Dumaan ang kalahating oras. Nandito pa rin kami sa Beer Garden, hanggang ngayon ay hindi pa rin namin maka-usap ang kaharap namin. Si Elsa lang ang nagtitiis na kumausap dito dahil sobrang tipid nito kung sumagot. Madalas ay hindi pa sasagot at hindi pinapansin ang itinatanong sa kanya.
Light liqour lang ang iniinom ko maging sila James dahil magda-drive pa ang mga 'yan pauwi. Si Jackie naman ay juice ang pinakuha, ayaw nya raw uminom.
"Jackie pansin ko, tahimik ka nitong mga nakaraang araw. May problema ba?" Hindi ko na natiis at tinanong ko na sya.
Baka kasi may problema sya, hindi lang nya sinasabi. Mararamdaman mo naman iyon kung may problema ang kaibigan mo. Dalawang taon na kaming magkakasama sa banda kaya kabisado ko na kung may problema ba sila.
Agad syang namutla sa tinanong ko at bahagyang nanlaki ang mata. Ngumiti sya ng pilit saka nagsalita, kitang kita ko na kinakabahan sya.
"P-paano mo nasabi? Wala akong problema Mim." Nilakihan nya ang ngiti nya para lang iparating na nagsasabi sya ng totoo, kahit ramdam kong hindi.
Magsasalita pa sana ako kaso ikinagulat ko nang biglang pumagitna si Elsa sa aming dalawa. Mukang lasing na sya dahil sa dami ng alak na nainom nya, i-plus mo pa na puro hard liquor ang iniinom nya.
"Ay Koeld hahaha, naipakilala ko na ba sa 'yo itong banda na tumugtog kanina?" Tumawa si Elsa. Amoy ko na ang buga ng hininga nya. Amoy alak.
"Oo Elsa, naipakilala mo na kami kanina pa, siguro mga pang limang beses na," bulong ko sa kanya kaso hindi nya ata pinakinggan o hindi nya lang narinig?
"This is Jackie the lead guitarist, Yuan the bassist, James the drummer, and lastly... This is Gemimah also known as Mim, the lead vocalist!" Tinakpan ko ang tenga ko sa pagtili nya sa dulo.
"Sila ang bandang paborito rito sa bar, basta banggitin mo lang ang Timeless Band ay tiyak na maraming magdadagsaan sa pagpunta rito," pagmamayabang ni Elsa.
Tinignan ko kung ano na ang reaksyon ni Koeld dahil paulit ulit na lang ang sinasabi ni Elsa.
Ganon pa rin, walang reaksyon. Hindi ito nakatingin sa amin kaya malaya ko na namang napagmamasdan ang muka nya.
Matangos ang ilong nya, perpekto ang panga, makapal ang kilay, mahaba ang pilik-mata at mapula ang labi. Kumunot ang noo ko nang mapansin ang round piercing sa gilid ng kanyang labi. Tinignan ko ang magkabilaan nyang tenga, meron din. Hindi rin nakatakas sa paningin ko ang tattoo sa gilid ng tenga nya. Muka syang gangster, sa tindig pa lang nya at sa well-built na katawan. Maging sa porma nya ay mahahalata.
Kumabog ang dibdib ko nang tumaas ang tingin nya at nagtama ang paningin namin. Nakaramdam ako ng hiya kaya mabilisan kong iniwas ang paningin ko. Napalunok ako kaya agad kong kinuha ang isang beer at inisahang inom.
"Koeld ano ba fb account mo? Add nga kita, babalik ka ba rito bukas?" tanong ni Elsa.
"Depends." Pati sa pagsasalita nya ay malalim at napakalamig.
Tipong kikilabutan ang kahit na sinong makarinig ng boses nya. Mula kanina ay hindi na huminto sa pagkabog ng mabilis ang dibdib ko.
"Uwi na tayo," aya ni Jackie.
"Oo nga, baka maparami pa inom natin," ani James.
Nagsitayuan na sila. Loading pa ako nung una dahil parang ayaw ko pang umalis.
"Huy! 'Di ka pa uuwi?" Saka lang ako tumayo nang kinalabit ako ni James.
Tinignan ko si Koeld sa huling pagkakataon. Hindi pa kaya ito uuwi? Wala pa syang balak? Pano kung malasing sya tapos nagdrive sya pauwi? Pano kung maaksidente sya? O pano kung rape-in sya ni Elsa? Gagoo delikado!
"Hoy gago Elsa, sumabay ka na sa 'min pauwi!" Hinila ko si Elsa dahil mukang may balak nga sya.
May tama na rin kasi kaya mas maganda nang ihatid namin.
"Si Koeld na maghahatid sa akin, una na kayo!" Pinagtulakan kami ni Elsa para makalakad na paalis.
"Hayaan mo na sya dyan." Aalma pa sana ako kaso hinila na ako paalis ni James.
Hindi na ako nakapalag at nagpahila na lang. Hindi ko na muling nasulyapan si Koeld kung nakatingin ba ito sa amin o hindi. Malamang hindi. Sino ba naman kami 'di ba?
Sumakay na kami parehas ni Jackie sa backseat ng pick-up. Si Yuan sa front, si James ang nagdadrive dahil sa kanya itong pick-up. Ito ang palaging service namin sa tuwing may gig kami.
"Ako na muna ihatid mo James," pagsasalita ni Jackie.
"Okay."
Matapos maihatid ni Jackie ay ako ang sumunod. Kinuha ko ang acoustic guitar sa likod ng pick-up dahil madalas akong tumugtog ng gitara sa bahay.
"Bye, ingat sila sa inyo!" Sigaw ko saka kumaway sa kanila.
Pinagbuksan ako ni Kuya Lando ng gate, guard namin. Ngumiti ako saka bumati sa kanya.
Dumiretso ako sa dining area para kumain. Naabutan ko roon si Mommy na nakadekwatro. She's wearing a red silk robe, elegante itong umiinom sa baso ng wine.
Hindi ko sya pinansin at nagsandok ng pagkain. Tulog na ang mga katulong namin kaya sariling asikaso na lang ang gagawin ko.
Hindi ko close ang Mommy ko, daddy's girl ako. Simula pagkabata ay malayo ang loob ni Mommy sa akin ganon din ako. Hindi rin sila ayos ni Daddy, palagi nya itong inaaway kahit wala naman syang dahilan. Ewan ko ba sa kanya, pinaglihi yata ito nila Lola sa sama ng loob kaya ganyan.
"You really don't take my advice to leave that stupid band," aniya sa malamig na tono.
"Dito ako masaya," sagot ko. Totoo naman kasi, eto ang kasiyahan ko. Suportado ako ni Daddy sa kahit na anong gawin ko sa buhay.
"Is that it? You think aangat kayo dyan?" sarcastic na sabi nya at sinabayan pa ng nakaka-asar na tawa.
Pabagsak kong binitiwan ang kutsara at tinidor na hawak ko. Tumingin ako sa kanya ng masama.
"Hindi... hindi pa, kaya maghintay ka," iritable kong sagot.
Nawalan na ako ng gana kaya inilagay ko na ang pinagkainan ko sa sink at hinugasan ang plato na ginamit ko. Hindi ko na ulit sya hinintay magsalita, lumakad na ako paalis don at umakyat sa hagdan. Nagtuloy ako sa kwarto ko.
Isinabit ko ang gitara sa pader. Naghalf bath ako bago ako tuluyang natulog.
Kinaumagahan ay maaga akong nagising. Naligo muna ako bago bumaba para sumabay kila Daddy sa almusal.
"Morning Dad." Masaya akong humalik ako sa pisngi nya.
Hindi ko na sana babatiin si Mommy at hahalikan sa pisngi kaso nakita ko ang pagsenyas ni Dad na gawin ko rin iyon kay Mommy kaya wala akong nagawa. Labag sa loob kong hinalikan sya sa pisngi at binati.
Muka rin namang labag ito sa loob nya kaya parehas lang kami nang nararamdaman.
"How's the band?" tanong ni Daddy sa kalagitnaan ng pagkain.
"Maayos naman po Dad, actually marami nang nag-aabang at naghihintay sa amin kapag tumutugtog kami," masaya kong kwento sa kanya. "Hindi katulad dati na halos wala kaming taga hanga." Tumawa ako.
Narinig ko na naman ang sarcastic na tawa ni Mommy. Palihim akong umirap dahil baka kapag nakita na naman iyon ni Daddy ay malalagot ako. Mahal na mahal nya ang Mommy kahit na ganyan kasama ang ugali nyan. Tahimik lang si Dad kapag inaaway sya sa mga walang katuturang dahilan. Ang malas nga ni Daddy sa kanya eh kasi sya pa ang napangasawa nito, napaka maintindihin ni Dad pagdating kay Mommy.
Mapagpasensya at wala kang makikitang ni katiting na pagsisisi na napangasawa nya ito. Ayaw ni Dad na binabastos ko si Mom pero ayaw rin naman ni Dad na pinipigilan ako ni Mommy sa mga gusto kong gawin at sa mga desisyon na ginagawa ko.
"Kaya lumaking bastos 'yang anak mo at mukang walang mararating sa buhay ay dahil kinukunsinti mo! My God Rodolfo, she's already 22, she must be handling the company right now. Dahil sa estupidang pagbabanda na 'yan, hanggang dyan na lang sya." Huminga ako ng malalim para pakalmahin ang sarili ko.
Kailangan ko na rin yatang matutong magbeatbox para sabayan sya sa pagra-rap. Sige, minsan nga ay gawin ko iyon, mukang masaya eh.
"May sariling desisyon ang anak natin Cecilia, let's respect it," mahinahong sabi ni Dad.
"I don't care! Ako ang dapat na sinusunod nya at hindi 'yang maling desisyon nya sa buhay," hirit pa nya.
"Ilang beses ko bang dapat ulit-ulitin na ayaw ko sa kumpanya? Hindi 'yun ang calling ko." Hindi ko na natiis ang bunganga ko sa pagputak.
"Gem," nagbabanta agad na tawag sa akin ni Dad.
"See how rude she is?" Tinuro pa ako ni Mommy at bahagya syang tumawa sa nakakainis na tono.
"Mom, pati ba naman sa harap ng hapag ay pag-aawayan natin ito?" iritableng tanong ko.
'Yung mga maids ay tahimik lang sa isang gilid at pinakikinggan ang mga sagutan namin.
"I'm done." Padabog na tumayo si Mommy sa kinauupuan nya.
Nakarinig na lang kami ng pag-alis ng sasakyan. Napailing ako at pakiramdam ko'y nawalan na naman ako ng gana.
"Gem, please be kind to your Mother, palagi mo syang intindihin at pagpasensyahan, huwag mo na lang pansinin ang mga sinasabi nyang mali ang naging desisyon mo sa pagpili ng kasiyahan mo. Always choose what's best for you. Piliin mo palagi ang makakapagpasaya sa 'yo." Matamis na ngumiti si Dad sa akin.
Ngumiti rin ako pabalik at tumango bilang sagot.