamot-ulo na lang si Erin at tinalikuran na lang si Muel. Ayaw na ayaw niya kasing binabanggit ang apelyido niya sa ibang tao.
“Hula ko, nakikita sa kusina ang apelyido mo. Tama?” pambubuyo ni Muel na ikinausok ng ilong ni Erin. Umirap lang din ito sa kanya.
“Oo na! Lababo. La—ba—bo! Masaya ka na?”
“Oo. Nakakatawa kasi e.” Inunahan ni Muel sa paglalakad si Erin. Kanina lang din niya nalaman ang pangalan nito dahil nakapaskil sa board ng classroom ng bago niyang section ang listahan ng mga nasa top 10. Top 1 si Erin at naroon din ang litrato nito.
He grinned upon knowing her name. He guessed, that's the kind of name he won't forget. At isa pa, kahit papaano'y napagagaan ng may-ari ng kakaibang pangalan ang bigat ng kanyang loob sa ngayon.