"Ano bang ginagawa mo Candy? Parang kang natatanga." Inis kong palo sa kamay niyang panay ang ikot sa akin.
Lumukot ang mukha niya at nag-cross arm sa harapan ko. Naniningkit pa ang mga mata sa akin.
Kadadating ko lang. Wala kaming practice ngayon kaya naman medyo late akong dumating—hindi pala medyo, late talaga ako. 'Yong unang subject namin ay hindi ko napasukan. Ang ending tuloy hindi ako nakapag-take ng quiz sa kanina. Twenty items lang naman pero malaki rin ang puntos no'n. Pupuntahan ko na lang ang teacher ko mamaya at hihingi ng consideration para makapag-take ako ng quiz.
"Bakit ngayon ka lang? Isang oras at kalahati kang late, Abigail. Huwag mo sabihing inuna mo pang dumayo sa building nila Troy kaysa ang mag-take ng quiz na'tin?" Namimilog ang mata niyang tanong.
Umiling ako at bahagya siyang hinawi para naman makapasok na ako sa room. Wala kaming teacher sa second subject dahil may sakit ito. Ngunit may iniwan naman na mga susulatin at reviewer para sa quiz na ibibigay sa friday. Ang daming quiz, ang daming sasagutan. Sumasabay talaga kung kailan wala akong gana.
"Ano bang pinagsasabi mo? Kita mong kakapasok ko lang, paano ako dadayo do'n kung kakarating ko lang, sige nga?" Baling ko sa kaniya.
Ngumuso naman itong umupo sa upuan niya. Magkatabi kami ni Candy kaya't hindi ko siya maiiwasan sa mga mahahabang tanong na alam kong iniipon niya sa kaloob looban niya.
"Ngayon ka lang na-late, Abigail. Sabihin mo nga sa 'kin, may problema ka ba?" Seryoso niyang tanong at inilapit pa lalo ang upuan sa akin.
"Mukha ba akong may problema?" Tanong ko rin.
Ngumiwi ito at mahinang hinampas ako sa braso. "Tinatanong kita ng maayos, Abigail. Naandar na naman 'yang kaeng-ingan mo."
Napahimas ako sa braso ko. Ngumiwi pa ako na parang nasasaktan ngunit irap ang napala ko sa kaniya. Bumuntong hininga ako maayos siyang hinarap.
"Late akong nagising, Candy. Natural na mala-late ako dito dahil tinanghali ako ng gising. Ano ayos na?"
Umiling siya. "May hindi ka pa sinasabi sa akin. Open up, makikinig naman ako." Pamimilit pa niya.
"Ang sabihin mo gusto mo lang nang chismis." Usal ko at kinuha ang notebook ko kung saan sinulat ko 'yong mga pointers para sa laman ng quiz. 
Binuklat ko iyon at nagsimulang reviewhin lahat. Hindi ako nakapag-aral kagabi dahil tinatamad ako. Idagdag pa na pinasama ni Troy ang loob ko. Hindi man lang ako kinumusta kung ayos lang ba ako pagkatapos no'ng paghablot ni Sameul sa akin, ang sama talaga. Pinagbintangan pa ako na para bang ako ang lumalapit sa kaklase niya.
"Magsalita ka na, huwag mong sayangin ang oras, Abigail." Yugyog niya sa akin.
"Ano bang gusto mong sabihin ko, Candy?" Tanong ko habang nakatingin pa rin sa notebook ko.
Hindi ko alam kung makakakuha ba ako ng perfect score mamaya dahil kahit pinipilit kong ipasok sa utak ko lahat ng pointers ay hindi ko magawa. Idagdag pa ang kakulitan nitong si Candy na sobrang hilig sa chismis.
"Sa pagkakasabi mong 'yan parang ang dami mong kailangang i-kuwento sa akin, Abigail ah. Bakit kaya hindi mo umpisahan sa pinaka-una?"
Binalingan ko siya. "Paano ang quiz ko?" Tanong ko sa kaniya at kumindat naman ito sa akin.
"Kopya ka sa 'kin." Aniya at napangiti naman ako.
Inayos ko sa bag ang notebook ko at humarap sa kaniya. Inumpisahan ko ang kuwento ko mula doon sa pagpunta ko sa waiting shed hanggang sa nagkahiwalay kami ni Troy sa pag-uwi. Panay ang ngiwi niya at irap sa kawalan at bawat sentence na natatapos ko sa pag-ku-kuwento ay lagi siyang may komento.
"Eh siraulo naman pala 'yang si Troy—"
"Bunganga mo." Takip ko sa bibig niya. Nanlalaki ang mata niya at tinapik tapik ang palad ko na mabilis kong inalis sa kaniya.
"Totoo naman eh! Nakita ka naman pala niya na hinila ni Sameul, tapos para siyang tanga na naghihimutok?"
"Wala naman akong sinabing naghihimutok siya, Candy. Ang sabi ko, para pa nga siyang natutuwa dahil mawawala ako sa tabi niya. Hindi niya na ako magiging buntot, gano'n."
"Kahit na gano'n pa rin ang dating no'n. May katarata ata sa mata 'yang Troy na 'yan." Anas pa niya.
"Hayaan mo na. Pero kahit sabihin niya naman 'yon asa naman siyang lalayo ako." Ngisi ko kinalauanan.
"Ewan ko sa 'yo girl, masyado mong kina-career ang pagiging tanga mo."
"Suportado mo naman." Sundot ko sa tagiliran niya.
"Napipilitan lang ako." Sabi niya at inaayos ang upuan.
Hindi ko na siya pinansin, pinagtuunan ko na lang ang papel niya sa quiz na ipapaki-usap ko pa mamaya. Kasalanan talaga 'to ni Troy kaya ang ending ko ngayon ay kokopya na lang. Kung hindi niya kasi ako sinabihan no'n edi sana nakangiti akong nagre-review kagabi.
Ilang oras ang lumipas at breaktime na. Hindi muna ako dumiretso sa cafeteria bagkus ay tinungo ko ang faculty room kung saan naka-puwesto ang first subject teacher ko. Hindi naman ako nahirapan na makiusap, dahil gumawa naman ako ng letter at pinapirmahan ko kay Candy gamit ang pirma ni Tiya Anne.
Madali lang akong natapos. At agad ring nagtungo sa cafeteria kung saan doon ko nakita si Candy na kasama ang nobyo niyang si Kel. Matagal na silang dalawa. Sikat si Kel bilang isang magaling na manlalaro sa basketball at top achiever sa klase. Gano'n din naman si Candy. Minsan ay nagkakasundo ang grades namin kaya parehas kaming nailalagay sa parehas na top. Masaya naman kami doon dahil pati sa grades ay best friend kami.
Hindi na ako nagpakita kay Candy. Bumili lang ako ng makakain ko at lumabas na rin. Balak kong bisitahin si Troy ngayon. Pakiramdam ko kasi ay kailangan ko siyang makita. Hindi man ako natutuwa sa kaniya ay nami-miss ko naman ang kamalditahan niya. At isa pa, kukunin ko 'yong tupperware ni Tiya. Hinahanap niya sa akin 'yon pagka-uwi ko, at kung hindi ko 'yon mababalik ngayon ay baka mapalayas ako ni Tiya. Alam ko namang hindi niya kayang gawin 'yon pero alam ko ring mahalaga ang gamit na 'yon sa kaniya dahil tupperware ang tatak.
"Brad si Abigail!"
Para akong binuhusan ng malamig na tubig nang marinig ang malakas na sigaw na iyon. Hindi ko pa man nahahakbang nang tuluyan ang mga paa ko sa unang baitang ng hagdan ay umalingawngaw na agad sa taas ang pangalan ko.
"Babain mo na!" Sigaw pa nang kaninang boses, hindi ko alam kung tatakbo ba ako pababa ulit o tutuloy na lang para makita si Troy. Ngunit bago pa ako makapag-desisyon ay may kumalabit na sa likod ko.
Napasinghap ako nang makitang si Troy iyon. Blangko ang mukha habang nakapamulsa ang isang kamay niya.
"Anong ginagawa mo dito?" Takang tanong niya.
Napalunok naman ako. "I-Iyong tupperware ni Tiya... Kukunin ko." Patuloy ko.
"Nasa baba ang bag ko. Tara." Aniya sabay talikod.
Hindi ako nag-aksaya ng oras. Ayaw ko rin namang makita si Samuel kaya't mabilis akong sumunod sa kaniya. Nakarating kami sa may library, andoon niya pala iniwan ang gamit niya dahil nagre-review siya kanina para rin sa paparating nilang exam.
"Kinain mo ba 'yong laman?" Tanong ko habang yakap yakap 'yong baunan.
Tumingin siya sa akin. "Oo, para sa akin naman 'yon hindi ba?"
"Oo naman. Kaya nga inabot ko sa 'yo kahapon eh." Saad ko pa at tumabi sa kaniya. Ayon na naman ang kunot niyang noo. Ngumiti lang ako at ipinatong ang baunan sa mesa at ginawa ko 'yong unan.
"Malapit nang matapos ang break time niyo, bumalik ka na." Malamig niyang sabi sabay buklat sa sunod niyang libro.
"Wala na kaming klase."
Muli niya akong tiningnan. Isang tingin na hindi naniniwala sa sinabi ko.
"Wala pa namang alas-kwarto." Tingin niya sa kaniyang relo at muling baling sa akin.
"May meeting lahat ng teacher. Maging ang sa inyo ay mayro'n din." Aniya ko.
"Impossible—"
"Anong impossible ka jan. Hindi ka naniniwala sa akin?" Ngiwing tanong ko at bumangon. "Baka nakakalimutan mong vice president ako ng senior high." Pagmamalaki ko sa kaniya. "Napag-usapan lang 'yon kanina. Kaya nga ako pumunta sa 'yo ngayon dahil libre ang oras ko. Hindi ka ba nagtataka na bakit nandito ako ngayon? Hindi ba't usually bago pumasok at uwian lang kita kinukulit."
"Oh eh, bakit hindi ka pa umuwi? Naibigay ko na ang baunan mo, umalis ka na." Pagtataboy niya.
Umiling ako. "May kasalanan ka pa sa akin ah, ngayon naman dinagdagan mo." Nguso ko at muling ipinatong ang pisngi ko sa baunan.
Sinundan iyon ng tingin ni Troy at maya maya ay bumuntong hininga habang kinukuha ang bag niya. Iniabot niya 'yon sa akin at kinuha naman ang ginagawa kong unan.
"Iyan ang gawin mong unan." Aniya sabay focus muli sa libro niya.
Hindi ko mapigilang hindi mapangiti. Parang nabura ang hinanakit ko sa kaniya ng gano'n kadali. Kinikilig na naman ako.
"Kain tayo sa labas, Troy." Aya ko.
"Hindi ako puwede." Hindi man lang niya pinag-isipan ang sagot niya.
"Sige na, bumawi ka naman sa 'kin."
"Bakit naman ako babawi sa 'yo? Girlfriend ba kita?" Anas nito.
Mas lalong similay ang ngisi sa aking labi. "Hindi pa pero kung sasagutin mo na ako ngayon, edi girlfriend mo na ako." Kinikilig kong aniya.
Ngumiwi ito sabay ngisi rin kinalaunan. "Ayaw ko ng girlfriend sis, sorry."
"Oh edi boyfriend! Puwede mo naman akong maging boyfriend!" Inis kong singhal sa mababang boses lang.
Mas lalo siyang ngumisi. "You can't be, bebe." Himas niya pa sa pisngi ko.
Pinalo ko ang kamay niya. "At bakit naman?"
"Wala ka naman kasing hotdog." Irap niya at halakhak sa mahinang boses.
"Edi magpapalagay ako! Problema ba 'yon?!"
Hindi maipinta ang mukha ni Troy sa mga sumunod na segundo. Para siyang na-eskandalo sa sinabi ko. Napahimas pa siya sa magkabila niyang sintido.
"Ewan ko sa 'yong babae ka. Umalis ka na nga, mamaya dumating si Jack dito at makita tayong dalawa, ewan ko na lang talaga."
"Lagi mo na lang ako pinagtatabuyan, Troy." Pangangalumbaba ko naman.
"Iyon naman ang role ko dito, Abigail. Ang ipagtabuyan ka, hindi ba?" Patol niya.
"Sinasaktan mo na naman ako." Nagpapaawa ko pang sabi.
Mataray itong tumingin sa akin. Nagbibiro lang naman ako pero 'yong sunod na lumabas sa bibig niya ay tila isang bala na para talaga sa akin.
"Ikaw naman ang may gusto niyan Abigail. Kung nasasaktan ka, kasalanan mo 'yan dahil pilit mong isinisiksik ang sarili mo sa akin. Sa akin na malabong magka-gusto sa 'yo."