Bakit hindi ko ito napansin kanina? Kusang ngumiti ang mga labi ko at tumapat ako kung nasaan ito.
"Ate pwede patingin ako nito." Itinuro ko ang kwintas na music note.
"This one po ba Ma'am?" magalang na tanong nito sa akin.
Tumango ako at ngumiti.
Inilabas nya ito mula sa glass case at inilapag sa taas nito. Hindi na ako nagpaalam na hawakan ito at ilabas sa lalagyan. Kuminang ang mata ko nang makita ang kabuuan nito.
"Magkano po 'to Miss?" Tanging sa kwintas lang ako nakatingin nang tanungin ko iyon.
"That's twenty thousand Ma'am. Limited edition po kasi iyan, kung hindi nyo po napapansin ay kami lang ang mayroong ganyan, out of stock na rin po at nag-iisa na lang talaga iyan. Pinababa na po ang presyo nyan kaya mura na lang." Nakangiti nitong paliwanag sa akin.
Halos lumuwa ang mata ko at ubuhin nang malaman ang presyo. Nanlumo ako nang maisip na limang libo lang ang nandito sa wallet ko. Ibig sabihin ay hindi ko mabibili at may chance na mabili ng iba kapag hindi ko kinuha.
Kung pwede nga lang ipalista ang pangalan ng Presidente ay ginawa ko na o 'di kaya naman ay mangutang ako rito sa Ate na Sales lady.
Mulungkot akong ngumiti at isinauli ang kwintas sa box nito.
"Five thousand lang ang pera ko rito Miss eh."
"Ay sayang naman po Ma'am, bagay na bagay pa naman ito sa mala anghel na muka nyo." Langya, nambola pa si Ate Sales lady.
Awkward na lang akong ngumiti at nagpasalamat. Siguro naman makakahanap pa ako ng ganong kwintas kahit hindi na ganon kamahal ay ayos na sa akin. Nanghihinayang akong umalis sa shop na iyon at nagpunta naman sa Tom's World.
Inubos ko ang oras sa paglalaro. Halos hindi na nga rin ako nakaramdam ng gutom. Saka lang ako roon lumabas nang magsaktong 5 ng hapon. Doon ko lang din binuksan ang phone ko. Pumasok agad ang maraming mensahe ni James at Yuan.
Yuan:
"Kanina pa kami tumatawag, nasan ka na ba?"
"Nagtatampo si Jackie. Hinihintay ka namin dito sa airport."
"Nakalimutan mo na ba? Ihahatid natin sya?"
James:
"Naihatid na namin si Jackie."
"Hindi ka namin nahintay."
"Kau-uwi lang namin ni Yuan."
"Hahaha hindi ka raw pasasalubungan ni Jackie dahil hindi ka sumulpot."
Tangena?! Oo nga pala, aalis sya. Bakit hindi ko naalala? Napasampal na lang ako sa noo dahil nakalimutan ko talaga.
Tumawag agad ako kay James. Isang ring pa lang ay sinagot na kaagad nya.
"Hello? James, sorry nakalimutan ko." Naglalakad na ako para makalabas na ng Mall.
Tumawa sya sa kabilang linya.
[It's okay Love, busy ka ngayon kaya naiintindihan ko.] Malambing nyang sabi sa kabilang linya.
Kinilabutan at nanlaki ang mata ko dahil sa sinabi nya. Sabog ba sya? Naka-take ata sya ng drugs eh. Kulang na lang ay masuka ako dahil umulit-ulit sa pandinig ko ang sinabi nya. Tinignan ko pa kung si James na kaibigan ko ba talaga ang natawagan ko. Sya talaga. Natigil din ako sa paglalakad dahil doon.
"Putang ina mo James! Anong kabobohan 'yan? Gagoo, Love amputa, 'di mo bagay lumande depungal ka!" Pinagmumura ko sya sa kabilang linya pero tanging tawa lang ang isinukli nya.
[Ganon ba Love? Okay okay, I will visit you, I missed you.]
Ano bang nakain ng gagong 'to at kung ano-anong kademonyohan ang pinagsasasabi?
"Ewan ko sa 'yo gagoo! Papatayin talaga kita kapag nakita kita. Ibababa ko na."
[Bye, I love you.]
Nandidiri talaga ako sa gagong 'to. Pinatay ko na ang tawag at naglakad na palabas. Sandali pa ay nakareceived ako ng mensahe galing sa unggoy.
James:
"Mim, sorry haha 'wag mo 'kong saktan. Nagbibiro lang naman ako, may babae kasing kumukulit sa akin."
Kaya naman pala ganon sya kung makapag salita. Peste ka, dinamay mo pa talaga ako? Kakaltukan pa rin talaga kitang yawa ka.
Ako:
"Lul. Pautangin mo 'ko 15k may bibilhin ako."
James:
"Gagoo! Anong akala mo sa 'kin? Tumatae ng pera?"
Ako:
"Sige na, babayaran ko rin naman."
James:
"Kailan? Sa katapusan ng mundo?"
Ako:
"Haha, hindi ah."
James:
"Sige, kailan mo ba kailangan?"
Ako:
"Bukas."
James:
"Sige sige. Dumiretso ka na tuloy sa bahay nila Yuan. Pupunta na rin ako pagkatapos ko rito, practice tayo."
Ako:
"Nasaan ka ba?"
Hindi na sya nagreply nang tanungin ko iyon. Siguro busy na ang loko. Pasakay na ako ng taxi nang mahagip ng mata ko ang itim na BMW 'di kalayuan sa pagsasakayan ko ng taxi. Nakabukas ang front seat nito at kitang kita ko ang babae mula rito. Nakatalikod kasi ang lalaki sa pwesto ko kaya 'yung babae lang ang kita ko.
Nanlaki ang mata ko nang mamukhaan ito. Pakshet? 'Yung girlfriend ni Koeld! Niliitan ko ang mata ko para mas klaro kong makita kung ano ang ginagawa nila. Napa-iwas agad ako ng tingin dahil sa nakita. Naghahalikan ang pucha! Sumikip ang dibdib ko dahil doon. Nang tumingin ulit ako sa kanila ay hindi na. Ewan ko ba pero kahit nakahinga na ako ng maluwag ay mabigat pa rin ang dibdib ko.
Sumakay ako sa taxi na una kong nakita. Padabog kong binuksan ang pintuan niyon at pabagsak ko ring isinarado nang makasakay na ako sa loob.
Galit at halos pabulyaw kong sinabi kung saan ako pupunta. Nagulat ko pa nga yata ang driver ng taxi dahil sa inasta ko. Nakaramdam ako ng guilt kaya nagsorry agad ako dahil nadamay sya sa kainitan ng ulo ko.
Hinilot ko ang sentido nang maramdaman ang pananakit ng ulo ko. Hindi ko na lang ito pinansin dahil stress lang siguro ako. Nagbayad ako pagkatapos ay bumaba nang nasa tapat na ako ng bahay nila Yuan.
Nakita ko ang sasakyan ni James sa labas ng gate nila Yuan. Naunahan pa akong makarating ng loko. Pinagbuksan ako ng gate ng guard nila.
Si James at Yuan ay suportado parehas ng kanilang pamilya. Kahit mayaman din sila ay ayaw nilang mag handle ng business. Tulad ko, passion talaga ang pagbabanda. Ito ang calling namin.
Ang lungkot lang dahil umalis si Jackie sa banda para sa pamilya nya. Naiintindihan naman namin dahil hindi nga naman sapat ang kinikita namin sa pagbabanda. Lalo pa't sya lang ang inaasahan sa kanila dahil hindi sila nakaka-angat sa buhay.
Pagpasok ko sa front door ay nakita ko roon ang nakababatang kapatid ni Yuan na si Krystal. She's 16 years old.
"Ate Mim!" Tumakbo agad ito sa akin nang makita ako. Mahigpit nya akong niyakap na sinuklian ko naman.
Malapad pareho ang ngiti namin. Mabait na bata si Krystal at malapit dito ang loob namin ni Jackie.
"Ate, bakit hindi ka nakarating sa airport kanina? Kasama ako nung hinatid nila Kuya si Ate Jackie eh," nakapout na sabi nya.
Pinisil ko ang pisngi nya.
"Nakalimutan ko." Tumawa ako.
"Pinapasabi pala ni Kuya na kapag dumating ka, punta ka na lang sa music room."
"Okay, akyat na ako." Ini-wave nya ang kanan nyang kamay at bumalik na sa panonood ng k-drama.
Umakyat ako sa pangalawang palapag ng kanilang bahay at dumiretso ako sa kaliwang pasilyo. Soundproof ang music room kaya nakakapag practice kami ng hindi nakaka-istorbo.
Huminto ako sa isang pinto at walang katok-katok na binuksan ito. Nabaling sa akin ang atensyon ng dalawang unggoy na nag-kukulitan habang nagpa-practice.
"Mim, I missed you!" asar ni James saka tumawa.
Inirapan ko sya at itinaas ang middle finger ko.
"Lul!"
"Panget mo ka-bonding!" sita nya.
Tumawa lang ako. "Kaya ba natin?" tanong ko. Tinutukoy ang pagpe-perform kahit kulang kami.
"Kaya 'yan," positibong sabi ni Yuan.
"Mahihirapan akong kumanta habang tumutugtog sa electric guitar," angal ko.
Napakamot sa ulo ang dalawa.
"Try kaya nating magpahanap kay Elsa? 'Yung interesado sa banda," wika ni Yuan.
"Oo nga, marami 'yung kakilala," sabi naman ni James.
Agad na tinawagan ni Yuan si Elsa at sinabi ang pakay namin. Susubukan daw nya dahil wala raw syang kilalang mahilig sa pagbabanda. Namroblema kami dahil mukang hindi na naman kami makakatugtog ngayong gabi. Ibig sabihin ay wala na naman kaming kita.
Mabuti na lang at ito ang prinoblema namin dahil hindi nakakasingit sa utak ko ang problema sa bahay maging sa nakita ko kanina.
"Ikaw na lang mag-perform ngayon Mim, si Yuan na lang ang maggigitara," suhestiyon ni James.
"Pwede naman 'yon 'di ba?" tanong pa ni James.
"Malamang, bobo ka talaga." Binatukan agad ni Yuan si James saka sila nagtawanan.
"Sige, need ko ng pera eh."
"Ano ba kasi 'yung bibilhin mo?" tanong ni James.
"Necklace, ang ganda kasi ng pendant," paliwanag ko.
"Putspa! Tapos umabot ng 15k?" Nanlaki ang mata ni James at Yuan sa gulat.
"20k pa nga 'yun eh," natatawang sabi ko.
"Hahaha, isa lang solusyon dyan. Benta mo na isang atay mo," pambibiro ni James.
"Gagoo, 'di na kailangan kasi mangungutang na lang ako sa 'yo."
"So ano pa ang hinihintay nyo, pasko? Practice na kayo," utos ni James.
"Sabi nga namin, heto na nga 'di ba?" sarkastiko kong sabi.
Inayos ko ang stand mic. Saka kami nag-usap ni Yuan kung ano ang kakantahin.